Unidat den Kristu

E iglesia ta e famia di Dios riba tera; sirbi, studia, i adorá huntu. Mirando na Hesus komo su lider i Redentor, e iglesia ta ser yamá pa hiba e bon notisia di salbashon na tur nashon.

Number 14 di e Kreensianan Fundamental di Iglesia Atventista di e di Shete Dia ta deklará, parsialmente: “E iglesia ta e komunidat di kreyentenan ku ta konfesá Hesukristu komo Señor i Salbador. Den kontinuidat ku e pueblo di Dios den tempunan di Tèstamènt Bieu, nos ta ser yamá pa sali for di e mundu; i nos ta uni pa adorashon, pa kompañerismo, pa instrukshon den e Palabra, pa selebrashon di e Sena di Señor, pa servisio na henter humanidat, i pa e proklamashon global di e Evangelio.” - Seventh-day Adventists Believe (Boise, Idaho: Pacific Press© Publishing Association, 2005) p. 163.

Pero kiko nos ke men ku iglesia? Ken ta pertenesé na e iglesia? E kontesta riba e preguntanan aki ta dependé parsialmente riba nos definishon di e iglesia.

Un iglesia ta siguramente e komunidat lokal di kreyentenan den Hesus ku ta obedesé e Señor i ku ta kongregá nan mes pa adorashon i sirbishi. Nan por reuní den iglesianan di kas òf den kongregashonnan mas grandi (Rom. 16:10, 11). Ku iglesia nos ke men tambe e edifisio den kua Kristiannan ta kongregá. Pero esaki ta apénas e mihó definishon di iglesia. E iglesia ta tokante hende, no tokante edifisio.

Den Tèstamènt Nobo, tin biaha iglesia ta ser referí na dje komo e grupo di kreyentenan den un área geográfiko partikular. Asina, ora Pablo tabata dirigí su mes na e iglesia na Galatia, e tabata referí na hopi kongregashon lokal den statnan i pueblonan den e region ei (Gal. 1:2; lesa tambe 1 Pe. 1:1). Ku iglesia tin biaha nos ke men tambe un grupo di hende ku ta pertenesé na un denominashon partikular òf ku ta yama nan mes na un nòmber partikular duná pa nan kreensianan i herensia.

Sinembargo, tur e definishonnan aki ta inkompletu. E iglesia ta e pueblo di Dios tur kaminda riba tera. I ounke Kristu tin siguidónan fiel den vários denominashon (di kua hopi lo uni ku e remanente di Dios den e krísis final [Rev. 18:1-4]), e trimèster aki nos ta bai focus riba nos iglesia, Iglesia Atventista di e di Shete Dia, i kiko unidat den Kristu ta nifiká pa nos.

Kreensia Fundamental 14, yamá Unidat den e Kurpa di Kristu, ta deklará: “E iglesia ta un kurpa ku hopi miembro, yamá for di tur nashon, tribu, lenga, i pueblo. Den Kristu nos ta un kreashon nobo; distinshonnan di rasa, kultura, siñansa, i nashonalidat, i diferensianan entre haltu i abo, riku i pober, hòmber i muhé, no mester ta divisivo entre nos. Nos tur ta igual den Kristu, kende pa medio di un Spiritu a mara nos den un kompañerismo kunE i un ku otro; nos mester sirbi i ser sirbí sin parsialidat òf reserva. Dor di e revelashon di Hesukristu den e Skrituranan nos ta kompartí e mesun fe i speransa i ta rèk man den un testimonio na tur hende. E unidat aki tin su fuente den e unidat di e Dios triuno, ken a adoptá nos komo Su yunan.” - Seventh-day Adventist Believe, p. 201.

E propósito di e seri aki di lès di studio di Beibel ta pa proveé instrukshon bíbliko riba e tópiko di unidat Kristian pa nos komo Atventistanan di e di Shete Dia, ken, awor, manera semper, ta afrontá desafionan na e unidat ei, i lo hasi esei te na fin di tempu.

Sinembargo, den e Skrituranan nos ta haña numeroso persepshon i instrukshon riba kon pa biba e don di Dios di unidat den Kristu. E persepshonnan ei, e instrukshonnan ei tokante biba i ekspresá den nos iglesia e unidat ku a ser duná na nos, ta e focus di e trimèster aki.