Les 2

Lesa pa e siman aki:

Ekl. 12:14; Dan. 12:1, 2; Mat. 8:12; 22:1-13; 25:31-33, 46; Juan 3:18; 2Kor. 5:10

Versíkulo di Memoria:

"Riba e dia ku Dios lo huzga e sekretonan di hende pa medio di Kristu Hesus, segun mi evangelio" (Romanonan 2:16).

Grafiti skibí riba un muraya dor di un ateista italiano ta bisa: "No tin Dios, i Maria ta Su mama!" Anke prèt, e punto ta importante: komo sernan humano nos ta kriaturanan suphetivo. Maske kon nos trata na ta ophetivo, na wak kosnan honestamente, hustamente, lógikamente, sin forma noshonnan prekonsebí, inevitablemente nos ta trese nos mes ideanan, kultura, beis, i eksperensianan den kualke tópiko ku nos toka. Asta e idea di no tin un noshonnan prekonsebí tokante algu ta, enbèrdat, di tin un opinion prekonsebí tokante algu.

E siman aki, miéntras nos ta realisá nos limitashonnan heredá, nos lo ta mas ophetivo ku nos por segun nos ta wak loke Beibel ta bisa tokante huisio. Laga nos lubidá pa aworakí tokante 1844, e huisio pré-Atvènt, Ellen White, Hiram Edson den e kunuku di maishi, etc. Na lugá di esei, laga nos djis laga Beibel papia pa su mes riba e tópiko importante aki. I segun e ta hasi esei, laga nos wak ki kontestanan e ta duna pa e siguiente preguntanan: Kon huisio i e evangelio ta konektá? Kiko ta e resultadonan final di huisio? Kristiannan ta ser huzgá? Ki ròl obranan ta hunga den huisio? Ki ora e huisio ta tuma lugá?

Anke niun di e kontestanan pa e preguntanan aki ta kontené tur loke nos mester sa riba e tópiko, hinká den otro huntu nan ta forma un tela bunita ku lo kapasitá nos pa gara e konsepto di huisio mihó, apesar di kualke otro prekonsepshon ku nos tabatin kaba tokante dje.

Komo Kristiannan Atventista nos ta bisa ku e evangelio di Hesukristu ta "bon notisia". En bèrdat, e palabra griego tradusí "evangelio" ta nifiká presis esei, "bon notisia".

Pero si e ta bon notisia, ta bon notisia tokante kiko? Ta e bon notisia ku Hesus a muri komo nos Supstituto (1Pe. 2:24); ku na e Krus E a paga e kastigu pa nos pikánan (Isa. 53:6); ku pa medio di fe den djE nos ta para perfekto den Dios awor pasobra nos ta kubrí ku hustisia perfekto (Rom. 3:22); i ku pa motibu di loke E a hasi pa nos, nos tin e promesa di bida eterno (1Juan 5:11,12).

Lesa e siguiente tèkstnan. Kiko ta e opshon pa esnan ku, na final, no tin bida eterno? Dan. 12:2; Mat. 8:12, 25:46; Juan 3:18; 2Tes. 1:9; Rev. 14:11.

Wak algun di e imágennan i frasenan di e tèkstnan aki: “kastigu eterno”, “huma di nan tormento”, “kondená”, “destrukshon eterno”, “yoramentu i mordementu riba djente”. Si esaki no ta papiamentu tokante huisio, kiko sí ta anto?

Pues, e bon notisia di e evangelio ta ku nos ta ser librá di kondenashon den huisio. Den otro palabra, inherente den e evangelio mes tin e promesa ku esnan ku a aseptá Hesus no ta ser kondená manera esnan ku a rechas’É. No tin, anto, e evangelio sin huisio, pasobra “e bon notisia” di e evangelio ta ku nos ta ser librá di kondenashon. Den kòrtiku, e evangelio sin huisio ta manera un sírkulo sin rònchi: Pa su definishon bèrdadero, e evangelio ta inkluí huisio.

Buska e tèkstnan aki bou. Ken ta e dos último kategoria di hende deskribí aki?

Ki otro kos huisio ta envolví, e ta resultá den solamente dos kategoria di hende: esnan ku ta salbá eternamente i esnan ku ta pèrdí eternamente. E tèkstnan aki no ta mustra niun sorto di meimei felis òf tereno neutral. Finalmente, e destino final di nos tur ta sea bida eterno òf destrukshon eterno.

Asina, ta kla asta for di e tèkstnan aki ku algun tipo di huisio ta separá e hustu for di e malbado. Un separashon final ta tuma lugá, un huisio den kua e destino final di tur hende ta disidí pa semper.

Lesa e siguiente tèkst: “Ora e Yu di Hende bin den Su gloria, i tur e angelnan santu huntu kunÉ, E lo sinta riba e trono di Su gloria; i tur e nashonnan lo ser tresé huntu Su dilanti; i E lo separá nan un for di otro, manera un wardadó ta separá karné for di kabritu; i E lo pone e karnénan na Su man drechi, pero e kabritunan na Su man robes” (Mat. 25:31-33). Kiko mas nan ta siña nos tokante e naturalesa di huisio?

Un kantidat di puntonan fasinante ta ser tresé na kla aki. Promé ku tur kos, ken ta ser huzgá? E ta bisa ku “tur e nashonnan” lo ser tresé huntu Su dilanti. Pues, esaki ta parse di ta un sorto di huisio universal; tur nashonnan ta ser skrudiñá, loke ta nifiká ku ta tur hende pasobra, despues di tur kos, no ta Señor ta “e Hues di henter mundu”? (Gén. 18:25)

Aki tambe nos ta ser konfrontá ku e mesun divishon kla: e karnénan i e kabritunan, e salbánan i esnan pèrdí, esnan ku, den palabranan mes di Kristu, lo “bai den kastigu eterno; ma e hustunan den bida eterno” (Mat. 25:46).

E estudio di ayera a revelá e idea di un sorto di huisio universal, huisio na fin di tempu ku ta envolví tur hende. Pero kiko ta di iglesia? Kiko ta di esnan ku a profesá e nòmber di Hesus i, di tur aparensianan eksterior, ta biba e bida Kristian den sinseridat i fieldat? Nan tambe ta ser huzgá?

Komo Kristiannan, nos ta komprondé ku Hesus a ser huzgá i kondená na e Krus na nos lugá. E a konfrontá kondenashon pa piká ku nos, di otro manera, lo mester a konfrontá nos mes (wak Isa. 53:4-6, Mat. 20:28, Rom. 5:8, 2 Kor. 5:14, Efe. 5:2, 1 Tes. 5:10). Manera Ellen White a ekspres’é: “Riba Kristu komo nos supstituto i siguridat e inikidat di nos tur a ser poné. E a ser kontá komo transgresor, pa E por a redimí nos for di kondenashon di e lei. E kulpa di kada desendiente di Adam tabata primi riba Su kurason.” - The Desire of Ages, p. 753. Esaki ta nifiká anto ku, pasobra Kristu a ser kondená na nos lugá, Kristiannan no ta konfrontá huisio?

Buska e siguiente tèkstnan. Kon nan ta kontestá e pregunta: Kristiannan ta ser huzgá?

E poko tèkstnan aki, huntu ku hopi mas, ta hasi abundantemente kla ku e pueblo di Dios, Su iglesia, ta konfrontá huisio. Ora Hesus, den Mateo, a reprendé esnan ku a reklamá ku nan tabata hasi hopi kos maravioso “den bo nòmber”, E no tabata papia ku e ateonan, Hindú, òf Wiccano, pasobra nan no ta hasi kos den Su nòmber. Ta Kristiannan ta hasi esei. E palabranan di Pablo ku “nos tur lo” para dilanti di e tribunal ta inkluí e mes den esnan ku lo ser huzgá.

No tin kuestion ku, di akuèrdo ku e Palabra di Dios, esnan ku ta profesá di ta siguidónan di Kristu, esnan ku enbèrdat ta “Su pueblo” (Hebr. 10:30), lo konfrontá un sorto di huisio na fin di tempu.

"Pasobra Dios lo trese tur echo na huisio, tur kos ku ta skondí, sea bon òf malu" (Ekl. 12:14).

Salomon ta skibi henter e buki di Eklesiastés i ta kaba ku e tèkst ariba menshoná, kua ta un deklarashon mas kla i komprendibel ku hende por haña den Skritura tokante no solamente e realidat di huisio ma ku huisio ta envolví nos echonan, asta “kada kos sekretu”.

Naturalmente, Salomon no tabata e úniko pa konta nos tokante un huisio segun obra. Hesus tabata basta eksplísito den Mateo 12:36,37 ora E a bisa ku “hende lo duna kuenta riba e dia di huisio di kada palabra bano ku nan papia. Pasobra segun bo palabranan lo bo ser hustifiká, i segun bo palabranan lo bo ser kondená.” Pedro tambe ta hasié kla: “I si boso ta invoká komo Tata, Esun ku imparsialmente ta huzga di akuèrdo ku kada hende su obra, komportá boso mes ku temor durante e tempu ku boso ta pasa riba mundu” (1Pe. 1:17). Pablo tambe ta komprondé e realidat di un huisio segun obranan: “Pasobra nos tur mester paresé dilanti di e tribunal di Kristu, pa kada un ser rekompensá pa su echonan den su kurpa, segun loke e a hasi, sea bon òf malu” (1 Kor. 5:10). Juan, den Revelashon, tambe ta skibi di un huisio segun obranan: “I mi a mira e mortonan, grandi i chikitu, pará dilanti di e trono; i bukinan a ser habrí; i un otro buki a ser habrí, kua ta e buki di bida; i e mortonan a ser huzgá for di loke tabata pará skibí den e bukinan, segun nan obranan” (Rev. 20:12).

Kua otro tèkstnan di Beibel bo por haña, manera den e komparashonnan, ku ta papia hopi kla tokante un huisio segun obranan?

Tokante kiko henter e metáfora di kasamentu ta bai? Wak tambe Isa. 62:5, Ose. 2:19, Mat. 9:15, Rev. 21:2.

Ki nifikashon tin pa e echo ku un persona ku a aseptá e invitashon a konfrontá huisio?

Kiko tabata e destino di e hòmber ku, despues di skrudiñamentu, a ser hañá sin un bistí?

Loke e komparashon aki ta siña tambe ta ku tin un sorto di huisio promé ku ehekushon di e sentensia. Despues di tur kos, asta den kortenan humano, kuantu bia un sentensia ta ser ehekutá promé ku un investigashon ku ta hiba na huisio? Revelashon 22:12, den kua Señor ta bisa ku ora E bolbe, Su rekompensa “ta ku Mi”, tambe ta impliká un huisio promé. (Pakiko e rekompensa lo ta kunÉ kaba si no tabatin algu di antemano ku a determiná ken lo hañ’é?) 2 Korintionan 5:10 ta impliká un dunamentu di kuenta promé ku e rekompensa òf kastigu final, pa asina “kada un por risibí loke ta debé, pa su echonan den e kurpa”. E idea aki tambe ta ser hañá den Daniel 12:1, kaminda esnan hañá den e buki di bida ta liberá.

Kualke tipo di huisio segun obranan ta impliká un dunamentu di kuenta di e obranan ei promé ku ehekushon di e rekompensa òf kastigu ku e obranan ei a meresé, sea e huisio ei ta shen aña òf shen sekònde promé ku e kastigu òf vindikashon ser ehekutá. I pasobra, di akuèrdo ku hopi di e tèkstnan ku nos a mira e siman aki, e rekompensa òf e kastigu òf vindikashon ta bin na e Segundo Binida, mester tin algun sorto di dunamentu di kuenta òf huisio promé ku e evento ei mes.

“Huisio ta meresé atenshon kuidadoso, komo ku e ta envolví den e asuntunan di (a) hustisia divino den un mundu inhustu (teodisea), (b) kastigu pa malu hasí, (c) e sufrimentu di e inosente, (d) e resolushon di e konflikto di bon i malu, i (e) e final di piká i sufrimentu. Pero riba tur kos, huisio final ta vindiká e Kreador, Su karakter i gobernashon, den mente di tur inteligensianan kreá, sea fiel òf pèrdí, di e manera ei hañando siguridat i pas eterno pa e universo. Huisio anto a ser deskribí den Skritura komo un parti esensial di e ‘evangelio eterno’ (Rev. 14:6, 7).”—Handbook of Seventh-day Adventist Theology, vol. 12, p. 815.

E siman aki nos a mira ku Skritura ta siña e siguiente puntonan tokante huisio: (1) Huisio i e evangelio ta konektá, asta inseparabel; (2) tin algun sorto di huisio final serka e fin di tempu; (3) entre esnan huzgá tin e siguidónan profesá di Kristu; (4) obranan klaramente ta parti di e huisio aki; (5) solamente dos resultado final ta presentá, bida eterno i destrukshon eterno; i (6) algun sorto di huisio ta tuma lugá promé ku ehekushon di e sentensia.

Preguntanan di Diskushon:

Komo klas, repasá boso kontestanan riba e pregunta na final di e estudio di djarason. Kiko bo por siña un di otro? Kon tambe e pregunta di teodisea ta konkordá ku boso kontestanan?

Bai rònt den klas i laga kada persona ku ke, kontestá e pregunta aki: Kon bo ta sinti tokante e perspektiva di ser huzgá segun bo obranan?

Puntra diferente hende den klas si nan a yega di ta den un posishon den kua nan mester a ehekutá algun sorto di huisio riba un otro persona. Kon e proseso tabata? Kon importante tabata pa ta hustu? Kon serio nan a tuma nan responsabilidat? Dikon tabata importante pa haña tur e echonan promé ku bin na un konklushon? Kiko e klas por siña for di loke a ser bisá, ku lo por yuda nos komprondé e idea di e huisio di Dios mihó?

SABAT

DJADUMINGU

DJALUNA

DJAMARS

DJARASON

DJAWEPS

DJABIÈRNÈ

DJADUMINGU		2 di yüli

DJALUNA		3 di yüli

DJAMARS		4 di yüli

DJARASON		5 di yüli