Preparashon pa e Tempu di Fin

Den e oranan final di Hesus Su estadia temporal den karni humano, E a papia e palabranan aki di konsuelo na e disipelnan:

"No laga boso kurason bira intrankil; boso ta kere den Dios, kere tambe den Mi. Den kas di Mi Tata tin hopi lugá di biba; si no tabata asina, lo Mi a bisa boso. Mi ta bai pa prepará un lugá pa boso. I ora Mi bai i prepará un lugá pa boso, lo Mi bin atrobe i risibí boso serka Mi, pa kaminda Ami ta, boso tambe por ta. I boso sa unda Mi ta bai, i e kaminda boso sa." (Juan 14:1-4, NKJV).

Ounke siguramente nan no a komprondé kompletamente e nifikashon di loke E a bisa ni e tempu den kua Su promesa lo a ser kumplí, e hòmbernan sigur sigur a saka konsuelo for di e palabranan di Hesus. Un lugá den kas di Su Tata? Un lugá ku Hesus Mes tabata preparando pa nan? Siguramente esaki lo tabata mihó ku unda ku nan lo por a haña nan mes den e mundu aki aworakí.

Enbèrdat no muchu tempu promé, ora E tabata sinta huntu ku e disipelnan, Hesus a duna nan un deskripshon kòrtiku di loke lo a bai sosodé promé ku E a bin bèk. Tabata un tipo di “historia di futuro”, i e no tabata bunita. Guera, rumornan di guera, nashon kontra nashon, hamber, i teremotonan tur tabata, Hesus a bisa, djis “e prinsipio di dolónan”. Persekushon, traishon, engaño, i pruebanan tambe tabata na horizonte.

Awe, for di nos punto di bista den e koriente di historia, nos por mira ku kasi tur loke Hesus a spièrta p’e a bin pasa, i presis manera E a predesí tambe. Nos por mira e kumplimentu di dos profesia di tempu mas grandi tambe. Esun promé ta e “tempu, tempunan i mitar di un tempu” di Daniel 7:25 (lesa tambe Rev. 12:6, 14; 13:5; Num. 14:34), kua a kuminsá den di seis siglo A.D. (A.D. 538) i a terminá na final di siglo diesocho (A.D. 1798). Despues, tambe, e profesia di tempu di mas largu, e 2300 dianan di Daniel 8:14, a alkansá su kumplimentu den aña 1844.

Sin duda, anto, nos ta bibando aworakí den “e fin di dianan” (Dan. 12:13). Pero no solamente nos sa ki dia e fin, ku ta kulminá ku e segundo binida di Hesus, lo yega, nos no tin mester di sa. Nos mester sa solamente ku e lo yega, i ku ora e yega, nos mester ta prepará.

Kon? Kisas e mihó kontesta ta ser hañá den e tèkst aki: “Meskos ku boso a risibí Kristu Hesus e Señor, asina kana den djE” (Kol. 2:6, NKJV). Den otro palabra, ku asina tantu eventonan den mundu, asina tantu titular, i asina tantu teoria tokante tempunan di fin, ta fásil pa ser distraí, i enfoká muchu hopi riba e kosnan ku nos ta pensa ku ta hiba na e binida di Kristu enbes di riba Kristu Mes, kende so ta e klave na nos preparashon.

E trimèster aki e enfoke ta riba e tempu di fin, pero no totalmente. E enfoke real ta riba Hesus, ma den konteksto di e último dianan i kon pa ta prepará pa nan. Sí, nos mester wak fechanan históriko, eventonan den mundu, historia mes, pasobra Beibel ta papia di nan en relashon ku e fin. Pero asta den e konteksto aki, Beibel ta papia tokante Hesus, tokante ken E ta, kiko E a hasi pa nos, kiko E ta hasi den nos, i kiko E lo hasi ora E bin bèk. Kristu, i E krusifiká, mester ta e sentro di nos fe; òf, manera Pablo a bisa: “Pasobra mi a determiná di no sa nada meimei di boso sino Hesukristu, i E, krusifiká (1 Kor. 2:2, NKJV). Mas nos focus riba djE, mas nos ta bira manera E, mas nos ta obedes’E, i mas prepará nos lo ta pa tur loke ta spera nos, tantu den futuro inmediato komo na final, e dia ora ku nos lo drenta “e lugá” ku Hesus a prepará pa esnan ku stim’E.