Menu

Bèrdat Presente den Deuteronomio

E Buki di e Aliansa: Deuteronomio

E storia ta bai asin’aki: durante e reinado di Rei Josias na Herusalèm (640-609 P.K.), un hende, ku probablemente tabata traha den e tèmpel, a haña un kopia di un buki, i e buki a ser lesá dilanti di Rei Josias. “Awor a sosodé, ora rei a tende e palabranan di e Buki di Lei, ku el a sker su pañanan” (2 Reinan 22:11, NKJV). Dikon? Pasobra el a realisá ku e i su pueblo no tabata obedesiendo loke tabata pará skirbí den e buki.

E ora ei, a base di e buki ei, yamá e “Buki di e Aliansa” (2 Reinan 23:2, NKJV), Josias a kuminsá un gran reforma. Nos por lesa tokante e reforma ei den 2 Reinan 23.

Kua tabata e buki ku tabatin asina un impakto riba e rei i su nashon? Ta ser keré di ta Deuteronomio, nos estudio di e kuartal akí.

E di sinku, i último, di e Sinku Bukinan di Moises, Deuteronomio, un nòmber ku ta bin di e palabra latin deuteronomium (kua ta nifiká “di dos lei”), por a ser resumí komo lo siguiente:

Despues di e bandoná Egipto, i despues di a drenta den e aliansa na Sinai ku Señor, e yunan di Israel, na lugá di bai direktamente Kanaan, a dual den desierto pa 40 aña. Ora e 40 añanan a terminá i e hebreonan finalmente tabata na punto di krusa i drenta e Tera Primintí, Moises a papia ku nan den un seri di diskurso. E esensia di e diskursonan ei tabata: awor boso ta na punto di drenta e Tera Primintí. Porfin! No lubidá loke Señor a hasi pa boso, i no lubidá loke E ta pidi di boso awor, kua ta pa stim’E ku henter boso kurason i alma i pa revelá e amor ei a traves di obediensia na tur Su mandamentunan, tur di akuerdo ku e aliansa.

I, pa enfatisá e importansia di e aliansa, Moises a ripití na e pueblo e Dies Mandamentunan, e fundeshi legal di nan obligashonnan den e aliansa ku Señor a sera promé ku nan tatanan, i tabata hasiendo asina atrobe, pero awor ku nan, nèt riba e fronteranan di Kanaan.

Por lo tantu,, nos ta puntra: Kisas lo tin paralelonan ku loke e yunan di Israel, riba e fronteranan di e Tera Primintí, a enfrentá, i loke nos, awe, nèt riba e frontera di e Tera Primintí (solamente unu muchu mas mihó), ta enfrentá, tambe?

Asina, e tópiko pa e kuartal akí, kua ta yamá “Bèrdat Presente den e Buki di Deuteronomio”. I ta esei nos ta bai wak: mensahenan di bèrdat presente ku nos por saka for di e palabranan di Dios na Su pueblo di aliansa.

Den e kuartal akí nos lo wak Deuteronomio segun tópiko, kubriendo temanan manera e aliansa eterno, lei i grasia, kiko ta nifiká stima Dios i bo próhimo, i, mas importante di tur, kon e buki di Deuteronomio ta revelá na nos e amor di Dios, kua a ser manifestá mas poderosamente den e morto di Hesus riba e krus i Su resurekshon.

Sigur, un tempu i divishon kultural enorme ta separá nos iglesia awe for di e iglesia den desierto. Pero kisas, loke nos tin en komun ku nan por ta mas ku loke ta dividí nos for di nan. Por ehèmpel, e siguiente palabranan no por a ser papiá na nos tambe awe?

“Siguramente mi a siña boso statutonan i huisionan, meskos ku SEÑOR mi Dios a ordená mi, ku boso mester aktua di akuerdo ku nan den e tera ku boso ta bai pa poseé. P’esei, sea kuidadoso pa warda nan, pasobra esaki ta boso sabiduria i boso komprendementu den bista di e pueblonan ku lo tende tur e statutonan akí, i bisa: 'Siguramente e nashon grandi akí ta un pueblo sabí i di komprendementu’ ” (Deut. 4:5,6, NKJV).

Nota, no tabata e leinan mes ku tabata nan “sabiduria i komprondementu” dilanti di e nashonnan sino nan obediensia na e leinan ei. Siguramente tin un mensahe pa nos aki. Djis un di hopi, manera nos lo mira, den e buki di Deuteronomio.

Clifford R. Goldstein ta editor di e Guia di Estudio di Beibel pa Adulto i outor di Baptizing the Devil: Evolution and the Seduction of Christianity.