Lès 3 * 13 - 19 di yanüari

Dios òf Mamon?

Sabat Atardi

Lesa pa e siman aki:

Salmo 33:6-9; Mat. 19:16-22; 1 Pet. 1:18; Hebr. 2:14, 15; Eks. 9:14; Salmo 50:10.

Versíkulo di Memoria:

“P’esei tambe Dios a hals'E te na e halturanan, i a dun'E e nòmber ku ta riba tur nòmber, ku pa e nòmber di Hesus tur rudia mester dobla, di esnan ku ta den shelu, i riba tera, i bou di tera, i ku tur lenga mester konfesá ku Hesukristu ta Señor, pa e gloria di Dios Tata” (Filipensenan 2:9-11 NKJV).

Dios no ta gasta palabra splikando Su perspektiva riba opseshon eksesivo ku plaka i kosnan material. E palabranan di Kristu na e hòmber riku golos ku, ounke e a ser bendishoná dor di Señor, a akumulá i akumulá loke e tabatin, mester pone e temor di Dios den nos tur: “Abo, bobo! Awe nochi mes bo alma lo ser eksigí for di bo; i awor ken lo bira doño di loke bo a prepará? Asina ta e hende ku ta montoná tesoro pa su mes, i no ta riku pa ku Dios” (Lukas 12:20, 21, NKJV).

Sirbi Dios i sirbi plaka ta akshonnan mutuamente eksklusivo. Ta esun òf e otro, Dios òf mamon. Ta un fantasia pa pensa ku nos por tin tur dos manera pasobra pa biba un bida dòbel lo alkansá nos trempan òf lat. Nos lo por gaña otronan, kisas asta nos mes, pero no Dios, na ken nos lo tin ku duna kuenta un dia.

Nos mester hasi un eskoho, i mas nos basilá, pone esküs, òf posponé, mas fuerte e gara ku plaka i e amor pa plaka lo ehersé riba nos alma lo ta. Fe ta rekerí akshon.

Loke mester hasi nos desishon asina mas fásil ta pa focus riba ken Dios ta, loke E a hasi pa nos, i loke nos deb’E.

* Studia e lès di e siman aki pa prepará pa Sabat, 20 di yanüari.

Djadumingu14 di yanüari

Kristu, e Kreador

Lesa Génesis 1:1; Salmo 33:6-9; Isaias 45:11, 12; Yeremias 51:15; i Juan 1:3. Kiko e tèkstnan aki ta bisa nos tokante e bondat di e mundu material?



“Tabata Kristu ku a plama e shelunan, i a pone e fundeshinan di e tera. Tabata Su man ku a kologá e mundunan den espasio, i a modelá e flornan di sabana. ‘Su fortalesa a establesé e serunan.’ ‘E laman ta di djE, i E a trah’é.’ Salmo 65:6; 95:5. Tabata E ku a yena tera ku bunitesa, i e aire ku kantika. I riba tur kos den tera, i aire, i shelu, E a skirbi e mensahe di amor di e Tata.” - Ellen G. White, The Desire of Ages, p. 20.

Kosnan material, den i di nan mes, no ta malu. Diferente for di algun religion, kua ta siña ku e mundu material i materia mes ta malu i ku solamente kosnan spiritual ta bon, Beibel ta balorá e mundu material.

Despues di tur kos, Hesus Mes a kre’é. Kon, anto, e por ta malu? E por, desafortunadamente, manera ku tur e donnan di Dios, ser deformá i uzá pa maldat, pero esei no ta hasi e regalo original malu. Beibel ta spièrta kontra abuzu i deformashon di e kosnan ku Dios a krea den e mundu aki, pero no kontra e kosnan mes.

Al kontrario, Dios a krea e mundu material, i E tabata ke pa Su pueblo gosa di e fruta i benefishinan di e mundu aki tambe: “i abo, e levita i e stranhero ku ta biba meimei di bo lo regosihá den tur kos bon ku Señor bo Dios a duna abo i bo kas” (Deut. 26:11; lesa tambe Deut. 14:26).

Hesus ta e Kreador (Juan 1:1-3), i e tera ta un mero muestra di loke E a traha. Su abilidat kreativo ta dun’E un perspektiva úniko riba bida mes i esnan ku ta biba riba dje. E konosé e balor di kosnan material, i E sa ku E a duna nos nan pa nos benefisio, i asta pa nos plaser. E sa tambe kiko ta sosodé ora humanidat desfigurá e regalonan ei, òf asta hasi e regalonan un fin den nan mes, ora, manera ku tur kos, nan tabata intenshoná pa ser uzá pa glorifiká Dios.

Djaluna15 di yanüari

Yu di Dios/Yu di Hende

Komo Kristiannan, nos ta kere ku Hesus tabata totalmente Dios i totalmente humano. E union aki di e Divino i humanidat ta hasi Su perspektiva úniko pa loke ta trata loke ta importante riba tera i importante pa eternidat. Ku nos no por komprondé kon E por tabatin un naturalesa divino/humano no ta abolí e bèrdat aki niun tiki mas ku un hende su falta di komprondementu tokante airodinámika por a pone ku un avion no por bula.

“Aki tin dos misterio pa preis di un – e pluralidat di personanan denter di e unidat di Dios, i e union di Divinidat i humanidat den e persona di Hesus. . . . Nada den fikshon ta asina fantástiko manera e bèrdat aki di Enkarnashon ta.” - J. I. Packer, Knowing God (Downers Grove, Illinois: InterVarsity Press, 1973), p. 53.

Un motibu ku Hesus a bin na e mundu aki tabata pa mustra nos presis kon amoroso i tierno Dios ta i kuantu E ta preokupá pa kada un di nos. Leu for di ta un deidat friu i leu, manera algun hende tabata kere, Hesus a revelá e berdadero karakter di nos Tata selestial.

Satanas, sinembargo, a purba separá sernan humano for di Dios. E a purba despersonalis’E, karakterisando E komo un hende ku no ta preokupá pa nos. E ta hasi tur loke e por, mediante kualke medio posibel, pa tene nos for di konosé i eksperensiá e realidat di Dios Su bondat i grasia. Un amor eksesivo pa kosnan material ta funshoná bon komo un di e trampanan di Satanas pa alkansá e fin aki.

Lesa Mateo 19:16-22. Kiko e storia aki ta bisa nos tokante kon Satanas por uza nos amor pa kosnan material pa tene nos leu for di Dios?



Imaginábo Hesus Mes, Dios den karni, papiando ku e hóben aki ku opviamente tabata sa ku Hesus tabata un hende spesial. I tòg, kiko a sosodé? E a permití su gran rikesa, su amor pa kosnan material, separ’é for di e persona mes di Dios Mes. Amor pa e mundu i pa kosnan material a sieg’é di tal forma ku asta ounke e tabata tristu, e tristesa ei no tabata sufisiente pa pon’é hasi e kos korekto. E no tabata tristu pasobra e tabata pèrdiendo su poseshonnan (e no tabata). E tabata tristu pasobra e tabata pèrdiendo su alma riba e kosnan ei.

Djamars16 di yanüari

Kristu, e Redentor

Debe no ta un prinsipio di shelu. Pero Adam i Eva a peka, i un lei kibrá a nifiká morto. Pues, humanidat a bira debedónan di hustisia divino. Nos tabata bankrut, spiritualmente bankrut di un debe ku nunka nos por a paga bèk.

E amor di Dios pa nos a aktivá e plan di redenshon. Hesus a bira un “garantia” pa nos (Hebr. 7:22). Ta e identidat di Kristu komo e Redentor ku ta revelá e transakshon di mas importante hamas hasí. Solamente e sakrifisio di Su bida por a kumpli ku e pago rekerí di hustisia divino. Hesus a paga e debe di piká ku nos tabata debe ora hustisia i amor a brasa otro na e krus. E universo nunka a mira òf presensiá e manifestashon di un rikesa asina manera a ser uzá den e pago pa e redenshon di humanidat (Efe. 5:2).

“Dor di basha henter e tesoreria di shelu den e mundu aki, dor di duna nos den Kristu henter shelu, Dios a kumpra e boluntat, e afekshonnan, e mente, e alma, di tur ser humano.” - Ellen G. White, Christ’s Object Lessons, p. 326.

Lesa kada tèkst i skirbi for di kiko Kristu a salba nos: Kol. 1:13; 1 Tes. 1:10; 1 Pe. 1:18; Hebr. 2:14, 15; Gal. 3:13; Rev. 1:5.



E palabra Grigo tetelestai den Juan 19:30 a ser yamá e palabra di mas importante hamas papiá. E ta nifiká “Ta kumplí”, i e ta e último pronunsiashon ku Hesus a hasi riba e krus. Su deklarashon final tabata nifiká ku Su mishon a ser kumplí i nos debe a ser “pagá kompletamente”. E no a pronunsi’é komo un sin speransa ma komo un ku a logra den e redenshon di un mundu pèrdí. Pa wak na e krus di redenshon ta revelá un evento pasá ku un efekto presente i un futuro speransa. Hesus a duna Su bida pa destruí piká, morto, i e obranan di diabel un bia i pa semper. Esaki ta nifiká ku ounke nos no meresé, nos a ser redimí (Efe. 1:7). Pa tira un bista riba e maravianan di salbashon ta pa trapa riba tera santu.

Kristu komo e Redentor ta e imágen di mas sublime di Dios. Su interes supremo ta pa redimí nos. Esaki ta revelá Su perspektiva pa ku humanidat i spesialmente kon E ta balorá un relashon ku nos. Ku hustisia satisfasé, Kristu ta bira Su atenshon na nos kontesta riba Su sakrifisio.

Djarason17 di yanüari

Un Dios Yalurs

Den Su konfrontashon ku Fárao, Dios a deklará: “Pasobra e biaha aki lo Mi manda tur Mi plaganan riba bo, riba bo sirbidónan i riba bo pueblo, pa bo sa ku no tin ni un manera Ami den henter tera” (Eks. 9:14, NKJV).

Kiko Señor tabata ke men ora E a bisa ku “no tin ni un manera Ami den henter tera” (NKJV)?



“Ta imposibel pa e mente finito di hende komprondé kompletamente e karakter òf e obranan di Esun Infinito. Pa e intelekto di mas sabí, pa e mente di mas poderoso i mas altamente eduká, e Ser santu ei mester keda pa semper bistí den misterio.” - Ellen G. White, Testimonies for the Church, vol. 5, pp. 698, 699

Dios no tin igual (1 Reinan 8:60). E ta pensa, kòrda, i aktua den formanan ku nos no ta komprondé. No importá ki intentonan nos purba pa hasiE den nos mes imágen, Dios ta keda Dios. E ta Esun ku a traha tur plushi di sneu, seleber, kara, i karakterístika individual úniko, i “no tin niun otro” (1 Reinan 8:60). Despues di tur kos, E ta e Kreador, i komo Kreador E ta siguramente distinto for di Su kreashon.

Kiko e tèkstnan aki ta bisa nos tokante kon diferente Dios ta for di Su kreashon? 1 Sam. 2:2; Salmo 86:8; Isa. 55:8, 9; Yer. 10:10; Tito 1:2.



Ora nos wak tur loke Dios ta, tur loke E ta poseé, i tur loke E ta hasi, ta remarkabel ku E por tabatin kompetidónan. I sinembargo E tin, den sentido ku E tin ku “kompetí” pa amor i afekshon humano. Kisas ta p’esei E ta bisa ku E ta un Dios (yalurs” (Eks. 34:14). Dios a krea sernan humano pa ta liber, kua ta nifiká ku nos tin e opshon pa sirbiE òf pa sirbi kualke otro kos. Esei tabata, den hopi forma, e problema humano esensial: skohe pa sirbi otro diosnan, no importa den ki forma nan ta bin, kontrali na sirbi e úniko Dios ku ta digno di ser sirbí, Esun ku a krea i ta poseé henter universo. Ta p’esei anto E ta berdaderamente un Dios yalurs.

Djaweps18 di yanüari

Berdadero Sentido di Propiedat

Nos ta pertenesé na Dios, tantu dor di kreashon komo dor di redenshon. I no solamente nos ta pertenesé na Dios, pero tur nos poseshonnan tambe. Nos, di nos mes, ta poseé nada otro sino nos propio eskohonan.

Kontrali na esei, un prinsipio sentral di mundanalidat ta e idea ku nos ta doño di nos poseshonnan. Sinembargo, esaki ta engaño. Pa Kristiannan pensa ku nan ta e doñonan final di nan poseshonnan ta pa pensa algu kontrali na loke e Palabra di Dios ta siña.

Dios, no nos, ta doño di tur kos (Job 38:4-11). Nos ta solamente stranhero i pasaheronan (Lev. 25:23), meskos ku e Israelitanan tabata den e Tera Primintí. Nos ta asta dependiente riba Dios pa nos siguiente rosea (Echonan 17:25). Loke nos ta pensa ku ta di nos, ta di djE. Nos ta djis Su mayordomonan, i komo tal nos mester manehá poseshonnan tangibel i asta intangibel na e Gloria di Dios.

Skirbi e kosnan for di e siguiente versíkulonan ku Dios ta doño di dje: Deut. 10:14; Salmo 50:10; 104:16; Ezek. 18:4; Hag. 2:8; 1 Kor. 6:19, 20. Kiko e tèkstnan aki ta bisa nos tokante kon nos mester wak e kosnan material ku nos tin den nos poseshon?



“Tur kos ta pertenesé na Dios. Hende por ignorá Su afirmashonnan. Miéntras E ta drama Su bendishonnan na abundansia riba nan, nan por uza Su regalonan pa nan propio gratifikashonnan egoista; pero nan lo ser yamá pa duna kuenta di nan mayordomia.” - Ellen G. White, Testimonies for the Church, vol. 9, p. 246.

Dios Su sentido di propiedat i nos mayordomia ta demandá un relashon, unu atraves di kua E por uza nos den formanan ku lo prepará nos pa shelu i ku lo benefisiá i bendishoná otronan. Pero mayordomonan infiel por restringí e akseso di e Doño na Su mes poseshonnan. Manera nos a mira ayera, Dios no ta fòrsa Su boluntat riba nos. E a krea nos, i a duna nos poseshonnan den e mundu aki pa manehá p’E te ora E bin bèk. Loke nos ta hasi ku nan ta reflehá e tipo di relashon ku nos tin kunE.

Djabièrnè19 di yanüari

Pa mas Estudio:

Mayordomia, manera nos ta komprond’é, a kuminsá ora Dios a pone Adam i Eva den un hòfi bunita ku nan mester a kuida i manehá (Gen. 2:15). Den e ambiente perfekto aki nan mester a hasi e hòfi bibabel, un tarea ku no mester tabata asina difísil. Dios a outorisá nan funshon nobo i a siña nan tokante nan responsabilidat. Kuida Eden lo a duna nifikashon i trese felisidat na e famia nobo.

E verbo Hebreo pa “dominio” (Gen. 1:26,28) ta nifiká “pone bou di control i goberná”. Esaki, mirando e konteksto, no tabata un dominio severo ma un gobièrnu bondadoso den kuida e kreashon di Dios. E responsabilidat aki no a stòp. Den e ambiente aki Adam i Eva mester a siña ku Dios tabata e Doño, i nan tabata Su mayordomonan. For di komienso tabata Dios Su intenshon pa Adam i Eva tin posishonnan di responsabilidat i konfiansa pero no komo doñonan. Nan mester a demostrá na Dios ku nan tabata fiel den nan tareanan.

“Adam i Eva a ser duná e hòfi di Eden pa kuida p’e. Nan mester a ‘kultiv’é i kuid’é’. Nan tabata felis den nan trabou. Mente, kurason, i boluntat tabata aktua den harmonia perfekto. Den nan trabou nan no tabata kansa, ni fatigá. Nan oranan tabata ser yená ku trabou útil i komunion ku otro. Nan okupashon tabata agradabel. Dios i Kristu tabata bishitá nan i tabata papia ku nan. Nan a ser duná perfekto libertat. . . . Dios tabata e doño di nan hogar den Eden. Nan tabata manten’é p’E.” - Ellen G. White, Manuscript Releases, vol. 10, p. 327.

Preguntanan di Diskushon:

pregunta 1Kiko e echo ku Dios ta doño di e mundu ta siña nos tokante nos responsabilidat básiko ora ta trata di e medioambiente? Miéntras nos mester evitá e fanatismo polítiko di algun ekologista ku ta hasi nada otro sino adorá e kreashon mes, kiko nos aktitut, komo Kristiannan, mester ta pa ku kuida e medioambiente?

pregunta 2Meditá mas riba e idea di Dios komo un Dios “yalurs”. E no ta semper un konsepto fásil pa kapta, spesialmente pasobra den términonan humano nos ta wak yalursheit komo algu malu, komo algu ku mester ser evitá. Kon, sinembargo, nos por komprondé e idea aki manera e ta ser apliká na Dios sin nada di e ekipahe negativo ku e palabra ta karga normalmente?

pregunta 3Kon nos por siña distinguí entre e uzo korekto i goso di e kosnan físiko ku Dios a krea i e abuzu di e kosnan ei? Dikon pa hasi e distinshon aki ta asina importante?