Les 5

Versíkulo di Memoria:

“I e a bisa mi: 'Dos mil treshen anochi i mainta; e ora ei e lugá santu lo ser purifiká'” (Daniel 8:14).

Daniel 8, manera nos lo mira pronto, ta kubri hopi di e mesun tereno ku Daniel 2 i Daniel 7.E ta mustra un fluho di historia, kuminsando den antigwedat i bayendo dor di e “tempu di fin” (Dan. 8:17), e promé bia ku e frase ta aparesé den e buki di Daniel (pero no e último bia). Huntu ku e evidensia poderoso for di kapítulonan anterior ku Daniel ta trata ku eventonan di fin di tempu, Daniel 8 ta sali stret i ta bis’é, un problema pa esnan ku ke limitá e eventonan di Daniel 8 na un periodo históriko den historia di Israel ku a terminá den siglo 2 promé ku Kristu, un punto di bista ku pa e motibu aki (i otronan) ta insostenibel.

Tambe, meskos ku Daniel 2 i 7, Daniel 8 ta partí den dos sekshon: un soño/vishon i despues un splikashon di e soño/vishon ei. Den Daniel 8, e promé 14 vèrsnan ta trata ku su vishon, den kua Daniel ta mira un chubatu di karné, un chubatu di kabritu i un kachu chikitu, siguí pa purifikashon di e santuario. Sobrá di e kapítulo ta e splikashon duná na dje tokante e chubatu di karné, e chubatu di kabritu i e kachu chikitu. Interesante ta ku e parti, tokante e purifikashon di e santuario, no ta ser spliká akinan. I, manera nos lo mira, anke e ta ser bisá spesífikamente ku e vishon di e santuario ku ta ser purifiká “ta bèrdat” (v. 26), Daniel ta bisa ku e no ta komprond’é (v. 27). Esaki ta pasobra e no ta ser spliká, manera e otro elementunan den e vishon. E punto aki ta bira importante despues, ora nos studia e siguiente kapítulo, den kua finalmente un splikashon ta ser duná.

Lesa Daniel 8:1-14. Riba e liñanan aki bou, resumí e vishon. Konsentrá spesialmente riba e sekuensia di eventonan manera presentá na Daniel.

Despues Daniel a ser duná e vishon di e chubatu di karné, e chubatu di kabritu, e kachu chikitu i e purifikashon di e santuario, ripará kiko ta sosodé den vèrsnan 15 te ku 18. Daniel ta bisa ku e a buska e nifikashon di loke a pasa su dilanti den vishon. Un “bos di hòmber” a grita e ora ei i bisa e angel Gabriel pa “hasi e hòmber aki komprondé e vishon.” Despues Gabriel ta aserká Daniel. Ripará tambe kon e angel ta introdusí su palabranan. Dos bia (v. 17, 19) e ta bisa Daniel ku e vishon tin di hasi ku “e fin”.

Refiriendo na tantu Daniel 2 i Daniel 7, nos a bisa ku Medo-Pèrsia i Gresia a ser deskribí komo algun di e gran podernan ku lo a lanta den historia mundial. Aki, awor, no tin reimentu: Gabriel ta sali stret i ta nombra nan. (Distinto for di e otro dos vishonnan, Babilonia no ta ser deskribí aki den Daniel 8; den un otro siman nos lo wak dikon).

Despues di nombra Medo-Pèrsia i Gresia (v. 20, 21) e ta duna un splikashon di e poder di e kachu chikitu ku ta lanta despues. Anke nos lo wak e mas den detaye mayan, ripará kon e poder di e kachu chikitu aki ta ser destruí (v. 25), lenguahe masha similar na kon Daniel a deskribí e intervenshon sobrenatural di Dios ku ta trese e fin di mundu (v. 34).

Den nos investigashon di Daniel, nos a mira ku e a trata ku sinku reino, di kua kuater a ser nombrá pa nos: Babilonia (Dan. 2:38), Medo-Pèrsia (Dan. 8:20), Gresia (Dan. 8:21),e reino eterno di Dios (Dan. 2:44; 7:14, 18, 22, 27). E úniko ku no a ser nombrá spesífikamente ta esun ku, den tur tres vishon, ta lanta despues di Gresia i ta eksistí te na fin di tempu. Aki bou tin un tabèl ku tur e reinonan di tera deskribí, esnan nombrá i esun no nombrá:

Daniel 2	Daniel 7	Daniel 8
Babilonia	Babilonia
Medo-Pèrsia	Medo-Pèrsia	Medo-Pèrsia
Gresia	Gresia	Gresia
Siguiente reino	Siguiente reino	Siguiente reino
Destrukshon sobrenatural na final	Destrukshon sobrenatural na final	Destrukshon sobrenatural na final

Di loke bo a studia te asina leu, kiko ta e identidat di e poder di e kachu chikitu ei den Daniel 8? Ki motibunan bo por duna pa bo konklushon?

E kontesta opvio, naturalmente, ta Roma (tantu pagano i papal). At’akí djis algun di e hopi motibunan pakiko:

Ora wak e paralèlnan entre e vishonnan, hende por mira ku e tabata Roma den Daniel 2, Roma den Daniel 7; asina, opviamente, e ta Roma den Daniel 8.

E poder di e kachu chikitu ta bin despues di Gresia i ta ekstendé te na e tempu di fin, ora e ser destruí sobrenaturalmente. Kua poder, lantando despues di Gresia, ta eksistí awe ainda?

Ripará tambe ku Medo-Pèrsia ta ser deskribí komo “grandi” (v. 4) i ku Gresia ta deskribí komo “masha grandi” (v. 8). Kontrali na esei, e poder di e kachu chikitu ta deskribí komo “masha grandi mes” (v. 9). Anke hende por diskutí si “masha grandi mes” ta mas ku “masha grandi”, “masha grandi mes” siguramente ta mas ku djis “grandi”. Asina, e poder di e kachu chikitu aki ta, a lo ménos, mas grandi ku e Imperio di Medo-Pèrsia. Atrobe, kua poder, lantando despues di Gresia, eksistiendo te na fin, lo por ser deskribí komo mas grandi ku Medo-Pèrsia, ku no ta Roma?

Nos a mira siman pasá kon e poder di e kachu chikitu den Daniel 7 tabata klaramente Roma papal. Nos tin akinan e mesun símbolo den Daniel 8. Tur dos tambe ta ser deskribí komo podernan ku ta pèrsiguí.

E evidensia ku nos a mira te asina leu ta aplastante ku e poder di e kachu chikitu ku a lanta despues di Gresia den Daniel 8 ta e mesun poder ku ta lanta despues di Gresia den tantu Daniel 2 komo Daniel 7, i esei ta Roma, kuminsando komo Roma pagano i despues ta kambia den Roma papal.

E dos fasenan ta ser mirá den e ilustrashon di tur tres kapítulo. Den Daniel 2, manera nos a mira, e heru ku ta lanta despues di Gresia (e bròns) ta ekstendé te na fin, anke e forma ta kambia den e pianan, ora e bira mesklá ku klei. Miéntras e énfasis aki ta mas polítiko ku religioso i e enfoke ta riba e vários nashonnan mes, e kambio aki den Roma ta koinsidí ku e lantamentu di e papado, tantu den tempu komo den lugá. Riba tur kos, den Daniel 2 nos ta mira e idea di Roma kambiando forma na algun punto den historia.

Den Daniel 7, manera nos a mira, e di kuater bestia a bin promé, siguí pa e kachu chikitu, un otro fase di e mesun poder.

Repasá e detayenan di e kachu chikitu den Daniel 8. Kua ta e elementunan religioso ku ta ser revelá einan den e fase aki di Roma?

Den vèrs 8, despues di a deskribí e kiebro di Gresia den diferente reino, e kachu chikitu ta ser deskribí komo biniendo for di un di “e kuater bientunan di shelu” (v. 8), su antesedente inmediato. Mesora despues di esaki, e dos fasenan di e aktividat di e kachu chikitu tambe ta ser revelá.

Kua ta e aktividat direkshonal di e kachu chikitu manera deskribí den Daniel 8:9? Hasi un kontraste di e aktividat direkshonal ei ku loke e kachu chikitu ta hasi den vèrsnan 10-12. Ki diferensha bo ta mira?

Den vèrs 9 e kachu chikitu ta move horizontalmente krusando kara di tera, deskribiendo ekspanshon militar òf polítiko (kompará ku Dan. 8:4). Den e siguiente vèrsnan e aktividat ta ser deskribí komo vertikal, direkshon di shelu, den un atake riba e “ehérsito di shelu”, riba e “Komandante di e ehérsito”, asta kontra e santuario mes. Anke, opviamente, e kachu chikitu no ta yega literalmente den shelu mes, loke esaki ta deskribí ta e naturalesa religioso di su atake. Asina, aki den Daniel 8 tambe, nos a ser duná dos fase di e mesun poder: promé e fase pagano, despues e aktividat religioso diferente di a fase papal.

Den repaso, loke nos a studia den Daniel 8 te asina leu, por ser resumí asin’aki:

Manera mustrá mas promé, tur kos den Daniel 8 a ser interpretá dor di Gabriel ku eksepshon di e purifikashon di e santuario. Anke niun splikashon spesífiko a ser duná, ta haña un indikashon poderoso den e kapítulo.

E vishon di Daniel 8:14 ta terminá ku purifikashon di e santuario despues di un deskripshon di aktividat di e kachu chikitu den un sierto periodo históriko; despues di e deskripshon di e kachu chikitu (v. 22-25), e splikashon ta terminá ku un evento spesífiko (v. 25, último parti). Kua ta e evento aki, i kon e ta yuda nos un tiki pa yega na komprondementu tokante kiko e purifikashon di e santuario ta enserá?

Si nos mester a hasi un paralèl entre e vishon di Daniel 8 ku su splikashon, e lo mustra asin’aki:

Kiko mas e purifikashon di e santuario ta enserá, e ta resultá den destrukshon sobrenatural di e último imperio terenal aki, loke ta pasa den tantu Daniel 2 komo 7, ora Dios establesé Su reino eterno. Asina, e idea ku ta limitá e purifikashon di e santuario na un evento meramente humano, manera eliminashon di enemigunan for di e teritorionan di tèmpel den siglo 2 promé ku Kristu, ta kai na pida pida. Ta bisto for di e konteksto, spesialmente ora mir’é den paralèl ku Daniel 2 i Daniel 7, ku e purifikashon di santuario aki ta un evento di mayor importansia. Enbèrdat, djis e echo ku e ta konektá ku e lanta i kai di loke Beibel ta deskribí komo podernan mundial mayó den i di su mes ta testifiká di e importansia di e purifikashon di e santuario.

Aki bou tin un tabèl resumiendo loke nos a mira te asina leu den e simannan ku a pasa. Kiko esaki ta bisa nos ku e purifikashon di e santuario ta?

Manera nos ta mira henter e kaminda te aki, tin paralèlnan entre e kapítulonan. I no solamente e nashonnan a ser deskribí den paralèl un ku otro, e esena di huisio den Daniel 7, kua ta tuma lugá despues di un periodo di tempu diferente enkuanto di Roma (e 1.260 añanan), ta un paralèl direkto ku e purifikashon di e santuario, kua ta sosodé den Daniel 8 despues di Roma tambe. Den kòrtiku, e huisio selestial aki den Daniel 7, e huisio ku ta hiba na e fin di mundu, ta e mesun kos ku e purifikashon di e santuario den Daniel 8. Nos ta ser duná aki dos diferente deskripshon di e mesun kos: e huisio, tambe konosí komo purifikashon di e santuario den Daniel 8.

Di akuerdo ku e tabèl aki, unda e huisio aki ta, mirá for di e punto di bista di tempu, den relashon ku e Segunda Binida?

E punto krusial ta e paralèl entre e gran esena di huisio aki den Daniel 7 i e purifikashon di e santuario den Daniel 8. E esena di huisio den Daniel 7 ta simplemente un otro manera di ekspresá e purifikashon di e santuario den Daniel 8, meskos ku e deskripshon di e ber den Daniel 7 ta un otro manera di ekspresá e chubatu di karné den Daniel 8. Kada deskripshon ta añadí na e otro, ampliando riba otro, huntu dunando nos hopi informashon tokante e evento spesífiko. Loke ta inegabelmente kla ta ku e ta un evento pre-Atvènt; esta, esaki ta un huisio ku ta tuma lugá promé ku e Segundo Binida. Enbèrdat, ta e huisio aki mes ta esun ku ta hiba direktamente na e Segundo Binida.

Wak e paralèlnan aki entre Daniel 7 i 8, e bia aki ku e fechanan aproksimá pa e eventonan deskribí den e dos kapítulonan:

Daniel 7	Daniel 8
Babilonia	_____________________
(Ta terminá promé mitar di siglo 6 promé ku Kristu)
Medo-Pèrsia	Medo-Pèrsia
(Di promé mitar di siglo 6 pa promé mitar di siglo 4 promé ku Kristu)
Gresia	Gresia
(Di promé mitar di siglo 4 te promé mitar di siglo 2 promé ku Kristu)
Roma Pagano	Roma Pagano
(Di promé mitar di siglo 2 promé ku Kristu te siglo 5-6 despues di Kristu)
Roma Papal	Roma Papal
(Fase di e persekushon deskribí: for di siglo 6 despues di Kristu te siglo 18-19 despues di Kristu)
Huisio den shelu	Purifikashon di santuario
Segundo Binida	Destruí sin man

Loke ta kla for di e tabèl ta ku pasobra e huisio den Daniel 7, kua a tuma lugá despues di e 1.260 añanan, ta mesun kos ku e purifikashon di e santuario den Daniel 8, e ora ei e purifikashon di e santuario den Daniel 8 a tuma lugá despues di e 1.260 añanan tambe. E echo aki e ora ei ta pone e purifikashon di e santuario algun tempu despues di e último parti di siglo 18 i komienso di siglo 19, sinembargo promé ku e Segundo Binida di Kristu. Anke e puntonan aki ta yuda aserka mas e tempu di e huisio pre-Atvènt, ainda nan no ta duna nos un fecha eksakto. Mester di mas informashon; ta p’esei, manera nos lo mira, mas informashon ta ser duná.

Preguntanan di Diskushon:

Komo klas, repasá e puntonan prinsipal di e lès di e siman aki. Sea sigur ku tur hende ta komprondé e paralèlnan entre e kapítulonan. Purba kontestá kualke pregunta ku lanta mas mihó ku bo por.

E último vèrs di Daniel 8 ta siña ku sierto aspektonan di e vishon tabata deskonosí pa Daniel. Ki lès tin ei pa nos enkuanto di e nesesidat pa primi bai dilanti den fe apesar ku tin kosnan ku nos no ta komprondé ainda?

Vishon	Splikashon
Chubatu di karné Chubatu di kabritu Kachu chikitu Santuario purifiká	Medo-Pèrsia Gresia Roma Terminashon sobrenatural di e kachu chikitu

SABAT

DJADUMINGU

DJALUNA

DJAMARS

DJARASON

DJAWEPS

DJABIÈRNÈ

DJADUMINGU		23 di yüli

DJALUNA		24 di yüli

DJAMARS		25 di yüli

DJARASON		26 di yüli