Menu

E Evangelio di Akuerdo ku Esdras i Nehemias

Esdras i Nehemias tabata lidernan eksepshonal, sentrá riba Dios, orientá riba e Palabra, i guiá pa e Spiritu ku tabata deseá profundamente pa e pueblo di Dios prosperá i ku Su nòmber ser halsá i proklamá rònt mundu. Nan bida tabata un modelo di loke Dios por hasi traves di lidernan sirbidó dediká i fiel.

Pa motibu di nos naturalesa pekaminoso, kustumbernan kultivá, i karakterístikanan hereditario, nos por eksperensiá kambionan duradero solamente dor di estudio di e Palabra transformadó di Dios i asistensia di Spiritu Santu. Kreyentenan ta biba “no pa medio di forsa ni pa medio di poder, ma pa medio di Mi Spiritu” (Zak. 4:6, NKJV) i dor di brasa e promesanan di Dios pa medio di fe (Hab. 2:4), ku ta resultá den un bida spiritual vibrante.

E lès di e kuartal aki ta ilustrá ku bida ta kompliká. Tan pronto ku nos trata na hasi bon kosnan, ta aparesé opstákulonan i oposishon ta surgi. Asta amigunan por bai kontra nos, abiertamente òf den sekreto, i, kisas, bira nos enemigu. Opstákulonan i resistensia na bon ta demostrá ku Satanas ta bibu i ku piká ta real. Bringa Satanas ta humanamente imposibel pasobra maldat ta mas fuerte ku nos ta. Solamente Dios por sigurá viktoria, transformá pensamentu, i duna nos poder pa biba bidanan balansá. E desánimonan di bida ta oportunidatnan pa kambio. Desapuntonan por yuda nos focus riba kosnan esensial i aselerá nos kresementu spiritual, segun ku nos ta optené viktoria den kada krísis pa medio di e empoderashon di Dios.

Ni e buki di Esdras ni esun di Nehemias ta terminá ku optimismo. Piká ta un asuntu serio, ku ta plama fásilmente i rápidamente. E desafio di mas grandi no ta bin for di pafó, ma for di infidelidat na Dios ora Su propio pueblo no ta sigui Su boluntat revelá. Pa ta fiel na Señor i perseverá den sigui Su instrukshon ta e prueba di mas fuerte pa e iglesia di Dios. Manera Esdras a komprondé korektamente, e úniko poder pa kambia ta bin dor di skrudiñá, komprondé, i internalisá e Skrituranan di forma diligente.

Pa kumpli ku e komienso di e profesianan di e 70 siman i e 2.300 anochi- i maintanan (kua ámbos a kuminsá na 457 b.c.), Dios yen di grasia a intervení i influensiá Rei Artaherhes I pa permití Esdras huntu ku un grupo di israelita pa regresá Yerusalèm, pa sigurá e siguridat di nan biahe, i asta pa supli provishonnan físiko i finansiero nesesario pa e sirbishinan di tèmpel (Esdras 7:11–28).

E temanan teológiko klave di e dos bukinan akí ta e providensia, fieldat, i pakto di Dios. Dios a kumpli ku Su promesanan, aunke Su pueblo tabata intolerante, desorientá, distraí, i tèrko. A traves di Su sirbidónan, El a yama nan for di nan estado di apatia na reavivamentu i reforma.

“E obra di restourashon i reforma mantené dor di e eksiliadonan ku a bin bèk, bou di liderazgo di Zorobabel, Esdras i Nehemias, ta presentá un kuadro di un obra di restourashon spiritual ku mester ser hasí den e último dianan di historia di e tera akí. E remanente di Israel tabata un pueblo suak, eksponé na e efektonan destruktivo di nan enemigunan; pero pa medio di nan Dios a proponé pa preservá den e tera un konosementu di E mes i di Su lei. Nan tabata e guardiannan di e berdadero adorashon, e wardadónan di e orákulonan santu.”—Ellen G. White, Prophets and Kings, p. 677.

Esdras i Nehemias ta konektá histórikamente, i nan ta kubri un transishon krusial den bida di e pueblo di Dios. E 23 kapítulonan akí ta forma un historia grandi, ma ku supdivishonnan; nan ta komplementario i ta kubri temanan teológiko similar. Dor di studia e patronchi revelá den komposishon di e dos bukinan akí kuidadosamente, nos por diserní e gran akshonnan históriko i liderazgo yen di grasia di Dios.

Tene den mente ku no tur kos presentá den e bukinan akí ta skirbí den órden kronológiko, i ku algun partinan ta komponé den un forma temátiko.

Manera nos lo mira, e desafio pa Esdras i Nehemias no tabata pa rekonstruí e tèmpel (el a ser terminá i dediká na 515 b.c., mas ku 50 aña promé ku yegada di Esdras) sino pa rekonstruí e stat di Yerusalèm, su atministrashon, i e outonomia nashonal, tur finalmente ta prepará e kaminda pa e binida di e Mesias.

Segun ku nos ta studia e Palabra di Dios e kuartal akí, ku Señor por bendishoná nos dor di inspirá nos, toka nos kurason, transformá nos pensamentu, i kapasitá nos diariamente pa siguiE fielmente i yen di entusiasmo.

Jiří Moskala, ThD, PhD, ta un profesor di ekségesis i teologia di Tèstamènt Bieu i dekano na e Seminario Teológiko Atventista di e di Shete Dia na Universidat di Andrews. El a uni ku e fakultat na 1999. Promé ku el a bin na Andrews, Moskala a sirbi den vários kapasidat (pastor ordená, atministradó, maestro, i direktor) na Repúblika Cheko.