Menu

E Promesa

Na 1588, un muhé ingles hóben (shete luna embarasá) tabata wak riba laman, i loke el a mira, e Armada Spañó, ku 130 barku fuertemente armá planiando pa invadí e isla, a spant’é asina tantu ku el a duna lus prematuro, e partera siendo miedu.

Miedu, de echo, tabata un imágen apto pa su yu, Thomas Hobbes, ku a bira un di e teorétikonan polítiko di mas grandi di Oropa. Bibando na un momentu ora Inglatera a ser ruiná pa gueranan sivil i violensia religioso sinfin, Hobbes a skirbi ku humanidat, sin un gobièrnu fuerte i ku ta inkluí tur kos, tabata eksistí den un estado di miedu perpetuo, miedu di instabilidat, miedu di konkista, i, mas ku tur kos, miedu di morto. Hende tabata biba den loke el a yama “e guera di tur kontra tur” i ku a ménos ku algu radikal a ser hasí, bida humano lo tabata, el a spièrta, nada sino “solitario, pober, repugnante, brutu, i kòrtiku”.

Kiko tabata e solushon? Hobbes a bisa ku tabatin solamente unu: e hendenan mester a pone nan mes bou di un solo poder ku lo a redusí tur nan boluntat na un solo boluntat i ku lo a ehersé kompleto outoridat riba nan. E poder akí, e soberano akí, sea ta un solo hende òf un grupo di hende, maske e tabata ehersé apsoluto hegemonia riba e nashon, lo a terminá e kondishonnan teribel ku tabata hasi nan bida asina temeroso i instabil. Den otro palabra, a kambio di tur nan derechinan, e hendenan tabata haña pas i seguridat en kambio. E transferensia di poder akí, di e hendenan na esun soberano, ta loke Hobbes a yama e “pakto”.

E idea di pakto, sinembargo, no a originá ku Hobbes. Al kontrario, míles di aña promé, Dios a hasi un pakto ku Israel, un pakto ku su raisnan, de echo, tabata bai bèk asta mas leu den tempu. Kontrali na e pakto di Hobbes, kua a ser inisiá i plamá pa e hendenan, e pakto akí a ser inisiá i plamá pa e berdadero Soberano, e Kreador di shelu i tera. Tambe, aunke e pakto di Hobbes a ser motivá solamente pa miedu, e pakto di Dios ta ser motivá pa amor, Su amor pa e rasa kaí, un amor ku a hib’E te na e Krus.

Asina, pa motibu di loke Kristu a hasi pa nos, nos ta stima Dios bèk, i meskos ku den e pakto Hobesiano, kaminda e suhetonan mester a someté na esun soberano, nos ta someté, tambe, nos kamindanan pekaminoso, nos miedunan, nos noshonnan trosé di loke ta korekto i robes. Nos ta hasi esaki, no pa gana algu a kambio pero pasobra ya nos a ser duná lo mihó ku e Soberano por duna, Hesu-Kristu i e redenshon haña solamente den djE.

Kon e ta funshoná? E ta mes simpel ku un interkambio: Kristu ta tuma nos pikánan i ta duna nos Su hustisia pa asina, pa medio di djE, nos ta ser kontá komo hustu manera Dios Mes. Di e manera akí, piká ya no ta ser atribuí na nos; e no tin ku tene nos separá dor di djE mas. Asesino-, adúltero-, intolerante-, gañadó-, ladronnan, i asta esnan insestuoso, tur por ser mirá komo hustu manera Dios Mes. I e regalo maravioso akí, e kontamentu di hustisia, ta bin na nan pa medio di fe, i fe so. P’esei e frase “hustifikashon pa medio di fe.

Pero e no ta kaba ei tampoko. Asesino-, adúltero-, intolerante-, gañadó-, ladronnan, i asta esnan insestuoso por, pa medio di Hesus, drenta den un relashon ku Dios, pasobra e sanger di Hesus no ta trese solamente pordon sino purifikashon, sanashon, i restourashon. Nos ta, pa medio di Kristu, nase di nobo, i a traves di e eksperensia akí Dios ta skirbi Su lei santu riba e tablanan di karni di nos kurason. Asina asesino-, adúltero-, intolerante-, gañadó-, ladronnan, i esnan insestuoso ya no ta hasi e kosnan ku nan tabatin kustumber di hasi. For di i pa medio di e lei interno akí, henter bida ta ser formá pa e kreyente. E hendenan akí ta deseá di desaroyá loke Dios ta pone denter di nan, i e deseo ei ta igualá ku e promesa di poder divino. Aki tin e esensia di loke ta nifiká pa biba den relashon di pakto ku Dios.

E trimèster akí, e ora ei, nos ta wak mas djaserka kiko ta e pakto di Dios, kiko e ta ofresé, asta kiko e ta demandá. Aunke e ta ser saká for di hopi fuente, e lèsnan ta dependé fuertemente riba trabou di defuntu Dr. Gerhard Hasel, ku su ideanan den e Palabra (kaminda e promesanan di pakto ta ser revelá) lo duna ánimo, speransa, i komprondementu pa asina nos por siña algu ku, kisas, Hobbes nunka a hasi: “No tin miedu den amor; ma amor perfekto ta tira miedu afó” (1 Juan 4:18).

Gerhard F. Hasel (PhD, Vanderbilt University) tabata Profesor di John Nevins Andrews di Teologia Bíbliko i di Tèstamènt Bieu na e SDA Theological Seminary na Andrews University. Di 1981 te 1988 el a sirbi komo e dekano di e seminario i pa 27 aña komo direktor di e programanan di ThD/PhD.