Apesar di tur e propaganda popular ku ta kontrali, kristiannan tin motibunan masha lógiko i rashonal pa kere den Dios. Ounke ku algun di e “mihónan i di mas sabí” ta sigurá ku e konseptonan evolushonario di “selekshon natural” i “mutashon pa kasualidat” por splika e kompleksidat, maravia, i bunitesa di bida, hopi hende no ta asept’é, i esei ta lógiko. I apesar di e último pronunsiamentunan sientífiko ku universo a surgi for di “nada,” mayoria hende ta haña e idea di un Dios, ku ta eksistí eternamente, ku ta opuesto di “nada”, e splikashon mas lógiko ku ta duna satisfakshon pa Kreashon.

I tòg, asta ku lógika i rasonamentu firmemente na nos banda, ketu bai tin e problema di maldat ku semper ta presente. I p’esei e pregunta eterno: Si Dios ta eksistí, i ta asina bon, asina amoroso, i asina poderoso, dikon asina tantu sufrimentu?

Ta p’esei e estudio pa e kuartal aki: e buki di Job. Ta fasinante ku e buki di Job, ku ta lucha ku e pregunta eterno, tabata un di e promé bukinan skirbí di Beibel. Dios a duna nos, for di trempan, algun kontesta riba e asuntu di mas difísil di tur.

Algun kontesta, pero no tur. Probablemente niun buki di Beibel lo por kontestá nan tur; asta e Beibel kompletu no ta hasié. Sinembargo, Yòb ta habri un kortina i ta revelá na e lesadó e eksistensia di un realidat mas ayá di loke ku nos sentidonan, asta esunnan ku ta ser yudá dor di mekanismonan sientífiko, por mustra nos. E ta hiba nos na un mundu ku, den un sentido, ta hopi alehá for di nos, den un otro e ta inkreiblemente serka. E buki di Job ta mustra nos loke ku asina hopi di e Beibel ta hasi tambe, esta ku e loke ku ta natural i supernatural ta inseparablemente konektá na otro.

Job ta un drama ilustrá tokante di e prinsipio i spièrtamentu ku añanan despues Pablo a ekspresá: “Pasobra nos no ta lucha kontra di karni i sanger, sino kontra e prinsipadonan, kontra podernan, kontra e gobernantenan di skuridat di e edat aki, kontra ehérsitonan spiritual di maldat den e lugánan selestial” (Efe. 6:12, NKJV).

Ounke ku mayormente e ta bai tokante di un hòmber, e buki di Job ta e storia di nos tur, pasobra nos tur ta sufri di maneranan ku hopi biaha ta parse di no tin sentido. I asta e storia di e kuater hòmber ku ta bin serka dje ta reflehá nos situashon tambe, pasobra ken entre nos no a purba di haña kòntròl riba e sufrimentunan di otronan?

Sinembargo, nos lo a hera un punto krusial di e buki di Job si nos lo a limit’é solamente na sufri intentonan humano, pa komprondé humanidat ku ta sufri. E storia ta tuma lugá den un konteksto, esun di e gran konflikto entre Kristu i Satanas, ku aki ta ser presentá den e términonan di mas literal posibel. I esei ta pasobra e ta e bataya di mas literal, un ku a kuminsá den shelu i ku ta ser desaroyá aki den e kurason, mente, i kurpa di kada ser humano.

E lèsnan di e kuartal aki ta bai tokante di e storia di Job, tantu di aserka, den e drama inmediato di e narashon, komo for di un distansia, dor di kua no solamente nos sa kon e buki ta terminá, sino tambe e trasfondo mas amplio den kua e ta desaroyá. Komo lesadónan anto, ku e konosementu no solamente di e buki di Job sino di henter Beibel, un asuntu krusial pa nos ta di purba i hala pone tur kos huntu. Nos ta purba komprondé mas tantu djaserka posibel, no solamente pakiko nos ta biba den un mundu di maldat, sino mas importante ainda, kon nos mester biba den un mundu asina.

Naturalmente, asta despues ku nos studia Job, asta den e konteksto di restu di Beibel, e pregunta eterno ta keda. Sinembargo, nos ta sigurá di e kontesta eterno: Hesukristu, den kende “nos tin redenshon pa medio di Su sanger” (Efe. 1:7, NKJV), Esun atraves di kende tur kontesta ta bin.