---

LÈS 9

*19 - 25 di ougùstùs

	Prinsipio Dia-Aña

		SABAT DJADUMINGU DJALUNA DJAMARS  DJARASON  DJAWEPS  DJABIÈRNÈ

SABAT ATARDI

Lesa pa e siman aki:

Eks. 34:22; Lev. 12:5; Num. 14:34; Deut. 16:10; Eze. 4:5, 6; Dan. 8:17, 19, 26; 10:2, 3.

Versíkulo di Memoria:  

“Ora bo a kumpli ku nan, kai drumi atrobe riba bo banda drechi, i lo bo karga e inikidat di e kas di Yudá kuarenta dia: Mi a stipulá pa bo un dia pa kada aña” (Ezekiel 4:6).

Un bista riba siman:

Nos a mira tambe ku e profesia di 2.300 dia di Daniel 8 tabata e úniko parti di e vishon no spliká i ku Gabriel a bin serka Daniel den kapítulo 9 ku e splikashon ei, e profesia di 70 siman, ku a ser kòrtá kitá afó for di e 2.300 dianan. E profesia di 70 siman aki, ku rais den Hesus, a forma e base pa e profesia di 2.300 dia; tambe e a proveé e fecha di komienso pa e 2.300 dianan, kua a trese e profesia ei na 1844, un fecha ku ta pas perfektamente ku loke nos a ser mustrá den Daniel 7 i 8.

Asina, nos tin e esensia di e profesia di 1844, ku rais firmemente no solamente den imperionan mundial históriko enorme, ma den e krus.

Pa e siguiente simannan nos lo wak mas di serka algun di e tópikonan ku nos a djis pasa riba dje tokante 1844; segun nos ta hasi esei, nos lo buska pa kontestá e preguntanan mas opvio ku lo por lanta segun nos ta studia e profesia asina krusial aki pa Atventistanan di Shete Dia.

*Studia e lès di e siman aki pa prepará pa sabat , 26 di ougùstùs.

DJADUMINGU		20 di ougùstùs

Tempu Profétiko

Den e simannan ku a pasa, nos a wak tres profesia di tempu: e ‘tempu, tempunan i mitar di un tempu” (Dan. 7:25), e “dos mil treshen dia (Dan. 8:14), i e “setenta siman” (Dan. 9:24). Nos a traha riba e premisa ku esakinan no mester a ser tumá komo tempu literal ma komo tempu profétiko i ku den kada un di e kasonan aki e dianan mester a ser interpretá komo añanan.

Asina nos tabata mas bien atendiendo ku periodonan di shen, asta míles di aña ku djis periodonan di algun aña si nan ser komprondé komo tempu literal.

E pregunta ta: Ki hustifikashon nos tin asumiendo ku esakinan no tabata tempu literal sino profétiko, i ku nos lo mester uza e prinsipio dia-aña ora nos ta interpretá nan?

Den Daniel 8:17, 19, 26, Daniel a ser bisá den un manera òf otro ku e vishon profétiko ku a ser duná na dje tabata pa e “fin”. Di echo, e a ser bisá spesífikamente ku e vishon tokante di “anochi i mainta” (e 2.300 dianan) lo ta “pa hopi dianan” (Dan. 8:26). Dikon e echonan aki ta yuda proba ku e profesia di tempu den Daniel 8 no ta literal?

Lesa Daniel 7:24-27. E poder di e kachu chikí, ku a lanta di Roma pagano (un poder ku a terminá mas ku 1500 aña pasá), lo eksistí te na kabamentu di e huisio final ku ta trese e fin di mundu. Ki evidensia nos tin aki ku e profesia di tempu den vèrs 25 tampoko lo mester ser tumá literalmente?

Klaramente den tantu Daniel 7 komo Daniel 8 mes, duná e konteksto den kua nan ta operá (imperionan mundial enorme ku, kuminsando den antigwedat i kulminando na fin di mundu, ta kubri míles di aña di historia), apénas tin sentido di ku e profesianan di tempu mas grandi den nan lo ta literal; esta, den kaso di Daniel 7 kubriendo solamente tres aña i mei i den Daniel 8 masoménos seis aña i tres luna (2.300 dia literal). E kuadronan di tempu aki apénas ta hasi hustisia na e magnitut di e eventonan deskribí den e vishonnan.

Ora, sinembargo, e prinsipio di dia-aña ser apliká, e profesianan di tempu tin mas sentido, nan ta pas mas mihó ku e eskala di eventonan den kua nan ta ser deskribí.

DJALUNA		21 di ougùstùs

Daniel 9 i Tempu Profétiko

Repasá e profesia di 70 siman di Daniel 9:24-27. Ki evidensia interno nos tin ku esaki no por ser tumá komo tempu literal?

Manera nos a mira den un lès anterior, no opstante e fechanan ku a usa pa e òrdu pa restorá i pa rekonstruí Yerusalèm i pa e ministerio di Hesus, tabatin klaramente mas ku setenta siman literal entre e dos eventonan. Tumá literalmente, e profesia ta bira sin nifikashon. Ki interesante, sinembargo, ku si e prinsipio dia-aña ta ser apliká, e profesia ta funshoná perfektamente, tresiendo nos stret na Hesus. Asina, den un sentido real, e ministerio di Hesus, manera revelá den Daniel 9, ta proba e valides di e prinsipio dia-aña.

Algun hende, sinembargo, ta argumentá ku e palabra pa “siman” den Daniel 9:24 ta nifiká “siman di aña”, asina kada un di e simannan ei ta shete aña. P’esei nos tin 70 “siman di aña”, ku ta yega na 490 aña.

E úniko problema, sinembargo, ta ku e palabra tradusí “siman” den Daniel 9:24 nunka ta aparesé na otro lugá den Beibel ku no ta komo “siman”. Nunka e ta nifiká “siman di aña”.

Buska Èksodo 34:22, Levítiko 12:5, Deuteronomio 16:10 i Daniel 10:2, 3, un par di kaminda den Beibel kaminda e palabra básiko ei tradusí “siman” ta aparesé. Ki evidensia den e tèkstnan mes ta mustra ku ta un siman, òf simannan, e tabata ke men, kontrali na “siman di aña”?

Den Daniel 10:2, 3 ta aparesé e mesun palabra ku den Daniel 9:24, i opviamente e no ta nifiká “siman di aña”. (Daniel a yuna 3 siman di aña òf 21 aña?) Tambe, asta si un hende a aseptá e eror ku e palabra den Daniel 9:24 ta nifiká “siman di aña”, un siman di aña ainda ta shete aña, e mesun kantidat di aña ku si bo a usa e prinsipio aña-dia. Asina, e prinsipio dia-aña ta asina integrá den e profesia ku un fabrikashon erudito inventá pa deshasí di e prinsipio solamente ta afirm’é mas bien!

DJAMARS		22 di ougùstùs

Setenta Siman i 2.300 Dia

Manera nos a mira, e profesia di 70 siman no tin sentido si e ser tumá literalmente. Unabes e prinsipio dia-aña ta apliká, e ta trese nos stret na Hesus. Asina, e profesia mes ta demandá e prinsipio dia-aña.

Daniel 9:24-27 ta demandá e prinsipio dia-aña. Awor, pasobra e profesia aki a ser “kòrtá kitá afó” for di e profesia di 2.300 dia, kiko esei ta bisa nos tokante di e prinsipio dia-aña i e 2.300 dianan?

E profesia di 70 siman ta yega na 490 aña. E 2.300 dianan, si tuma nan literal, ta yega na un poko mas ku seis aña. 490 aña por ser “kòrtá kitá afó” for di un poko mas ku seis aña? Naturalmente nò. For di 2.300 aña? Naturalmente. P’esei aki tin mas evidensia ku e prinsipio dia-aña mester ser apliká na e profesia di 2.300 dia tambe. No tin sentido pa apliká e prinsipio na e 70 simannan, kua ta solamente parti di e 2.300 dianan, i no aplik’é na e 2.300 dianan tambe.

Nada straño ku Atventistanan no tabata e únikonan pa usa e prinsipio dia-aña pa e 2.300 dianan. Un di e eruditonan hudiu di mas grandi, Rashi (A.D. 1040-1105), a tradusí Daniel 8:14 asina: “I e a bisa mi: Te na 2.300 aña...”. No solamente e idea aki no ta un inovashon Atventista, e a wòrdu usá dor di otro eruditonan riba e mesun profesianan hopi promé ku nos.

Buska Numbernan 14:34 i Ezekiel 4:5, 6. Anke den i di nan mes nan no ta proba e prinsipio dia-aña, ki evidensia nan ta duna p’e?

Buska e tèkstnan aki, tur hañá dilanti den Beibel (Gen. 5:14, 5:23, 9:29). Ki konekshon nan ta mustra entre dia i aña den Beibel?

DJARASON		23 di ougùstùs

Mas Prueba

Lesa e pregunta den Daniel 8:13 atrobe. Ora bo hasi esaki, bo ta realisá ku e palabra tokante di no ta aparesé den hebreo, ni gramátika hebreo no ta permití esaki. Asina, e pregunta no ta djis tokante e aktividat di e kachu chikí. Na lugá di esei, e pregunta ta tokante tur kos deskribí den e kapítulo, kua ta inkluí e vishon tokante e chubatu di karné i e chubatu di kabritu (Medo-Persia i Gresia), i tambe e aktividat di e kachu chikí (Roma pagano i papal). Un tradukshon literal lo lesa; “Kon largu e vishon, e diario, i e transgreshon di desolashon pa trapa e santuario i e ehérsito”. Den otro palabra, e pregunta ta lista tur loke a sosodé den e vishon. Di echo, e palabra pa “vishon” den vèrs 13 ta hazon, ku, manera nos a mira mas promé, ta trata ku e chubatu di karné i e chubatu di kabritu i e kachu chikí, esta Medo-Persia, Gresia i Roma.

E pregunta e ora ei lo por a ser parafrasiá asin’aki: Kuantu tempu tur e kosnan aki, for di e lantamentu di Medo-Persia, e lantamentu di Gresia i finalmente e atake di Roma riba e ministerio selestial di Kristu, ta ser permití pa sigui?

Lesa e tradukshon literal di e tèkst duná akiriba. Dikon esaki ta mustra ku e 2.300 dianan no por ser tumá komo tempu literal? Si e ta literal, kon e por a kubri tur e eventonan deskribí den e pregunta?

E punto lo mester ta opvio: E 2.300 dianan mester kubri tur e eventonan deskribí den e vishon di Daniel 8, esta Medo-Persia, Gresia, Roma i e purifikashon di e santuario. Un periodo di 2.300 dia literal no ta ni kuminsá kubri un di e reinonan ei, muchu ménos tur. Na e otro banda, ku e prinsipio dia-aña e problema ta resolvé instantáneamente. Dos mil treshen aña, na lugá di un poko mas ku seis, ta kubri e eventonan den en kestion.

DJAWEPS		24 di ougùstùs

Prinsipio di dia-aña

Pasa riba e vishon i e interpretashon den Daniel 7. Dikon tur e símbolonan ei ta yuda nos komprondé dikon e elemento di tempu den e vishon lo mester ta simbóliko tambe?

Daniel 7 ta un kapítulo yen di tur sorto di símbolo òf imágen, ku no mester ser tumá literalmente. Asina, dikon nos lo mester tuma e tempu profétiko duná den dje komo literal, ora kasi tur otro kos ta simbóliko?

Lesa Daniel 8. Siguiendo e mesun linea di pensamentu ku e último pregunta, ki evidensia nos tin ku e periodo di tempu aki lo mester ser mirá komo simbóliko tambe, i no literal?

Daniel 8 no ta bai mas tokante kabritunan buladó (v. 5) ku Daniel 7 tabata tokante bestianan ku djente di heru (v. 7). Na lugá di esei, esakinan tabata simbóliko; di e mes manera, e periodonan di tempu duná tabata simbóliko tambe.

Di echo, di e tres periodonan di tempu ku nos a mira, e “tempu, tempunan i mitar di un tempu” (Dan. 7:25), e “2.300 dianan” (Dan. 8:14) i e “setenta siman” (Dan. 9:24), niun di nan ta skibí na e manera komun ku tempu ta ser ekspresá. Por ehèmpel, na lugá di bisa 2.300 dia, dikon Gabriel no a bisa ku e santuario lo a ser purifiká den “seis aña, tres luna i binti dia”? Den 2 Samuel 5:5 e tèkst ta bisa ku e rei “a reina shete aña i seis luna riba Yuda”, kontrali na 2.700 dia. Ta mesun kos ku e dos otro profesianan di tempu: Niun ta ser ekspresá na e manera komun ku tempu ta ser ekspresá.

Lesa Lukas 4:25 and Santiago 5:17. Kompará nan ku Daniel 7:25. Kua di nan tabata trata ku tempu literal, i kon e tempu literal ei a ser ekspresá den kontraste ku esun ku ta ekspresá tempu profétiko?

DJABIÈRNÈ		25 di ougùstùs

Pa mas Estudio:   Eruditonan tambe a mustra evidensia pa e konekshon entre dia i aña den poesia hebreo, kaminda dia ta ser usá den paralèl ku aña, mustrando un konekshon semántiko entre e dos periodonan di tempu:

“Bo dianan ta manera dianan di hende mortal?
Bo añanan ta manera añanan di hende.” Job 10:5

“Dianan mester papia, i kantidat di aña
mester deklará sabiduria.” Job 32:7

“Mi a konsiderá e dianan di promé aya,
E añanan di hopi tempu pasá.” Salmo 77:5

Den kada un di e kasonan aki, dia i aña tabata bisa básikamente e mesun kos; esta, nan tabata palabranan diferente usá pa transportá e mesun idea. Anke e paralèlnan aki no ta proba, den i di nan mes, e prinsipio dia-aña, nan ta mustra ku den e mente hebreo dia i aña tabata konektá.

Preguntanan di Diskushon:

Komo klas, pasa over di e lès di e siman aki te ora tur hende a komprendé bon e valides di e prinsipio dia-aña.    Komo klas, kontestá e pregunta aki: Dikon Beibel ta usa asina tantu símbolo? Kiko lo ta e motibu pa e uso di símbolonan?    Kua otro evidensia hende por haña den Beibel pa e prinsipio dia-aña?    Pensa riba esaki: Nos ta aki kasi dos mil aña desde e morto di Kristu. Kon e profesianan di tempu aki, manera komprondé dor di e prinsipio dia-aña, ta yuda nos realisá ku enbèrdat nos ta biba serka di e fin i ku nos lo no mester spera otro mil aña mas pasa promé ku Kristu regresá? Esta, kon e profesianan aki ta yuda nos komprondé unda nos ta den historia di mundu i dikon nos lo mester sa ku e binida di Kristu ta serka?