E Buki di Revelashon

Kasi 2 milenio pasá, apòstel Juan tabata eksiliá riba un isla chikitu yen di baranka den Laman di Aegeo pa motibu di su testifikashon fiel di e evangelio. E apòstel di edat a soportá tur e difikultatnan di enkarselamentu Romano. Un Sabat partikular, e tabatin un bishita spesial di Hesukristu, Kende a bin pa enkurashá Su sirbidó den su sufrimentu. Den un seri di vishon, Hesus a mustr’é e historia panorámiko di e iglesia i loke e pueblo di Dios lo a eksperensiá miéntras nan tabata spera riba e regreso di nan Señor.

Loke Juan a mira den vishon e a registrá fielmente den un ròl ku e a titulá “E Revelashon di Hesukristu” (Rev. 1:1). E buki ku e a skirbi ta revelá e obra di Hesus den shelu i riba tera for di Su asenshon i loke E lo hasi ora E bin bèk. Tabata e intenshon pa sigurá Kristiannan atraves di siglonan di e presensia di Kristu i pa sostené nan miéntras nan ta eksperensiá e pruebanan di bida diario meimei di un mundu kaí, sumergí den e gran konflikto.

E trimèster aki nos lo dùik den e buki aki. Den rasgonan amplio nos lo enfoká riba e partinan i temanan prinsipal di e buki. E idea ta pa bira konosí ku e temanan klave di e buki i pa mira ku, enbèrdat, e ta revelá Hesukristu, Su bida, Su morto, Su resurekshon, i Su ministerio sumosaserdotal na fabor di Su pueblo.

Segun ku nos ta hasi esei, nos lo prosedé den e siguiente formanan:

  1. Nos estudio di Revelashon ta basá riba e konsepto bíbliko di e inspirashon di e Beibel. Miéntras e mensahenan di e buki a bin for di Dios, e lenguahe den kua nan a ser komuniká ta humano. Miéntras nos ta nota lenguahe i imágennan derivá for di e historia di e pueblo di Dios den Tèstamènt Bieu, nos lo deskubrí kon Juan a komuniká e mensahenan ei.
  2. Un lesamentu kuidadoso di e profesianan di Revelashon (meskos ku esnan di Daniel) ta mustrá ku e método hipotétiko di interpretashon profétiko ta e forma korekto pa komprondé e kumplimentu intenshoná di e profesianan pasobra nan ta sigui e fluho di historia, for di tempu di e profeta te na fin di mundu. E método aki ta ilustrá kon nos mester hasi tur esfuerso pa derivá nifikashon for di e tèkst mes, mas bien ku imponé un interpretashon fihá riba dje.
  3. E struktura organisativo di Revelashon ta krusial den hopi manera pa aplikashon responsabel di e profesianan di e buki. Nos análisis di Revelashon lo ta basá riba e struktura kuadrupel di e buki:
    1. Revelashon 1:1-3:22 ta uza e situashon di e iglesianan di e tempu di Juan pa trata di forma profétiko e situashon di e iglesia den diferente periodo di historia.
    2. Revelashon 4:1-11:19 ta ripití (òf rekapitulá) i ta konstruí riba e historia aki di e iglesia, uzando símbolonan apokalíptiko ku, den forma progresivo, ta añadí mas detaye.
    3. Revelashon 12:1-14:20 ta e sentro temátiko di e buki i ta abarká e historia di e gran konflikto for di promé ku e tempu di Hesus te na e Segundo Binida.
    4. Revelashon 15:1-22:21 ta enfoká eksklusivamente riba e tempu di fin.
  4. Un interpretashon signifikativo di e profesianan di Revelashon mester ta Kristoséntriko. Henter e buki a ser skirbí for di e perspektiva di Kristu. Ta solamente atraves di Kristu ku e símbolonan i imágennan di Revelashon ta risibí nan nifikashon supremo.

Revelashon ta primintí bendishonnan pa esnan ku ta lesa òf skucha su palabranan i ku ta pone atenshon i warda e spièrtamentunan ku ta ser hañá den dje. “E buki di Revelashon ta habri ku un órden na nos pa komprondé e instrukshon ku e ta kontené. ‘Bendishoná ta esun ku ta lesa, i esnan ku ta tende e palabranan di e profesia aki,’ Dios ta deklará, ‘i ta warda e kosnan ei ku ta skirbí den dje: pasobra tempu ta serka.’ Ora nos, komo pueblo, komprondé loke e buki aki ta nifiká pa nos, lo ser mirá meimei di nos un gran reavivamentu. Nos no ta komprondé plenamente e lèsnan ku e ta siña, apesar di e mandato duná na nos pa skrudiñ’é i studi’é.” - Ellen G. White, Testimonies to Minsters and Gospel Workers, p. 113.

Segun ku nos ta analisá e buki aki, nos ta invitábo pa deskubrí pa bo mes e kosnan ku bo mester tende, i pone atenshon na dje, miéntras nos ta spera riba e binida di nos Señor Hesukristu.