Lès 2 * 1 – 7 di aprel

Un Herensia Inkoruptibel

Sabat Atardi

Lesa pa e siman aki:

1 Pe. 1:1, 2; Juan 3:16; Ezek. 33:11; 1 Pe. 1:3-21; Lev. 11:44, 45; 1 Pe. 1:22-25.

Versíkulo di Memoria:

“Komo ku den obediensia na e bèrdat boso a purifiká boso alma pa un amor sinsero pa ku e rumannan, stima otro fervientemente, di kurason” (1 Pedro 1:22).

Ki ora ku un hende studia Beibel, partikularmente ku focus riba un buki òf asta un sekshon di un buki, un par di pregunta mester ser kontestá, si ta posibel.

Di promé, lo tabata bon pa sa ken e lesadónan mester tabata. Di dos, kisas asta mas importante, lo tabata bon pa sa kiko e motibu eksakto pa e skirbimentu tabata. Kiko tabata e asuntu partikular (si tabatin) ku e outor kier a atendé (manera e karta di Pablo na e Galationan enkuanto di e erornan teológiko ku tabata ser siñá tokante salbashon i lei)? Manera nos sa, hopi di Tèstamènt Nobo a ser skirbí komo epístola, òf karta, i hende normalmente ta skirbi karta pa transmití mensahenan spesífiko na esnan ku ta risibí nan.

Den otro palabra, manera nos ta lesa Pedro, lo tabata bon pa sa, mas tantu posibel, e konteksto históriko di su karta. Kiko e tabata bisa, i dikon? I naturalmente, mas importante ku tur: Ki mensahe nos por (na ken, bou di inspirashon, e a ser skirbí tambe) saka for di dje?

I manera nos lo mira pronto, asta den e promé par di versíkulo, Pedro tin hopi bèrdat importante pa revelá na nos awe, siglonan despues ku e a skirbi.

* Studia e lès di e siman aki pa prepará pa Sabat, 8 di aprel.

Djadumingu2 di aprel

Na Esnan den Eksilio

Si bo a ser duná un pida papel ku tabata kuminsá, “Apresiabel Señor,” lo bo a realisá ku bo tabata lesando un karta. I lo bo a asumí ku e karta tabata bin di un hende ku probablemente no ta serka di bo.

Meskos ku kartanan moderno tin un manera stándart pa kuminsá, asina tambe kartanan den antigwedat. Promé Pedro ta kuminsá manera kualke karta di antigwedat. E ta identifiká e outor i esnan na ken e tabata ser mandá.

Lesa 1 Pedro 1:1. Kiko nos por siña di esun versíkulo aki ku ta yuda duna nos un tiki di e konteksto?



Pedro ta identifiká su mes klaramente. Su nòmber ta e promé palabra den e karta. Sinembargo, inmediatamente e ta identifiká su mes komo “un apòstel di Hesukristu.” Asina, meskos ku Pablo tabata hasi hopi biaha (Gal. 1:1, Rom. 1:1, Ef. 1:1), Pedro ta establesé su “kredensialnan” mesora, enfatisando su yamada divino. E tabata un “apòstel”, es desir “unu ku a ser mandá”, i Esun ku a mand’é tabata Señor Hesukristu.

Pedro ta identifiká un region na kua su karta tabata dirigí: Pontus, Galatia, Cappadocia, Asia, i Bithynia. Esakinan tur ta regionnan den Asia Menor, masoménos ekivalente na e parti di Turkia moderno pariba di Bosforus.

Tin debatenan tokante si Pedro tabata skirbi mas tantu na kreyentenan hudiu òf na kreyentenan pagano. E tèrminonan ku Pedro a usa den 1 Pedro 1:1 “huéspet/eksiliado,” “dispershon [diaspora] ”, (NRSV) ta tèrminonan ku naturalmente ta pertenesé na hudiunan ku, den e promé siglo, tabata biba pafó di e Tera Santu. E palabranan eskohí i santifiká den 1 Pedro 1:2 ta pas pa tantu hudiu komo kristian. Deskribiendo esnan pafó di e komunidat komo “pagano” (1 Pe. 2:12, 4:3) tambe ta suprayá e karakter hudiu di esnan na kua Pedro ta skirbi.

Algun komentarista ta argumentá, komo kontesta, ku lokual Pedro ta bisa den 1 Pedro 1:18 i 4:3 lo tabata mas apropiá bisá na konversonan pagano na kristianismo ku esnan hudiu. Despues di tur kos, Pedro realmente lo a skirbi na hudiu tokante e “manera bano di biba ku boso a eredá di boso antepasadonan”? Òf lo e a bisa e lesadónan hudiu, “Pasobra nos a pasa sufisiente tempu kaba kumpliendo ku e deseo di e paganonan, hibando un bida di sensualidat, pashon, buracheria, paranda, fiesta di bebementu i idolatria abominabel” (1 Pe. 4:3, NKJV)?

Djaluna3 di aprel

Skohí

Lesa 1 Pedro 1:2. Kiko mas esaki ta bisa nos tokante esnan na ken Pedro tabata skirbi? Kiko e ta yama nan?



Sea skirbi na spesífikamente kreyentenan hudiu òf pagano, Pedro tabata sigur di un kos: nan tabata “skohí segun e konosementu previo di Dios Tata” (1 Pe. 1:2).

Aki, sinembargo, hende mester ta kuidadoso. Esaki no ke men ku Dios ta predestiná algun hende pa ta salbá i algun pa ta pèrdí, i pa suerte, esnan na ken Pedro tabata skirbi pa kasualidat ta algun di esnan skohé òf elegí dor di Dios pa salbashon, miéntras ku otronan a ser skohé dor di Dios pa ta pèrdí. Esei no ta loke Beibel ta siña.

Lesa 1 Timoteo 2:4, 2 Pedro 3:9, Juan 3:16, Ezekiel 33:11. Kon e versíkulonan aki ta yuda nos komprondé loke Pedro tabata ke men ora e a yama e hendenan aki “eskohí”?



Skritura ta hasié kla ku tabata e plan di Dios pa tur hende ser salbá, un plan ku a ser instituí na nan fabor asta promé ku kreashon di mundu: “meskos ku E a skohe nos den djE promé ku fundashon di mundu” (Ef. 1:4, NKJV). “Tur” ta “eskohí” den sentido ku e propósito original di Dios tabata pa tur hende ta salbá i ningun hende bai pèrdí. E a predestiná henter humanidat pa bida eterno. Esaki ke men ku e plan di salbashon tabata adekuá pa tur hende ser inkluí den e rekonsiliashon, asta si no tur hende lo a aseptá kiko e rekonsiliashon tabata ofresé nan.

E konosementu previo di Dios di esnan eligí ta simplemente su konosementu adelantá di kiko nan eskoho liber lo tabata relashoná ku salbashon. E konosementu previo aki di ningun manera a fòrsa nan eskoho mas ku un mama ku sa adelantá ku su yu lo skohe bolo di chukulati na lugá di bonchi bèrdè a nifiká ku su konosementu previo di e eskoho a obligá e mucha di tum’é.

Djamars4 di aprel

Temanan Klave

Lesa 1 Pedro 1:3-12. Kiko ta e mensahe prinsipal di Pedro den e versíkulonan aki?



Den su saludo na su lesadónan den 1 Pedro 1:1,2, Pedro ya a menshoná e Tata, Yu i Spiritu Santu (1 Pe. 1:2). E tres miembronan di e deidat ta forma e tema di 1 Pedro 1:3-12. E Tata i Yu ta e tópiko di 1 Pedro 1:3-9, i Spiritu Santu ta prominente den 1 Peter 1:10-12.

Segun ku e ta skirbi tokante e Tata i Yu i e obra di Spiritu Santu, Pedro ta introdusí hopi di e temanan ku e lo trata despues.

Kristiannan, Pedro ta kuminsá (1 Pe. 1:3; lesa tambe Juan 3:7), a nase di nobo. Henter nan bida a ser transformá pa e resurekshon di Hesus i e herensia ekstraordinario ku ta spera kristiannan den shelu (1 Pe. 1:3, 4). Aki, manera den asina tantu otro lugá den Tèstamènt Nobo, e resurekshon di Hesus ta klave den e speransa kristian.

E speransa aki ta duna kristiannan un motibu pa regosihá, apesar di e echo ku hopi di esnan ku ta lesa 1 Pedro ta sufri. E sufrimentu aki ta tèst i refiná nan fe, meskos ku kandela ta tèst i ta refiná oro. Ounke e lesadónan di Pedro no a mira Hesus durante Su ministerio terenal, nan ta stim’E i ta kere den djE. I e resultado di nan fe den djE ta salbashon i e promesa di “un erensia ku ta inkoruptibel i sin mancha i ku lo no marchitá, reservá den shelu pa boso” (1 Pe. 1:4, NKJV).

Pedro ta laga nan sa tambe ku e profetanan di antaño a profetisá e “grasia ku lo a bin pa boso” (1 Pe. 1:10). E profetanan di Tèstamènt Bieu “a hasi búskeda i investigashon” (1 Pe. 1:10, NKJV) tokante e salbashon ku e hendenan aki awor ta eksperensiá den Hesus.

Segun ku nan ta sufri persekushon pa nan fe, Pedro ta mustra nan ku nan ta parti di un konflikto hopi mas amplio entre bon i malu. Na final, e ta purba yuda nan keda fiel na e bèrdat, asta meimei di pruebanan.

Djarason5 di aprel

Bibando e Bida di Salbashon

Lesa 1 Pedro 1:13-21. Di akuerdo ku e pasashi aki, kiko lo mester motivá komportashon kristian?



E palabra p’esei, ku kua 1 Pedro 1:13, NKJV ta kuminsá, ta mustra ku loke Pedro ta bai bisa ta surgi di loke e a kaba di bisa. Manera nos a mira den e estudio di ayera, Pedro a kaba di papia tokante e grasia di Dios i e speransa ku kristiannan tin den Hesukristu (1 Pe. 1:3-12).

Komo resultado di e grasia i speransa aki, Pedro ta urgi su lesadónan pa “faha e hepnan di boso mente” (1 Pe. 1:13). Es desir, komo kontesta riba e salbashon ku nan tin den Hesus, nan mester prepará nan mente pa asina nan para firme i ta fiel (1 Pe. 1:13).

Lesa 1 Pedro 1:13. Kiko ke men pa fiha boso speransa kompletamente riba e grasia revelá den Hesus?



No tin kuestion, Pedro ta bisa nan ku nan speransa ta sosegá solamente den Hesus. Pero despues e ta enfatisá ku un sierto nivel di komportashon ta ser sperá di kristiannan komo konsekuensia di nan salbashon. E ta nota tres di e gran motivashonnan ku ta apoyá komportashon kristian: e karakter di Dios (1 Pe. 1:15, 16), e huisio ku ta bin (1 Pe. 1:17), i e kosto di redenshon (1 Pe. 1:17-21).

E promé kos ku lo motivá komportashon kristian ta e karakter di Dios. E karakter aki por ser resumí di e manera aki: Dios ta santu. Pedro ta sita for di Levítiko 11:44, 45 ora e ta bisa: "Boso lo ta santu, pasobra Ami ta santu." (1 Pe. 1:16). P’esei esnan ku ta sigui Hesus tambe mester ta santu (1 Pe. 1:15-17).

Un di dos motivashon pa komportashon kristian ta ser hañá den e realisashon ku Dios, kende ta santu, lo huzga tur hende di un manera imparsial, di akuerdo ku loke kada un a hasi (1 Pe. 1:17).

Un di tres motivashon ta surgi for di e gran bèrdat ku kristiannan a ser redimí. Esaki ke men ku nan a ser kumprá ku un preis, un preis hopi haltu: e sanger presioso di Kristu (1 Pe. 1:19). Pedro ta enfatisá ku e morto di Hesus no tabata un aksidente di historia sino algu establesé promé ku fundashon di mundu (1 Pe. 1:20).

Djaweps6 di aprel

Un Stima Otro

Pedro awor ta dirigí kristiannan na e ekspreshon final di kon bibando un bida santu i fiel lo ta.

Lesa 1 Pedro 1:22-25. Ki punto krusial e ta hasi aki tokante kiko ke men pa ta un kristian?



Punto di salida di Pedro ta ku kristiannan a ser purifiká kaba (“Komo ku boso a purifiká . . .” ), i ta bibando den obediensia na e bèrdat (1 Pe. 1:22). E verbo “purifiká” òf “hasi limpi” ta ser relashoná djaserka na e palabranan santu i santidat, kua ta konektá bèk na loke Pedro a skirbi un par di versíkulo promé (1 Pe. 1:15). Pa medio di nan kompromiso na Hesus, i pa medio di nan boutismo (kompará 1 Pe. 1:15), kristiannan a purifiká nan mes dor di apartá nan mes pa Dios, i nan ta hasi esaki dor di obedesé e bèrdat.

E kambio aki den nan bida tin e konsekuensia natural ku awor nan ta haña nan mes den un relashon será ku otronan ku ta kompartí un perspektiva similar. E relashonnan aki ta asina será ku Pedro ta usa e lenguahe di famia pa deskribí nan. Kristiannan mester aktua ku amor di ruman. E palabra griego usá den 1 Pedro 1:22, ora e ta papia di e “amor di ruman,” philadelphia ta nifiká literalmente “amor di ruman.” Ta e amor ku famia tin un pa otro.

Tin diferente palabra den griego ku ta ser tradusí “amor”: philia (amistat), eros (e amor pashoná di esposo i esposa), agape (un amor puru ku ta buska e bienestar di esun otro). E palabra ku Pedro ta usa ora e ta skirbi “stima otro fervientemente” (1 Pe. 1:22, NKJV) ta konektá ku agape, ku normalmente ta nifiká e amor puru ku ta buska e bienestar di otronan. Esei siguramente ta e motibu dikon e a añadí e frase pa un stima otro “ku un kurason puru” (1 Pe. 1:22, NKJV), e tipo di kurason ku ta bin for di “nase di nobo” (1 Pe. 1:23; lesa tambe 1 Pe. 1:3) pa medio di e Palabra inkoruptibel di Dios. E tipo di amor aki ta bin solamente di Dios; no ta loke un kurason egoista, sentrá den su mes, no regenerá, lo manifestá, ku ta siguramente dikon Pedro ta pone asina un énfasis riba ser purifiká i riba “obedesé e bèrdat” (1 Pe. 1:22). Bèrdat no ta solamente algu ku bo ta kere; e mester ser bibá.

Djabièrnè7 di aprel

Pa mas Estudio:

Lesa Ellen G. White, “Christ the Way of Life,” pp. 365-368, i “Perfect Obedience Through Christ,” pp. 373-376 den Selected Messages, book 1.

Ta asombroso kon riku i profundo e promé kapítulo aki di Pedro ta i kuantu tereno e ta kubri. Pedro ta kuminsá su epístola ku un meditashon riba e karakter di e Deidat, introdusiendo e Tata, Yu i Spiritu Santu. E Tata a proveé un Salbador den su Yu, Hesukristu, i nos ta ser eligí den djE pa santifikashon i obediensia. Nos ta bin stima Hesus, i den djE nos ta regosihá ku goso eksaltá pasobra, pa medio di Su morto i resurekshon, nos tin e promesa di un “herensia inkoruptibel” den shelu. Asta meimei di pruebanan, e ora ei, nos por regosihá grandemente den e salbashon ku a ser ofresé na nos den Kristu. “Su kartanan [di Pedro] tabata e medio pa rebibá e kurashi i fortalesé e fe di esnan ku tabata pasando dor di prueba i aflikshon, i di renobá na bon obranan esnan ku dor di múltiple tentashon tabata den peliger di pèrdè nan gara na Dios.” - Ellen G. White, The Acts of the Apostles, p. 517. Mientrastantu, Spiritu Santu tabata obra pa medio di e profetanan pa deskribí e dianan den kua Pedro i su lesadónan tabata biba. Komo konsekuensia, Kristiannan mester biba bidanan santu, yená ku obediensia na e bèrdat, den komunidatnan ku ta ser karakterisá pa e tipo di amor ku ta bin di un “kurason puru.”

Preguntanan di Diskushon:

pregunta 1Den klas, pasa riba boso kontestanan riba e pregunta na final di e estudio di djarason: Kiko ta motivá nos pa ta kristian? Kiko boso kontestanan tin en komun? Kon nan ta diferensiá?

pregunta 2Dos bia den e promé kapítulo aki (1 Pe. 1:3, 21), Pedro a trese dilanti e resurekshon di Hesus. Kiko tin tokante e resurekshon ku ta asina krusial pa nos fe?

pregunta 3Pedro a papia tokante un “herensia inkoruptibel” (lesa tambe Dan. 7:18). Kiko esei ta nifiká? Pensa riba tur e kosnan den e mundu aki i e bida aki ku ta kaba na nada òf ku por ser destruí instantáneamente. Kiko esaki lo mester bisa nos tokante kon maravioso nos herensia primintí realmente ta?

pregunta 4Kon nos fe por krese meimei di pruebanan? Es desir, ki eskohonan nos por hasi pa yuda nos siña di e kosnan ku nos ta sufri?