Alimentá e karnénan

Komo nos estudio e trimèster aki ta 1 i 2 Pedro, nos ta lesa e palabranan di un hende ku tabata ku Hesus na mayoria di e momentonan importante di Su ministerio. Pedro tabata tambe un hende ku a bira un lider prominente entre e promé kristiannan. E echonan aki so lo a hasi su kartanan bale la pena pa lesa. Pero e kartanan aki tin mas interes mirando ku nan a ser skirbí na iglesianan ku tabata eksperenshá tempunan difísil: nan a sufri persekushon di pafó i e peliger di maestronan falsu ku tabata lantando paden.

Pedro ta spièrta ku entre e kosnan ku e maestronan falsu aki lo promové ta duda tokante e binida di Hesus. “Unda e promesa di su binida ta?” nan lo bisa, “Pasobra for di tempu ku e tatanan a bai sosegá, tur kos a sigui meskos ku nan tabata for di prinsipio di kreashon” (2 Pe. 3:4). Awe, kasi dos mil aña despues, nos sa e realidat di e enkargo ei, no ta asina?

Ademas di e spièrtamentu di Pedro tokante maestronan falsu, e sufrimentu ku e iglesianan tabata pasa aden ta un tópiko na kual e ta bolbe vários biaha. E sufrimentu aki, e ta bisa, ta reflehá e sufrimentu di Hesus, ku a tuma nos pikánan den Su kurpa ora E a muri na e krus (1 Pe. 2:24). Pero e bon notisia ta ku e morto di Hesus a trese nada ménos ku libertat for di e morto eterno kousá pa piká, i tambe un bida di hustisia aki i awó pa esnan ku ta konfia den Dje (1 Pe. 2:24)

Pedro ta bisa ku Hesus no solamente a muri pa nos pikánan sino ku lo E bolbe na tera i kuminsá e huisio di Dios (2 Pe. 3:10-12). E ta hasi énfasis riba e echo ku e perspektiva di huisio mester tin implikashonnan signifikante i práktiko den bida di e kreyente. Ora Hesus bolbe, lo E destruí tur pika i limpia/purifiká e tera ku kandela (2 Pe. 3:7). E ora ei Kristiannan lo risibí e herensia ku Dios tabata akumulá pa nan den shelu (1 Pe 1:4)

Pedro tin palabranan masha práktiko enkuanto di kon kristiannan mester biba. Promé i riba tur kos kristiannan mester stima otro (1 Pe 4:8). E ta resumí su punto di bista dor di bisa: “Finalmente, boso tur, tin unidat di spiritu, simpatia, amor un pa otro, un kurason tierno, i un mente humilde” (1 Pe. 3:8, NRSV).

E epístolanan di Pedro ta tambe un proklamashon ferviente di e evangelio, e mensahe sentral di henter Beibel. Despues di tur kos, si kualke hende lo a konosé e grasia ku ta salba di Señor, ta Pedro. E mesun Pedro, ku asina abiertamente i brutu a ninga su Señor (asta ku palabra malu), bisando, “mi no konosé e Hòmber” (Mat. 26:74, NKJV), ta e mesun ku Hesus a bisa despues, “Alimentá mi karnénan” (Juan 21:17). E dos epístolanan aki ta ehèmpel di Pedro hasiendo esei: alimentando e karnénan di Señor.

I, naturalmente, kualke parti di e alimentashon ei, lo a inkluí e gran bèrdat di salbashon pa medio di fe den Kristu, un tema ku su kompañero den obra, apòstel Pablo, di un manera asina poderoso a proklamá. Esaki ta e bèrdat di e grasia di Dios. Pedro tabata sa di esaki, no solamente di un manera teorétiko, òf solamente komo un doktrina, sino pasobra e a eksperensiá e realidat i e poder di grasia pa su mes.

Manera Martin Lutero a skirbi den su komentario riba Pedro: “Konsekuentemente e epístola aki di San Pedro ta un di e bukinan di mas grandi di Tèstamènt Nobo, i ta e evangelio berdadero i puro. Pasobra Pedro ta hasi tambe e mesun kos ku Pablo i tur e evangelistanan ta hasi, ku e ta inkluí e doktrina berdadero di fe, kon Kristu a ser duná na nos, Kende ta kita nos pikanan i ta salba nos.”‒ Commentary on the Epistles of Peter and Jude (Grand Rapids: Kregel Publications, 1982), p. 2, 3. Hesus a bisa Pedro pa alimentá Su karnénan. Nos ta entre e karnénan ei. Laga nos ser alimentá.