Spiritu Santu, e Palabra, i Orashon

Ounke bistí ku kapa piadoso, hopi orashon ta ser guiá pa motibunan kuestionabel. Nos lo por hasi orashon pa bida di un hende ser di spar pasobra nos no gusta biba nos so. Nos lo por hasi orashon pa éksito den e obra di Dios pasobra nos tin un parti importante den dje. Nos lo por hasi orashon pa kombershon di un persona pasobra e ora ei nos bida lo ta mas fásil. Hopi biaha nos orashonnan ta sentrá mas tantu riba loke ku nos ke, mas bien ku loke Dios ke. Orashon ku ta agradabel na Dios tin un enfoke diferente.

Lesa Juan 15:7. Dikon ta importante pa nos orashonnan pa nos ta den Hesus i ku Su Palabra ta biba den nos? Ki enfoke diferente nos orashonnan lo tin si nos no keda den Hesus?

Pa buska Dios promé i gosa di Su kompañerismo, ta mas importante ku kualke otro kos ku E lo por duna nos. Si Dios ta na promé lugá den nos bida, nos lo ke hasi loke E ke; Su pensamentunan lo moldia nos deseonan. Unabes ku Dios ta e sentro di nos orashon, nos lo kuminsá hasi orashon for di Su perspektiva. Nos lo kuminsá mira henter nos bida atraves di Su wowonan. E perspektiva aki ta enrikesé orashon.

Dios ta profundamente interesá den nos. E ta anhelá pa ta parti di tur aspekto di nos bida: nos preokupashonnan, nos temornan, nos deseonan, nos speransanan, nos anhelonan, nos deseonan, nos éksitonan, nos gosonan, nos fayonan, tur kos. Nos por papia tokante e kosnan aki kunE manera ku un bon amigu. I nos ta wak tur esaki atraves di Su wowonan.

Orashon no ta kambia Dios; e ta kambia nos, pasobra nos ta ser hibá den e presensia di Dios ku ta kambia bida.

“Orashon ta habrimentu di e kurason na Dios manera na un amigu. No ku e ta nesesario pa hasi konosí na Dios kiko nos ta, sino pa kapasitá nos pa risibiÉ. Orashon no ta baha Dios bin seka nos, sino ta subi nos seka Dje” ─Ellen G. White, Steps to Christ, p. 93.

Ki un sita poderoso! E ta kapta asina tantu di e realidat di kiko orashon ta hasi ku nos i pa nos. Orashon so ta hasi nos resipientenan habrí pa e grasia, e poder, i e presensia di Dios den nos bida. Ken, te na sierto punto, no a yega di eksperensiá e realidat di kon orashon por hala nos mas serka di Dios?

Lesa Mateo 7:7. Promé ku nos por risibí kualke kos for di Dios, nos mester pidi p’e. Dikon nos pidimentu ta asina importante si, di tur manera, Dios sa tur kos?

Pidimentu ta revelá nos deseo i ta ekspresá nos konfiansa den Dios. Pa medio di orashon nos ta aserk’É, for di Kende nos ta buska sosten i yudansa. Ora nos ta pidi Dios, nos ta dun’E públikamente tambe pèrmit pa bira aktivo na nos fabor. Dios ke ser pidí. E ta deseá pa nos trese nos petishonnan di orashon serka djE. Si nos no pidiÉ, nos lo no risibí e donnan ku E a primintí. Hesus a bisa: “Pidi, i lo ser duná na bo; buska, i lo bo haña; bati, i lo ser habrí pa bo. Pasobra tur ku pidi lo risibí, i esun ku buska lo haña, i na esun ku bati lo ser habrí.” (Lukas 11:9, 10, NKJV).

Lesa Marko 11:24; 1 Juan 5:14, 15; i Salmo 66:18. Dikon ningun petishon di orashon ta muchu grandi pa Dios? Dikon ta bon pa sa ku Dios ta generoso i ta gusta duna for di Su abundansia? Kiko ta e rekisito pa Dios kumpli ku nos orashonnan?

Berdaderamente nos por pidi Dios pa kualke kos. Ningun petishon ta demasiado chikitu òf sin importansia p’E. Ningun petishon ta asina grandi ku Dios no por dil kuné. E ta omnipotente. Pa fe nos por reklamá tur promesa den Beibel i risibí e don primintí for di Su mannan, di akuerdo ku Su boluntat (2 Kor. 1:20).

Sinembargo, tin algun kondishon pa ser kumplí kuné pa risibí loke nos ta pidi. Si nos no ta dispuesto pa someté totalmente na Dios, i si nos petishonnan ta reflehá solamente nos deseonan egoista i pekaminoso, Dios lo no kontestá nos orashonnan (lesa Isa. 59:1, 2). Un kondishon importante pa kumplimentu di nos orashonnan ta nos disponibilidat pa sigui e boluntat di Dios i pa ta obedesidu. “Tur Su [Dios] donnan ta primintí bou di kondishon di obediensia.”─Ellen G. White, Christ’s Object Lessons, p. 145. Sabiendo ku Dios ta generoso, nos por bai ku konfiansa serka djE. “Señor no ta ser glorifiká dor di e súplikanan slap ku ta mustra ku nada ta ser sperá. E ta deseá pa tur esnan ku ta kere, aserká e trono di grasia ku sinseridat i siguransa.” ─Ellen G. White, Signs of the Times, Aug. 7, 1901.

Lesa Marko 11:24. Ademas di pidi, ki otro aspekto Hesus ta menshoná den konekshon ku orashon?

Pidi solamente no ta sufisiente. Tin un di dos aspekto importante ku mester ta presente den nos orashonnan: fe. E buki di Hebreonan ta bisa nos ku “sin fe ta imposibel pa agradá” Dios (Hebr. 11:6, NASB). Ora ku nos rudia dilanti di Dios i habri Beibel na kualke un di e mas di tres mil promesa, i despues pidi Dios ku e simplesa di un mucha chikitu, pa kumpli ku Su promesa na nos fabor, nos mester kere ku E lo hasi loke ta mihó pa nos na Su tempu.

Lesa Santiago 1:6-8. Kon e tèkst ta deskribí e persona ku tin falta di fe? Dikon fe ta un rekisito pa risibí e donnan primintí?

Si nos bin serka Dios, nos mester kere ku E ta eksistí i ku E lo rekompensá esnan ku busk’É. Orashon efektivo mester ta kompañá ku un kreensia no solamente ku Dios por kontestá, sino ku E lo hasi asina di akuerdo ku Su boluntat divino.

Den Beibel, kerementu ta relashoná ku konfia. Nos por konfia un hende solamente ora nos sa ku e otro persona ta konfiabel. Ora ku nos ta karisiá duda si Dios lo kumpli ku Su promesanan, nos ta basilá i no por spera ku nos lo risibí nada di djE. Pa kere ta nifiká ku nos ta konfia Dios riba Su palabra. E ta nifiká ku nos ta dependé riba Dios i riba Su promesanan, asta ora nos sentimentunan ta bisa nos otro kos. Pasobra “fe ta e siguransa di kosnan ku nos ta spera, e konvikshon di kosnan invisibel” (Hebr. 11:1, NASB). Fe ta tene duru na e promesanan di Dios pasobra nos ta konfia loke E a bisa (Hebr. 11:11). Fe sa ku “ta imposibel pa Dios gaña” (Hebr. 6:18, NASB). Dios ta e mesun ayera, awe, i pa semper (Hebr. 13:8). Fe sa ku pa Dios nada ta imposibel (Lukas 1:37).

Fe ta habri e porta na e kas di tesoro divino. Pa medio di Spiritu Santu, Dios ta move kurasonnan di hòmber i muhénan pa konfia e Palabra di Dios, i pa medio di fe nos orashonnan ta move e brasa di omnipotensia.

Tur fe ta inútil si nos no reklamá e kosnan pa kua nos a hasi orashon.

Lesa 1 Juan 5: 14, 15. Kiko ta e motibu ku nos por tin konfiansa ku Dios ta tende nos i ku nos ta risibí loke nos a pidiÉ?

E di tres aspekto di orashon bíbliko ta e resepshon. Despues di a pidi Dios i a kere den Su promesanan, nos mester reklamá loke E a primintí. Nos ta reklamá e promesa di Dios i, den fe, nos ta gradisiE pa esaki, asta promé ku nos a risibié. Asina e promesanan ta ser apliká na nos kurason. Ellen G. White a bisa ku “nos por pidi pa kualke don ku E a primintí; despues nos mester kere ku nos ta hañ’é, i duna danki na Dios ku nos a risibié.”─Education, p. 258.

Den Lukas 8:11 Hesus ta kompará e Palabra di Dios ku un simia. Di e mesun manera ku henter e palu di apel ta kontené den un simia di apel, e don di Dios ta kontené den Su promesanan. Ora ku nos reklamá e promesa i gradisí Dios p’e, ya nos ta poseé e don ku E a primintí. Pa fe nos ta risibí e don primintí asta promé ku nos por sinti òf mir’é.

E ehèmpel di e resurekshon di Lázaro den Juan 11 ta ilustrá ku Hesus a hasi orashon di e manera aki. Hesus tabata sa eksaktamente kiko tabata Dios Su boluntat den e situashon aki. Juan 11:11 ta bisa nos ku E tabata dispuesto pa hasi e boluntat di Dios i ku E tabata obedesidu. Den Juan 11:39-41 nos ta lesa ku Hesus a gradisí e Tata adelantá ku E lo a resusitá Lázaro, ounke Lázaro tabata den e graf ainda. Ora ku Hesus a gradisí Dios, E a risibí e kumplimentu di Su petishon. Komo yunan di Dios nos mester biba riba e promesanan di Dios, no riba Su splikashonnan. Ounke nos no por splika tur kos, nos por konfia Su promesanan.

“Señor ta bisa: ‘Sklama na Mi den e dia di angustia.’ Salmo 50:15. E ta invitá nos pa presentá na djE nos konfushonnan i nesesidatnan, i nos nesesidat di yudansa divino. E ta konsehá nos pa ta konstante den orashon. Asina ku surgi difikultat, nos mester ofresé na djE nos petishonnan sinsero i ferviente. Dor di nos orashonnan persistente nos ta duna evidensia di nos konfiansa fuerte den Dios. E sentido di nos nesesidat ta hiba nos na hasi orashon ku mas fervor, i nos Tata selestial ta ser moví dor di nos súplikanan.”─Ellen G. White, Christ’s Object Lessons, p. 172.

Lesa Efesionan 3:16 i Echonan 2:38. Kiko e tèkstnan aki ta bisa nos tokante risibí Spiritu Santu den nos bida?

Tin hopi kos pa kua nos por hasi orashon, pero tin un gran nesesidat den e tempu di peliger aki den kua nos ta biba: ta e don di Spiritu Santu. Esaki ta e don di mas grandi ku Hesus por a duna. Dor di a duna e Spiritu Santu, Dios no por a duna Su pueblo mas. Na e don aki nada por a ser agregá (despues di tur kos, kiko por a ser añadí na Divinidat Mes?). Atraves di djE i Su obra den nos bida, tur nos nesesidatnan ta ser suplí. E bendishon di Spiritu Santu lo trese huntu kuné tur otro bendishon.

Tin, sinembargo, un opstákulo mayó, i esei ta nos mes, pasobra hopi biaha nos no ta prepará pa risibí Spiritu Santu.

Manera den e dianan di e iglesia di Tèstamènt Nobo, nos mester realisá ku promé nos mester repentí i someté nos bida totalmente na Hesus. Sí, ta solamente e inspirashon di Spiritu Santu ku asta ta permití nos hasi esei.

Sinembargo, ora ku nos kontestá Su inspirashon, e ora ei repentimentu pa piká ta e promé fruta di e obra di Spiritu Santu den nos bida. Den humildat i fe nos mester konfesá nos pikánan pa E por purifiká nos for di tur inhustisia. Nos mester komprondé kon kaí nos ta i kuantu nos tin mester di Dios i Su grasia den nos bida. Sin djE nos ta pèrdí, morto den nos pikánan i kondená na perdishon eterno.

Asina anto, den orashon sinsero, nos lo kumpli ku e kondishonnan riba kua Dios a primintí di duna nos Su Spiritu Santu. E ora ei tur loke nos mester hasi ta di pidi Dios, i E lo duna nos gustosamente Su Spiritu. “E Mayor selestial ta mas dispuesto pa duna Spiritu Santu na esnan ku pidiÉ ku mayornan terenal ta dispuesto pa duna bon kosnan na nan yunan.”─Ellen G. White, Ye Shall Receive Power, p. 284.

Manera ta ku otro kosnan spiritual, e don di Spiritu Santu nunka ta un fin riba su mes. E ta ser duná pa halsa Hesus, pa reprodusí e karakter di Kristu den nos bida, i pa kapasitá nos pa sirbi otronan den edifiká e kurpa di Kristu, e iglesia. Asina, kada práktika di adorashon, públiko òf privá, ku ta elevá e Spiritu mas haltu ku Kristu, ta robes. Pasobra ta atraves di Hesus nos “tin nos akseso den un Spiritu na e Tata” (Efe. 2:18, NASB).

Lesa Ellen G. White, “ Asking to Give,” p. 139-149, den Christ’s Object Lessons. Pa un kolekshon útil di promesanan ku ta enkurashá, lesa Ellen G. White, God Has Promised (Washington, D.C.: Review and Herald, 1982.)

Sin orashon nos lo no tabatin poder spiritual den nos bida, pasobra orashon ta konektá nos ku e Fuente di e poder ei. Sin orashon nos lo no tabatin un konekshon vital ku Dios. Nos lo bira weanan bashí ku lo por tin “un forma di santidat”, pero ku lo ta bashí di e poder i promesa di e donnan di ariba. I, sin duda, manera nos a mira henter e siman aki, promesanan maravioso a ser duná na nos tokante Dios ku ta kontestá orashonnan. Pero ke tal di tur e biahanan ku nos no ta haña loke nos ta hasi orashon p’e, asta ora nos a purba kumpli ku tur e kondishonnan di e mihó forma segun nos abilidat risibí for di Dios? “Pero no deskurashá si bo orashonnan no ta parse di ta haña un kontesta inmediato. Señor ta mira ku orashon hopi biaha ta mesklá ku kosnan di mundu. Hende ta hasi orashon pa e loke ta satisfasé nan deseonan egoista, i Señor no ta kumpli ku nan petishonnan den e forma ku nan ta spera. E ta pasa nan dor di tèstnan i pruebanan, E ta laga nan pasa dor di humiashonnan, te ora ku nan mira di forma mas kla kiko nan nesesidatnan ta. E no ta duna hende e kosnan ku lo satisfasé un apetit degradá i ku lo proba di ta un daño na e agente humano i hasié un deshonra pa Dios. E no ta duna hende e loke ku lo gratifiká nan ambishon i trabou simplemente pa eksaltashon propio. Ora nos bini serka Dios, nos mester ta sumiso i kontrito di kurason, i supordiná tur kos na Su boluntat sagrado.”─Ellen G. White, In Heavenly Places, p. 89.