Lès 4 * 20 - 26 di yanüari

Eskape For di e Kamindanan di e Mundu

Sabat Atardi

Lesa pa e siman aki:

Salmo 119:11; Efe. 6:18; Rom. 8:5, 6; Hebr. 11:1-6; 1 Reinan 3:14; Eze. 36:26, 27.

Versíkulo di Memoria:

“Rikesa no ta di probecho den e dia di rabia, ma hustisia ta libra for di morto. . . . Esun ku konfia den su rikesa lo kai, ma e hustu lo floresé manera blachi bèrdè” (Proverbionan 11:4, 28, NKJV).

Aunke Satanas a faya ku Hesus, e a logra ku tur otro hende. E lo sigui hasi asina a ménos ku nos bringa den e korasa i poder di Dios, Kende so ta ofresé nos e libertat for di e atrakshon di e mundu.

Pues, nos mester focus nos atenshon riba nos Proveedó selestial. David a realisá bèrdadero balor den e bida aki ora e a skirbi: "Leonnan por bira debil i pasa hamber, ma esnan ku ta buska Señor lo no tin falta di ningun kos bon" (Salmo 34:10, NIV). Salomon a rekonosé ku sabiduria i komprondementu tabata mas balioso ku plata i oro (Prov. 3:13, 14). Felisidat bèrdadero i bibando un bida rekto ta bin ora nos kita nos bista for di e poseshonnan ku nos tin i wak na e Kristu bibu, Kende ta nos doño.

Nos úniko speransa pa skapa di e atrakshon di e mundu ta un relashon vital i eksitoso ku Hesus. E siman aki, nos lo studia e elementonan di e relashon ei, i kon krusial ta pa nos propio éksito spiritual pa rekonosé e poder tras di e máskara di e mundu i mira e importansha di Kristu komo e rason real pa biba.

* Studia e lès di e siman aki pa prepará pa Sabat, 27 di yanüari.

Djadumingu21 di yanüari

Un Relashon Ku Kristu

Amor pa poseshonnan mundano, asta dor di esnan ku no tin hopi, por ta un kadena poderoso ku ta mara e alma na e mundu na lugá di na Kristu. Asta si nos no tin hopi den términonan di poseshonnan terenal, e deseo pashonal pa haña biennan material por bira un maldishon teribel ku, si e no ser poné bou di kontròl di Señor, lo hiba un alma for di salbashon. Satanas sa esaki, i ta p'esei e ta usa e amor pa poseshonnan material pa gara mas tantu hende posibel den trampa.

Kiko ta nos úniko protekshon?

"Pone boso mente riba e kosnan djariba, no riba e kosnan ku ta riba tera" (Kol. 3:2, NKJV). Kon nos ta hasi loke Pablo ta bisa nos pa hasi? (Lesa tambe Salmo 119:11, Efe. 6:18.)



Ki otro tèkstnan bo por haña ku ta papia tokante loke nos mester mantené nos mente enfoká riba dje? (Lesa por ehèmpel Fil. 4:8.)



E úniko kura pa mundanalidat, den kualkier forma ku e ta bini, ta un deboshon kontinuo na Kristu (Salmo 34:1) pa medio di e subida i bahadanan di bida. Moises "a konsiderá e reproche pa motibu di Kristu mas grandi ku e tesoronan di Egipto" (Hebr. 11:26, NIV). Promé ku kualkier otro relashon, Kristu mester ta nos promé prioridat. Kristu ta buska un kompromiso basá riba konvikshon, no preferensia; es desir, nos mester ta konsagrá na Kristu pa motibu di ken E ta i kiko E a hasi pa nos, no pa motibu di kualkier bentaha inmediato ku nos fe i kompromiso na djE lo por trese.

Nos bida mester ta skondé den Hesus, i Su plannan mester ta nos plannan. Bèrdadero kompromiso ta pa pone nos man na e plug sin "wak patras" (Lukas 9:62, NKJV). Ora nos hasi e tipo di kompromiso ei, Hesus ta elevá nos na nos potensial kompleto. Ora nos someté na djE, E lo kibra e gara ku e mundu tin riba nos alma. Nos mester bira Kristoséntriko na lugá di ta enfoká riba material; esei so lo yena e bashí den nos bida.

Djaluna22 di yanüari

Den e Palabra

Mas ku seis bion Beibel a ser distribuí rònt mundu, pero kuantu di nan a ser mirá komo e Palabra di e Dios bibu? Kuantu ta ser lesá ku un kurason sinsero habrí pa konosé e bèrdat?

Estudio di Beibel apropiá ta dirigí nos kompas spiritual i ta kapasitá nos pa nabegá den un mundu di falsedat i konfushon. Beibel ta un dokumentu bibu di orígen divino (Hebr. 4:12), i komo tal e ta mustra nos e bèrdatnan ku nos no por haña niun otro kaminda. Beibel ta Kristu Su mapa di ruta pa bida diario, i e ta eduká nos dor di ekspandé nos intelekto i refiná nos karakter.

Lesa Juan 5:39, 14:6 i 20:31. Beibel, spesífikamente e Evangelionan, ta duna nos nos informashon di mas outoritativo tokante Hesus. Kiko e tèkstnan spesífiko aki den Juan ta bisa tokante djE i dikon E ta asina importante pa nos i pa tur loke nos ta kere?



Nos ta studia Beibel pasobra e ta e fuente supremo di e Bèrdat. Hesus ta e Bèrdat, i den Beibel nos ta haña Hesus manera nos por konos'E pa motibu di kon E a ser revelá na nos einan. Aki, den e Palabra di Dios, e Tèstamènt Bieu i Nobo, nos ta siña tokante ken Hesus ta i kiko E a logra pa nos. E ora ei nos ta namorá di djE, i ta komprometé nos bida i alma na Su kustodia eterno. Ora nos sigui Hesus i obedesé Su palabranan, manera ta ser revelá den Su Palabra, nos por bira liber di e lasonan di piká i di e mundu. "P'esei si e Yu hasi boso liber, di bèrdat boso lo ta liber" (Juan 8:36, NKJV).

Lesa Romanonan 8:5, 6. Kontra kiko nos ta ser spièrtá aki, i kon e estudio di e Palabra di Dios por yuda nos den e lucha aki riba nos mente?



E amor pa e mundu, speshalmente e amor pa poseshonnan di mundu, por hala nos fásilmente for di Dios si nos no ta kuidadoso. Ta p'esei nos mester mantené nos mes den e Palabra, kua ta mustra nos e realidatnan eterno i spiritual ku ta asina krusial pa e bida Kristian.

Amor pa kosnan di mundu nunka ta elevá e mente na moralidat spiritual; na lugá di esei e ta remplasá prinsipionan bíbliko ku kudishi, egoismo, i pashon. Amor, manera ta ser revelá den Beibel, ta konstruí relashonnan dor di siña nos e importansia di duna nos mes na otronan. Kontrali na esaki, mundanalidat ta enserá haña kos pa nos mes, kua ta kontrali di tur kos ku Hesus ta representá.

Djamars23 di yanüari

Un Bida di Orashon

"I esaki ta bida eterno, ku nan por konoséBo, e úniko Dios bèrdadero, i Hesukristu, Kende Bo a manda" (Juan 17:3, NKJV). No ta nada straño ku Kristiannan hopi biaha ta bisa ku nan fe ta trata di un relashon ku Dios. Si pa konosé Dios ta "bida eterno", e ora ei nos por haña e bida ei pa medio di un relashon kunÉ. I, naturalmente, sentral na e relashon ei tin komunikashon. Nos a mira ayera ku Dios ta komuniká ku nos pa medio di Su Palabra divino. Nos, na nos turno, tin komunion kunÉ pa medio di orashon.

Si, manera nos a mira, nos mester fiha nos mente i kurason riba kosnan selestial na lugá di e kosnan di e mundu aki, e ora ei orashon ta esensial. Esaki ta pasobra, pa medio di su naturalesa mes, orashon ta mustra nos na un esfera mas haltu ku di e mundu mes.

Sinembargo, asta aki nos mester ta kuidadoso pasobra tin biaha nos orashonnan por ta meramente un ekspreshon di nos propio naturalesa egoista. P'esei nos mester hasi orashon den sumishon na e boluntat di Dios.

Añanan pasá, un muhé a kanta e palabranan aki: "O, Señor, lo Bo no ke kumpra un Mercedes-Benz pa mi?" Tabata, den su propio forma, un atake riba e materialismo di esnan ku ta profesá fe den Dios. Nos tambe mester ta sigur ku, ora nos ta hasi orashon, kua riba su mes ta un akto di sumishon na Dios i morto na e mundu, nos ta buskando e boluntat di Dios, no solamente di nos mes.

Lesa Hebreonan 11:1-6. Kiko ta e komponente krusial ku mester ser mesklá ku tur nos orashonnan? Tambe, kiko ta nifiká pa bini serka Dios ku fe i pa hasi orashon ku fe?



Si no tin fe pegá na nos orashonnan, lo bai tin presunshon, e fe falsu di Satanas. "Orashon i fe ta ligá djaserka, i nan mester ser studiá huntu. Den e orashon di fe tin un siensia divino; e ta un siensia ku tur hende, ku ke hasi nan bida un éksito, mester komprondé. Kristu ta bisa: ‘Tur loke boso pidi ora boso ta hasi orashon, kere ku boso ta risibié, i e lo bira di boso.’ Marko 11:24. E ta hasié bon kla ku nos pidimentu mester ta di akuerdo ku Dios Su boluntat; nos mester pidi pa e kosnan ku E a primintí, i loke sea nos risibí mester ser usá pa hasi Su boluntat. Si kumpli ku e kondishonnan, e promesa lo no faya."—Ellen G. White, Prayer, p. 57.

Djarason24 di yanüari

E Bida di Sabiduria

Un di e storianan di mas bunita den Beibel ta ser hañá den e storia di Solomon su petishon na Dios, pa dun'é riba tur kos "un kurason di komprendementu pa huzga Bo pueblo, pa mi por diserní entre bon i malu. Pasobra ken ta kapas pa huzga e pueblo grandi aki di Bo?” (1 Reinan 3:9, NKJV).

Ki palabranan importante Dios a bisa Salomon ku, si e a paga atenshon, lo a spar e rei e ruina ku su poseshonnan a trese riba dje? Dikon loke Dios a bis'é aki tabata asina importante pa nos? 1 Reinan 3:14; lesa tambe 1 Juan 5:3, 1 Pe. 4:17.?



Salomon tabatin gran sabiduria, pero sabiduria den i di su mes, si e no ser poné na práktika i bibá, ta bira nada mas ku bon informashon. Den sentido bíbliko di e palabra, sabiduria ku no ser praktiká no ta realmente sabiduria. Hopi lo bai pèrdí ken lo tabatin hopi informashon korekto tokante Dios i Su rekerimentunan. Pero Salomon su falta di obediensia a pone ku e a desviá for di e kamindanan na kua Señor a yam'é. Solamente mas lat den bida e a bin bei realmente, skirbiendo den humildat: "Pasobra sabiduria ta mihó ku rubí, i tur loke hende por deseá no ta di kompará kuné" (Prov. 8:11, NKJV).

Sabiduria ta e aplikashon di konosementu i komprondementu. Konosementu ta representá e echonan; komprondementu ta representá disernimentu; i sabiduria ta bini den e proseso di aplikashon di nos komprondementu i konosementu na nos bida. Un mayordomo sabí no mester di solamente konosementu i komprondementu sino e eksperensha ku ta bini ora e biba e konosementu i komprondementu ei.

E ehèmpel di Salomon ta mustra nos kon fásilmente asta e persona di mas sabí i ku mas komprondementu por kai den e bashí di un estilo di bida materialista si e persona ei no biba e konosementu ku a ser duná na dje.

Djaweps25 di yanüari

Spiritu Santu

E gran kontroversia ta real; dos banda ta batayando pa nos alma. Unu ta halando nos na Kristu (Juan 6:44) i unu na e mundu (1 Juan 2:16). E poder di Spiritu Santu den nos bida por i lo hala nos den e direkshon korekto si nos djis someté na dje.

“Ma ora ku E, e Spiritu di bèrdat, bin, E lo guia boso den tur bèrdat" (Juan 16:13, NKJV; lesa tambe Juan 14:16). Spiritu Santu ta empoderá nos pa biba pa medio di prinsipio i pa medio di fe, no pa medio di kaprichonan òf emoshonnan ku ta dominá e mundu asina tantu. Preparashon eksitoso pa biba den shelu ta bini dor di biba fielmente den e mundu aki bou di e direkshon di Spiritu Santu.

Pablo ta konsehá: “boso fe no mester ser basá riba e sabiduria di hende, sino riba e poder di Dios" (1 Kor. 2:5, NKJV). E atrakshon di e mundu, hopi biaha atraves di poseshonnan material, ta hala nos for di Señor. Kontrali na esei, si nos no resistí, e poder di Spiritu Santu lo hala nos serka Hesus.

Éksito den e bataya ku e mundu i su atrakshonnan lo ser lográ solamente fuera di nos mes. Lesa Eze. 36:26, 27; Juan 14:26; i Efe. 3:16, 17. Ora nos laga Spiritu Santu tuma poseshon di nos, kiko ta e kosnan ku Dios lo hasi pa sigurá ku nos tin viktoria spiritual?



“Ta pa medio di teoria i tradishonnan falsu ku Satanas ta gana su poder riba e mente. Dor di dirigí hende na normanan falsu, e ta desformá e karakter. Pa medio di e Skrituranan Spiritu Santu ta papia na e mente, i ta impreshoná bèrdat riba e kurason. Asina e ta eksponé eror, i ta sak'é for di e alma. Ta pa medio di e Spiritu di bèrdat, obrando atraves di e palabra di Dios, ku Kristu ta hala Su skohínan na Su mes.'—Ellen G. White, The Desire of Ages, p. 671.

Spiritu Santu ta e reportero di e bèrdat i e ta e don supremo ku Hesus por a duna pa representá e deidat riba tera despues di Su asenshon. Spiritu Santu ta lucha pa duna nos poder pa vense e atrakshon poderoso di e mundu i su "enkantonan".

Djabièrnè26 di yanüari

Pa mas Estudio:

Un mayordomo ta operá for di e prinsipionan ohochi di deber i amor. “Kòrda ku deber tin un ruman muhé ohochi, Amor; esakinan uní por logra kasi tur kos, pero separá niun di dos ta kapas di hasi bon. - Ellen G. White, Testimonies for the Church, vol. 4, p. 62. Deber ta amor den akshon. Nos mester solamente meditá riba e sakrifisio di Kristu pa amor spièrta nos deber.

Den kontraste tin e prinsipionan di mundu: odio i su pia ohochi, rebelion. Rebelion por ta odio den akshon. Lucifer a rebeldiá kontra Dios (Eze. 28:16, 17) i nunka lo stòp di hasi esaki te ora e ta destruí. E a kambia e outoridat di amor den e amor pa outoridat. E lidernan religioso di Israel tabata odia e outoridat i poder ku Hesus tabata poseé (Mat. 22:29). Asta ora nan a hui for di e tèmpel i a kita for di Su mirada penetrante, nan no a kambia nan kustumbernan.

Preguntanan di Diskushon:

pregunta 1Meditá mas riba e idea di amor i deber. Kiko Ellen G. White ke men ora, despues di a yama nan ohochi, e ta bisa ku esun sin e otro no ta “kapas di hasi bon”? Kon amor ta sin deber, i kon deber ta sin amor? Dikon nan tur dos mester ta huntu?

pregunta 2E versíkulo di memoria pa e siman aki ta bisa: “Rikesa no ta di probecho den e dia di rabia, ma hustisia ta libra for di morto. . . . Esun ku konfia den su rikesa lo kai, ma e hustu lo floresé manera blachi bèrdè” (Prov. 11:4, 28, NKJV). Kiko ta nifikashon di e tèkst aki? Kiko e ta bisando tokante rikesanan i kiko e no ta bisando?

pregunta 3Den klas, diskutí e bida di Salomon. Puntra kon e por a desviá asina leu. Skrudiñá e buki di Eklesiastés pa tèkstnan ku ta yuda revelá e banidat i bashí di poseshonnan mundano, asta ora nos tin, manera Salomon, asina hopi di nan. Kiko nos a siña e siman aki tokante orashon, tokante studio di Beibel, i tokante un relashon ku Kristu ku por mantené nos riba e kaminda korekto spiritualmente?

pregunta 4Kon hende ku no tin hopi poseshon mundano tòg por ser kapturá den e trampa ku Satanas ta pone pa nan?

pregunta 5Ki kontesta bo a bin kuné enkuanto di e pregunta final di djarason tokante e diferente tipo di sabiduria?