Hopi di nos a yega di tende e palabranan: “I mi ta batisá bo den nòmber di e Tata, i di e Yu, i di Spiritu Santu.” I, si nos a batisá, ku tur siguridat nos a tende e palabranan aki djis promé ku un pastor a hinka nos bou di awa (lesa Mat. 28:19).

Batisá den nòmber di e Tata, e Yu, i Spiritu Santu. Si, einan mes e Spiritu ta ser menshoná huntu ku e Tata i e Yu.

I no ta nada straño, Kreensia Fundamental number 5 di Iglesia Atventista di e di Shete Dia, “Dios Spiritu Santu,” ta bisa: “Dios e Spiritu eterno tabata aktivo huntu ku e Tata i e Yu den kreashon, enkarnashon, i redenshon. E ta un persona meskos ku e Tata i e Yu. E a inspirá e eskritornan di Skritura. E a yena Kristu Su bida ku poder. E ta atraé i kombensé sernan humano; i esnan ku respondé, E ta renobá i transformá den e imágen di Dios. Mandá dor di e Tata i e Yu pa ta semper ku Su yunan, E ta duna donnan spiritual na iglesia, dunando e poder pa duna testimonio di Kristu, i den harmonia ku Skrituranan, ta gui’é den tur bèrdat.”

Sinembargo, ora nos lesa Beibel, partikularmente Tèstamènt Bieu, nos ta mira e aktividat i obra direkto di Dios e Tata. Su akshonnan ta tur kaminda. Den Tèstamènt Nobo, spesialmente den e Evangelionan, nos ta lesa bes tras bes tokante di e obra i aktividat di Hesus, e Yu. Hesus, Su bida, morto, i ministerio na shelu, ta dominá Tèstamènt Nobo.

Den kontraste ku e aktividat di tantu e Tata komo e Yu, e obra di Spiritu Santu no ta ser deskribí asina kla den niun di dos Tèstamènt.

Pero tin un motibu pa e kontraste aki: Spiritu Santu no ta buska pa ta den sentro di atenshon. E ta hunga un papel mas tras di kòrtina. E Tata i e Yu ta mas direktamente revelá den e Palabra. I esei ta pasobra e Spiritu Santu ta einan pa mustra nos, nó na Su mes, sino na Hesus i na loke ku Hesus a hasi pa nos.

Ora ku nos ta studia e obra di Spiritu Santu, nos lo mira kon sentral E ta pa nos eksperensia kristian. Spiritu Santu, kende, komo Dios mes, konosé Dios manera niun otro persona; p'esei, E por revelá Dios na nos di un forma digno di konfiansa i fiel. Spiritu Santu promé a inspirá e eskritornan di Beibel, i awe Spiritu Santu ta guia nos den nos estudio tokante di loke ku E a inspirá e eskritornan aki pa komuniká. Spiritu Santu ta duna siguransa di nos salbashon pa medio di HesuKristu (Rom. 8:16), i E ta duna evidensia di e obra di Dios den nos (1 Juan 3:24). Spiritu Santu ta hasi nos limpi tambe for di piká i ta santifiká nos. “Boso a ser labá, boso a ser santifiká, boso a ser hustifiká den e nòmber di Señor HesuKristu i den e Spiritu di nos Dios” (1 Kor. 6:11, RSV). E Spiritu ta produsí den nos eterno kresementu den santidat pa, kreando e fruta di Spiritu denter di nos, “amor, goso, pas, pasenshi, kariño, bondat, fieldat, mansedumbre, dominio propio” (Gal. 5:22, 23, NASB).

“E Spiritu mester a ser duná komo un agente regeneradó, i sin esaki e sakrifisio di Kristu lo tabata di ningun probecho. E poder di maldat tabata birando mas fuerte pa siglonan largu, i e sumishon di hende na e koutiverio satániko aki tabata asombroso. Piká por a ser resistí i vensí solamente atraves di e agensia poderoso di e di Tres Persona di e Deidat, ku lo a bin no ku energia modifiká, sino den e plenitut di poder divino. Ta e Spiritu ta Esun ku ta hasi efikas e loke ku e Redentor di e mundu a logra.”–Ellen G. White, The Desire of Ages, p. 671.

Pa motibu di Su parti krusial den bida di e kreyentenan, estudio di e kuartal aki lo yuda nos komprondé mas mihó e gran don ku nos tin den e Spiritu Santu.