Les 8

Lesa pa e siman aki:

Lev. 7:27; 17:10; Luk. 3:1-22; Rom. 5:8; Gal. 3:13; 1 Tes. 5:9, 10; 1 Pe. 2:24.

Versíkulo di Memoria:

“I mira, e kòrtina di e tèmpel a sker na dos for di ariba te abou; i tera a tembla i barankanan a splet” (Mateo 27:51).

Te asina leu, nos a mira ku Daniel 8 a terminá kaminda Daniel tabatin mester di mas splikashon tokante e 2.300 dianan. Daniel 9 ta proveé e splikashon ei. Gabriel, e mesun angel interpretadó den Daniel 8, ta mustr’é direktamente bèk na e mareh di Daniel 8, e úniko parti di e vishon ku e no a komprondé. Gabriel ta dun’é mesora un otro profesia di tempu, e 70 simannan, kua ta ser “kòrtá kitá afó”, opviamente for di e profesia di tempu mas largu, esun di e 2.300 dianan.

Diferente for di e 2.300 dianan, kua no ta menshoná un punto di komienso spesífiko, Daniel 9 tin unu: e “òrdu pa restorá i konstruí Yerusalèm”, kua nos a mira a ser publiká den 457 B.C.

Mientrastantu, 69 di e 70 simannan di e profesia ta yega na “e Mesias e Prens”, Hesus. Pues, Hesus Mes ta forma e sentro di e profesia aki; E ta e fundeshi, e punto di enfoke di e 70 simannan. Tur ta deskansá riba Hesus, “piedra di skina prinsipal” (Efe. 2:20).

Siman pasá nos a mira ku e “òrdu pa restorá i konstruí Yerusalèm” a sosodé den e reinado di e rei pérsiko Artaherhes. Esta, e no a ser publiká durante e tempu di Babilonia ma despues, den e siguiente reinado di Medo-Persia.

Ku kua reinado e profesia di Daniel 8 ta kuminsá? Kon e kontesta ei ta proveé un otro konekshon entre Daniel 8 i 9?

Daniel 9 ta duna e punto di komienso eksakto di e profesia di 70 siman, 457 B.C. Despues e ta bisa ku for di e punto ei, lo tin 69 siman te na “e Mesias e Prens”. 69 Siman ta suma 483 dia; aplikando e ora ei e prinsipio di dia-aña ta nifiká ku, for di e òrdu pa restorá i rekonstruí Yerusalèm te na e Mesias e Prens, lo pasa 483 aña.

Pa haña e fecha, bo mester kita 457 for di 483. Esei ta yega na 26, loke lo nifiká A.D. 26. Sinembargo, nos ta atendiendo ku un kalènder aki i no ku un liña di number stret, ku ta bai manera -2 -1 0 1 2 3. E kalènder naturalmente no tin un habrí pa 0 (no tin un aña 0). Mas bien, e kalènder ta bai asin’aki: -2, -1, 1, 2, òf mas spesífikamente, 2 B.C., 1 B.C., A.D. 1, A.D. 2. Asina, faltando e aña 0 riba kalènder, 483 aña lo ekstendé un aña mas na e kalènder, yegando na A.D. 27 na lugá di 26.

Lesa Lukas 3:1-22 Kua evento mayó ta ser pintá aki, i kon esaki ta yuda nos komprondé e nifikashon di e profesia di Daniel 9?

E profesia no ta papia tokante e nasementu di Hesus; na lugá di esei, e ta papia tokante di djE komo “e Mesias”, e “Ungí”, e Kristu; esta Hesus den Su kapasidat ofisial. Lukas ta pone e ministerio di Juan un e di diesinku aña di reinado di Tiberio, kua por ser fechá na A.D. 27. Mirando ku Juan a batisá Hesus djis despues ku e ministerio di Juan mes a kuminsá, nos tin e profesia inkreibel aki, duná mas ku 500 aña mas promé, mustrando na e ministerio di Hesus.

Te asina leu, den nos estudio di e profesia di 70 siman (490 aña), nos a kubri 69 siman (òf 483 di e 490 añanan ei). Tambe nos a wak dos diferente evento históriko ku por ser fechá ku eksaktitut. Wak e skèts aki bou:

Studia e skèts akiriba te ora e eventonan deskribí den dje ta kla pa bo.

Lesa Daniel 9:26. E ta bisa ku despues di e 62 siman e Mesias lo ser “kòrtá kitá afó”; esei ta e 62 siman ku ta bin despues di e promé 7 (mira v. 25), loke ta nifiká ku despues di e di 69 siman (A.D. 27) e Mesias lo ser kòrtá kitá afó, pero “no pa Su mes”.

Buska e siguiente tèkstnan (Isa. 53:5; Rom. 5:8; Gal. 3:13; 1 Tes. 5:9, 10; 1 Pe. 2:24). Kon nan ta yuda nos komprondé tokante di kiko e profesia aki ta papia?

Te ku aworakí e profesia a kubri e promé 69 siman. Vèrs 26 ta introdusí awor e último siman, e último 7 aña di e profesia, i e ta hasi esaki ku un imágen di e morto ekspiatorio di Kristu. No solamente E a ser “kòrtá kitá afó (un verbo diferente for di esun usá den 9:24), ma E a ser kòrtá kitá afó “no pa Su mes”, dunando e idea ku Su morto tabata na fabor di otronan. Nos ta mira akinan e aspekto supstitushonario di e sakrifisio di Kristu: Su morto no tabata pa Su mes, e tabata pa nos.

Ta interesante tambe ku e verbo (krt) usá pa “kòrtá kitá afó” ta direktamente konektá ku e sistema di sakrifisio Levítiko, ku esnan ku a violá e pakto ta ser “kòrtá afó” for di e pueblo. (Mira Lev. 7:27; 17:10; 20:6, 17). Den Daniel 9:26 nos ta mira un imágen di e Hesus inosente kòrtá kitá afó” pa e pikánan di otronan.

Lesa Daniel 9:27. Dos bia e ta papia tokante e “siman”. Na kua siman e ta referí?

Te asina leu, nos sa ku e profesia ta papia tokante di Hesus, i ku e di 69 siman a trese nos na Su boutismo den A.D. 27. Nos a mira tambe den vèrs 26 un referensia direkto na Su morto ekspiatorio. Despues di tur kos, esei tabata e motibu pa kua E a bin (Marko 10:45; Juan 3:14).

Tur loke a sobra di e profesia di 70 siman ta e último siman, e di 70, e último 7 añanan.

Kiko ta sosodé meimei di e último siman? Di kua periodo di tempu e ta papia?

Anke vèrs 26 a papia un poko dirèkt tokante di e morto di Hesus, vèrs 27 ta papia di dje den sentido di loke e a logra: fin di e sistema di sakrifisio terenal, a lo ménos den sentido ku nan no tabata di niun balor mas (despues di tur kos, algun hende awe ainda ta ofresé sakrifisio). E punto aki a ser hasí kla den Marko 15:34-39, ku e kòrtina di e tèmpel di sker na dos, señalando fin di e servisio di santuario terenal komo un símbolo legítimo di e ministerio di Kristu. E sakrifisio bèrdadero a ser ofresé finalmente; e sistema bieu mester a duna lugá na un nobo i mihó. Tur loke tabatin di aber ku e sistema bieu, e sakrifisio, e saserdosio i e santuario, a ser remplasá (mira Hebr. 9:1-15).

Esaki a sosodé ´meimei di e siman”. Esei lo mester tabata tres aña i mei (mitar di shete). Dor di konta Paskunan den Juan, nos por mustra ku tabata tres aña i mei despues, den primavera di A.D. 31, ku Hesus a ser krusifiká. Asina, nos skèts awor ta mustra asin’aki:

E último kos ku nos mester wak den e profesia di 70 siman ta ser hañá atrobe den Daniel 9:27: “E lo hasi un aliansa firme ku hopi hende pa un siman”. Kua siman esei ta? Opviamente, ta e di 70 siman, esun último den e profesia. Si nos kuminsá ku 457 B.C., e ora ei 490 aña despues ta trese final di e profesia di 70 siman na A.D. 34. Asina, e último siman, e di 70 siman, ta terminá na e fecha ei.

Daniel 9:27 ta papia tokante e “aliansa”. Na kua aliansa esei lo por ta referí? Eks. 19:5, 34:10, Lev. 26:45, 1 Reinan 19:10, Isa. 59:21, Yer. 50:5.

Asina, e profesia di 70 siman ta papia tokante di un afirmashon di e aliansa ku Dios a hasi ku Israel. Lo E “konfirmá e aliansa ku hopi hende” durante e periodo spesífiko ei, opviamente refiriendo spesífikamente na e hudiunan ku a aseptá Hesus e tempu ei. Anke e profesia mes no ta duna un evento spesífiko pa e último aña ei, A.D. 34, hopi hende ta kere ku tabata e aña ku apòstel Pablo a aseptá e evangelio i a bira un gran predikador na e Gentilnan (Echonan 9). Den otro palabra, e eksklusividat di Israel a terminá, i un era nobo den historia di salbashon a ser inougurá na fin di e 490 añanan ora e evangelio a bai na henter mundu.

Repasá e skèts akiriba te ora bo komprond’é sufisiente bon ku bo por splik’é na otronan.

Pa fasinante ku e profesia akiriba ta, nos mester kòrda ku e ta djis parti di un profesia mas largu, e 2.300 dia. Esta, e di 70 siman aki tabata, manera nos a mira, “kòrtá kitá afó” for di e mareh mas largu di Daniel 8. Asina, nos tin dos profesia di tempu aki, e 2.300 dianan, kua no tabatin un punto di komienso spesifiká, i e 70 siman, kua sí tabatin. P’esei nos tin e siguiente dos periodonan di tempu:

Manera nos a mira, e base di e profesia di 70 siman ta den Hesus, i pasobra e profesia di 70 siman ta djis parti di e profesia di 2.300 dia, e profesia ei ta basá den Hesus tambe. E siguiente paso ta opvio. E 70 simannan, kua tin un punto di komienso definí, ta ser “kòrtá kitá afó” for di e 2.300 dianan (mira mayan dikon e mester a ser “kòrtá kitá afó” na kuminsamentu, kontrali na final di e 2.300 dianan).

Traha e sòm. Si bo usa e 70 simannan komo e punto di komienso di e 2.300 añanan, na kua fecha bo ta yega?

Si bo konta 2,300 aña for di 457 B.C. (kòrda deskontá e aña 0 ku no ta eksistí), bo ta haña 1844; òf si bo konta e sobrá 1810 añanan for di A.D. 34 (2.300 ménos e promé 490 añanan), bo ta yega na 1844 tambe. Asina, e purifikashon di e santuario den Daniel 8:14 por ser mustrá di a kuminsá den 1844.

Bai bèk na siman 5, estudio di djabièrnè. Nos a mira for di e paralèlnan entre Daniel 7 i Daniel 8 ku e purifikashon di e santuario (e mesun evento ku e esena di huisio den Daniel 7) mester a sosodé despues di e periodo di 1.260 aña den Daniel 7 i tòg promé ku e Segundo Binida. Kon e kalkulashon hasí awe ta pas den e estudio ei?

Loke ta asina krusial tambe tokante di e profesia di 2.300 dia ta ku, siendo inegabelmente konektá ku e profesia di 70 siman, e ta inseparabelmente mará ku Hesus. Atrobe, hende no por kònkel ku e fechanan ei den niun manera supstansial sin kònkel ku e fechanan di Hesus. Hesus Mes ta e Siguridat di e profesia aki. Opviamente anto, Señor a haña e profesia di 2.300 dia sufisiente importante pa, den un sentido masha real, bas’é riba Hesus, riba e profesia mas grandi i mas eksakto tokante di Su ministerio terenal, e profesia di 70 siman di Daniel 9.

Pa mas Estudio: Ellen G. White, The Great Controversy, pp. 409-432 [kapítulo 23 and kapítulo 24].

Kon kla ku e ta ku e 70 simannan a ser kòrtá kitá afó for di e 2.300 dianan, dikon nos ta kòrta nan afó for di e kuminsamentu i no for di e final? E kontesta ta pasobra esei ta e úniko manera ku e ta funshoná lógikamente. Si nos kòrta e 70 simannan kita afó na final, e 2.300 dianan lo terminá den A.D. 34, un konklushon imposibel, duná e konteksto di Daniel 8, kua, paralèl na Daniel 7, ta konektá e 2.300 dianan na e tempu di fin, i esei imposibelmente a sosodé den A.D. 34. I tambe, si bo kòrta nan kita afó for di e final, e kuminsamentu di e profesia lo a kuminsá masoménos 1.600 aña promé ku Babilonia, e promé reino deskribí den e profesianan aki. Den otro palabra, pa kòrta nan kita afó for di e final no ta funshoná mes, duná e konteksto den kua nan ta paresé. Mientrastantu, pa kòrta nan kita afó na kuminsamentu ta pone e komienso di e profesia den e reinado di Medo-Persia, kua ta pas ku e konteksto di e vishon (Daniel 8 a kuminsá ku Medo-Persia) i ta pone nan fin despues di e 1.260 añanan pero promé ku e Segundo Binida, kua tambe ta pas perfektamente ku e konteksto di e vishon.

Preguntanan di Diskushon:

Komo klas, repasá loke a ser studiá den e par di simannan ku a pasa. Sea sigur, mas tantu posibel, ku tur hende ta komprondé loke a ser kubrí.

Dikon e fecha 1844 pa Daniel 8:14 ta mustra dikon e santuario ku ta ser purifiká ta esun selestial, i no esun terenal?

Dikon bo ta kere ta importante pa nos, komo Atventista, pa komprondé e profesia aki, konsiderando ku e evento deskribí den dje, e purifikashon di e santuario, a sosodé asina tantu tempu pasá? Kiko e ta nifiká pa nos komo iglesia awe?

Komo klas, papia tokante di e implikashonnan di e frase, e a ser “kòrtá kitá afó pero no pa e mes.” Ki speransa esei ta ofresé na nos? Pa ken E a ser kòrtá kitá afó, dikon, i kiko esei ta nifiká? Papia tokante di esaki tambe: E profesia di 70 siman, un profesia di e evangelio, ta konektá ku e profesia di 2.300 dia. Kiko esei ta bisa nos tokante dikon e evangelio lo mester forma e base di nos komprondementu di e nifikashon di e profesia di 2.300 dia?

SABAT

DJADUMINGU

DJALUNA

DJAMARS

DJARASON

DJAWEPS

DJABIÈRNÈ

	1844 Hasí Simpel

DJADUMINGU		13 di ougùstùs

DJALUNA		14 di ougùstùs

DJAMARS		15 di ougùstùs