Lès 1 * 30 di desèmber - 5 di yanüari

E Influensia di Materialismo

Sabat Atardi

Lesa pa e siman aki:

1 Juan 2:16, 17; Lukas 14:26-33; 12:15-21; Deut. 8:10-14; 1 Tim. 6:10; Juan 15:5; Gal. 2:20.

Versíkulo di Memoria:

"I no sea konforme e mundu aki, ma sea transformá pa medio di e renobamentu di boso mente, pa boso por komprobá kiko ta e bon i agradabel i perfekto boluntat di Dios" (Romanonan 12:2).

E Palabra di Dios ta bisa Su pueblo pa no "sea konforme e mundu aki" (Rom. 12:2), pero e atrakshon di materialismo, e deseo eksesivo pa rikesa i pa loke nos ta pensa ku rikesa por trese, ta poderoso. Masha poko hende, sea riku òf pober, ta mas aya di e alkanse di materialismo.

Esaki ta inkluí Kristiannan tambe.

No tin nada robes ku ta riku, òf asta traha duru pa bai dilanti pa proveé di forma konfortabel pa bo mes i bo sernan kerí. Pero ora plaka, òf e yagmentu tras di plaka, bira ekstensivo, nos a kai den e trampa di diabel i a bira, enbèrdat, "konforme e mundu aki".

E mundu ta karga e idea ku e bon bida, e bida abundante, por ser hañá solamente den plaka. Pero plaka ta un máskara ku Satanas ta skonde su tras pa sigurá nos lealtat. Materialismo ta un di e armanan di eskoho di Satanas kontra Kristiannan. Despues di tur kos, ken no gusta plaka i loke plaka por trese pa nos den e tempu di awor? Su logro di mas grandi ta gratifikashon instante, pero al final e no por supli nos nesesidatnan di mas grandi.

* Studia e lès di e siman aki pa prepará pa Sabat, 6 di yanüari.

Djadumingu31 di desèmber

E Dios di e Mundu Aki

Plaka a bira e dios di e mundu aki, i materialismo ta su religion. Materialismo ta un sistema sofistiká i sutil ku ta ofresé siguridat temporario ma no siguridat final.

Materialismo, manera nos ta definié aki, ta ora ku e deseo pa rikesa i poseshonnan bira mas importante i di mas balor ku realidatnan spiritual. Poseshonnan por tin balor, pero nan balor no mester poseé nos: "Esun ku ta stima plaka lo no keda satisfecho, esun ku ta stima abundansia nunka ta satisfecho ku su entrada" (Ekl. 5:10, NIV). Esei ta e problema ku deseá e kosnan di e mundu aki: no importá kuantu nos haña, nunka e ta sufisiente; nos ta pusha mas i mas duru pa mas i mas di loke nunka por satisfasé nos. Papia tokante un trampa!

Lesa 1 Juan 2:16, 17. Kiko e tèkst aki ta bisa nos tokante kiko ta importá realmente?



Lesa Lukas 14:26-33. Kiko Hesus ta bisando nos aki, tambe, tokante kiko ta di supremo importansia pa e Kristian?



Kisas e por ser bisá asin’aki: esnan pa ken plaka, òf e deseo pa plaka, bira un realidat eksesivo mester, en realidat, konta e kosto. "Pasobra ki probecho un hende tin si e gana henter mundu i pèrdè su alma?" (Marko 8:36).

"Ora Kristu a bin na tera, tabata parse ku humanidat tabata alkansando su punto di mas abou di forma rápido. E fundeshinan mes di sosiedat tabata debilitá. Bida a bira falsu i artifisial. . . . Rònt mundu tur sistema di religion tabata pèrdiendo nan gara riba mente i alma. Disgustá ku fábula i falsedat, buskando pa hoga pensamentu, hende a bira na infidelidat i materialismo. Lagando eternidat pafó di nan pensamentu, nan tabata biba pa e presente." - Ellen G. White, Education, pp. 74, 75.

Hende halá na infidelidat i materialismo i bibando solamente pa e presente? E ta zona konosí?

Djaluna1 di yanüari

Yenando e Mangasinanan

Lesa Lukas 12:15-21. Kiko ta e mensahe na nos aki? Kon e prinsipio aki lo por apliká asta na un hende ku no nesesariamente ta riku?



Sea nos ta riku òf pober, nos deseo pa poseé kos por kita nos mente for di loke realmente ta importá i enfok’é, en kambio, riba loke solamente ta temporal i transitorio i siguramente no digno di e pèrdida di bida eterno.

Probablemente nunka nos lo bùig pa un estatua literal di ora òf plata i ador’é awendia. Sinembargo, ainda nos por ta den peliger di adorá ora i plata, solamente de un otro forma.

E parabel aki ta asina aplikabel den hopi parti di mundu, kaminda bida ta ser dediká kasi eksklusivamente na atkerí poseshon. Rebendedónan a kambia e bendementu di nan produktonan di kas pa kas den un forma di arte riba eskala global. Henter nan strategia di merkadeo ta konstruí riba pone nos pensa ku nos no por ta felis òf satisfecho te ora nos ta poseé loke nan ta bendiendo. Un kompania hopi eksitoso a krea un produkto, a pone nos pensa ku nos tabatin mester di dje, i despues a bend’é ku nos. I e bèrdat ta: é a funshoná! Asta Kristiannan, ken nan speransa no ta di e mundu aki, no ta seif for di e engaño aki.

Lesa Deuteronomio 8:10-14. Den ki formanan kualke miembro di iglesia por ta den peliger di e menasa ku ta ser spièrtá di dje aki?



Djamars2 di yanüari

E Atrakshon di Materialismo

E mundu di propaganda ta poderoso. Kompanianan ta gasta biónes poniendo nan produktonan nos dilanti. Kasi semper nan ta uza hendenan bunita i atraktivo pa promové loke nan ta bendiendo. Nos ta wak e propaganda ei i ta mira nos mes, no solamente ku e produkto ma komo en realidat siendo manera e hendenan den e propaganda.

Materialismo lo no tabata mes efektivo si no tabata pa e sensualidat sutil (i tin biaha no-asina-sutil) hilá den e propaganda. E ta e téknika di mas poderoso di hasimentu di propaganda, pero e ta aktua manera venenu pa Kristiannan ku ta luchando kontra e peligernan di materialismo, kua ta mayoria di nos.

Lesa Mateo 6:22-24. Kiko wowo ta representá di akuerdo ku pensamentu i akshon Kristian? Kon nos komo Kristiannan mester reakshoná riba e imágennan sutil ku ta tenta nos pa uza loke realmente nos no tin mester?



Hasimentu di propaganda ku ta pone sensualidat na produktonan di e rebendedónan por bira un hèrmènt poderoso. Rebendedónan ta bende nan merkansia dor di krea eksitashon den mente di konsumidónan. E eksperensia ta puru fantasia, pero e ta funshoná. E por ta kasi místiko, hibando hende, ounke pa un momentu hopi kòrtiku, na loke ta parse un otro esfera di eksistensia. E ta bira un religion falsu ku no ta ofresé konosementu i niun bèrdat spiritual, sinembargo na e momentu e ta asina yamativo i atraktivo ku hopi hende no ta resistié. Nos kier e, i nos ta sinti ku nos meres’é, pues pakiko no busk’é? Dios so konosé e kantidatnan grandi ku a ser gastá i ainda lo ser gastá riba kosnan ku hasidónan di propaganda a konvensé nos ku nos mester di dje.

"Ma mi ta bisa, kana segun e Spiritu, i boso lo no kumpli ku deseo di e karni" (Gal. 5:16, NKJV). Ounke nos tin tendensia di pensa di e "deseo di karni" den solamente términonan seksual, den ki otro formanan nos por ta den peliger di kumpli ku e deseo aki?

Djarason3 di yanüari

Amor di e Ami

"Pasobra dor di e grasia duná na mi, mi ta bisa kada un di boso pa no pensa mas haltu di su mes ku e mester pensa; ma pa mas bien pensa di su mes ku sano huisio, di akuerdo ku e midí di fe ku Dios a dunabo (Rom. 12:3).

Dios a bisa: "Bo kurason a bira orguyoso pa motibu di bo bunitesa; bo a korumpí bo sabiduria pa motibu di bo splendor" (Eze. 28:17, NKJV). Lucifer a gaña su mes, pensando ku e tabata mas grandi ku e tabata realmente. Ora e a bisa den su kurason, "Lo mi ta manera e Haltísimo" (Isa. 14:14), e a revelá egoismo, reklamando derechinan ku e no tabatin. Engaño-propio i egoismo tabata dos karakterístika di e kurason kaí di Satanas.

E tèkstnan aki tokante e kaida di Lucifer mester bisa nos ku, den hopi forma, e piká original ta esun di egoismo, kua un dikshonario ta definí komo "opseshon eksesivo di bo mes; amor-propio, banidat." Ki karakterístikanan, den kualke ser humano kaí, ta indikadónan di mas grandi di engaño-propio ku esakinan?

Tòg e menasanan aki ta mas komun ku un hende lo por kere. Nabukodonosor, di forma arogante, a pensa ku e tabata mas grandi ku e tabata (Dan. 4:30). E Fariseonan tambe a yega na kere e fantasia seduktor aki (lesa Lukas 18:11, 12). Rikesa, tambe, por hiba na e mesun engaño, si nos no ta kuidadoso.

Lesa 1 Timoteo 6:10. Di ki peliger Pablo ta spièrtando aki?



Pablo ta instruí Timoteo pa tene kuidou ku hopi mal tipo di hende (2 Tim. 3:1-5), inkluyendo “stimadónan di plaka”. E amor pa plaka aki por enkurashá arogansia i un grandioso aktitut di egoismo i orguyo. Esaki ta pasobra materialismo ta inspirá hende ku tin gran poseshonnan ku un sentido haltu di importansia. Ta fásil, ora un hende tin hopi plaka, pa pensa mas haltu di su mes ku e mester pensa. Despues di tur kos, tur hende ke ta riku, ma solamente un par ta alkans’é. P’esei, ta fásil pa e hende riku bira egoista, orguyoso, i bromadó.

Djaweps4 di yanüari

E Insignifikansia Final di Materialismo

Tin hopi hende ku ta stima Dios. Nan identidat ta mesklá ku esun di Dje den un forma ku poseshonnan material no por kita.

Lesa Deuteronomio 7:6, 1 Pedro 2:9, Juan 15:5, i Galationan 2:20. Kiko ta nifiká pa ta poseshon di Dios, i unda nos ta haña nos berdadero identidat?



Dios ta bisa: "Ami ta e mata di wendrùif, boso ta e ramanan. . . . Sin Mi boso no por hasi nada" (Juan 15:5). E konekshon ta direkto i sigur. "Tur berdadero obediensia ta bin for di e kurason. Tabata trabou di kurason ku Kristu. I si nos permití, E lo identifiká Su mes asina ku nos pensamentunan i metanan, meskla nos kurason i mente asina den konformidat na Su boluntat, ku ora nos obedes’E nos lo hasi nada otro sino realisá nos impulsonan." Ellen G. White, The Desire of Ages, p. 668.

Na otro banda, materialismo ta ofresé nos un identidat ku ta sinónimo ku nos poseshonnan. Den otro palabra, nos ta definí nos mes riba base di loke nos ta poseé i loke nos por kumpra di e kosnan di e mundu aki. Santiago ta spièrta nos kontra esaki: "Boso oro i boso plata a frusá. Nan frus lo ta un testimonio kontra boso i lo kaba ku boso karni meskos ku kandela. Ta den e último dianan boso a akumulá boso tesoro" (Santiago 5:3, NIV). "Akumulá" ta nifiká kolekshoná i warda hopi tesoro; mas importante ainda, ta den e tesoronan ei, sea tiki òf hopi, ku hopi ta haña nan identidat (Lukas 12:19-21).

Materialismo ta un forma di konfushon di identidat. Esaki ta nifiká ku pa hopi di nos, nos identidat ta bira mesklá ku nos poseshonnan. Nos poseshonnan ta bira nos Dios (Mat. 6:19-21). Manera un persona a bisa: "Mi no ta nada sin mi kosnan." Kon tristu ta ku nos ta identifiká nos mes solamente pa medio di loke sea poseshonnan terenal ku nos tin. Ki un forma poko hundu, pasahero, i finalmente inefektivo pa biba un hende su bida, spesialmente pa un hende ku ta bisa di ta un Kristian. Nos ta identifiká ku Dios òf ku nos poseshonnan? Finalmente, e lo ta esun òf e otro.

Djabièrnè5 di yanüari

Pa mas Estudio:

"E enemigu ta kumprando almanan awendia hopi barata. ‘Boso a bende boso mes pa nada,’ ta e lenguahe di Skritura. Un hende ta bendiendo su alma pa e aplouso di mundu, un otro pa plaka; unu pa gratifiká pashonnan baho, un otro pa plaser mundano. Areglonan asina ta ser hasí diariamente. Satanas ta ofresé pa paga pa e kompra di e sanger di Kristu i ta bende nan barata, apesar di e preis infinito pagá pa reskatá nan." - Ellen G. White, Testimonies for the Church, tomo 5, p. 133.

Kumpra almanan pa medio di materialismo ta e meta di Satanas, i e trampanan superfisial ta apelá na tur kurason. Materialismo no por papia, pero e sa tur idioma. E sa kon pa proveé plaser i gratifikashon na tantu e riku komo e pober i ta pone nan bisa: "Mi tin tur loke mi mester aki; pakiko preokupá tokante nada mas?" Pues, materialismo ta korumpí e mente; e ta pone hende konfia den loke nan ta poseé kontrali na konfia den Dios. Sinembargo, e antitoksina ta " ‘No pa medio di forsa, ni pa medio di poder, ma pa medio di Mi Spiritu,’ e Señor di ehérsitonan ta bisa" (Zak. 4:6). Materialismo no por soportá e kontròl di Spiritu Santu ora nos duna nos mes na Dios i determiná pa medio di Su grasia pa no laga materialismo goberná nos bida.

Preguntanan di Diskushon:

pregunta 1Kiko ta formanan den kua, asta si nos ta pober òf sin hopi biennan material, ainda nos por ser lastrá den algun di e peligernan ku nos a wak e siman aki?

pregunta 2Algun hende ta bisa: “Mi no tin kunes tokante plaka. Plaka no ta nifiká nada pa mi.” (Hopi biaha, esnan ku ta bisa esaki tin kantidat grandi di plaka en todo kaso.) Dikon, den mayoria kaso, esei simplemente no ta bèrdat? Finansa ta importante; nan tin un ròl den nos bida. E pregunta ta: Kon nos por mantené plaka i nos nesesidat pa plaka den e perspektiva bíbliko korekto?

pregunta 3"No montoná tesoro pa boso mes riba tera, kaminda mòt i frus ta destruí nan, i kaminda ladron ta kibra drenta i hòrta; ma montoná tesoro pa boso mes den shelu, kaminda ni mòt ni frus no ta destruí, i kaminda ladron no ta kibra drenta i hòrta. Pasobra kaminda boso tesoro ta, einan boso kurason lo ta tambe" (Mat. 6:19-21, NKJV). Lesa kuidadosamente loke Hesus ta bisa nos aki. Kon loke E ta bisando nos ta un forma poderoso pa protehá nos mes for di e peligernan di materialismo?