Aki Nos ta Pará: Lutero riba Romanonan

Sinkushen aña pasá e luna aki, Martin Lutero, un profesor di teologia di 33 aña di edat, a pone su 95 Tesisnan. I ounke e tabata purbando, promé, solamente pa refutá un charlatan papal ku tabata saka lechi for di e tou di Lutero dor di bende indulgensia, e akto di desafio di Lutero a bira e chispa ku a sende e Reforma Protestant – i mundu no tabata meskos for di e dia ei.

Naturalmente, hopi kos a kambia for di e dia ei na 1517. Pero loke no a kambia ta e Palabra di Dios i e bèrdatnan den e Palabra ku a duna Lutero e fundeshi teológiko pa desafiá Roma i pa hiba na miónes e gran mensahe di salbashon pa medio di fe so.

Sentral na e fundeshi ei ta nos estudio pa e kuartal aki: e buki di Romanonan. Lutero a skirbi den su Commentary on Romans: “E Epistel ta enbèrdat e parti prinsipal di Tèstamènt Nobo i e Evangelio di mas puru, i e ta di balor no solamente ku tur Kristian mester sa e palabra pa palabra, di memoria sino okupá su mes kuné tur dia, komo e pan diario di su alma.”-Martin Luther, Commentary on Romans, tradusí pa J. Theodore Mueller (Grand Rapids, Mich.: Kregel Publications, 1976), p. 8.

Sí, tabata den Romanonan ku Lutero a haña e gran bèrdat di “hustifikashon pa medio di fe” so. Tabata aki ku e hòmber aki, luchando ku siguransa di salbashon, a revelá e gran bèrdat, no solamente di Romanonan, no solamente di Tèstamènt Nobo, sino di henter Beibel: e bèrdat tokante e plan di salbashon, kua a ser duná na nos den Kristu Hesus promé ku tempu a kuminsá” (2 Tim. 1:9, NKJV). I esaki ta e bèrdat ku salbashon ta ser hañá solamente den e hustisia di Kristu. E ta un hustisia akreditá na nos pa medio di fe, un hustisia ku ta ser duná na nos fuera di warda e lei. Òf , manera Pablo ta ekspresá asina kla den Romanonan: “P’esei nos ta konkluí ku un hende ta ser hustifiká pa medio di fe fuera di e obranan di lei” (Rom. 3:28, NKJV).

Tabata den bista di e bèrdat aki, tambe, ku Lutero, desafiando e podernan di e prinsipadonan di e mundu i di e herarkia Romano, a parse dilanti di e Edikto di Worms, na 1521, i a deklará: “Mi no por i lo mi no hala atras, pasobra no ta seif pa un Kristian papia kontra su konsenshi. . . . Aki mi ta pará, mi no por hasi otro.”-J. H. Merle D’Aubigné D.D., History of the Reformation, tradusí pa H. White (New York: American Tract Society, 1848), p. 249.

I awe Protestantnan fiel tambe no por hasi nada tampoko sino para riba e Palabra di Dios apesar di tur tradishon i dògma ku no ta bíbliko.

No tin duda ku Kristianismo a avansá grandemente desde Lutero, librando su mes pa siglonan di superstishon i doktrina falsu ku no solamente a trose e evangelio, de echo, tambe a usurp’é.

Sinembargo, despues di añanan largu e Reforma a para. Den algun lugánan e progreso a ser remplasá pa un formalismo friu, den otro lugánan hende realmente a bira bèk pa Roma. I awor, den un siglo di ekumenismo i pluralismo, hopi di e bèrdatnan distintivo ku a kuminsá e reforma a bira ménos kla, kubrí dor di un tiramentu di triki semántiko ku ta purba skonde diferensianan fundamental ku no a ser resolvé awor ni tampoko den e dianan di Lutero. E profesianan di Daniel 7:23-25, 8:9-12, i Revelashon 13, 14, i tambe e gran nobo di salbashon pa fe manera ta ser hañá den e buki di Romanonan ta mustra dikon esnan fiel na Beibel mester tene firmemente na e bèrdat ku nos antepasadonan Protestant a defendé, asta a kosto di nan bida.

Nos ta Atventistanan di e di Shete Dia, i nos ta apoyá riba e prinsipio di sola scriptura, solamente Skritura; p’esei , nos ta rechasá kategórikamente tur intento pa trese Kristiannan bék na Roma i e fe promé ku e Reforma. Al kontrali, Skritura ta mustra nos na e direkshon opuesto. (Rev. 18:4), i den e direkshon ei nos ta sigui miéntras nos ta proklamá “e evangelio eterno” (Rev. 14:6) na e mundu, e mesun evangelio eterno ku a inspirá Lutero 500 aña pasá.