Menu

“Esnan di Mas Ménos di Esakinan …”

Atventistanan di e di Shete Dia ta ser yamá pa proklamá “e evangelio eterno” (Rev. 14:6) na henter mundu. Dor di hasi esei, nos ta simplemente obedesé e palabranan di Hesus tokante hasi disipel, batisá nan, i “siña nan pa warda tur e kosnan ku Mi a manda boso” (Mat. 28:20, NKJV). I entre e kosnan ku El a manda, nos ta ser yamá pa ministrá na esnan heridá, esnan oprimí, esnan pober, esnan ku tin hamber, i esnan den prizòn.

Despues di tur kos, tabata Hesus kende, despues di a konta e parabel di e bon Samaritano (Lukas 10:30–36), despues a manda Su oyentenan: “Bai i hasi mesun kos” (Lukas 10:37, NKJV). Tabata Hesus kende, ora El a deskribí e momentu ora E lo a dividí e nashonnan Su dilanti manera un “wardadó ta dividí su karnénan for di e kabritunan” (Mat. 25:32, NKJV), a papia tokante kon importante yuda esnan ku tin hamber, esnan malu, esnan sunú, i esnan den prizòn realmente ta. “Siguramente, Mi ta bisa boso, te asina leu ku boso a hasié pa un di esnan di mas chikitu di esakinan Mi rumannan, boso a hasié pa Mi” (Mat. 25:40, NKJV).

Den otro palabra, huntu ku proklamá e gran bèrdatnan tokante salbashon, e santuario, estado di e mortonan, i e eternidat di e lei, nos mester ministrá na e nesesidatnan di otronan. I ki mihó manera pa alkansá hende ku dor di traha na nan fabor tambe? Manera Ellen G. White korektamente a skirbi: “E método di Kristu so lo duna berdadero éksito den alkansá hende. E Salbador a meskla ku hende manera un ku tabata deseá nan bon. E a demostrá Su simpatia pa nan, a ministrá na nan nesesidatnan, i a gana nan konfiansa. Despues El a bisa nan: ‘Sigui Mi.’ ”—The Ministry of Healing, p. 143.

Di akuerdo ku un konteo, Skritura ta kontené 2.103 versíkulo ku ta ekspresá e preokupashon spesial di Dios pa esnan pober i oprimí. Kompará ku hopi otro aspektonan di fe, doktrina, i bida Kristian en general, e peso di referensianan tokante ministrá na esnan den nesesidat ta abrumador. Nos mester bira serio tokante traha pa aliviá e doló i sufrimentu ku ta eksistí rònt di nos. Esaki no ta kita for di nos trabou di plama e evangelio; al kontrario, e por bira un manera poderoso di hasié.

Naturalmente, ta un bon kos pa yuda otronan, djis pasobra ta bon pa yuda nan. Nos mester “hasi hustisia” (lesa Mik. 6:8) simplemente pasobra ta tantu korekto komo bon pa “hasi hustisia”. I tòg, no ta ainda mihó ora ta hasi hustisia, ora ta yuda otronan den nan nesesidatnan inmediato i temporal, ta mustra nan tambe na e “rason pa e speransa ku tin den bo” (1 Pe. 3:15, NKJV), ku ta e promesa di bida eterno den Kristu?

Hesus a kura malesa, a duna bista na esnan siegu, a kura leprosonan, i asta a lanta esnan morto. Pero tur esnan na ken El a ministrá ta bai muri trempan òf lat, bèrdat? Pues, a lo largu, loke sea bon El a hasi pa nan i nan nesesidatnan inmediato, El a hasi mas tambe. Sí, El a ministrá na esnan heridá, pero despues El a bisa nan, Sigui Mi. I esei ta presisamente dikon nos tambe mester ministrá na esnan heridá i despues bisa nan SiguiE.

No tin duda, dor di buska hustisia i bondat den mundu, nos ta proklamando e reino di Dios (lesa Lukas 4:18, 19) den un forma ku ta por lo ménos mes fiel, bálido, i kisas mes efektivo ku predik’é. Ora nos ta preokupá pa esnan pober i esnan oprimí, nos ta realmente ofresiendo honor i adorashon na Dios (lesa Isa. 58:6–10). Pero si nos faya di ministrá na fabor di esnan heridá, esnan ku ta sufri, i esnan kibrá, nos ta mal represent’E (lesa Prov. 14:31).

E kuartal aki, anto, nos ta bai mira kiko e Palabra di Dios ta bisa (i e ta bisa hopi) tokante nos deber di ministrá na e nesesidatnan di esnan rònt di nos.

“Gratuitamente boso a risibí, duna gratuitamente” (Mat. 10:8, NKJV). Esei ta bisa tur kos. Jonathan Duffy a sirbi komo presidente di ADRA International for di 2012. Promé di a uni ku ADRA Australia na 2008, Duffy a sirbi komo direktor di Adventist Health pa e Divishon Pasífiko Sur di e iglesia, kaminda e tabatin eksperensia ekstensivo den promoshon di salú i desaroyo di salú komunitario.