Menu

Sosiegu pa Esnan Intrankil

E buelo tabata trankil te na e momento ku e kapitan a anunsiá for di e cockpit ku e avion lo tabatin ku krusa un gran tormenta. “Por fabor, mara bo faha di seguridat. Nos ta bai pasa den un eksperensia intenso”, e bos for di e cockpit a bisa ora el a terminá e anunsio.

Djis despues, e avion a kuminsá sakudí violentamente miéntras e tabata lucha pa pasa dor di e tormenta. Kompartimentonan ariba a habri; hendenan tabata sinta tenso den nan stulnan. Despues di un temblamentu partikularmente violento di e avion, un hende a grita patras den e avion. Imágennan di un ala ku ta kibra kita afó i e avion ku ta move sin kontròl direkshon di tera tabata flèsh dor di un par di mente. Tur pasahero tabata parse tenso i yen di miedu, tur ku eksepshon di un mucha muhé chikitu ku tabata sintá den e rei dilanti di ‘economy’. E tabata okupá pintando un pintura riba un mesita habrí su dilanti. De bes en kuando e tabata wak pafó di e bentana chikitu na un rayo di welek impreshonante, pero despues e tabata sigui trankilamente ku su pintamentu.

Despues di loke tabata parse un eternidat, e avion a baha finalmente na su destinashon. Pasaheronan a grita di kontentu i a bati man, asina gradesidu i aliviá pa ta bèk riba suela. E mucha muhé chikitu a paketá su tas i tabata wardando pa hendenan bandoná e avion ora un di e biaheronan a puntr’é si e no tabatin miedu. Kon e por tabata asina kalmu durante un tormento asina grandi i ku e avion ta sakudí asina tantu?

“Mi no tabata spantá”, e mucha muhé chikitu a bisa e hòmber ku tabata sorprendí. “Mi tata ta e pilot, i mi tabata sa ku e tabata hibando mi kas”.

Inkietut i miedu hopi biaha ta bai man na man. Bibando den un mundu ku ta tene mayoria hende okupá 24-7 por resultá den inkietut i miedu den nos bida. Ken, tin biaha, no ta lucha ku temor, ku preokupashon, i ku miedu di loke futuro tin aden? Pasado a bai, presente tei awor; pero futuro ta yen di pregunta, i den e mundu instabil akí, e kontesta kisas no ta loke nos ke tende. Nos ta puntra nos mes si nos lo ta kapas pa yega un fecha límite inminente, pa kubri e siguiente pago di hür òf skol, òf di laga nos matrimonionan ku ta lucha sobrebibí un otro tormenta. Nos ta puntra nos mes si Dios por sigui stima nos, aunke nos ta “desapunt’E” bes tras bes.

Den e trimèster akí, nos lo konfrontá algun di e miedunan ei sin kore pa nan. Sosegá den Kristu no ta djis un título pa un guia di estudio òf e logo koutivante di un kampaña evangelístiko òf reunion di kampamentu. Sosegá den Kristu ta e klave na e tipo di bida ku Hesus ta primintí Su siguidónan: “ ‘E ladron no ta bin eksepto pa hòrta, i pa mata, i pa destruí. Ami a bin pa nan por tin bida, i pa nan tin e mas na abundansia’ ” (Juan 10:10, NKJV).

Miéntras e outornan tabata traha riba e guia di estudio akí, nan a realisá di ripiente ku e konsepto di sosiegu ta penetrá totalmente den e struktura di teologia bíbliko. Sosiegu ta konektá na salbashon, na grasia, na Kreashon, na e Sabat, na nos komprondementu di e estado di e mortonan, na e pronto binida di Hesus, i na asina tantu mas.

Ora Hesus a invitá nos pa bin i haña sosiegu den djE (Mat. 11:28), E no a dirigí Su mes solamente na Su disipelnan òf e iglesia kristian trempan. El a mira tambe e futuro generashonnan di sernan humano malu di piká, kansá, akabá i luchando ku tabatin mester di akseso na e Fuente di sosiegu. Segun ku bo ta studia e lèsnan semanal durante e trimèster akí, kòrda pa bin, i sosegá den djE. Despues di tur kos, nos Tata selestial ta den kontròl i ta kla pa hiba nos kas seif.

Chantal i Gerald Klingbeil ta gosa di un matrimonio multikultural i ta trahando komo un tim. Chantal, un direktor asosiá di Ellen G. White Estate, a nase na Sur Afrika, miéntras Gerald, un editor asosiá di Adventist Review Ministries i profesor di investigashon di Tèstamènt bieu i Ancient Near Eastern Studies na Universidat di Andrews, a nase i a lanta na Alemania.