Menu

Serando Amistatnan pa Dios: E Goso di Kompartí den e Mishon di Dios

Tin momentunan ora ku tene duru na un solo pensamentu ta hasi un diferensia profundo den nos bida. Un kantidat di aña pasá mi tabata sinta den un reunion ministerial huntu ku algun di mi koleganan. E diskushon a bira na kompartí nos fe, testifikashon, i evangelismo. Un di mi amigunan a ekspresá e pensamentu akí: “Mishon ta primeramente e obra di Dios. E ta usando tur e rekursonan di shelu pa salba nos planeta. Nos trabou ta pa koperá ku goso kunE den Su obra di salba hendenan pèrdí.” A parse manera un karga pisá a ser kitá for di mi skoudernan. No tabata mi trabou pa salba un mundu pèrdí. Tabata di Dios. Mi responsabilidat tabata pa koperá kunE den loke E tabata hasiendo kaba.

E idea ku mishon ta obra di Dios ta ser klarifiká a lo largu di Skritura. Salomon ta deklar’é di e forma akí: “E [Dios] a pone eternidat den nan kurason” (Ekl. 3:11, NKJV). Ora un hende nase den e mundu akí, Dios ta pone un deseo pa eternidat profundo denter di e struktura di e ser di e persona ei. Manera Augustine a bisa un bia: “Señor, nos a ser trahá pa Bo, i nos kurason lo no haña sosiegu nunka te ora e haña sosiegu den Bo.” Di kuerdo ku e Evangelio di Juan, Hesus ta e Lus ku ta lusa tur persona nasé den e mundu akí (Juan 1:9). No solamente Dios a pone denter di kada un di nos un anhelo pa E mes, sino tambe El a manda Su Spiritu Santu pa hala nos na E mes.

Tur deseo pa hasi lo korekto i tur konvikshon di piká ta ser stimulá pa Spiritu Santu. Tur deseo pa bondat i inklinashon pa ku amabilidat i altruismo ta ser motivá na promé lugá pa Spiritu Santu. Aunke nos no por komprondé òf realis’é kompletamente, Spiritu Santu ta obrando den nos bida pa hala nos na Hesus (Juan 16:7–15). Pero Hesus Mes ta e regalo di mas grandi di tur.

Ora e rasa humano tabata desesperadamente pèrdí den piká, kondená na morto eterno, e amor di Dios a tuma e inisiativa. Lukas ta skirbi: “Pasobra e Yu di Hende a bin pa buska i pa salba e loke tabata pèrdí” (Lukas 19:10, NKJV). Apòstel Pablo ta añadí: “Pero Dios ta demostrá Su mes amor pa nos, den miéntras nos tabata pekadornan ainda, Kristu a muri pa nos” (Rom. 5:8, NKJV). Dios a tuma e inisiativa den nos salbashon. Kristu a laga e gloria i splendor di shelu i a bin na e mundu skur di piká akí riba un mishon redentor.

Promé ku hamas a dal un stap di beibi den Su direkshon, El a dal un salto gigante den nos direkshon. Promé ku hamas nos a dun’E nos bida, El a proveé salbashon pa nos a traves di Su morto. Nos tabata Su enemigunan, pero E tabata nos Amigu. Nos a bira nos lomba p’E, pero El a bira Su kara den nos direkshon. Nos a preokupá poko p’E, pero El a preokupá inmensamente pa nos.

Den Lukas 15 E ta ser ilustrá komo e Bon Wardadó ku kontinuamente ta buskando Su karné pèrdí, un muhé ku desesperadamente ta buskando su moneda di plata pèrdí di su herensia, i un tata bieu ku riesgoso ta kore pa topa ku su yu pèrdí. Ellen G. White ta hasi e deklarashon maravioso akí digno di kontemplá: “E gran plan di redenshon a ser poné promé ku fundashon di mundu. Kristu no a para su so den e tarea maravioso akí pa e reskate di hende. Den e kortenan di shelu, promé ku e mundu a ser kreá, e Tata i e Yu a hasi un pakto huntu ku si hende a proba di ta infiel na Dios, Kristu, un ku e Tata, lo a tuma lugá di e transgresor, i sufri e kastigu di hustisia ku mester kai riba dje.”– Advent Review and Sabbath Herald, 15 di novèmber 1898.

Kontempl’é pa un momentu. Nos tin e privilegio inkreibel i e responsabilidat maravioso komo tambe e goso eterno di partisipá huntu ku Kristu i koperá kunE den Su mishon. Ta di esei e lèsnan akí ta trata e trimèster akí.

Un nativo di Connecticut, USA, i un evangelista internashonalmente konosí, Mark Finley tabata un vise presidente na Konferensia General di Atventistanan di e di Shete dia for di 2005 te 2010. Despues di a retirá di trabou fultaim, el a bira un asistente di e presidente di Konferensia General. Pastor Finley i su esposa, Ernestine, tin tres yu i sinku ñetu.