Menu

Etapanan di Famia

E di seis dia di Kreashon a yega na su fin. Durante e promé sinku dianan, e mundu a ser transformá for di káos na un kos di bunitesa perfekto.

Skuridat a ser remplasá dor di lus. E awanan a ser pushá bèk ora Dios a manda nan. “Te asina leu bo por yega, pero no mas leu, i aki bo olanan orguyoso mester para!” (Job 38:11, NKJV). E tera seku a sprùit den un tela di koló i fragansianan. Paranan di tur tipo i variedat tabata bula rònt miéntras piskánan i bestianan di laman tabata landa i spat den nan hogar marítimo. Animalnan di tera di tur tipo i espesie tabata kore, bula, òf kologá na ramanan di palu, dependé di kon e Kreador a krea nan. Despues, finalmente, hende a ser trahá den e imágen propio di Dios, sernan úniko den henter e Kreashon terenal.

Ora Dios a prepará pa e promé Sabat di e di shete dia riba tera, E a wak riba Kreashon i a deklará tur kos “masha bon” (Gen. 1:31).

Si solamente esei tabata e fin di e storia, un mundu perfekto, ku hendenan perfekto, ku ta eksistí pa semper. Djis pensa: Adam i Eva tin hopi yu, i despues ñetu i bisañetu, ku nan ta mira krese pa un kantidat infinito di generashon, kada un ta trese asta mas goso na e promé pareha i na Dios tambe. Ta un senario ku nos, ku ta eksistí den i ku konosé solamente un mundu kaí, apénas por imaginá nos mes.

I esei ta pasobra nos imaginashonnan a ser formá den un mundu radikalmente diferente for di esun ku Dios a krea promé. Kon diferente e dos mundunan ta, e mundu promé ku piká i e mundu despues? Ata un ehèmpel. Ora Adam i Eva, Ellen White a skirbi, “a opservá den flor ku ta kologá i blachi ku ta kai e promé señalnan di deterioro, Adam i su kompañera a rou mas profundamente ku hende awendia ta rou riba nan mortonan.

E morto di e flornan delikado i frágil tabata enbèrdat un kousa di fèrdrit; pero ora e palunan grandi a tira nan blachinan abou, e esena a trese bibu na mente e echo serio ku morto ta e porshon di tur kos bibu.”—Patriarchs and Prophets, p. 62. Nos no tin e reakshon ei riba un blachi ku ta kai pasobra, ya ku nos a biba solamente den un mundu kaí, nos a bin ta tuma morto i sufrimentu komo partinan inevitabel di e siklonan di bida.

I ta di esei e lès di e kuartal aki ta trata: e siklonan di bida, a lo ménos pa nos aworakí, den e mundu kaí aki.

I nos ta bai wak e siklonan aki den esun lugá kaminda mayoria di nos ta sirkulá dor di nan, i esei ta denter di e struktura di famia.

Hende a ser kreá, den Eden, den konteksto di famia; promé un esposo i esposa, i despues yunan ku a haña mas yu, i asina nos tin e historia di nos mundu te ku dia di awe. Enbèrdat, hopi di e storianan di Beibel di mas promé, for di Adam i Eva, e patriarkanan, e dinastia Davídiko, tur a desaroyá denter di e konteksto di relashonnan familiar. Atraves di henter Beibel, den un forma òf otro, famianan ta yuda forma e struktura di eventonan ku ta desplegá.

Kua no ta sorprendente pasobra, atrobe, segun ku nos ta move dor di e etapanan di bida, nos tambe ta hasi esei te na un grado òf otro kontra e trasfondo di famia.

Apesar di tur e forsanan ku ta traha kontra e famia, tantu awendia i den pasado (por ehèmpel, e práktika di poligamia den tempunan bíbliko apénas a añadí na stabilidat di famia), i apesar di intentonan pa rekonsiderá eksaktamente kiko un famia ta, e konsepto di un famia ta permanesé. I e mester hasi esei. Ta kaminda nos ta kuminsá, i e ta hopi biaha e forsa di mas grandi pa bon òf malu ora nos ta forma nos bida i kon nos ta reakshoná riba desafionan ku nos ta afrontá miéntras nos ta move dor di e fasenan di bida.

I meskos ku kada individuo ta diferente, kada famia ta tambe. Pa e motibu ei, e lèsnan di e kuartal aki ta mustra na prinsipionan, basá riba Skritura, ku (ta nos speransa i orashon) por yuda hasi famianan mas fuerte den tur fase di bida.

Claudio i Pamela Consuegra ta sirbi komo e direktornan di Ministerio di Famia pa e Divishon Norteamerikano. Nan a sirbi e iglesia den vários kapasidat pa mas ku trinta aña.