E Evangelio den Galationan

E mundu Protestant ta preparando pa selebrá e di 500 aña aniversario di Reforma Protestant, ora ku Martin Lutero‒guiá pa Spiritu Santu‒a trese na miónes bèrdatnan bíbliko krusial ku tabata skondí pa hopi tempu bou di siglonan di superstishon i tradishon. Un hende por argumentá ku for di e páginanan di Galationan (huntu ku Romanonan) Protestantismo mes a nase mitar milenio pasá! Tabata miéntras e tabata lesando Galationan ku Martin Lutero a ser toká pa promé biaha ku e glorioso bon notisia di hustisia pa medio di fe e gran bèrdat ku a generá e Reforma Protestant, kua a liberá miónes for di siglonan di eror teológiko i eklesiástiko. Loke e a lesa den e buki aki a kambia Lutero, i nunka mas mundu tabata meskos.

Atventistanan di e di Shete Dia, hopi siglo despues di Lutero, tambe ta den debe ku Galationan. Atraves di studio di Galationan, E.J. Waggoner i A.T. Jones a yuda Iglesia Atventista den dékada di 1880 pa 1889 i 1990 pa 1999 pa bolbe deskubrí e bèrdat di hustisia pa medio di fe.

Kiko tin ku Galationan ku a hasié asina un wesu di lomba di e Reforma Protestant? Dikon e tabata kapas di toka kurasonnan di asina hopi, manera Martin Lutero? Na un manera diferente for di kualke otro buki den Beibel, Galationan ta trata un kantidat di tema ku ta krusial na e alma Kristian. Ta den Galationan ku Pablo ta toka temanan manera libertat, papel di e lei den salbashon, nos kondishon den Kristu, i naturalesa di e bida guiá pa e Spiritu, komo tambe e pregunta di siglonan bieu: Kon sernan humano pekaminoso por ser hasí bon dilanti di un Dios santu i hustu? Tabata e pregunta aki, kisas mas ku kualke otro, ku a motivá Martin Lutero riba e kaminda ku e a kuminsá i for di kua nunka e a bira bèk.

Naturalmente, otro bukinan, manera Romanonan, ta trata riba algun di e mesun kuestionnan aki, pero Galationan ta diferente. No solamente e ta mas korto, ma su temanan riku ta skirbí den un tono pastoral poderoso i pashoná ku no por yuda sino toka kurasonnan ku ta habrí na e Spiritu di Dios, te awe ainda.

Ounke e karta di Pablo ta papia na nos personalmente, nos komprondementu por ser fortifiká si nos ta konsiente di e situashon históriko original ku Pablo, bou di guiansa di Spiritu Santu, tabata tratando riba dje.

Hopi erudito ta kere ku Galationan por ta esun promé di e kartanan di Pablo, kisas skirbí den aña 49 D.K., despues di e famoso konseho di Yerusalèm (Echonan 15). E buki por ta e dokumentu Kristian di mas bieu konosí. Manera Echonan i Galationan ta splika, e iglesia trempan a haña su mes den un bataya feros riba e naturalesa di salbashon, spesialmente den kaso di e Paganonan. Di akuerdo ku un grupo di kreyentenan Hudiu, konosí komo Hudaisantenan, kreensia den Hesus so no tabata sufisiente bon pa Paganonan. Paganonan mester ser sirkumsidá tambe i sigui e lei di Moises (Echonan 15:1). No ta sorpresa, anto, ku ora Pablo a funda un iglesia di Paganonan na Galatia, algun di e Hudaisantenan aki a biaha bai aya pa “stret kos”.

Ora palabra di e problema aki a yega serka Pablo, e a reakshoná fervientemente. Rekonosiendo ku e evangelio falsu aki di salbashon pa medio di fe i obranan tabata menasá di debilitá e obra di Kristu, Pablo a skirbi e Galationan un defensa ardiente di e evangelio. Den e palabranan di mas fuerte, e a identifiká e siñansa falsu aki pa loke e tabata realmente—legalismo, puru i simpel.

E guia di estudio di Beibel di e kuartal aki ta invitá nos pa biahá huntu ku apòstel Pablo segun ku e ta roga e Galationan pa permanesé fiel na Hesus. Na mes momentu, e ta duna nos tambe un chèns pa reflekshoná riba nos propio komprondementu di e bèrdatnan ku a habri kaminda pa e kiebro inevitabel di Martin Lutero ku Roma i e restorashon di e evangelio bíbliko.