E Evangelio, 1844 i  Huisio

E Evangelio, 1844 i Huisio

Komo Atventista, hopi di nos doktrinanan “úniko” realmente no ta úniko. Despues di tur kos, otro Kristiannan (no hopi ku ta rekonos’é) den enfoke mas grandi, tambe ta warda e Sabat di shete dia. Maske un mayoria di e mundu Kristian ta kere den inmortalidat di e alma, otro Kristiannan ta komprondé ku e morto ta drumi den graf te na resurekshon, sea e promé òf e di dos. Diferente siñansanan “Atventista”, p.e. destrukshon eterno (kontrali na tormento eterno) òf e naturalesa di milenio, tambe por ser haña algun otro kaminda. En realidat, kasi tur nos doktrinanan ta plamá dor di henter Kristianismo.

Ku eksepshon di un: e huisio pre-Atvènt di 1844.

Pa algun, e echo aki ta kos di prekupá; Dikon mas Kristian no ta mir’é tambe? Pa otronan, e singularidat di e doktrina ta mustra asta mas poderoso na e yamada spesial di e Iglesia Atventista di Shete Dia. E ta presisamente pasobra niun otro hende ta siña e huisio ku nos a ser lantá pa siña. For di e doktrina aki, kisas mas ku kualke otro, nos identidat distinto komo Atventistanan di Shete Dia ta lanta.

E trimèster aki nos lo studia e huisio pre-Atvènt di 1844. Pero no separá. Manera e título ta sugerí, nos ta bai wak e huisio den konteksto di e evangelio, pasobra huisio sin e evangelio ta manera lei sin grasia: e ta hiba solamente na miedu, kondenashon i morto. Na otro banda, huisio huntu ku e evangelio (manera lei huntu ku grasia) ta hiba na fe, siguransa i speransa.

Kisas e konekshon mas kla entre e evangelio i huisio ta e mensahe di e promé angel: “I mi a mira un otro angel ta bula meimei di shelu, ken tabatin un evangelio eterno pa prediká...bisando na bos haltu: Teme Dios i dun’É gloria, pasobra e ora di Su huisio a yega”(Rev. 14:6,7). Asina leu ku ta konserní Dios, e “evangelio eterno” ta inkluí huisio; kon bobo di nos pa hasié ménos inklusivo.

Nos estudio di e trimèster aki lo ser partí den vários parti. Promé, nos lo laga Skritura yena e fondo pa e huisio i henter e plan di salbashon.

Despues, den mayoria di e trimèster, nos lo establesé e base bíbliko pa e huisio di 1844, mirando pa nos mes presis ki un base sólido nos tin pa e siñansa aki, ku su rais den e Krus. Pa esnan ku nan konosementu di e doktrina a kuminsá i kaba ku un serie evangelístiko, e estudio aki lo yuda bo para firmemente den e bèrdat klave aki. Pa esnan ku ya a studi’é den profundidat, e trimèster aki lo reforsá loke bo sa kaba i, kisas, yuda bo komprond’é asta mihó.

E ora ei nos lo wak algun pregunta ku e siñansa ta konfrontá, usando nan komo un vehíkulo pa komprondé e base bíbliko pa e huisio pre-Atvènt mihó.

Mas importante ainda, nos lo wak e huisio den konteksto di e evangelio, di e morto di Kristu na nos fabor, ku e komprondementu ku pa motibu di Su morto nos por tin siguransa den e huisio. “P’esei awor no tin kondenashon pa esnan ku ta den Kristu Hesus, ku no ta kana segun karni, ma segun Spiritu” (Rom. 8:1). No tin kondenashon awor, i spesialmente den e huisio.

Finalmente, nos ta buska pa kontestá preguntanan manera: Kiko un huisio ku a kuminsá den siglo 19 ta nifiká pa nos den siglo 21? Kiko e ta bisa nos tokante nos mes, nos iglesia i, mas importante, tokante e Dios ku ta primintí di bin bèk i hiba nos kas?

Na final, un debido komprondementu di e huisio di 1844 lo trese na kla e morto di Kristu pa nos den un klaridat i profundidat muchu mas grandi, spesialmente segun ku nos ta spera e di Segundo Binida. Kisas ta pa e motibu ei nos komo Atventistanan di Shete Dia a ser yamá pa predik’é, pasobra e ta trese e Krus den un enfoke muchu mas grandi, i segun ku nos ta aserká e konsumashon di tur kos, kon importante ta pa e Krus ser komprondé ku tur klaridat posibel. Asina, mas ku nos ke pa bo sali for di e lèsnan aki ku un mihó komprondementu di mapanan, fechanan i sifranan, nos ke pa bo sali ku un mihó komprondementu di Hesus, di e Krus, i di Su ministerio den shelu pa nos. Si ta asina, e ora ei nos trabou huntu e trimèster aki lo a ser, pa e grasia di Dios, rikamente rekompensá i mas ku bale la pena.