Menu

Kon Interpretá Skritura

Komo Atventistanan di e di Shete dia, nos ta Protestantnan, kua ta nifiká ku nos ta kere den sola Scriptura, Beibel so komo e úniko fundeshi outoritativo di nos fe i doktrinanan. Esaki ta spesialmente relevante den e último dianan, ora, manera Ellen G. White a bisa, Dios lo tin “un pueblo riba tera pa mantené e Beibel, i solamente Beibel, komo e standart di tur doktrina i e base di tur reforma”. — The Great Controversy, p. 595.

Naturalmente, nos no ta úniko entre Protestantnan ku ta afirmá “e Beibel i e Beibel so” komo e fundeshi di nos fe, aunke hopi ku ta hasi e afirmashon ei ta kere den kosnan manera djadumingu komo e remplaso di Tèstamènt Nobo pa e Sabat di e di shete dia; inmortalidat di e alma; tormento eterno den fièrnu pa esnan pèrdí; i asta un rapto sekreto den kua Hesus silensiosamente i den sekreto ta regresá na tera i ta ranka esnan salbá bai kuné miéntras tur otro hende ta ser lagá puntrando nan mes kon e hendenan ei por a disparsé.

Den otro palabra, djis tin e Beibel, i profesá di ta ker’é, ta un kos, pa importante ku esei ta. Pero, manera e multiplikashon di doktrinanan falsu (tur supuestamente derivá for di Skritura) ta revelá, nos mester sa kon interpretá e Beibel korektamente tambe.

P’esei, e tema di e Guia di Estudio di Beibel pa Adulto di e trimèster akí, “Kon Interpretá Skritura”. Den dje, nos ta kuminsá ku e suposishon ku Skritura, komo e Palabra di Dios, ta “e revelashon infalibel di Su boluntat” i “e standart di karakter, e prueba di eksperensia, e reveladó outoritativo di doktrinanan, i e registro digno di konfiansa di e aktonan di Dios den historia”. — Seventh-day Adventists Believe, … (2nd ed.) (Nampa: Idaho: Pacific Press® Publishing Association, 2005), p. 11. Den poko palabra, Skritura ta e fuente fundamental di e bèrdatnan ku nos ta kere i ta proklamá na e mundu. Òf, manera Beibel mes ta bisa, “Tur Skritura ta duná pa inspirashon di Dios, i ta útil pa doktrina, pa reprendementu, pa korekshon, pa instrukshon den hustisia” (2 Tim. 3:16). “Tur Skritura”, naturalmente, ta nifiká tur Skritura, asta e Skritura ku kisas nos no gusta, ku kisas ta trapa riba nos tenchinan, i ku pa uza lenguahe kontemporáneo, kisas no ta “polítikamente korekto”.

For di e punto di salida aki, anto, nos lo eksaminá kon Beibel ta siña nos interpretá su mes. Es desir, mas bien ku promé bai na fuentenan ekstrabíbliko manera siensia, filosofia, i historia (kua, si nan ser uzá korektamente, por ta un bendishon), nos lo trata na deskubrí for di denter di tèkstnan bíbliko e hèrmèntnan ku ta revelá e gran bèrdatnan hañá den su páginanan sagrado. Nos ta ser bisá ku “hòmbernan santu di Dios a papia segun ku nan tabata ser mové pa Spiritu Santu” (2 Pe. 1:21, NKJV). I nos ta kere ku entre e kosnan ku e “hòmbernan santu di Dios [aki] a papia” tabatin klavenan pa yuda nos interpretá e Palabra di Dios.

Por ehèmpel, kon Pablo òf e otro eskritornan di evangelio tabata interpretá Tèstamènt Bieu? Si loke nan a skibi tabata inspirá pa Dios, e ora ei siguramente e forma kon nan a lesa i a interpretá e Skrituranan por tabata sentral na yuda nos siña hasi e mesun kos tambe. I kon Hesus Mes a uza i interpretá Skritura? Nos lo no haña un mihó ehèmpel riba kon lesa Beibel ku for di Hesus.

Na mes momentu, nos lo eksplorá nos propio presuposishonnan, i ta rasoná tokante konteksto, lenguahe, kultura, i historia i kon nan ta impaktá e forma kon nos ta lesa i komprondé Palabra di Dios. Kon nos mester interpretá e parabelnan, profesianan, historia sagrado, amonestashonnan, kantikanan di alabansa, vishonnan profétiko, i soñonan, henter e spectrum di eskrito inspirá ku ta ser hañá den e Skrituranan?

Tur e preguntanan akí i mas lo ser eksplorá e trimèster akí pasobra, manera doktrinanan manera tormento eterno den fièrnu òf santidat di djadumingu ta mustra, kere den Beibel mes no ta sufisiente. Nos mester siña kon interpret’é tambe.

Frank M. Hasel, Ph.D., ta un Direktor Asosiá di Biblical Research Institute (BRI) na Konferensia General di Atventistanan di e di shete dia. Michael G. Hasel, Ph.D., ta Profesor di Religion na Southern Adventist University i Direktor di Institute of Archaeology i Lynn H. Wood Archaeological Museum.