Les 3

Versíkulo di Memoria:

“I den e dianan di e reinan ei e Dios di shelu lo lanta un reino ku nunka lo ser destruí; i e reino ei lo no pasa pa ningun otro pueblo, ma e lo garna i pone un fin na tur e reinonan aki, i e lo dura pa semper” (Daniel 2:44).

Un hóben, luchando ku preguntanan tokante Dios, e enfrentá un Kristian i a bisa: “Lo mi duna bo un ora pa proba mi ku Dios ta eksistí!” E Kristian, sin pèrdè tempu, a pasa kuné dor di Daniel 2. Ora e a kaba, e hóben a konfesá: “Awor mi sa ku tin un Dios den shelu!”

Esnan ku konosé Daniel 2 por komprondé kiko a pasa. E buki aki, skibí den e di seis siglo promé ku Kristu, mustrando e historia di mundu for di e tempu di Daniel te ku nos tempu, i asta mas ayá. Ta duru pa mira kon kalke hende rasional, despues di a studia Daniel 2, lo por keda sin ser impreshoná dor di e profesia i e Dios ku a revelá Su mes den dje. Enbèrdat, Daniel 2 (meskos ku otro partinan di e buki) ta asina poderoso komo un testigu pa e fe Kristian ku, den siglonan tempran di e iglesia, oponentenan ya tabata argumentá ku Daniel a ser skibí meimei di e di dos siglo promé ku Kristu, despues di e eventonan ku e ta papia di dje, un punto di bista ku hopi hende tin te awe ainda . E teoria aki, sinembargo, no solamente no a ser konfirmá, pero e no ta splika kon e kapítulo por a pronostiká eventonan di hopi siglonan despues di e supuesto fecha di su komposishon den e di dos siglo promé ku Kristu.

E siman aki nos lo wak e profesia fasinante aki, ku ta yuda forma e base pa nos estudio di e trimèster aki, tokante e huisio i e evangelio.

Kua tabata e úniko dos posibel destinonan ku tur e hòmbernan sabí di Babilonia tabata konfrontá ku e dekreto di e rei?

Kon e akshonnan di Daniel ta revelá e inkapasidat total di su situashon for di punto di bista humano so?

Dikon Daniel tabata asina sigur (v. 24) ku e lo por a revelá e sekreto aki na rei?

E orashon di gradisimentu di Daniel ta revelá den hopi manera e mensahe prinsipal di henter e buki: Apesar di aparensianan eksterior, Señor ta Soberano, asta te na e punto di kita òf pone reinan. Anke nos, ku nos bista limitá di kosnan (1 Kor. 13.12), por sinti nos mes aplastá dor di eventonan, nos por tin e siguransa ku Dios ta den kontròl finalmente.

Ainda mas importante, loke e promé sekshon aki di e kapítulo ta mustra ta ku no solamente Dios ta den kontròl di e kuadro grandi, E ta serka di nos komo individuonan. Wak kon E a bin serka Daniel den un “vishon di anochi” i a revelá na dje loke e mester a sa. Papiando di kontakto íntimo! Anke Daniel tabata solamente un katibu stranhero den un imperio mundial enorme, e Señor di henter mundu (Jos. 3:11), e Kreador di shelunan i tera (Gén. 1:1), Esun ku ta tene e streanan na nan lugá (Job 38:31), a manifestá Su poder i Su kuido na e hobensitu Hebreo simpel aki.

I, si en kaso ku nos lubidá, esaki ta e mesun Dios ken nos ta adorá i sirbi awe..

Lesa Daniel 2:26-45 i skibi un resúmen di e soño i e interpretashon. Segun bo mihó konosementu, kua ta e kuater reinonan terenal representá aki?

Ata Daniel, seis siglo promé ku nasementu di Kristu, mustrando e historia di mundu. E kabes di oro, naturalmente, a ser nombrá Babilonia (v. 38). E siguiente reino, esun representá dor di e pechu i e brasanan di plata (v. 32, 39), tabata e Imperio Medo-Pèrsia. E siguiente, simbolisá dor di e barika i e bèlnan di pia di bròns (v. 32, 39), tabata Gresia; i e di kuater reino, simbolisá dor di e heru den e pianan (v. 33, 40), tabata e Imperio Romano, ku finalmente a hiba na e nashonnan di Oropa moderno, simbolisá dor di e pianan, un parti di heru i un parti di klei (v. 33, 41-43).

Esaki no ta un senario Atventista: studiantenan di Beibel Hudiu i Kristian pa hopi siglo a interpretá Daniel 2 na e manera aki.

Kon e profesia ta kaba? Kua reino a keda establesé finalmente? I kiko e kontesta ei ta revelá tokante henter e panorama i ekstenshon di e kapítulo aki?

Daniel 2 ta revelá un panorama ekstenso di historia, podernan mundial ku ta sigui otro sin interupshon kuminsando mas ku sinku siglo promé ku Kristu i terminando algun tempu den futuro, ora e reino eterno di Dios lo ser establesé despues di e regreso di Kristu. Asina, Daniel 2 ta hiba nos na e fin di mundu manera nos konosé awor. Esnan ku ta limit’é i su profesianan na eventonan asta promé ku e promé binida di Kristu ta severamente malinterpretá un siñansa fundamental di e kapítulo, no pa menshoná (manera nos lo mira) henter e buki. Daniel, sin kestion, ta un buki ku ta mustra susesonan te na e segunda binida di Kristu, i despues di dje. Bèrdaderamente e ta, manera e ta bisa den otro lugánan, tratando ku e tempu di “fin” (Dan. 8:17; 19; 12:4, 9, 13).

Kua metal a ser usá pa Babilonia? ___________________ Kua metal a ser usá pa Medo-Pèrsia? _________________ Kua metal a ser usá pa Gresia? ___________________ Kua metal a ser usá pa Roma? _________________

Babilonia ta ser kompará ku un metal, Medo-Pèrsia ta ser kompará ku un metal, i Gresia ta ser kompará ku un metal. Kontrali na esei, den vèrs 33, 34 e heru ku a lanta despues di Gresia (representando Roma) ta keda ei te ora e piedra kòrtá “no ku man” (v. 34) destruí tur kos. E heru ku ta lanta despues di Gresia ta keda te na final, anke den e pianan e ta bira mesklá ku klei. Den e interpretashon di e parti ei di e vishon, e metal ku ta representá e di kuater reino, heru, ta keda te na final, anke e ta ser deskribí komo mesklá ku lodo (v. 40-44). E punto ta kla: E di kuater reino, e di kuater poder, ta lanta despues di Gresia i ta keda te na final, apesar ku e ta ser manifestá den un forma diferente. Den Daniel, e di kuater poder, e poder ku ta lanta despues di Gresia, ta keda e mesun poder (pasobra e ta heru ketu bai, distinto for di e podernan promé, kua nan metal a disparsé ora un imperio kompletamente nobo a lanta), anke na sierto punto e a kambia di forma. Asina, ta Roma for di e tempu di Gresia te na fin di mundu. Sorprendentemente, Roma ta eksistí awe ainda komo un poder mundial, anke su forma ta radikalmente diferente for di ora e a lanta promé despues di Gresia.

Hopi siglo pasá un di e pensadónan mas grandi di Inglatera a skibi: "Si un hende konsiderá e orígen di e gran dominio eklesiástiko aki, fásilmente e lo komprondé ku e papado no ta niun otro sino e spiritu di e imperio Romano morto, sintá koroná riba esaki su graf"—Thomas Hobbes, Leviathan. Kon e sita ei ta yuda nos komprondé kiko Daniel 2 ta siña tokante e Imperio Romano?

Den Daniel 2, sinku reino a ser deskribí, maske e kapítulo mes ta identifiká spesífikamente solamente dos: esun di promé, Babilonia (v. 37, 38) i e último, e reino di Dios (v. 44). Sinembargo, manera nos lo mira den mas detaye despues, Daniel 7 i Daniel 8 ta kubri hopi di e mesun tereno, solamente for di diferente perspektivanan. Tambe, den e dos kapítulonan ei, dos mas di e sinku reinonan ta ser nombrá.

Read Daniel 8:20, 21. Kua dos reino ya diskutí den e estudio di ayera, ta ser menshoná spesífikamente?

Si nos mester a traha un tabèl di e reinonan deskribí, i nombrá spesífikamente, den Daniel, e lo tabata parse asina’ki:

Babilonia (Dan. 2:37, 38)
Medo-Pèrsia(Dan. 8:20)
Gresia (Dan. 8:21)
Di kuater reino
E reino eterno di Dios(Dan. 2:44)

Lesa Daniel su mes interpretashon di e vishon (Dan. 2:37-45). Bo ta mira kalke kos einan ku ta indiká ku e profesianan aki por tin diferente nifikashonnan den diferente tempunan? Defendé bo kontesta.

Anke e di kuater reino no ta ser nombrá, ta un poder so por pas posiblemente (despues lo bai mas riba esaki). Sinembargo, di e sinku reinonan deskribí, kuater ta ser nombrá. E profesia ta bisa apsolutamente nada tokante ku nan tin kumplimentu múltiple, esta, e reinonan simbolisando un kos den un era, i un otro kos den un otro. Konsiderando loke ta nombrá, imperionan enorme ankrá inmovibel i inkambiabel den historia mundial mes, e idea ku di un òf otro manera nos por duna e profesianan spesífiko aki den Daniel diferente kumplimentu den diferente era siguramente no ta lanta for di nada den e tekstonan mes. Den kòrtiku, no tin apsolutamente niun hustifikashon pa e idea ku e profesia ei ta habrí pa diferente kumplimentu den diferente tempunan den historia.

Pa aworakí, un punto lo mester ta hopi kla enkuanto di nos estudio di Daniel 2, i esei ta ku, den hopi forma, e ta un estudio históriko. Anke algun di e profesia ta hiba den nos tempu i mas despues, su fundeshi ta basá riba historia.

Lesa Daniel 2:37-45 atrobe. Resumí den djis dos liña, e mensahe básiko di e tèkt aki.

E profesia aki ta kuminsá den antigwedat i ta sigui un panorama kontinuo di historia mundial ku ta ekstendé te na “e tempu di fin” (Dan. 12:9); esei ta, mas ayá di nos i den e mundu futuro di e reino eterno di Dios.

Mas ku kalke otro kos, e vèrsnan aki ta revelá tambe e método kon nos lo mester interpretá e profesianan den Daniel. Daniel 2:37-44, dor di interpretá e soño, ta kontené e yabi pa komprondé e profesianan, pasobra e tèkstnan mes ta interpretá e profesianan. Esaki ta prueba ku e aserkamentu historisista di interpretashon (di kua ta kasi Atventistanan so ta tene na dje ainda) ta loke e tèkst ta demandá. E aserkamentu historisista ta siña loke Daniel 2 ta siña, ku e profesianan aki ta sigui e panorama di historia di humanidat for di antigwedat te eternidat i ku nan no ta enfoká solamente riba susesonan den pasado lehano òf solamente riba susesonan den futuro, pero ta kubri e panorama di historia mundial for di pasado te den futuro. Asina, den e promé sekshon profétiko di Daniel nos t ser duná e yabi pa komprondé su profesianan.

Lesa Daniel 2:34, 35 i su interpretashon den vèrsnan 44, 45. Kiko nan ta bisa nos tokante e naturalesa di e último reino aki den kontraste ku e destino di tur e reinonan promé kuné? Kiko nos ta haña den e tèkstnan aki ku ta prueba ku e reino aki no a ser establesé ainda?

“Algun lo tuma e bèrdat aplikabel na nan tempu i pon’é den futuro. Susesonan den e trein di profesia ku tabatin nan kumplimentu leu den pasado ta ser hasí futuro, i asina dor di e teorianan aki e fe di algun ta debilitá.” —Ellen G. White, Selected Messages, vol. 2, p. 102.

Manera nos a mira e siman aki, Daniel 2 ta presentá un kaso poderoso pa nos konfiansa den e inspirashon di e Palabra. Kon un hende, seis siglo promé ku Kristu, por a deliñá historia di mundu asina eksakto manera e a hasi, ta algu ku ta desafiá un splikashon puramente natural. E punto ei ta asina opvio, ku algun hende a reklamá ku e profesia ta vaticinium ex eventu (profesia despues di e evento), ku e buki di Daniel tabata skibí den e di dos siglo promé ku Kristu i ku e tabata solamente tokante eventonan di pasado, eventonan promé ku e a ser skibí.

Promé ku tur kos, e palabranan di Kristu den Mateo 24:15 ta prueba ku Hesus tabata kere ku algun di e profesianan di Daniel ainda tabata futuro.

Di dos, asta si un hende lo a rechasá e palabranan di Daniel mes tokante e tempu ku e tabata biba (Dan. 1:1, 2:1, 7:1, 9:1) i data e buki den e di dos siglo promé ku Kristu, kon esaki ta splika e eksaktitut asombroso ku kua e a predesí no solamente e dominio mundial di e Imperio Romano (ku no a sosodé ainda) ma su kiebro den loke a bira e nashonnan di Oropa moderno, kua, den su estado aktual, ta eksaktamente manera Daniel a skibi? E no ta malu pa un hòmber skibiendo siglonan promé ku algun di e eventonan aki a sali na kla. Den kòrtiku, no tin ningun motibu ku nos lo mester aseptá e fecha di e di dos siglo promé ku Kristu pa Daniel, spesialmente ora e idea a originá dor di hende ku tabata ke desakreditá Kristianismo pa kuminsá kuné. Komo Kristiannan, nos mester tuma e Palabra pa loke e ta bisa, na lugá di loke hende ta bisa.

Preguntanan di Diskushon:

Komo klas, papia tokante boso kontestanan riba e pregunta final di djadumingu.

Na ki maneranan e profesia di Daniel 2 por ta un hèrmènt di testimonio poderoso, spesialmente pa esnan ku ta duda asta tokante e eksistensia di Dios?

SABAT

DJADUMINGU

DJALUNA

DJAMARS

DJARASON

DJAWEPS

DJABIÈRNÈ

DJADUMINGU		9 di yüli

DJALUNA		10 di yüli

DJAMARS		11 di yüli

DJARASON		12 di yüli