Mi ta Mira, Mi ke, Mi ta Kue

Un predikador di televishon popular tin un mensahe simpel: Dios ke bendishoná bo, i e prueba di su bendishon ta e abundansia di poseshonnan material ku bo ta poseé. Den otro palabra, si bo ta fiel, Dios lo hasibo riku.

E idea aki, òf variantenan di dje, tabata ser yamá e evangelio di prosperidat: Sigui Dios, i E lo hasibo riku den kosnan mundano. E idea aki ta nada otro sino un hustifikashon teológiko falsu pa materialismo, pasobra loke e ta bisando realmente ta, Bo ke ta materialista i sinti bon tokante dje? Awèl, nos tin e “evangelio” pa bo.

Sinembargo, konektando e evangelio ku rikesa garantisá ta un ekshibishon mal dirigí. E kreensia aki ta krea diskrepansia ku Skritura i ta reflehá un teologia egoséntriko ku ta nada mas ku mitar bèrdat bistí den lenguahe bíbliko. Na núkleo di e mentira aki tin e asuntu na núkleo di tur piká, i esei ta e ami i e deseo pa agradá mes riba tur otro kos.

E teologia di e evangelio di prosperidat ta siña ku, dunando na Dios, nos ta gana a kambio un garantia di rikesa material. Pero esaki ta hasi Dios un mashin outomátiko i ta kambia nos relashon kunE den nada otro sino un dil: Ami ta hasi esaki i Abo ta primintí di hasi esei a kambio. Nos ta duna, no pasobra e ta e kos korekto pa hasi ma pa motibu di loke nos ta haña a kambio.

Esei ta e evangelio di prosperidat.

Lesa 2 Korintionan 8:1-7. Kiko ta sosodiendo aki? Ki prinsipionan nos ta mira den e tèkstnan aki ku ta bai kontra di e idea aki di e evangelio di prosperidat? Kiko Pablo ke men ora e ta papia tokante e “grasia di duna? (2 Kor. 8:7)?

E hendenan aki, ounke den “ekstremo pobresa” (2 Kor. 8:2), tabata sinembargo hopi generoso, dunando asta mas di loke nan por a permití nan mes. Tèkstnan manera esakinan, i hopi otronan, ta yuda refutá e teologia falsu di e evangelio di prosperidat, kua ta siña ku si bo ta bibando bon ku Dios, lo bo tin un kantidat di poseshonnan material pa mustra esaki.

Nos no tin mester di Beibel pa siña nos un bèrdat opvio: E preokupashonnan di e bida aki i su rikesanan ta temporal. Nada aki ta dura, i siguramente no largu tampoko. Manera Pablo a bisa: “Nos no ta wak e kosnan ku ta ser mirá, ma e kosnan ku no ta ser mirá: pasobra e kosnan ku ta ser mirá ta temporal, ma e kosnan ku no ta ser mirá ta eterno” (2 Kor. 4:18). Kristiannan tin vishon kòrtiku ora nan ta fihá riba e preokupashonnan di e mundu aki mas bien ku riba e kaminda pa shelu. I poko kos por siega nan bista na e kaminda ei mas ku e engaño di rikesanan. Hellen Keller, ku tabata siegu, a bisa: “E persona di mas patétiko den mundu ta un hende ku tin bista, pero no tin vishon.” Beibel ta yená ku ehèmpelnan di esnan ku por a mira pero tabata, en realidat, spiritualmente siegu.

“Algun ta stima e mundu aki asina tantu ku e ta guli nan amor pa e bèrdat. Segun ku nan tesoronan akinan ta oumentá, nan interes den e tesoro selestial ta disminuí. Mas nan ta poseé di e mundu aki, mas djaserka nan ta bras’é na nan, komo si fuera nan tin miedu ku nan tesoro kudishá lo a ser kitá for di nan. Mas nan ta poseé, ménos nan tin pa drama riba otronan, pasobra mas nan tin, mas pober nan ta sinti nan mes. O, e engaño di rikesa! Nan lo no mira i sinti e nesesidatnan di e kousa di Dios.” - Ellen G. White, Spiritual Gifts, vol. 2, p. 267.

Bista spiritual nublá ta pone salbashon eterno na peliger. No ta sufisiente pa tene Hesus na bista; nos mester ten’E den focus.

Lesa Mateo 13:3-7 i 22. Di ki peliger Hesus ta spièrtando nos aki? Dikon esaki ta un trampa fásil pa kualke hende, riku òf pober, kai aden?

Di promé, Hesus ta spièrta nos enkuanto di “e preokupashonnan di e mundu aki” (Mat. 13:22, NKJV). Hesus sa ku nos tur tin preokupashonnan, inkluyendo esnan finansiero. Esnan pober ta preokupá ku nan no tin sufisiente, esnan riku ta preokupá tokante kiko mas nan lo por ke. Nos mester djis ta sigur ku nos no ta laga preokupashonnan asina “choka e palabra” (Mat. 13:22, NKJV) den nos bida.

Di dos, Hesus ta spièrta nos di “e engaño di rikesa” (Mat. 13:22, NKJV). Ounke rikesa mes no ta malu, ainda nan tin e poder pa gaña nos den un forma ku por hiba na nos destrukshon final.

Meskos ku tur piká, kudishi ta kuminsá den e kurason. E ta kuminsá paden di nos i despues ta obra di pafó. Esaki ta loke a sosodé den Eden.

Lesa Génesis 3:1-6. Kiko Satanas a hasi pa sedusí Eva den piká? Kon e a uza e mesun prinsipionan atraves di siglonan pa gaña nos tambe?

“Ora ku e muhé a mira ku e palu tabata bon pa kuminda, ku e tabata un delisia pa bista, i ku e palu tabata deseabel pa hasi hende bira sabí, e a kohe di su fruta i a kome; e a duna su esposo tambe ku tabata huntu kuné, i e a kome” (Gen. 3:6, NKJV).

Si hende no tabata sa mihó, hende por a pensa ku e industria di propaganda a haña su ehèmpel paradigmátiko di kon bende su produktonan for di e storia di Eden. Diabel a presentá e fruta di e palu prohibí den un forma pa krea den Eva e deseo di ke mas ku e tabatin kaba, i pa pon’é pensa ku e tabatin mester di algu ku e no tabatin mester di dje realmente. Ki briante! Su kaida ta un demostrashon di e tres pasonan ku kada un di nos ta dal ora nos kai pa kudishi: Mi ta mira, mi ke, mi ta kue.

Kudishi, naturalmente, por ta un piká silensioso. Meskos ku pashon, e ta skondí tras di e velo di nos karni. Pero ora ku finalmente e duna fruta, e por ta devastador. E por daña relashonnan, laga sikatrisnan riba bo sernan kerí, i bati nos ku kulpabilidat despues.

Laga kudishi bin na superfisie, i e lo dominá kualke prinsipio. Rei Ahab a mira e kunuku di wendrùif di Nabot, e a dese’é, i a rèk lep te ora su reina a laga mata Nabot p’e (1 Reinan 21). Akan no por a resistí ora e a mira un mantel i plaka, asina e a kudishá i a kohe nan (Hosué 7:20-22). Kudishi, finalmente, ta djis un otro forma di egoismo.

“Si egoismo ta e forma dominante di piká, kudishi por ser konsiderá komo e forma dominante di egoismo. Esaki ta ser intimidá altamente dor di Apòstel Pablo, ora e ta deskribí e ‘tempunan trabahoso’ [2 Tim. 3:1] di e apostasia final, e ta representá egoismo komo e rais produktivo di tur maldat kua lo prevalesé e ora ei, i kudishi komo su promé fruta. ‘Pasobra hende lo bira stimadó di nan mes, kudishi’ [2 Tim. 3:2].” - John Harris, Mammon,(New York: Lane & Scott, 1849) p. 52.

Lesa Isaias 56:11. Tokante ki piká e spièrtamentu aki ta?

Pa nos komo sernan kaí, goloseria por ta mes fásil ku halamentu di rosea. I mesun natural tambe. Sinembargo, ta difísil pa imaginá kualke kos den e karakter humano ku ta ménos reflektivo di e karakter di Kristu ku goloseria. “Pasobra boso konosé e grasia di nos Señor Hesukristu, ku ounke E tabata riku, sinembargo pa boso motibu E a bira pober, pa boso dor di Su pobresa por a bira riku” (2 Kor. 8:9, NKJV).

Solamente Señor konosé e daño ku goloseria a okashoná atraves di historia. Goloseria a hiba na gueranan. Goloseria a pone hende kometé krímennan ku a trese ruina riba nan mes i nan famianan. Goloseria por ta manera un vírus ku lo gara su anfitrion i konsumí tur birtut te ora tur loke sobra ta mas i mas goloseria. Goloseria ta un malesa ku ta deseá tur kos: pashon, poder, i poseshonnan. Atrobe, mi ta mira, mi ke, mi ta kue.

Lesa Mateo 26:14-16. Kiko nos por siña tokante e poder di goloseria for di e storia tristu aki?

Nota e palabranan di Hudas: "Kiko boso kier dunami si mi entreg'E na boso?" (Mat. 26:15, NKJV). Papiando tokante laga goloseria surpasá tur otro kos! Hudas a ser privilegiá manera masha poko hende den henter historia: e a biba huntu ku e Hesus enkarná, a testiguá Su milagernan, i a tend’E prediká e palabranan di bida. I tòg, wak kiko goloseria i kudishi a hib’é na hasi.

“Kon suavemente e Salbador a trata ku esun ku tabata bai ta Su traidor! Den Su siñamentu, Hesus a meditá riba prinsipionan di bondat ku a dal na e rais mes di kudishi. E a presentá dilanti di Hudas e karakter hororoso di goloseria, i bes tras bes e disipel a realisá ku su karakter a ser deskribí, i su piká identifiká; pero e no ke a konfesá i bandoná su inhustisia.” - Ellen G. White, The Desire of Ages, p. 295.

Lesa e siguiente tèkstnan. Kiko nan ta bisando ku por i mester yuda nos komprondé kon hende, riku òf pober, por protehá nan mes for di e peligernan ku goloseria, kudishi, i e amor pa plaka i kosnan material por presentá na e Kristian?

Echonan 24:24-26

Gal. 5:22-25

2 Pe. 1:5-9

E tèkstnan aki ta asina riku i yená ku un kantidat di instrukshon divino enkuanto di kon nos mester biba. Pero nota un liña komun: dominio propio. E karakterístika aki por ta partikularmente difísil ora ta yega na goloseria, kudishi, i e deseo di poseé kos. Solamente pa medio di dominio propio, promé di nos pensamentunan i despues nos akshonnan, nos por ser protehá for di e peligernan di e kosnan ku nos tabata papia di dje.

Nos por ehersé e control ei solamente te na e grado ku nos ta entregá nos mes na e poder di Señor. Ningun di nos, riba nos mes, por derotá e karakterístikanan pekaminoso aki, spesialmente si nan a ser kultivá i karisiá pa largu tempu. Berdaderamente nos tin mester di e obra sobrenatural di Spiritu Santu den nos bida si nos mester haña viktoria riba e engañonan poderoso aki. “Ningun tentashon, fuera di loke tur hende ta pasa aden, no a bin riba boso; ma Dios ta fiel, Kende lo no pèrmití pa boso ser tentá mas ku boso por soportá, ma huntu ku e tentashon E lo proveé salida tambe, pa boso por soportá” (1 Kor. 10:13, NKJV).

Lesa atrobe 2 Pedro 1:5-9. Kiko ta e kaminda na kua Pedro ta mustrá? Kiko ta su pasonan, i kon nos por siña sigui nan, spesialmente den nos lucha kontra goloseria i kudishi?

E meta humano final ta pa ta felis i satisfecho. Pero siendo felis i satisfecho pa motibu di materialismo lo no alkansá e meta aki. Te den fondo hende sa ku esaki ta bèrdat, i tòg nan ta sigui den nan opseshon ku poseshonnan: mi ta mira, mi ke, mi ta kue. Kiko por ta mas simpel ku esei? Atventistanan di e di Shete Dia, meskos ku tur otro hende, ta ser afrontá ku e tentashon pa suskribí na e balornan di materialismo. Sinembargo, e atkisishon kontinuo di biennan no ta produsí felisidat, satisfakshon, òf alegria. En kambio e ta produsí problemanan, manera nos a mira ora e hóben riku a bira bai for di Hesus infelis, deskurashá, i depresivo pasobra e no a tende òf a haña loke e tabata ke. “Balornan materialista ta asosiá ku un debilitashon penetrante di hende su bienestar, for di satisfakshon i felisidat di bida abou, te na depreshon i ansiedat, te na problemanan físiko manera doló di kabes, i te na desareglonan di personalidat, arogansia, i komportashon antisosial.” - Tim Kasser, The High Price of Materialism (Cambridge, Mass.: The MIT Press, 2002), p. 22.

Kristiannan materialista, den otro palabra, ku orguyo ta bebe for di e pos di rikesa pero ta spiritualmente deshidratá. Pero nos lo no haña set nunka ora nos ta bebe for di e awa ku Kristu ta duna (Juan 4:14).