---

LÈS 13

*16 di sèptèmber - 22 di sèptèmber

	E Evangelio  i  Huisio

		SABAT DJADUMINGU DJALUNA DJAMARS  DJARASON  DJAWEPS  DJABIÈRNÈ

SABAT ATARDI

Lesa pa e siman aki:

Levítiko 16; Rom. 8:1, 34; Hebr. 6:20; 7:25; 9:24; 1 Pe. 1:2, 18, 19.

Versíkulo di Memoria:  

“Mi yunan chikitu, mi ta skibi boso e kosnan aki pa boso no hasi piká. I si un hende hasi piká, nos tin un Abogado serka e Tata, Hesukristu e hustu” (1 Juan 2:1).

Un bista riba siman:

Esaki naturalmente ta bon notisia. Despues di tur kos, kiko otro e ekspiashon ta ku no ta e trabou di Dios salbando nos dor di e sanger di Kristu? E lei no por ekspiá; obedensia no por ekspiá; karakter no por ekspiá. Ekspiashon ta bin solamente na un manera, pa medio di e Krus.

Si nos ta biba anto den e dia di ekspiashon, esei lo no mester ta bon notisia? Kalke “dia” dediká na ekspiashon, na e obra di Dios di salba nos, lo no mester ta algu ku nos mester ta gradesido p’e? Nos lo no mester regosihá den e speransa di ta biba den e dia di ekspiashon?

Naturalmente. E huisio ta bon notisia pasobra e ta forma un parti inseparabel di “e bon notisia”; e ta e aplikashon kulminante di e Krus na nos fabor. E siman aki nos lo wak e evangelio i e huisio, pasobra ta solamente dor di lèns di e evangelio nos por mira kla kiko e huisio ta nifiká pa nos.

*Studia e lès di e siman aki pa prepará pa sabat , 23 di sèptèmber.

DJADUMINGU		17 di sèptèmber

Nos Tur Mester Para

Manera nos a mira den siman 2, Beibel ta kla ku tin un huisio i ku esaki ta un huisio pa obra, un huisio kaminda nos obranan ta bin bou di skrudiñamentu. (Despues di tur kos, kiko un huisio ta sin skrudiñamentu?) Kòrda, Hesus a bisa ku nos mester duna kuenta di “kada palabra bano” (Mat. 12:36). Kada palabra bano? I esaki no ta e mesun Señor ku a bisa ku e “drachinan di kabei riba boso kabes , tur ta kontá” (Mat. 10:30), Ken sa ora un mòfi kai na suela (Mat. 10:29), i Ken a bisa den Su Palabra ku e lo trese “tur echo na huisio, tur kos sekretu” (Ekl. 12:14)? Tur obra? Tur kos sekretu? Asina, henter e idea di un skrudiñamentu di obra, un investigashon den huisio, ta bíbliko.

Pero mas importante ta e pregunta: Kon kalke pekador lo por para ora kada palabra bano, tur kos sekretu, ta bin den huisio? Ta un pensamentu basta spantoso, pa para dilanti di Dios den un huisio ora tur kos ku bo a yega di hasi ta ser repasá, spesialmente dilanti di un Dios ku, den Su santidat, ta un “kandela konsumidó” (Deut. 4:24). Ki persona, no importá kon obediente, hustu òf fiel, tin e tipo di registro ku lo por pon’é den bon lugá ku un Dios asina?

Lesa Romanonan 8:34, Hebreonan 6:20, 7:25, 9:24, i 1 Juan 2:1. Kon nan ta kontestá e pregunta aki riba?

E bon notisia di e huisio ta ku Hesus, den Su hustisia, ta pasa nos dor di e huisio pasobra E ta para einan den nos lugá. Esaki ta loke Su interseshon, Su ministerio sumosaserdotal, ta enserá. Di otro manera nos tur lo ta pèrdí pasobra ningun di nos, no importá nos echonan, tin sufisiente hustisia pa para dilanti di un Dios Santu. Solamente si nos ta bistí ku e hustisia perfekto ku nos niun tin òf por gana nunka, nos lo mester para den nos mes echonan, nos mes hustisia; i pasobra nos tur ta pekador, nos tur lo a ser kondená.

DJALUNA		18 di sèptèmber

Sanger i Huisio

E santuario ta sentral na nos teologia komo Atventistanan di Shete Dia, tantu esun terenal komo un modelo di e plan di salbashon i esun selestial komo e lugá den kua Hesus ta aworakí ministrá na nos fabor e méritonan di Su morto ekspiatorio. Nos komo Atventistanan ta kere, basá riba (1) e modelo di santuario terenal, (2) e buki di Hebreonan i (3) e profesianan den Daniel, ku for di 1844 Hesus tabata den e Lugá Santísimo kaminda e huisio, kla mirá den Daniel 7, ta tuma lugá aworakí.

Hopi di nos komprondementu pa esaki ta bin di e Dia di Ekspiashon terenal, den kua un bia pa aña e sumosaserdote tabata drenta den e Lugá Santísimo di e santuario terenal. Esaki ta ser haña mas kla den Levítiko 16.

Lesa Levítiko 16. Kuantu bia e palabra sanger ta ser menshoná? Kiko e sanger ta simbolisá? Mira tambe Hebr. 9:12-14.

Sanger tabata sentral na e ritual di Dia di Ekspiashon, un símbolo pa e sanger di Hesus, dramá na nos fabor na e Krus. Tambe, pasobra e Dia di Ekspiashon ta e dia di huisio, e ora ei huisio i ekspiashon ta konektá djaserka. I pa motibu ku ekspiashon enbèrdat ta bon notisia, huisio tambe lo mester ta. I e ta, pero solamente pa motibu di e sanger, kua ta representá e bida i morto di Hesus na nos fabor.

Lesa Levítiko 17:11; Lukas 22:20; Romanonan 5:9; Hebreonan 10:19; 12:24; 13:20; 1 Pedro 1:2, 18, 19. Kiko nan ta bisa nos tokante di e ròl sentral di sanger den e plan di salbashon?

Sanger ta un símbolo di bida; sanger dramá ta nifiká morto. Tur esaki tabata un símbolo di e bida i morto di Kristu pa nos. I pa motibu ku sanger a ser dramá i despues ministrá riba e Dia di Ekspiashon, esaki ta bisa nos ku, sentral na e Dia di Ekspiashon, tin e bida i morto di Hesus, na nos fabor! Ta p’esei e huisio, pa Kristiannan, ta bon notisia. Nos tin un Supstituto ku ta para den e presensia di Dios “pa nos” (Hebr. 9:24), awor i spesialmente den e huisio.

DJAMARS		19 di sèptèmber

E Bistí

Tempran den e trimèster (siman 2) nos a wak e komparashon di kasamentu den Mateo 22 komo evidensia pa un huisio pre-Atvènt. Sinembargo, tin mas den e komparashon aki ku djis e tempu; na lugá di esei, e ta un revelashon poderoso di loke ta nifiká pa ta kubrí dor di e hustisia di Kristu den e huisio i kiko e ta nifiká pa no ta kubrí.

Lesa e komparashon (Mat. 22:1-13). Kiko finalmente a hasi e diferensia entre si e hòmber a keda òf a bai?

Kiko e bistí ta simbolisá? Wak Isa. 61:10, Zak.. 3:1-5.

Den e komparashon aki nos ta mira un ehèmpel kla di un hende ku a paga tinu na e invitashon pa e kasamentu pero no na e kondishonnan. E a rechasá pa aseptá loke e doño a ofres’é: e bistí di hustisia perfekto di Kristu i asina, riba investigashon, a ser hañá fayo.

Ripará, e komparashon a bisa ku e bon i e malu tur dos a bin. E no a bisa si e hòmber sin e bistí tabata bon òf malu. Den un sentido e no a hasi diferensha: Dilanti di Dios den huisio, nos tur, “bon” òf “malu”, sin un bistí, ta kondená. Loke e invitado tabatin mester na e kasamentu ta e mesun kos ku nos mester den e huisio, algu ku ta kubri nos; di otro manera nos lo ser tirá pafó kaminda tin yoramentu i mordementu riba djente. E kubrimentu, simbolisá dor di e bistí den e komparashon, ta e hustisia di Hesus, akreditá na Su siguidónan pa fe i e ta nan úniko speransa aworakí i den e huisio.

Sea dor di e imágen di e sanger òf e bistí, e punto ta meskos: Nos tin mester di algu ku no ta nos mes pa pasa nos dor di e huisio. I e bon notisia ta ku, pa medio di e sakrifisio di Hesus, nos tur loke nos mester: e hustisia di Dios Mes (mira Rom. 3:21, 22; 10:3; 2 Pe. 1:1) akreditá na nos pa fe.

DJARASON		20 di sèptèmber

No tin Kondenashon

Lesa Romanonan 8:1. Ki mensahe ta ser hañá den e tèkst aki ku ta spesialmente importante pa nos ku ta enfrentá huisio?

E bon notisia di e huisio ta ku nos no tin mester di para den nos mes hustisia. Nos por para den e hustisia di Hesus. Ku nos ta ser huzgá pa obranan no ta nifiká ku nos ta ser salbá dor di nan; nos ta salbá, na lugá di esei, solamente dor di e hustisia di Hesus, kua ta ser akreditá na nos pa fe, un fe ku semper ta ser manifestá pa obranan. E hustisia aki ta kubri nos e momentu ku nos, dor di un sumishon kompletu di nos mes na Kristu, reklam’é pa nos mes; i e ta keda ku nos (anke no inkondishonalmente) stret dor di e huisio. Despues di tur kos, ki bon ta kubrí dor di e hustisia ei lo hasi kalke un di nos si nos no tabatin e ora ku mas nos tabatin mester di dje, kua lo tabata den e huisio?

Kon Santiago 2 ta yuda nos komprondé e ròl di obranan den e huisio?

Pero kon mi sa si mi tin sufisiente obranan pa mustra ku mi tin fe? Esei ta un pregunta lógiko, pero un premisa robes. E ta reflehá e aktitut di esnan ku a bisa: “Señor, Señor, nos no a profetisá den Bo nòmber, i den Bo nòmber nos a saka demoño, i den Bo nòmber nos a hasi hopi milager?” (Mateo 7:22), òf di e fariseo ku a bisa: “Dios, mi ta gradisí Bo ku mi no ta manera e otro hendenan: ladron, inhustu, adúltero, ni tampoko manera e publikano aki. Mi ta yuna dos bia pa siman, mi ta duna e di dies parti di tur loke mi ta poseé” (Lukas 18:11,12).

Mas bien, nos aktitut mester tabata esun di e publikano, ken a bati riba su pechu bisando: “Dios, tene miserikòrdia di mi, pekadó” (Lukas 18:13). Esnan ku a yega di wak un ratu e hustisia di Kristu sa ku nan mester tira nan mes riba e miserikòrdia i grasia di Dios i ku nan obranan, kiko ku nan por ta, pa kuantu hasí for di un kurason puru i amoroso, nunka no ta sufisiente. Ta pa e motibu aki nan mester biba pa fe, konfiando den e promesanan di Dios ku E lo salba nan pa motibu di Hesus i solamente Hesus. Ta e realisashon ku nos obranan ta inadekuá ta hiba nos na fe i na e promesanan di salbashon dor di Kristu. I ta e fe ei, e fe ku ta kere e promesanan di Dios, ta transformá e bida, un transformashon revelá den obranan.

DJAWEPS		21 di sèptèmber

Huzga pa Obra, Salbá pa Grasia

Sigui e liña di pensamentu aki bou, buskando e vários tèkstnan. Kon esaki ta yuda bo komprondé kiko un huisio pa obra ta nifiká pa nos ken ta salbá pa fe?

Bida di un siguidó profesá ta bin dilanti di Dios: Kada ora, kada kos sekretu, kada palabra bano ta ser repasá (Salmo 135:14, Ekl. 12:14, Mat. 12:36, Rom. 14:10-12, 2 Kor. 5:10, Hebr. 10:30). Ken lo por para dilanti di un skrudiñamentu asina? Niun hende (Rom. 3:23, Gal. 3:22, 1 Tim. 1:15, Rom. 3:10). Sinembargo, pa e siguidónan berdadero di Kristu, Hesus ta para komo nan Abogado, nan Representante, nan Intersesor den shelu (Rom. 8:34, Hebr. 6:20, 7:25, 9:24, 1 Juan 2:1). I anke ku nan no tin nada den i di nan mes pa duna nan mérito dilanti di Dios, anke ku nan no tin obranan ku ta sufisiente bon pa hustifiká nan dilanti di Señor, nan bida, anke imperfekto, anke defektuoso, sinembargo ta revelá nan repentimentu i fe berdadero (Mat. 7:24-27, Juan 14:15, Santiago 2:14-20, 1 Juan 4:20, 5:3). Kon nan a trata otronan, e pober, esun den nesesidat, prizoneronan, kon nan a pordoná manera nan a ser pordoná, e palabranan ku nan a papia, e aktonan ku nan a kometé (Mat. 7:2; 12:36, 37; 18:23-35; 25:31-46), miéntras e kosnan aki nunka por a hustifiká nan dilanti di Dios, miéntras nunka nan por a kontestá e demandanan di un lei kibrá, nan ta revelá esnan ku a aseptá Kristu komo nan Supstituto i solamente Su hustisia, kua ta kubri nan manera un bistí, ta hiba nan dor di e huisio (Levítko 16; Zak. 3:1-5; Mat. 22:1-14; Rom. 8:1, 34; Hebr. 9:24; 1 Juan 2:1).

Òf, manera Elena White a ekspres’é asina kla: “Pero miéntras nos lo mester realisá nos kondishon pekaminoso, nos mester dependé riba Kristu komo nos hustisia, nos santifikashon i nos redenshon. Nos no por kontestá e atakenan di Satanas kontra nos. Solamente Kristu por hasi un súplika efikas na nos fabor. E ta kapas pa silensiá e akusadó ku argumentunan fundá no riba nos méritonan, sino riba di djE mes.”—Testimonies for the Church, vol. 5, p. 472. E falta di utilidat di nos obranan pa salbashon lo mester a kousa nos pa lèn totalmente riba e miserikòrdia i méritonan di Kristu. E ora ei, for di amor i gradisimentu pa e siguransa di salbashon ku ta di nos dor di Kristu, nos ta sirbiÉ ku tur nos kurason, alma, mente i kurpa, un servisio ku ta ser ekspresá den obranan. Kon lo e por ta otro?

DJABIÈRNÈ		22 di sèptèmber

Pa mas Estudio:  

Den konteksto di e santunan den huisio Ellen White ta skibi: “Nan úniko speransa ta den e miserikòrdia di Dios; nan úniko defensa lo ta orashon. Meskos ku Josué tabata roga dilanti di e Angel, asina e iglesia remanente, ku kurason kibrá i fe sinsero, lo roga pa pordon i liberashon dor di Kristu nan Abogado. Nan ta kompletamente konsiente di e pekaminosidat di nan bida, nan ta mira nan debilidat i indignidat, i ora nan wak riba nan mes, nan ta kla pa desesperá. E tentadó ta para kla pa akusá nan, manera e a para kla pa resistí Josué. E ta mustra riba nan pañanan sushi, nan karakternan defektuoso. E ta presentá nan debilidat i lokura, nan pikánan di ingratitut, nan poko semehansa ku Kristu, kua a deshonrá nan Redentor."—Ellen G. White, Testimonies for the Church, vol. 5, p. 473. Atrobe, den e mesun konteksto: “Awor e [Satanas] ta mustra na e registro di nan bidanan, na e defektonan di karakter, e falta di semehansa ku Kristu, kua a deshonrá nan Redentor, na tur e pikánan ku e a tenta nan pa kometé, i pa motibu di esakinan e ta reklamá nan komo su suhetonan.

“Hesus no ta diskulpá nan pikánan, ma ta mustra nan penitensia i fe, i, reklamando pordon pa nan, E ta hisa Su mannan heridá dilanti di e Tata i e angelnan santu, bisando: ‘Mi konosé nan na nòmber. Mi a graba nan den e palmanan di Mi mannan.’ "—Ellen G. White, The Great Controversy, p. 484.

Preguntanan di Diskushon:

Komo klas, papia tokante di boso kontestanan riba e pregunta na final di lès di djamars.    Dikon bo ta pensa ku pa asina hopi hende den iglesia e huisio pre-Atvènt tabata un motibu di hopi miedu i prekupashon? Dikon nos mester tene e Krus na e sentro di nos komprondementu di e huisio?    Kiko boso por hasi komo klas pa yuda tur e miembronan di bo iglesia lokal pa komprondé e bon notisia di e huisio mihó?    Kiko lo bo por hasi pa un hende ku ta hopi deskurashá tokante di su kanamentu ku Señor? Kon bo por usa loke nos a studia e siman aki pa duna e persona ei kurashamentu pa no entregá?