Les 6

Versíkulo di Memoria:

“Nos a peka, a kometé inikidat, a hasi maldat i a rebeldiá, asta dor di bandoná Bo mandamentunan i Bo ordenansanan” (Daniel 9:5).

Promé ku bo sigui aki, sea sigur ku bo ta komprondé e diagramanan ku nos a wak e simannan ku a pasa. Nan ta forma un base inmovibel pa loke ta sigui. E punto krusial ku mester ser komprondé awor ta ku e esena di huisio den Daniel 7 i e purifikashon di santuario den Daniel 8 ta e mesun evento i ku e evento aki ta tuma lugá algun tempu despues di e periodo di 1.260 aña ku a deskribí un fase di persekushon papal di e santunan.

Mientrastantu, konsiderando e kuadro di tempu pa e evento aki, fin di siglo 18 òf kuminsamentu di siglo 19, kua ta e úniko santuario posibel ku ta ser purifiká aki, esun riba tera òf esun den shelu (mira Mat. 24:2; Luk. 21:6; Hebr. 8:1, 2)? E kontesta ta opvio.

Finalmente, wak loke Señor a uza pa forma e siñansa importante di e purifikashon di e santuario, e enorme imperionan mundial, kosnan asina inmovibel, inkambiabel i verifikabel ku ta posibel den e mundu aki. Señor no ta pidi nos pa basa nos fe riba kosnan inkompletu, vago; na lugá di esei E ta forma e gran bèrdatnan aki rondó di historia di mundu, un base mas firme posibel. Opviamente, Dios ke pa nos kere e bèrdatnan aki; ta p’esei E ta hasié fásil pa nos kere.

E siman aki nos ta move pa Daniel 9, e enlase final den e sekuensia asombroso di profesia i historia.

Lesa Daniel 9:1. Kua diferensha mayó ta aparesé aki den kontraste ku e tres kapítulonan anterior ku nos a studia te asina leu?

E kontesta, te na sierto grado, tambe ta yuda splika loke nos a nota den Daniel 8: ku diferente for di e dos kapítulonan anterior, Babilonia no a ser deskribí. Mas bien, Daniel a kuminsá ku Medo-Persia. Ta parse ku den Daniel 8 kaba Señor tabata mustra den direkshon di futuro, na e siguiente reino ku lo a lanta, ku tabata Medo-Persia.

Ta importante tambe pa opservá algu tokante e kapítulonan anterior. Manera nos a mira, Daniel 2 tabata un soño/vishon i un splikashon di e soño/vishon ei. Tur kos a ser spliká.

Den Daniel 7, e mesun kos: un soño/vishon i un splikashon di tur kos ku a ser mustrá na dje.

Den Daniel 8, sinembargo, a lanta un diferensia: Tabatin un soño/vishon i un splikashon. Sinembargo, manera nos a mira, no tur kos a ser spliká.

Repasá Daniel 8. Atrobe, kua tabata esun kos ku no a ser spliká na Daniel den kapítulo 8?

Distinto for di e vishonnan ruman ku a bai promé kuné, Daniel 8 ta terminá ku Daniel bisando ku e no a komprondé e “vishon”. Kua vishon? Opviamente, tabata e parti di e vishon ku tabata trata ku e 2.300 anochi i mainta di vèrs 14. Despues di tur kos, tur otro kos a ser spliká; den algun kaso algun dje podernan deskribí den Daniel 8 a ser asta nombrá (v. 20, 21). Den niun di e vishonnan anterior Daniel a sali bisando ku e no a komprondé algu, maske den algun kaso e splikashonnan no tabata asina presis manera den partinan di Daniel 8. Solamente den Daniel 8 e ta bisa ku tabatin algu ku e no a komprondé, i esei ta opviamente e “vishon” di e 2.300 dianan, e úniko parti di e kapítulo ku no a ser spliká spesífikamente.

Asina nos ta sali for di Daniel 8 i drenta Daniel 9 ku solamente un kos ku no ta kla pa Daniel na e momento aki: e vishon di e 2.300 dianan den Daniel 8:14.

Manera nos ta mira, Daniel awor ta bou di reinado di e Medonan i e Persanan, un kumplimentu direkto di e profesianan anterior di Daniel 2, 7, i 8.

Sinembargo, tin un gran problema pa Daniel. Su pueblo ta den koutiverio ainda, e tèmpel ta den ruina ainda, i su nashon no a ser restorá.

Lesa Daniel 9:2. Di kua promesa i profesia Daniel ta haña algu di speransa?

Apesar di tur e speransanan di grandesa nashonal, e nashon Hudiu a ser tumá den koutiverio dor di un poder pagano. For di un perspektiva lógiko, e lo mester tabata e fin di e Hudiunan i Yudá pa semper. Sinembargo, Señor no tabata kla ku Su pueblo. Anke e profetanan a spièrta tokante huisio, kondena i destrukshon, nan a duna e Hudiunan tambe e gran speransa di redenshon i restorashon.

Lesa Yeremias 29:10-12. Ki speransa bo ta kere ku Daniel ta saka for di e profesia aki? Mira tambe Yer. 25:11, 12.

Di akuerdo ku Su promesa, Señor enbèrdat a restorá Su pueblo na e tera ora E a bisa ku E lo a hasié. Esaki a ser registrá klaramente den 2 Krónikanan 36:18-23.

Lesa e vèrsnan ei den Krónikanan. Kiko nan ta bisa nos tokante Dios i Su promesanan?

Tabata falta ainda poko aña pa kumplimentu di e promesanan ei, ora e eventonan di Daniel 9 a tuma lugá. E 70 añanan, kuminsando 605 promé ku Kristu ku e konkista di Yerusalèm i e eksilio di Daniel i di e otro katibunan, kasi a ser kompletá. Sinembargo, nada no tabata sosodé. Su pueblo tabata den eksilio ainda, Yerusalèm tabata den ruina ainda, i e tèmpel no tabata ni serka di ser rekonstruí. Anke Daniel tabata testigu di e lantamentu di e Medo-Persanan, manera predesí, mas kos mester a sosodé, eventonan grandi ku for di perspektiva humano lo a parse imposibel. Den e konteksto aki nos por komprondé mihó e orashon ku ta sigui.

Lesa e orashon di Daniel den Daniel 9:3-19. Riba e liñanan aki bou, resumí e esensia di loke Daniel tabata hasi orashon p’e.

Daniel ta rekonosé e pikánan di su pueblo; no tabatin èksküs di su parti pa hustifiká nan akshonnan. Kiko nos por siña di esaki pa nos mes?

Daniel ta aklará ku e piká di su pueblo tabata envolví bira for di e Palabra di Dios. Ki lès tin aki pa nos tambe?

Asta meimei di tur e kastigu, tristesa i huisio, kua tur tabata meresí, Daniel ta roga na Dios pa miserikòrdia, grasia i restorashon. Ki speransa e ta duna nos enkuanto di nos mes fayonan?

Si bo lesa e orashon di Daniel, lo bo ripará ku un kos no tei. Lo bo ripará ku Daniel no ta hasi Señor un solo pregunta: Dikon tur e kosnan aki a pasa ku nos? I esei ta pasobra e sa dikon tur esaki a sosodé. E pueblo a desobedesé Dios. Daniel no a hasi pregunta den su orashon. E no ta buska lus, sabiduria òf komprondementu. Den konteksto di loke e ta papia di dje, e ta komprondé e asuntunan: Israel a peka, a ser kastigá, i awor e ta roga pa e restorashon primintí.

E punto ta ku niun kaminda den su orashon Daniel ta buska komprondementu. E último bia, a lo ménos manera registrá den Skritura, ku Daniel tabatin mester di komprondementu tabata en kuantu di e profesia di 2.300 dia di Daniel 8:14, loke e a bisa spesífikamente ku e no a komprondé na final di e último kapítulo (Dan. 8:27).

Lesa Daniel 9:20-22 i wak loke ta sosodé. Despues ku Daniel a hasi orashon, e angel Gabriel a aparesé na dje. Esaki, sinembargo, no tabata e promé aparishon di Gabriel na Daniel.

Ki ora tabata e último bia ku Gabriel a ser mirá den e buki di Daniel? Mira Dan. 8:16.

Kòrda tambe ku den Daniel 8 Gabriel a risibí òrdu pa hasi Daniel komprondé loke e a mira den vishon. I manera nos a mira, e a hasi nèt esei, ku eksepshon di e vishon di e 2.300 dianan.

Awor, sinembargo, Gabriel ta aparesé atrobe na Daniel, ku ta referí na dje komo esun ku e a mira “den e vishon na kuminsamentu” (v. 21). Anke e no ta bisa kua vishon spesífiko esei tabata, e úniko otro bia ku Gabriel ta aparesé den Daniel ta den kapítulo 8, di manera ku siguramente ta lógiko pa asumí ku ta na e vishon ei Daniel ta referí.

Manera nos a mira ayera, niun kaminda den e orashon di Daniel e a pidi pa “komprondementu”. E último bia ku e tabatin mester di komprondementu tabata tokante e 2.300 dianan. Awor e mesun angel interpretadó ta aparesé i ta bisa spesífikamente ku e a bin pa dun’é “komprondementu”. Komprondementu tokante kiko? Opviamente e 2.300 dianan, e último bia ku Daniel tabatin mester di komprondementu.

En realidat, e verbo rais Hebreo (bin), tradusí “komprondé” (Dan. 8:27), ta e mesun palabra rais ku ta aparesé den Daniel 9:22, kaminda Gabriel ta bisa ku e a bin pa dun’é disernimentu i komprondementu (di bin). Asina, Gabriel ta bin serka Daniel i ta dun’é e “komprondementu” (bin) ku e no tabatin na final di Daniel 8!

Tambe, nota ki sorto di profesia Daniel 8:14 tabata; e tabata un profesia di tempu. Mesora despues ku Gabriel bin serka Daniel i ofresé pa dun’é komprondementu, ki sorto di profesia e ta dun’é (mira Dan. 9:24)? Naturalmente, un profesia di tempu. Klaramente, e vishon di Daniel 9 ta konektá ku parti di e vishon den Daniel 8, e 2.300 dianan. Miéntras Daniel 2 i 7 tabatin un vishon i splikashon kompletu, Daniel 8 tabatin un vishon i un splikashon parsial. Den Daniel 9 no tabatin un vishon sino solamente un splikashon, un splikashon di loke no a ser spliká den Daniel 8.

Komo si fuera e informashon di e par di dianan anterior no tabata sufisiente pa konektá Daniel 9:24-27 ku Daniel 8:14, Señor a duna nos ainda mas evidensia pa hasi e konekshon ei.

Den Daniel 8;1, 2 Daniel ta referí tres bia na e “vishon” di e kapítulo; kada bia e ta bin di e mesun palabra Hebreo hazon: “Den e di tres aña di e reinado di rei Belsasar a paresé na ami, Daniel, un vishon [hazon], despues di esun ku a paresé na mi anteriormente. I mi a mira den un vishon [hazon]; i a sosodé, miéntras mi tabata wak, ku mi tabata den e sitadel di Susa, ku ta keda den e provinsia di Elam; i mi a mira den e vishon [hazon] ku mi tabata banda di Riu Ulai” (Dan. 8:1, 2).

E ora ei Daniel ta deskribí kiko e ta mira den e hazon: e chubatu di karné, e chubatu di kabritu, e kachu chikitu, etcetera. P’esei hazon ta referí na e vishon general di kapítulo 8.

Kontrali na esei, ora e papia spesífikamente tokante e 2.300 dianan, Daniel ta usa u palabra diferente pa vishon, mareh. “I e vishon [mareh] di e anochi i e mainta ku a ser duná, ta bèrdat. ... I ami, Daniel, a keda agotá i malu pa dianan largu; despues mi a lanta i a hasi e asuntunan di rei; i mi tabata babuká di e vishon [mareh], pero mi no a komprond’é” (Dan. 8:26.27).

Asina, nos tin dos palabra pa “vishon” den Daniel 8: hazon pa henter e vishon, mareh pa Daniel 8:14, e vishon tokante e 2.300 dianan i purifikashon di e santuario, e parti ku Daniel no a komprondé (Dan. 8:27).

Awor e dos palabranan aki ta paresé atrobe den Daniel 9, ora Gabriel paresé na Daniel. “Miéntras mi tabata papia ainda den orashon, e hòmber Gabriel, kende mi a mira den e vishon [hazon] anteriormente....a papia ku mi....Na kuminsamentu di bo súplikanan e òrdu a ser duná, i mi a bin pa konta bo esaki, pasobra bo ta masha stimá: p’esei komprondé e asuntu i konsiderá e vishon [mareh]” (Dan. 9:21-23).

Konsiderá kua mareh? Ta un so tin: e mareh di e 2.300 dianan ku Daniel a bisa spesífikamente ku e no a komprondé. En realidat, e palabra tradusí “konsiderá” ta bin di bin, kua tambe ta konekt’é ku e mareh di Daniel 8:26, ku Daniel tabatin mester di komprondementu (bin) di dje.

Klaramente,e splikashon di Daniel 9:24-27 ta konektá ku e 2.300 dianan di e kapítulo anterior. Gabriel a bin pa duna Daniel komprondementu tokante e mareh di e 2.300 dianan!

Pa mas Estudio: Ellen G. White, The Great Controversy, pp. 345-347; Prophets and Kings, pp. 553-556.

Daniel 8 ta terminá ku e mareh di e 2.300 dianan ku no a ser spliká. Gabriel, e mesun angel interpretadó den Daniel 8, ta paresé den Daniel 9 i ta bis’é pa komprondé e mareh. E úniko mareh ku Daniel no a komprondé tabata e mareh di 8:14 i 8:26, kua tabata un profesia di tempu. E ora ei, inmediatamente despues di bis’é pa komprondé e mareh, un profesia di tempu, kiko Gabriel ta duna Daniel? Un otro profesia di tempu.

Nada straño ku Atventistanan ta mira un konekshon poderoso entre e dos kapítulonan i dos profesia. Nos no ta so tampoko. E siguiente sita ta bin for di un komentario Hudiu Òrtodòks riba e buki di Daniel. Aki bou tin un ekstrakto di e frase “konsiderá e mareh” den Daniel 9:23, anke e komentario aki ta tradusié “haña komprondementu di e vishon”. Kiko e Hudiunan aki ta hasi ku e profesia di 70 siman?

“Esaki ta referí na e vishon di Daniel den kapítulo 8 den kua e parti ku a trastorn’é asina (v. 14) ta ser karakterisá den v. 16-26 komo un mareh.”—Daniel, Art Scroll Tanach Series (Brooklyn, New York: Mesorah Publications, Ltd., 1988), p. 258.

Asina, e Hudiunan Òrtodòks aki ta hasi ku e profesia di 70 dia eksaktamente loke nos ta hasi: esei ta, nan ta konekt’é ku e 2.300 dianan di Daniel 8:14.

Preguntanan di Diskushon:

Komo klas, repasá e material studiá e siman aki. Sea sigur ku tur hende ta komprondé e konekshonnan entre e dos kapítulonan.

Si bo lesa e orashon di Daniel, lo bo ripará ku bes tras bes e ta hasi orashon den promé persona di forma plural, "nos" a hasi esaki, "nos" a hasi esei. Dikon bo ta kere ku Daniel, ken ta ser deskribí den Skritura komo un karakter asina fiel, santu, ta inkluí su mes komo un di esnan ku a trese e kalamidat aki riba su mes pueblo? Ki mensahe tin aki pa nos tambe?

SABAT

DJADUMINGU

DJALUNA

DJAMARS

DJARASON

DJAWEPS

DJABIÈRNÈ

DJADUMINGU		30 di yüli

DJALUNA		31 di yüli

DJAMARS		1 di ougùstùs

DJARASON		2 di ougùstùs