Maske kuantu Pablo ta trata na koregí e Romanonan di nan noshonnan falsu di e lei, tambe e ta yama tur Kristian na un norma haltu di obediensia. E obediensia aki ta bini for di un kambio interno den nos kurason i mente, un kambio ku ta bini solamente dor di e poder di Dios obrando den un persona someté na djE.
Romanonan no ta kontené niun idea ku e obediensia aki ta bini outomátikamente. E Kristian mester ta iluminá tokante kiko e rekerimentunan ta; nan mester deseá di obedesé e rekerimentunan ei; i, finalmente, e Kristian mester buska e poder sin kua e obediensia ei ta imposibel.
Loke esaki ta nifiká ta ku obranan ta parti di e fe Kristian. Pablo nunka tabatin intenshon di despresiá obranan; den kapítulonan 13 i 15 e ta duna nan énfasis fuerte. Esaki no ta ningamentu di lokual e a bisa anteriormente tokante hustifikashon pa medio di fe. Al kontrario, obranan ta e ekspreshon berdadero di loke ta nifiká biba pa medio di fe. Un hende por asta argumentá ku pa motibu di e revelashon añadí despues ku Hesus a bini, e rekerimentunan di Tèstamènt Nobo ta mas difísil ku loke tabata ser rekerí den esun Bieu. Kreyentenan di Tèstamènt Nobo a ser duná un ehèmpel di komportashon moral apropiá den Hesukristu. E i ningun otro ta mustra e patronchi ku nos mester sigui. "Laga tin den boso e aktitut aki kual tabatin tambe den" [no Moises, no Daniel, no David, no Salomon, no Enok, no Debora, no Elias] "Kristu Hesus" (Fil. 2:5).
E norma no ta—no por!—bai mas haltu ku esei.