Mayordomia: Motibunan di e Kurason

Komo Kristiannan, nos mester rekonosé nos kondishon pekaminoso promé ku nos mira un nesesidat pa kambio. E kambio ei por bin solamente i totalmente dor di Kristu ku ta obra den nos. I un ekspreshon di Su obra den nos ta den e área di mayordomia. Ounke mayordomia ta enserá hopi diferente aspekto di e bida Kristian, nos lo definié aworakí, generalmente, komo manehá poseshonnan tangibel i intangibel pa e gloria di Dios.

Manera ta ser siñá den Beibel, mayordomia ta bira, entre otro kosnan, un hèrmènt poderoso kontra e peligernan di materialismo (e amor pa poseé kos), òf mundanalidat en general, un di e gran trampanan spiritual ku e enemigu di almanan ta pone nos dilanti. Hopi hende ta faya di realisá ku rikesa i poseshonnan ta spesereinan barata, artifisial ku finalmente ta pèrdè nan sabor. Desafortunadamente, hopi alma lo bai pèrdí pa motibu di nan fayo pa libra for di nan amor pa e mundu. E kamindanan di e mundu, “e deseo di karni, i e deseo di wowo, i e orguyo di bida” (1 Juan 2:16), tur por ser moderá, asta evitá, atraves di e prinsipionan di mayordomia bibá den nos bida.

Ta p’esei e trimèster aki nos lo wak mayordomia i kiko e por siña nos tokante kon pa biba manera Dios lo tabata ke pa nos biba, kua ta inkluí libertat for di e amor di e mundu, den tur su manifestashonnan. Mayordomia ta e ekspreshon práktiko diario di loke ta nifiká pa sigui Hesus; e ta un ekspreshon di nos amor pa Dios, un medio di biba e bèrdat ku nos a ser duná den Kristu. Nos ta mayordomo pasobra Dios a stima nos promé.

Nos bibamentu di e bida di mayordomo, anto, ta envolví nos aktitut, kombershon, kompromiso, disiplina-propio, i hopi mas. Nos mester ta sirbidónan konfiabel i fiel di Dios, ku ta biba un bida apnegá dor di konektá ku Hesus den tur kos ku nos ta hasi i bisa. Nos ta deskubrí den e skol di Kristu ku e resultado di mayordomia ta e satisfakshon di biba hustu. Nos mester siña manehá e poseshonnan di Dios pa Su gloria, duna fondonan pa Su mishon pa terminá Su obra.

Dios Su mayordomonan awor “ta mira den un spil, skur asina” (1 Kor. 13:12), pero Hesus ta mira klaramente. E ta konfia nos pa hasi Su obra. Asta dor di e nubia di atrakshon di e mundu, ainda nos ta responsabel pa e bon maneho di nos talentonan, finansa, salú, i medioambiente. E lèsnan aki ta ekipá pa siña nos kiko nos responsabilidatnan komo mayordomonan ta i kon nos por, pa medio di e grasia di Dios, kumpli ku e responsabilidatnan ei, no komo medio pa purba gana salbashon ma komo e fruta di a alkans’é kaba.

Nos bida komo mayordomonan Kristian ta reflehá e karakter di Dios na e mundu. Tin bunitesa, alegria, i santidat den bida di esnan ku ta riska tuma un posishon pa prinsipionan bíbliko, spesialmente kontra e moda i koriente di nos kultura. Tur hende ta tentá pa biba un bida profano; e tentashonnan ta tur rònt di nos, den formanan habrí i sutil. Komo Kristiannan, spesialmente komo mayordomonan Kristian, nos no a solamente ser mustrá kon pa skapa di e tentashonnan aki ma primintí e poder pa hasi esaki.

Na final, nos ta bai tende un di dos sintimentu bisá na nos: “Nunka Mi a konosé boso; bai for di Mi, boso ku ta hasi inikidat!” (Mat. 7:23), òf “bon hasí, mi bon i fiel sirbidó! Bo tabata fiel den poko kos, lo mi enkargábo ku hopi kos; drenta, tuma parti den e goso di bo shon!” (Mat. 25:23). Ta nos speransa i orashon ku loke ta ser siñá tokante mayordomia den e lès di e trimèster aki lo yuda nos keda riba e kaminda ku enbèrdat lo hasi e palabranan “Bin i tuma parti den e goso di bo shon” e palabranan ku nos ta tende.