E Viktoria di e Evangelio

Hopi historiadó ta kere ku e tres dékadanan di mas krusial den historia di mundu a tuma lugá ora un grupo chikitu di hòmber, prinsipalmente Hudiu bou di poder di Spiritu Santu, a hiba e evangelio na e mundu. E buki di Echonan ta un relato di e tres dékadanan krusial ei, kua tabata ekspandé for di e resurekshon di Hesus, den A.D. 31, te na final di e promé enkarselamentu Romano di Pablo, na A.D. 62 (Echonan 28:30). E buki mester a ser skirbí djis despues di esei, pasobra e ta stòp e narativo na e punto ei, ounke ta eksistí evidensia ku Pablo a ser lagá den libertat for di e enkarselamentu ei i ku e a sigui ku su esfuersonan mishonero, predikando i biahando te ora ku e a ser arestá un par di aña despues i despues ehekutá na Roma, den A.D. 67.

E buki ta silensioso tokante su outor, pero tradishon di iglesia semper a identifik’é komo Lukas, “e dòkter stimá” di Kolosensenan 4:14 i kompañero di biahe di Pablo (2 Tim. 4:11, Filemon 24). Tradishonalmente ta kere ku Lukas tambe ta e outor di nos di tres Evangelio, sin duda “e di tres buki” menshoná den Echonan 1:1 (kompará ku Lukas 1:3). Lukas i Echonan ta tomonan ohochi riba e prinsipio di Kristianismo, respektivamente su orígen (bida i ministerio di Hesus) i ekspanshon (e esfuersonan mishonero di e apòstel).

Huntu nan ta konstituí masoménos 27 porshento di Tèstamènt Nobo, e kontribushon di mas grandi di un solo outor. Skirbiendo na e Kolosensenan, Pablo ta referí na Lukas komo un kolaboradó Gentil, un hende ku no tabata “di e sirkumsishon” (Kol. 4:7-14). Lukas, anto, ta e úniko outor no-Hudiu di un buki di Tèstamènt Nobo.

Esaki parse di ta splika un di su temanan prinsipal: e universalidat di salbashon. Dios no tin faborito. E iglesia ta ser yamá pa testifiká na tur hende, no importá nan rasa, klase sosial, òf género (Echonan 1:8; 2:21, 39, 40; 3:25; 10:28, 34, 35). Un fayo pa hasi esei, sea pa prehuisio òf kumbiniensia, ta un deformashon di e evangelio i kontrali na e bèrdatnan di mas básiko di e Palabra di Dios. Nos tur ta, dilanti di Dios, meskos: pekadornan den nesesidat di e redenshon ku ta ser hañá den Kristu Hesus.

No ta pa kasualidat, anto, ku e héroe prinsipal di Lukas ta Pablo, “e apòstel na e Paganonan” (Rom. 11:13, NIV), na ken kasi dos terser parti di e buki di Echonan ta dediká.

Otro temanan importante ku ta ser hañá den Echonan ta inkluí: e outoridat di Dios i Su propósitonan divino (Echonan 17:24, 25; 20:27; 23:11); e elevashon di Hesus komo Señor i Salbador (Echonan 2:32, 36; 3:13, 15; 4:10–12; 5:30, 31); i spesialmente e ròl di e Spiritu den empoderá i guia e iglesia pa su mishon (Echonan 2:1–4; 4:24–31; 8:14–17, 29, 39; 10:19, 20). De echo, e logronan di e iglesia trempan no tabata resultado di sabiduria òf abilidat humano, ounke a agradá Dios pa uza un hende manera Pablo pa impaktá e mundu den un forma ku ningun otro apòstel a hasi òf kisas tabata kapas pa hasi (1 Kor. 15:10).

Echonan ta trata ku e periodo formativo di e iglesia trempan, den kua tabatin kresementu konsiderabel atministrativo i asta teológiko. Nos por mira esaki, por ehèmpel, den e forma ku e iglesia tabata atendé ku preguntanan ku tabata konserní e tempu di e segundo binida di Hesus, e status di e Paganonan, i e ròl di fe pa salbashon. Loke e iglesia trempan tabata kapas pa kumpli kuné den un periodo di tempu asina kòrtiku, sinembargo, ta un testimonio perpetuo di loke Dios por hasi atraves di esnan ku humiá nan kurason den orashon, biba mas aya di diferensianan individual, i laga nan mes ser uzá dor di e Spiritu pa honor i gloria di Dios.

Echonan ta e storia di esnan yamá di Dios pa kuminsá e obra; kiko nos ku ta yamá di Dios pa termin’é por siña for di nan storia?