Menu

Daniel, e Profeta di Fin

Segun ku siglo diesnuebe tabata disparsé den esun di binti, un sentido di optimismo a penetrá den Wèst. A traves di siensia i teknologia, humanidat tabata avansando den direkshon di un era di oro, un futuro di posibilidatnan maravioso ora guera, epidemia, pobresa, i hamber finalmente lo a terminá. Esei tabata e speransa, en todo kaso.

Naturalmente, siglo binti a proba ku e speransa aki no tabata solamente robes ma kèns i ignorante. Esaki ta yuda splika dikon, ora nos a drenta siglo bintiun, e no tabata ku un gran sentido di optimismo tokante un mihó futuro.

For di un perspektiva mundial, mundu ainda ta parse di ta den un forma depresivo i, pió ainda, tin tiki prospekto di mehorashon. Hende ta parse mes inkliná pa ku avarisia, opreshon, violensia, invashon, eksplotashon, i destrukshon propio awor ku nos antepasadonan tabata den siglonan pasá. Mientrastantu, hopi di nos gran avansenan teknológiko, aunke tin biaha nan ta sirbi humanidat bon, a yuda nos den nos avarisia, opreshon, violensia, invashon, eksplotashon, i destrukshon propio.

Nada di esaki mester ta sorprendente, naturalmente, no ku tèkstnan manera “E kurason ta engañoso riba tur kos, i desesperadamente malu; ken por konos’é?” (Jer. 17:9, NKJV) òf “Pasobra nashon lo lanta kontra nashon, i reino kontra reino. I lo tin hamber, epidemia, i temblornan den vários lugá” (Mat. 24:7, NKJV).

I tòg, meimei di tur e desesperashon i kalamidat akí, nos tin e buki di Daniel, nos estudio pa e trimèster akí, un buki ku ta spesialmente relevante pa nos ku ta bibando den e ayt qatz, “e tempu di fin” (Dan. 12:9). I esei ta pasobra den e páginanan sagrado di Daniel nos tin evidensia poderoso, rashonal, ku ta afirmá fe no solamente pa nos kreensia den Dios sino den Señor Hesukristu i Su morto riba e krus, sino tambe e promesa di Su regreso i tur loke Su regreso ta enserá.

Pens’é. A lo largu di henter Daniel (kapítulonan 2, 7, 8, 11) nos a ser duná, for di vários ángulo, e siguiente sekuensia di imperionan: Babilonia, Medo-Persia, Gresia, Roma, i e reino eterno di Dios despues di e Segundo Binida. For di nos perspektiva awe, bibando den e tempu ku nos ta biba, nos por mira ku tur e reinonan mundial a bini i a bai manera predesí. Òf, den kaso di Roma, el a bin i ta keda, por lo ménos pa awor, presis manera Daniel a skibi. E ta ser deskribí den e pia- i tenchinan di Daniel 2:33,41 i ta ser manifestá den e nashonnan di Oropa ku ainda ta dividí komo tambe e iglesia Romano mes. Pues, nos tin un afirmashon di profesia bíbliko mes amplio i mes sólido ku e historia di mundu ku un hende ku a biba den e tempu di Babilonia, òf Gresia, òf asta den e promé dianan di Roma, lo no por tabatin.

Bibando kaminda nos ta biba riba e eskala di tempu profétiko, nos por mira tambe ku Daniel tabata korekto tokante tur e reinonan akí; pues, nos tin ainda mas rason pa konfi’é enkuanto di e úniko ku tin ku bin ainda: e reino eterno di Dios, despues di e Segundo Binida.

Sí, e buki di Daniel ta keda un dokumento poderoso, ku ta afirmá fe, spesialmente pa Atventistanan di e di Shete dia, ku ta haña denter di su páginanan tèkstnan ku ta fundamental pa nos iglesia, spesialmente Daniel 8:14, “I el a bisa mi, ‘Pa dos mil tresshen aña; e ora ei e santuario lo ser purifiká’ ” (NKJV). E tèkst aki ta paralelo na Daniel 7:22,26,27, kua ta mustra ku despues di e gran huisio selestial, duná “na fabor di e santunan di e Haltísimo,” e reino di Dios lo ser establesé. Kontrali na e imperionan terenal, ku ta pasa bai, e lo dura pa semper.

I tòg, huntu ku e “kuadro grandi”, nos ta mira kon serka Kristu por ta di nos, individualmente. For di e soño di Nabukodonosor te na e liberashon di Daniel for di e kueba di leon, e buki ta mustra nos e inherensia di Dios, òf Su serkania na nos; manera Daniel a bisa e malbado Rei Belsasar, E ta e Dios “Kende ta tene bo rosea den Su man i ta doño di tur bo kamindanan” (Dan. 5:23, NKJV).

Den poko palabra, e buki di Daniel, nos estudio pa e trimèster aki, ta keda loke e tabata ora el a ser skibí míles di aña pasá: un revelashon poderoso di e amor i karakter di nos Señor Hesukristu.

Ellias Brazil de Souza ta sirbi komo direktor di Biblical Research Institute na Konferensia General di Atventistanan di e di Shete dia. E tin un PhD den ekségesis di Tèstamènt Bieu i teologia di Andrews University..