Menu

Edukashon

“Temor di Señor ta e prinsipio di sabiduria, i e konosementu di Esun Santu ta komprondementu” (Proverbionan 9:10, NKJV). Pensa riba e teksto akiriba. E ta enserá, realmente, dos konsepto ku ta relashoná djaserka: “temor”, manera den atmirashon, manera den maraviá pa e gloria i poder di Dios; i “konosementu”, manera den siña bèrdat tokante e karakter di Dios. Por lo tantu, sabiduria, konosementu, i komprondementu ta fihá den Dios Mes.

Esaki tin sentido perfekto. Despues di tur kos, Dios ta e fuente di tur eksistensia, Esun so kende a krea i ta sostené tur eksistensia (Juan 1:1-3; Kol. 1:16,17). Kualke kos ku nos siña, kualke kos ku nos sa di dje, partíkula, bichi, supernova, angel, demoño, “outoridatnan i podernan den lugánan selestial” (Efe. 3:10), tur kos, nan ta eksistí solamente pa motibu di Dios. Por lo tantu, tur konosementu i sabiduria i komprondementu finalmente tin nan fuente den Señor Mes.

Skritura ta kla: “Dios ta amor” (1 Juan 4:8), kua ta splika e sita akí di Ellen G. White: “Amor, e base di kreashon i redenshon, ta e base di berdadero edukashon. Esaki a ser mustrá klaramente den e lei ku Dios a duna komo e guia di bida. E promé i gran mandamentu ta: ‘Lo bo stima Señor bo Dios ku henter bo kurason, i ku henter bo alma, i ku tur bo forsa, i ku henter bo mente.’ Lukas 10:27. Stim’E, Esun infinito i omnisiente, ku henter forsa, i mente, i kurason, ta nifiká e desaroyo di mas haltu di tur poder. E ta nifiká ku den henter e ser, e kurpa, e mente, komo tambe e alma, e imágen di Dios mester ser restourá.” — Education, p. 16.

Pa motibu ku Señor ta e fuente di tur konosementu berdadero, tur edukashon berdadero, tur edukashon kristian mester dirigí nos mente den Su direkshon i den direkshon di Su propio revelashon tokante E mes. A traves di naturalesa, a traves di e Palabra Skibí, a traves di e revelashon di Kristu den e Palabra Skibí ei, nos a ser duná tur loke nos tin mester, i despues algun, pa yega na un relashon di salbashon ku nos Señor i, en realidat, stim’E ku henter nos kurason i alma. Asta naturalesa, asina kontaminá pa míles di aña di piká, ainda ta papia, asta poderosamente, di e bondat i karakter di Dios ora e ser studiá for di e perspektiva duná na nos den Skritura. Pero e Palabra Skibí, e Skrituranan, ta e norma perfekto di bèrdat, e revelashon di mas grandi ku nos tin di ken Dios ta i kiko El a hasi i ta hasiendo pa humanidat. Skritura, i su mensahe di kreashon i redenshon, mester ta sentral na tur edukashon kristian.

Apòstel Juan a bisa ku Hesukristu ta e “Lus, kua ta lusa tur hende ku ta bin den mundu” (Juan 1:9). Den otro palabra, meskos ku solamente a traves di Hesus tur ser humano tin bida, a traves di Hesus tur ser humano ta risibí algun rayo di lus divino, algun komprondementu di bèrdat i bondat trasendente.

Sinembargo, nos tur ta den un lucha, e gran kontroversia, den kua e enemigu di almanan ta traha diligentemente pa blòkia nos di risibí e konosementu akí. Pues, kualke kos mas ku edukashon kristian ta enserá, opviamente e mester trata na yuda studiantenan komprondé mihó e lus ku Dios ta ofresé nos for di shelu.

Di otro forma, kiko? Manera Hesus a bisa: “Pasobra ki probecho un hende tin, si e gana henter mundu, i pèrdè su propio alma?” (Marko 8:36). Ki bon un gran edukashon den siensia, òf literatura, òf ekonomia, òf ingenieria ta, si, al final, bo ta konfrontá e segundo morto den e lago di kandela? E kontesta ta opvio, no ta bèrdat?

Asina, e tópiko pa nos lès di e trimèster akí. Kiko ta nifiká di tin un “edukashon kristian”, i kon nos komo un iglesia, den un forma òf otro, por haña un manera pa asina tur nos miembronan ta kapas pa haña un edukashon asina?

E Guia di Estudio di Beibel di Sabat Skol pa Adulto akí a ser skibí pa vários presidente di kolegio- i universidatnan Atventista di e di Shete dia na Nort Amérika.