LÈS 12  
*9 di sèptèmber - 15 di sèptèmber

E Huisio  Pre-Atvènt

   
SABAT
DJADUMINGU
DJALUNA
DJAMARS 
DJARASON 
DJAWEPS 
DJABIÈRNÈ 
 

SABAT ATARDI

Lesa pa e siman aki:
Deut. 25:1, 1 Reinan 8:32, Salmo 51:1-4, Mat. 22:1-13, Hebr. 9:22-24, Rev. 20:12, 22:12..

Versíkulo di Memoria:  
     
“I mira, Mi ta bin pronto; i Mi rekompensa ta ku Mi, pa duna kada hende segun loke e a hasi” (Revelashon 22:12).

Un bista riba siman:

Siman pasá nos a wak e huisio pre-Atvènt mas tantu den Daniel 8; e siman aki nos lo wak e atrobe pero for di e perspektiva di Daniel 7 i algun di e komprondementunan fasinante duná na nos einan. Manera ku e Evangelionan, nos ta ser duná aki mas ku djis un presentashon; tur dos kapítulo ta kontené bèrdatnan krusial ku mester ser komprondé huntu. Kada un, pa mas ilustrativo, tin mester di loke e otro tin i, tumá huntu, nan ta revelá hopi tokante di e huisio aki na nos.

Loke ta importante pa kòrda ta ku a kapítulonan aki no ta djis teologia òf profesia òf historia profundo; na lugá di esei huntu nan ta manda un mensahe pa nos, un mensahe di speransa, u mensahe di promesa. Huntu nan ta bisa nos ku no importá kon malu kos ta, nan no ta bai dura; ku apesar di aparensianan, e Dios ku ta mustra nos e historia di mundu for di tempu di Daniel te na nos tempu i den futuro lo kousa un fin maravioso den kua maldat lo ser kastigá i e hustunan lo ser salbá. Kon importante ta, meimei di nos estudio di mapa i gráfika i eventonan históriko, pa no pèrdè e punto krusial aki for di bista. Kon importante ta tambe ku segun ku nos ta kompartí e bèrdatnan aki ku e mundu, semper nos tene dilanti di e hendenan no djis bestianan i kachunan chikitu sino e promesa maravioso di bida eterno den e reino di Dios ku a ser sigurá na nos dor di e sanger di Hesus i Su morto na nos fabor.

*Studia e lès di e siman aki pa prepará pa sabat , 16 di sèptèmber.

DJADUMINGU
  
10 di sèptèmber

"Te ora e Ansiano di Dianan a bin"

Un punto ku nos a toka mas trempan den e trimèster aki tabata e importansha di e purifikashon di e santuario den Daniel 8. Nos a mira (wak siman 5) kuater evento deskribí den e vishon (Medo-Persia, Gresia, Roma, santuario purifiká); ku e tresnan promé di aparente mayor importansha, i ku e vishon yegando su klímaks ku purifikashon di e santuario, ta mas ku opvio ku loke sea e purifikashon di e santuario tabata, e lo mester tabata di mayor importansha tambe.

Asina, e pregunta ta: Kiko ta purifikashon di e santuario, kua tabata di asina importansha ku e lo a ser konektá ku e gran imperionan ku Skritura ta usa pa deskribí e historia di mundu?

Daniel 8 mes no ta revelá masha, den i riba su mes, kontesta; afortunadamente Señor no a duna nos djis Daniel 8. Nos tin e paralèl opvio ku Daniel 7, kua, den gran manera, ta yuda revelá e misterionan di Daniel 8.

Nos a mira anteriormente e paralèl entre e huisio den Daniel 7 i e purifikashon di e santuario den Daniel 8. Lesa Daniel 7:9, 10, 13, 14, 18, 21, 22, 26, 27. Na kiko e huisio aki (mesun kos ku e purifikashon di e santuario) ta hiba? Kiko ta resultado di e huisio aki? Kua punto spesífiko ta ser enfatisá kada bia di nobo?

Ripará e tema ku ta frekuente den e vèrsnan aki: E santunan lo ser duná e reino di Dios, un reino eterno ku lo no pasa manera tur esnan promé kuné a hasi. Kada bia di nobo, despues di deskripshon di vários reino, spesialmente e kachu chikitu blasfemadó i persiguidó, e viktoria final di Dios i Su santunan ta ser mustrá. Den otro palabra, no importá kon malu kos bira òf kuantu tempu kosnan tuma, na final, komo resultado di e huisio selestial /purifikashon di e santuario, maldat lo ser eradiká, i e reino eterno di Dios lo ser establesé.

Den e konteksto aki, kuantu mas fásil awor pa komprondé dikon e purifikashon di e santuario den Daniel 8 ta klímaks e vishon di e podernan terenal aki. Nada straño tambe ku e ta ser mustrá di ta asina importante!

 
Tur e otro reinonan a bin i bai òf finalmente lo ser destruí. Kontrali na esaki, e santunan lo “poseé” (v. 18) e reino eterno di Dios. Kiko e promesa aki ta nifiká pa bo? Kiko ta e promé kos ku bo ke hasi ora bo yega aya?
DJALUNA
  
11 di sèptèmber

Huisio i e Kachu Chikitu

Komo Atventistanan, nos ta komprondé e purifikashon di e santuario komo un huisio ku ta envolví esnan ku a profesá di ta siguidónan di Kristu (wak Mateo 22:1-13). Nos ta mira esaki spesialmente pasobra den e tipo terenal di e purifikashon di e santuario, e Dia di Ekspiashon (wak Levítiko 16), e huisio tabata sentrá rònt di e pueblo di Dios.

Sinembargo, e pregunta ta surgi: Dikon den tantu Daniel 7 komo Daniel 8 e huisio/purifikashon di santuario ta ser deskribí den konteksto di e kachu chikitu, por lo ménos e fase di e kachu chikitu mustrá den e vishon? Kiko e kachu chikitu tin di haber ku e huisio pre-Atvènt?

Lesa atrobe e tèkstnan ku nos a wak ayera. Kua ta e diferensha den e destino di e kachu chikitu i e destino di e “santunan di e Haltísimo”? Wak spesialmente Dan. 7:22.

Ta hopi kla. E kachu chikitu ta ser kastigá, kondená, miéntras e santunan ta ser vindiká, eksonerá. Esaki ta típiko di e konsepto hebreo di hustisia i huisio: E tabata envolví no djis e kastigu di e kulpabelnan òf e vindikashon di e hustunan, sino tur dos. Tur dos ta elementonan krusial di hustisia den pensamentu hebreo, i tur dos ta ser mirá aki den e deskripshon aki di e huisio pre-Atvènt.

Lesa Deuteronomio 25:1 i 1 Reinan 8:32. Kon e dos vèrsnan aki ta revelá e prinsipionan mirá den Daniel 7 i Daniel 8 huntu?

Naturalmente, e huisio den Daniel 7 ta resultá den fin di e kachu chikitu, pero esei ta solamente pasobra e huisio ta resultá den e Segundo Binida, kua ta trese kuné e fin di henter mundu di kalke manera (por lo ménos manera nos konosé aworakí). E punto ta ku e huisio, anke ekspresá aki den konteksto di e kachu chikitu, un símbolo di maldat, a envolví mas ku djis e kachu chikitu. Loke nos ta mira aki ta dos elemento: maldat kastigá, e santunan vindiká. Difísilmente lo a parse hustisia si e tabata kalke otro manera.

E hustunan vindiká, maldat kastigá. Esei ta e promesa di Dios. Kon e promesa ei lo yuda bo dor di tempunan ora, asina tantu bia, ta parse ku ta solamente e kontrali ta sosodé?

DJAMARS
  
12 di sèptèmber

Atrobe Teodisio

Den e promé siman di e trimèster aki nos a wak un termmino, teodisio, kua tabata nifiká e vindikashon di Dios frente di maldat. Ta e idea ku apesar di tur e maldat den mundu, nos por konfia ku Dios ta bon i rekto i hustu.

Nos a mira tambe ku piká i maldat a kuminsá den un otro parti di universo i ku piká i e preguntanan ku e a lanta no tabata limitá na tera so. Al kontrario, tera ta djis e lugá kaminda nan ta tuma lugá. Tambe nos a wak e echo ku otro inteligensianan den universo tambe ta envolví i interesá den e pregunta ku a surgi tokante piká i rebelion.

Lesa Daniel 7:9, 10 i despues kontestá e siguiente preguntanan:

   Ki evento ta tuma lugá aki?

    Unda e ta tuma lugá?

   Dilanti di ken?

No solamente nos tin un esena di huisio selestial aki, un huisio ku ta hiba na destrukshon di e kachu chikitu i e stablesementu di e reino di Dios, e huisio aki ta tuma lugá dilanti di un multitut di sernan selestial. “Dies mil bia dies mil” ta un manera di deskribí un multitut inkontabel. Asina, loke nos ta mira aki ta e universo opservadó mirando Dios ehekutá e huisio ku ta hiba na e stablesementu di Su reino eterno.

Teniendo den mente e esena di huisio aki den Daniel 7, lesa Salmo 51:1-4 i Romanonan 3:4. Kon e tèkstnan aki ta kuadra ku e huisio manera revelá den Daniel 7?

E punto krusial pa kòrda aki ta ku Dios ta huzga Su pueblo na un manera habrí dilanti di e universo ku ta opservá. I E lo bai hasié na un manera ku, ora e pasa, lo ser bisá ku “Bo ta keda hustifiká ora Bo papia i puru ora Bo huzga” (Salmo 51:4).

Kon habrí i transparente bo ta den tur bo tratamentu i huisionan ku otronan? Si bo no ta, dikon no, i kiko bo kontesta ta bisa bo tokante di e kualidat di e tratamentunan ei? Kiko lo bo mester kambia?

DJARASON
  
13 di sèptèmber

Huisio Pre-Atvènt

Lesa Daniel 12:1, Mateo 16:27, i Revelashon 20:12. Kada un, na su mes manera, ta papia tokante di huisio. Ki evidensia bo por haña den e tèkstnan aki ku ta mustra dikon e huisio aki ta promé ku e Segundo Binida, esta un huisio pre-Atvènt?

Si na e Segundo Binida e santunan ta risibí e reino i e kachu chikitu ta destruí, mester tabatin algun sorto di dunamentu di kuenta promé ku ehekushon di e sentensia. Despues di tur kos, asta kortenan terenal korupto ta hasi asina. Kon hustu lo e ta pa sentensiá un hende i luego, despues di e sentensia, tin un rat i investigá e echonan?

Si ora Kristu bin bèk “Mi rekompensa ta ku Mi, pa duna kada hende segun loke e a hasi” (Rev. 22:12) i nos tur mester ser huzgá pa nos echonan (Ekl. 12:13; 1 Kor. 3:13; 1 Pe. 1:17; Rev. 20:12), e ora ei ta basta opvio ku mester tin un huisio previo na e Segundo binida. Òf, manera Atventistanan ta ekspres’é, un huisio pre-Atvènt òf investigativo. (Despues di tur kos, ki tipo di huisio previo na un sentensia no ta enserá un investigashon di algun forma?)

Lesa kuidadosamente atrobe e esena di huisio manera deskribí den Daniel 7 (si mester, wak algun di e tabèlnan anterior ku ta paralèl e kapítulonan). Poniendo un banda e sifranan i fechanan, dikon esaki ta asina klaramente un huisio pre-Atvènt? De echo, ki evidensia bo ta haña den e tèkstnan ku ta sugerí un investigashon? Wak tambe Salmo 56:8, 69:28, Dan. 12:1, Rev. 13:8, 20:12.

Nos por mira anto for di Daniel 7 ku tin enbèrdat un huisio pre-Atvènt enorme, un huisio ku ta hiba no solamente na desaparishon di e kachu chikitu, ma na fin di e mundu aki i inougurashon di e siguiente, den kua e santunan ta biba pa semper den e reino eterno di Dios. Loke ta ser deskribí aki ta, opviamente, un evento di tremendo importansia, un evento den kua e destino eterno di kantidatnan inkalkulabel te enbolbí. Nada straño ku nos ta haña e mensahe di e ora di huisio krusial na loke nos ta kere komo Atventista.

DJAWEPS
  
14 di sèptèmber

E Shelunan Purifiká

Lesa Hebreonan 9:22-24 i despues kontestá e siguiente preguntanan:

1.  Kua dos santuarionan ta ser papiá di dje akinan?

2.  Ki paralèl ta ser pintá entre nan; that is, kiko e outor ta bisa ku mester sosodé ku tur dos e santuarionan?

E tèkstnan aki a konfundí eruditonan no-Atventista pa motibu di e referensia kla na e idea ku e santuario selestial mes tabatin mester di ser purifiká. “Un hende por konkluí ku e santuario terenal a ser purifiká pa motibu ku su kontraparti selestial tambe mester a ser purifiká.” —Craig Koester, Hebrews, Anchor Bible Series (New York: Doubleday, 2001), p. 427.

De echo, e palabra griego den Hebreonan 9:23 pa “purifiká” òf “limpiá” ta bin di e mesun palabra griego usá den un tradukshon griego antiguo di Daniel 8:14. Asina, e griegonan antiguo ken, promé ku e tempu di Kristu, a tradusí e Tèstamènt Bieu a komprondé ku e hebreo den Daniel 8:14 ta nifiká ku e santuario mester a ser purifiká; añanan despues, e outor di Hebreonan tabatin e mesun idea, sinembargo e konteksto inmediato tabata diferente. Meskos ku e santuario terenal a ser purifiká, asina esun selestial tambe mester ser purifiká. Enbèrdat, henter e punto di purifikashon terenal tabata pa mustra na esun mas grandi, esun berdadero den e santuario selestial.

Lesa Daniel 8:14 atrobe. Konsiderando e kuadro di tempu di e profesia aki, dikon e purifikashon di santuario aki mester ta e mesun purifikashon ku e outor hebreo a referí na dje?

Den pensamentu hudiu, e Dia di Ekspiashon, ora e santuario tabata ser purifiká, tabata tambe e gran dia di huisio, e momentu ku hende tabatin nan último chèns pa repentí promé ku enfrentá huisio. En realidat, riba e Dia di Ekspiashon hudiunan ainda tin bia ta bisa otro e bendishon aki: “Ku lo bo por ta seyá den e buki di bida pa semper.”

Dikon e hustisia di Kristu ku ta kubri bo, pa fe, ta bo úniko siguransa ku, enbèrdat, riba e dia di huisio lo bo ta seyá den e buki di bida pa semper?

DJABIÈRNÈ
  
15 di sèptèmber

Pa mas Estudio:  

Den pensamentu hudiu, kiko ta sosodé riba e Dia di Ekspiashon, ora e santuario mester ser purifiká? Kompará e sitanan aki bou ku kon Elena White ta deskribí e huisio pre-Atvènt den The Great Controversy, meskos tambe e imágennan ku ta ser mirá den e esena di huisio di Daniel 7.

“Dios, sintá riba Su trono pa huzga e mundu, na e mesun momentu Hues, Intersesor, Eksperto i Testigu, ta habri e buki di Registro; e ta ser lesá, asta firma di hende (nòmber) ta ser haña eiden. E gran trompèt ta ser zoná; un bos ketu chikitu ta ser tendé; angelnan ta tembla, bisando: esaki ta e dia di huisio... Riba e Dia di Ekspiashon ta ser seyá ken lo biba i ken lo muri.”—Sitá den Jewish Encyclopedia, “The Day of Atonement.”

Algun orashon pronunsiá riba e Dia di Ekspiashon ta bisa asin’aki: “Hustifiká mi den e huisio.... O silensiá e akusadó, i permití e abogado pa tuma su lugá.... i a konsekuensia di su rogamentu, deklará: Mi a pordoná.... O bora e transgreshon di e puebel ku a ser salbá.... E, e Ansiano di Dianan, ta sinta komo Hues.... Den e buki di bida.... laga nos ser seyá dor di Bo.”

Preguntanan di Diskushon:
 
  Pensa riba tur loke Dios ya a hasi pa nos, spesialmente den e Persona di Hesus. Pero, apesar di tur esaki, pa sigurá ku henter e universo ta mira Su hustisia i igualdat den trata piká i rebelion, E ta permití pa E mes ser huzgá riba kon E ta huzga. Kiko esei ta bisa nos tokante e karakter di Dios i dikon e ta asina digno di nos alabansa, adorashon i lealtat?

   Si bo tabata kere ku hende ta bai shelu òf fièrnu mesora ku nan muri, dikon tur e papiamentu aki riba un huisio pre-Atvènt òf kalke sorto di huisio futuro, lo a zona kèns? Kiko esaki ta bisa nos tokante kon konektá hopi di nos kreensianan ta?

   Bo konosé hende ku ta lucha ku nos komprondementu di huisio pre-Atvènt? Dikon no, komo klas, plania un reunion na kas den kua, despues di orashon i kompañerismo i kuminda, bo por kompartí algun di e kosnan ku bo a bin ta siña?