VENSIENDO MALU KU BON

Ku kapítulo 11, e parti di doktrina di e buki di Romanonan ta terminá. Kapítulonan 12 te ku 16 ta presentá instrukshonnan práktiko i notanan personal. Sinembargo, e kapítulonan final aki ta ekstremadamente importante pasobra nan ta mustra kon e bida di fe mester ser bibá.

Pa kuminsá, fe no ta un supstituto pa obediensia, manera kos ku fe di algun manera ta hasi nos obligashon pa obedesé Señor nulo. E preseptonan moral ainda ta vigente; nan ta ser splika, asta amplifiká den e Tèstamènt Nobo. I niun indikashon ta ser duná, ni tampoko, ku lo to fásil pa e Kristian pa regulá su bida dor di e preseptonan moral aki. Al kontrario, nos a ser bisá ku tin momentunan ku e por ta difísil, pasobra e bataya ku e ami i ku piká ta semper difísil (1 Pe. 4:1). Na e Kristian ta ser primintí poder divino i duná siguransa ku viktoria ta posibel, pero ainda nos ta den e mundu di e enemigu i lo mester bringa hopi bataya kontra tentashon. E bon notisia ta ku si nos kai, si nos trompeká, nos no ta ser rechasá, pero nos tin un Sumosaserdote ku ta intersedé na nos fabor (Hebr. 7:25).

Lesa Romanonan 12:1. Kon e analogia presentá aki ta revelá kon nos komo Kristiannan mester biba? Kon Romanonan 12:2 ta pas den esaki?

Den Romanonan 12:1, Pablo ta aludí na sakrifisionan di Tèstamènt Bieu. Meskos ku, den antigwedat, animalnan tabata ser sakrifiká na Dios, asina awor Kristiannan mester entrega nan kurpa na Dios—no pa ser matá pero komo sakrifisionan bibu dediká na Su servisio.

Den e tempu di Israel antiguo, kada ofrenda tresé komo un sakrifisio tabata ser saminá kuidadosamente. Si kualke defekto a ser diskubrí den e animal, e tabata ser rechasá, pasobra Dios a ordená ku e ofrenda ta sin mancha. Asina, Kristiannan ta ser pidí pa presentá nan kurpanan "komo un sakrifisio bibu, santu, aseptabel na Dios." Pa por hasi esaki, tur nan fakultatnan mester ser preservá den e mihó kondishon posibel. Ounke niun di nos ta sin mancha, e punto ta ku nos mester purba biba di forma mas intachabel i fiel ku nos por.

Nos a papia e trimèster aki masha hopi tokante e estado perpetuo di e lei moral di Dios i a enfatisá bes tras bes ku e mensahe di Pablo den e buki di Romanonan no ta unu ku ta siña ku e Dies Mandamentunan a ser eliminá ku òf di un forma òf otro anulá pa medio di fe.

Sinembargo, ta fásil pa ta asina atrapá den e lèter di e lei ku nos ta lubidá e spiritu su tras. I e spiritu ei ta amor—amor pa Dios i amor un pa otro. Miéntras kualke hende por profesá amor, pa revelá e amor ei den bida di tur dia por ta un asuntu kompletamente diferente.

Lesa Romanonan 12:3-21. Kon nos mester revelá amor pa otronan?

Manera den 1 Korintionan 12 i 13, Pablo ta eksaltá amor despues di a trata ku e donnan di e Spiritu. Amor (Griego agape) ta e manera mas ekselente. "Dios ta amor" (1 Juan 4:8). Por lo tantu, amor ta deskribí e karakter di Dios. Pa stima ta pa aktua pa ku otronan manera Dios ta aktua i pa trata nan manera Dios ta trata nan.

Pablo ta mustra aki ku amor mester ser ekspresá den un forma práktiko. Un prinsipio importante ta surgi, i esei ta humildat personal: un disponibilidat di un persona "no pa pensa mas haltu di su mes ku e mester pensa" (Rom. 12:3), un disponibilidat pa "duna preferensia na otro den onor" (Rom. 12:10), i un disponibilidat pa "no sea orguyoso den boso pensamentu" (Rom. 12:16). Kristu Su palabranan tokante Su mes, "Tuma Mi yugo riba boso, i siña di Mi, pasobra Mi ta mansu i humilde di kurason" (Mat. 11:29), ta kapta e esensia di esaki.

Di tur hende, Kristiannan mester ta esnan di mas humilde. Despues di tur kos, wak kon inkapas nos ta. Wak kon kaí nos ta. Wak kon dependiente nos ta, no solamente riba un hustisia eksterior di nos mes pa salbashon pero tambe riba un poder obrando den nos pa asina kambia nos den formanan ku nos nunka por kambia nos mes. Kiko nos tin pa broma di dje? Kiko nos tin pa gaba di dje? Kiko nos tin den i di nos mes pa ta orguyoso di dje? Apsolutamente nada. Si nos kuminsá na e humildat personal aki, no solamente dilanti di Dios pero dilanti otronan, nos mester biba manera Pablo ta spièrta nos pa hasi den e versíkulonan aki.

Lesa Romanonan 13:1-7. Ki prinsipionan básiko nos por saka for di e pasashi aki tokante e maneranan den kua nos mester relashoná na e poder sivil di gobièrnu?

Loke ta hasi Pablo su palabranan asina interesante ta ku e a skirbi durante un tempu ora ku un imperio pagano tabata goberná e mundu―unu ku por tabata inkreiblemente brutal, unu ku tabata korupto for di su base, i unu ku no tabata sa nada tokante e Dios berdadero i ku, denter di un par di aña, lo a kuminsá un persekushon masivo di esnan ku tabata ke a adorá e Dios ei. De echo, Pablo a ser matá dor di e gobièrnu ei! Sinembargo, apesar di tur esaki, Pablo tabata promové pa Kristiannan tabata bon suidadano, asta bou di un gobièrnu manera esei?

Sí. Anto esei ta pasobra e idea di gobièrnu mes ta ser haña dor di henter e Beibel. E konsepto, e prinsipio di gobièrnu, ta ordená dor di Dios. Sernan humano mester biba den un komunidat ku reglanan i regulashonnan i normanan. Anarkia no ta un konsepto bíbliko.

Ku tur esei, no ta nifiká ku Dios ta aprobá tur forma di gobièrnu òf kon tur gobièrnu ta ser atministrá. Al kontrario. Nos no mester wak masha leu, sea den historia òf den e mundu awe, pa mira algun régimen brutal. Sinembargo asta den situashonnan manera esakinan, Kristiannan mester, mas tantu posibel, obedesé e leinan di e pais. Kristiannan mester duna sosten leal na gobièrnu tanten ku su demandanan no ta den konflikto ku e demandanan di Dios. Un hende mester konsiderá ku hopi orashon i kuidadosamente―i ku e konseho di otronan―promé ku subi riba un kaminda ku ta pon’é den konflikto ku e podernan ku ta eksistí. Nos sa for di profesia ku un dia tur e siguidónan fiel di Dios lo ser enfrentá ku e podernan polítiko ku ta den kontròl di e mundu (Revelashon 13). Te e dia ei, nos mester hasi tur loke nos por, dilanti di Dios, pa ta bon suidadanonan den kual sea pais ku nos ta biba.

"Nos mester rekonosé gobièrnu humano komo un ordenansa di nombramentu divino, i siña obediensia na dje komo un deber sagrado, denter di su esfera legítimo. Pero ora ku su demandanan ta den konflikto ku e demandanan di Dios, nos mester obedesé Dios mas bien ku hende. Dios Su palabra mester ser rekonosé riba tur legislashon humano. . . .

"Nos no ta ser rekerí di nos pa desafiá outoridatnan. Nos palabranan, sea papiá òf skirbí, mester ser konsiderá kuidadosamente, pa nos no pone nos mes den registro komo ekspresando e loke lo laga nos parse komo kontra di lei i òrdu. Nos no mester bisa òf hasi nada ku innesesariamente lo sera nos kaminda."—Ellen G. White, The Acts of the Apostles, p. 69.

"No debe ningun hende nada, sino solamente pa stima otro; pasobra esun ku stima su próhimo a kumpli ku lei" (Rom. 13:8). Kon nos mester komprondé e versíkulo aki? E ta nifiká ku si nos stima, nos no tin niun obligashon, e ora ei, pa obedesé e lei di Dios?

Manera Hesus a hasi den e Sermon riba e Seru, Pablo ta amplifiká aki e preseptonan di e lei, mustrando ku amor mester ta e poder motivante tras di tur loke nos ta hasi. Pasobra e lei ta un transkripshon di e karakter di Dios, i Dios ta amor, pa stima, dor di esei, ta pa kumpli ku e lei. Sinembargo, Pablo no ta sustituyendo algun norma vago di amor pa e preseptonan presisamente detayá di e lei, manera algun Kristiannan ta afirmá. E lei moral ainda ta obligatorio, pasobra, atrobe, e ta loke ta mustra na piká‒i ken ta bai ninga e realidat di piká? Sinembargo, e lei berdaderamente por ser wardá solamente den konteksto di amor. Kòrda, algun di esnan ku a hiba Kristu na e krus a kore despues bai kas pa warda e lei!

Kua mandamentunan Pablo a sita komo ehèmpelnan ku ta ilustrá e prinsipio di amor den wardamentu di e lei? Dikon esakinan en partikular? Rom. 13:9, 10.

Ta interesante pa bisa, e faktor di amor no tabata un prinsipio resien introdusí. Dor di sita Levítiko 19:18, "Lo bo stima bo próhimo manera bo mes," Pablo ta mustra ku e prinsipio tabata un parti integral di e sistema di Tèstamènt Bieu. Atrobe Pablo ta apelá na Tèstamènt Bieu pa sostené su predikamentu di evangelio. Algun ta argumentá ku for di e tèkstnan aki ku Pablo ta siñando ku ta solamente e par di mandamentunan menshoná aki ta vigente. Si ta asina, esaki ta nifiká, anto, ku Kristiannan por deshonrá nan mayornan, adorá ídolonan, i tin otro diosnan dilanti di Señor? Naturalmente ku nò.

Wak e konteksto akinan. Pablo ta tratando ku kon nos ta relashoná un ku otro. E ta tratando ku relashonnan personal, kua ta e motibu dikon e ta spesifiká e mandamentunan ku ta sentrá riba e relashonnan aki. Su argumento siguramente no mester ser interpretá komo anulashon di sobrá di e lei (lesa Echonan 15:20, 1 Tes. 1:9, 1 Juan 5:21). Ademas, manera e eskritornan di Tèstamènt Nobo ta indiká, dor di mustra amor na otronan, nos ta mustra nos amor na Dios (Mat. 25:40; 1 Juan 4:20, 21).

Manera nos a deklará henter trimèster, Pablo tabatin un enfoke masha spesífiko den e karta aki na e Romanonan, i esei tabata pa klarifiká pa e iglesia na Roma—spesialmente e kreyentenan Hudiu einan—e ròl di fe i obranan den konteksto di e Pakto Nobo. E asuntu tabata salbashon i kon un pekador ta ser konsiderá hustu i santu dilanti di Señor. Pa yuda esnan ken henter nan énfasis tabata riba lei, Pablo ta pone e lei den su ròl i konteksto apropiá. Ounke, idealmente, Hudaismo asta den tempunan di Tèstamènt Bieu tabata un religion di grasia, legalismo a surgi i a hasi hopi daño. Kon kuidadoso nos komo iglesia mester ta pa nos no hasi e mesun eror.

Lesa Romanonan 13:11-14. Tokante ki evento Pablo ta papia aki, i kon nos lo mester ta aktuando den antisipashon di e evento ei?

Kon fasinante ku Pablo tabata papia aki na e kreyentenan, bisando nan pa lanta ariba i prepará pasobra Hesus tabata biniendo bèk. E echo ku esaki a ser skirbí kasi dos mil aña pasá no ta importá. Semper nos mester biba den antisipashon di e serkania di Kristu Su bibida. Pa loke ta konserní nos tur, pa loke ta konserní nos propio eksperensianan personal, e Segundo Binida ta mes serka ku e potensial di nos propio morto. Sea ta otro siman òf aki 40 aña nos sera nos wowo den morto, i sea nos drumi solamente kuater dia òf pa 400 aña, e no ta hasi niun diferensia pa nos. E siguiente kos ku nos sa ta e segundo binida di Hesus. Ku morto semper potensialmente djis tras di porta pa kualke di nos, tempu enbèrdat ta kòrtiku, i nos salbashon ta mas serka ku ora nos a kere na prinsipio.

Ounke ku Pablo no ta trata masha den e buki di Romanonan ku e Segundo Binida, den e kartanan di Tesalónika i Korintio e ta kubrié den hopi mas detaye. Despues di tur kos, e ta un tema krusial den Beibel, spesialmente den Tèstamènt Nobo. Sin dje i e speransa ku e ta ofresé, nos fe ta realmente sin nifikashon. Despues di tur kos, kiko "hustifikashon pa medio di fe" ta nifiká sin e Segundo Binida pa trese e bèrdat maravioso ei na realisashon kompletu?

"Den Beibel e boluntat di Dios ta ser revelá. E bèrdatnan di e Palabra di Dios ta e deklarashonnan di e Haltísimo. Esun ku ta hasi e bèrdatnan aki un parti di su bida ta bira den tur sentido un kriatura nobo. E no ta ser duná podernan mental nobo, pero e skuridat ku dor di ignoransia i piká a nubla e komprondementu ta ser kitá. E palabranan, ‘Un kurason nobo tambe lo mi dunabo,’ ta nifiká, ‘Un mente nobo lo mi dunabo.’ Un kambio di kurason semper ta ser kompañá dor di un konvikshon kla di deber Kristian, un komprondementu di bèrdat. Esun ku, ku orashon, duna e Skrituranan atenshon estrikto lo haña un komprenshon kla i bon huisio, manera kos ku dor di bira na Dios e a alkansá un nivel mas haltu di inteligensia."—Ellen G. White, My Life Today, p. 24.

"Señor . . . ta bini pronto, i nos mester ta kla i sperando riba Su aparishon. O, kon glorioso lo ta pa mir'E i ser duná bonbiní komo Su redimínan! Hopi tempu nos a warda, pero nos speransa no mester debilitá. Si nos por mira e Rei den Su bunitesa nos lo ta bendishoná pa semper. Mi ta sinti manera kos ku mi mester grita duru: ‘Na kaminda pa kas!’ Nos ta aserkando e tempu ora Kristu lo bini den poder i gran gloria pa hiba Su redimínan na nan kas eterno."—Ellen G. White, Testimonies for the Church, tomo 8, p. 253.