Lès 6 * 3-9 di febrüari

E Markanan di un Mayordomo

Sabat Atardi

Lesa pa e siman aki:

Hebr. 11:8-12; Rom. 4:13, 18-21; Mat. 6:24; Hebr. 9:14; 1 Juan 5:2, 3; Lukas 16:10-12.

Versíkulo di Memoria:

“Laga hende konsiderá nos asin'aki: manera sirbidónan di Kristu i mayordomonan di e misterionan di Dios. Ademas, ta ser rekerí di mayordomo ku kada un ta ser hañá fiel.” (1 Korintionan 4:1, 2, NKJV).

Mayordomonan ta konosí pa nan estilo, òf pa nan marka distintivo, meskos ku komersiantenan ta konosí pa nan logonan òf nòmber registrá. De echo, hopi hende a bira famoso dor di kombertí nan mes den un marka komersial.

Un marka di un mayordomo Kristian ta un refleho di e amor di Kristu dor di e relashon ku e tin kunÉ. Ora nos ta biba i praktiká e karakterístikanan di Kristu, nos bida lo revelá nos marka. Nos marka ta Su marka; nos identidat ta mesklá ku esun di djE (1 Kor. 6:17).

E siman aki nos ta wak e rasgonan di karakter di e mayordomonan di Dios ku ta forma nan marka. E karakterístikanan aki ta inspirá nos pa anhelá na Hesus Su regreso i pa hasi e trabou konfiá na nos komo mayordomonan fiel di Su bèrdat. Kada karakterístika ta deskribí un relashon mas profundo ku nos por tin ku Esun ku a bini pa buska i salba esnan pèrdí. Mas nos studia e kualidatnan aki, mas profundo nan lo ta ankrá den nos bida. Dios Su karakter di amor, den tur su dinámika, lo bira nos marka i lo tin un influensha riba kada aspekto di nos bida, awe i eternamente.

* Studia e lès di e siman aki pa prepará pa Sabat, 10 di febrüari.

Djadumingu4 di febrüari

Fieldat

"Ademas, ta ser rekerí di mayordomonan ku kada un ta ser hañá fiel" (1 Kor. 4:2, NKJV). Pa bringa i gana e "e bon bataya di fe" (1 Tim. 6:12, NKJV) ta krusial pa un mayordomo fiel. "Fiel" ta loke Dios ta i loke nos mester bira pa medio di E obrando den nos. Ser fiel ta nifiká pa keda firme pa loke nos sa ku ta korekto, spesialmente den e kayente di batayanan spiritual.

Konfliktonan spiritual entre korekto i inkorekto, bon i malu, siguramente lo bini. Nan ta parti di e lucha di fe. E desishon ku ta marka mayordomonan den tur situashon ta e eskoho di ta fiel. Si bo stima rikesa, sea sigur pa bo keda fiel na Dios i loke E ta bisa tokante e peligernan di amor pa plaka. Si bo ta anhelá fama, keda fiel na loke e Palabra di Dios ta bisa tokante humildat. Si bo ta lucha ku pensamentunan pashonal, keda fiel na e promesanan di santidat. Si bo ke poder, keda fiel na loke Dios ta bisa tokante ta un sirbidó di tur hende. E eskoho pa ta fiel òf infiel hopi biaha ta ser hasí den un frakshon di sekònde, asta si e konsekuenshanan por ta eterno.

Lesa Hebreonan 11:8-12, 17-19, i Romanonan 4:13, 18-21. Kiko e versíkulonan aki ta siña nos tokante ser fiel?



Na hebreo "fiel" ta nifiká konfia. E mesun rais hebreo ta duna nos e palabra "amèn", i realmente e ta nifiká ser "sólido" òf "firme". Fieldat ta nifiká ku nos a ser purbá, i a pèrmanesé firme komprometé na e plan di Dios.

Preparando pa papia dilanti di e emperador, e Reformista Martin Lutero "a lesa e palabra di Dios, a repasá su eskritonan, i a purba trese su kontesta den un forma adekuá. . . . E a hala serka e Skrituranan santu. . . . i ku emoshon e a pone su man robes riba e tomo sagrado, i hisando su man drechi den direkshon di shelu, e a hura di pèrmanesé fiel na e evangelio, i pa konfesá su fe libremente, asta si e mester a seya su testimonio ku su sanger."—J. H. Merle d'Aubigné, History of the Reformation (New York: The American Tract Society, 1846), tomo. 2, buki 7, p. 260.

Djaluna5 di febrüari

Lealtat

"Ningun hende por sirbi dos shon; pasobra òf e lo odio esun i stima e otro, òf e lo ta leal na esun i despresiá e otro. Boso no por sirbi Dios i mamon" (Mat. 6:24, NKJV). Kiko e tèkst aki ta siña nos tokante e importansha supremo di lealtat na Dios?



Sabiendo ku Dios Su nòmber ta nifiká "yalurs" (Eks. 34:14) mester duna nos un yamada bon kla pa lealtat. Lealtat na un Dios "yalurs" ta lealtat den amor. Den e lucha di fe, lealtat ta yuda definí ken nos ta i ta enkurashá nos pa keda den e bataya.

Nos lealtat ta importante pa Dios (1 Reinan 8:61). E no ta un kontrakt ku ta purba mira kada partikularidat adelantá; ni e ta simplemente un lista di reglanan. E ta, mas bien, e ekspreshon visibel di nos kreenshanan personal, fe i kompromiso.

Lesa 1 Krónikanan 28:9. Kiko e tèkst aki ta siña nos tokante e importansia di lealtat?



Wak Job. E no a premirá e eventonan katastrófiko ku lo a destruí su famia, poseshonnan, i salú. E por a stòp di konfia, stima, i komprometé, pero su lealtat na Dios tabata un eskoho di moralidat inmovibel. Honesto i sin miedu di alabá Dios públikamente, e a pronunsiá e palabranan famoso “Maske E matami, tòg lo mi konfia den djE” (Job 13:15, NKJV). Su fieldat dilanti di desaster ta e esensia di lealtat, i e ta ilustrá kon bon mayordomonan leal ta.

Djamars6 di febrüari

Un Konsenshi Limpi

Tin hopi kos presioso ku nos por tin. Salú, amor, amigunan, un gran famia, tur esakinan ta bendishonnan. Pero kisas un di esnan di mas importante ku tur ta un konsenshi limpi.

Lesa Hebreonan 10:19-22 i 1 Timoteo 4:1, 2. Kiko ta nifiká pa tin un "mal konsenshi" i un "konsenshi kimá komo si fuera ta ku heru kayente"?



Nos konsenshi ta funshoná manera un monitor interno di nos bida eksterno. Un konsenshi mester mara su mes na un norma haltu i perfekto: e lei di Dios. Dios a skirbi Su lei riba kurason di Adam, pero piká kasi a kit'é, no solamente den dje sino den su desendientenan tambe. Solamente fragmentonan di e lei a pèrmanesé. "[Paganonan] ta mustra ku e rekerimentunan di e Lei ta skirbí den nan kurason, nan konsenshi tambe ta testimonio" (Rom. 2:15). Hesus a logra kaminda Adam a faya pasobra Dios Su lei tabata "den [Su] kurason" (Salmo 40:8).

Kiko Pablo ta bisa ku ta nos úniko solushon na un mal konsenshi? Lesa Hebr. 9:14.



"Mester drenta den e kashi di konsenshi yen di kas di araña. E bentananan di e alma mester ser será den direkshon di tera i habrí hanchu den direkshon di shelu pa e rayonan briante di e Solo di hustisia por tin akseso liber. . . . E mente mester keda kla i puru pa e por distinguí entre bon i malu."—Ellen G. White, Mind, Character, and Personality, tomo 1, p. 327, 328. Ora e lei di Dios ser imprimí riba e kurason di e kreyente (Hebr. 8:10), i e kreyente buska pa sigui e lei pa medio di fe, un konsenshi limpi ta e probabel resulta

Djarason7 di febrüari

Obediensia

Abel a rudiá obedientemente na su altar, ku tabatin e ofrenda di lamchi manera Dios a manda. Kain, na otro banda, a rudiá yen di rabia na su altar ku tabatin e frutanan. Tur dos a trese ofrendanan, sinembargo un ruman hòmber tabata obediente na e mandato di Dios. E lamchi matá a ser aseptá, pero e kosecha di e tera a ser rechasá. Ámbos ruman a komprondé e nifikashon i instrukshonnan enkuanto di e ofrenda di sakrifisio, pero solamente unu a obedesé loke Señor a manda (Gen. 4:1-5).

"E morto di Abel tabata konsekuensha di e echo ku Kain a rechasá di aseptá e plan di Dios den e skol di obediensia, pa ta salbá pa medio di e sanger di Hesukristu, tipifiká pa e ofrendanan di sakrifisio ku ta mustra na Kristu. Kain a ninga e dramamentu di sanger, ku tabata simbolisá e sanger di Kristu ku mester a ser dramá pa e mundu."—Ellen G. White, The SDA Bible Commentary, tomo 6, p. 1109.

Obediensia ta kuminsá den e mente. E ta involví e proseso delikado di aseptá mentalmente e responsabilidat di ehersé mandatonan di un outoridat superior. Obediensia ta bini for di un relashon ku un figura di outoridat i e boluntat pa obedesé e figura ei. Den kaso di nos relashon ku Dios, nos obediensia ta un akshon boluntario i amoroso ku ta moldia nos komportashon na obligashonnan moral. Obediensia na Dios mester ta mes spesífiko ku E ta indiká, i no solamente manera nos ta kere òf ta deseá ku e mester ta. E kaso di Kain ta un ehèmpel perfekto di un hende ku ta hasi su mes kos na lugá di hasi loke Dios ta pidi.

Lesa 1 Juan 5:2, 3 i Romanonan 1:5; 10:16, 17. Kiko e tèkstnan aki ta siña nos tokante loke obediensia ta nifiká pa e Kristian, kende ta salbá pa medio di fe sin e obranan di lei?



Nos no ta obedesé pa ser salbá; nos ta obedesé pasobra nos ta salbá kaba. Obediensia ta e deklarashon práktiko di un fe moral. Samuel a bisa Saul, “Akaso Señor tin mes tantu delisia den ofrendanan kimá i sakrifisionan ku den obediensia na e bos di Señor? Mira, obedesé ta mihó ku sakrifisio, i skucha ta mihó ku vèt di karné chubatu” (1 Sam. 15:22, NKJV).

Djaweps8 di febrüari

Konfiabel

Lesa Lukas 16:10-12. Kiko esaki ta siña nos tokante ta konfiabel? Dikon e karakterístika aki ta asina importante pa un mayordomo fiel?



E prinsipio aki di konfiabilidat ta ser mirá den henter Beibel. Por ehèmpel, den un storia kuater wardadó-di-porta prinsipal Levita a ser konfiá pa protehá e santuario di Tèstamènt Bieu anochi. Nan mester a kuida e kambernan yen di tesoro i tene e yabinan pa habri e portanan tur mainta (1 Kron. 9:26, 27). Nan a ser duná e tarea aki pasobra nan a ser konsiderá konfiabel.

Ta konfiabel ta un karakterístika di un bon mayordomo. Esaki ta nifiká ku mayordomonan konfiabel ta komprondé e nifikashon profundo di nan ròl; nan ta komprondé ku Dios ta konfiabel, i nan lo aspirá pa ta meskos (Deut. 32:4, 1 Reinan 8:56).

Konfiabilidat ta impliká un sèt madurá di rasgonan di karakter. E ta e nivel di mas haltu di karakter i kompetensia ku un persona por logra den bista di opservadónan. Reflehando e karakter di Dios ta nifiká ku lo bo hasi loke bo ta bisa ku lo bo hasi, apesar di sirkunstanshanan òf hendenan ku ta preshoná bo pa hasi otro kos (2 Reinan 12:15).

Daniel a ser konsiderá konfiabel dor di e monarkanan di dos reino mundial. Su reputashon atraves di su bida komo un konsehero konfiabel ku sin miedu tabata duna bèrdat i sabiduria na reinan, tabata den oposishon direkto ku esun di e adivinadónan i magonan den korte. Konfiabilidat ta e hoya di korona di étika; e ta ekshibí bo prinsipionan moral den nan forma di mas puru. E kualidat aki den un mayordomo no ta aparesé den un anochi sino e ta bini ku tempu dor di ta fiel asta den e kosnan di mas chikitu.

Otronan ta nota nos konfiabilidat. Nan ta respetá nos i ta dependé riba nos pasobra nan sa ku nos no por ser influensiá fásilmente pa opinionnan, moda òf chiflamentu. Pa ta konfiabel pues ta un demostrashon di desempeño di karakter den tur responsabilidat desaroyá riba tera, e kampo di probashon pa shelu. "Nos mester ta suhetonan fiel i konfiabel pa e reino di Kristu, pa esnan ku tin tendensia di e kosnan mundano por tin un bèrdadero representashon di e rikesanan, e bondat, e miserikòrdia, e ternura i e kortesia di e siudadanonan di e reino di Dios."—Ellen G. White, Testimonies for the Church, tomo 6, p. 190.

Djabièrnè9 di febrüari

Pa mas Estudio:

Un otro marka di un bon mayordomo ta responsabilidat individual.

“Semper tabata e diseño di Satanas pa hala mente di hende for di Hesus na hende, i pa destruí responsabilidat individual. Satanas a faya den su diseño ora e a tenta e Yu di Dios; pero e a logra mihó ora e a yega na hende kaí. Kristianismo a bira korumpí.” - Ellen G. White, Early Writings, p. 213.

Ku Kristu na sentro di nos ser, nos ta habrí pa Su guiansa. Komo resultado, nos fe, lealtat, obediensia, konsenshi kla, konfiabilidat, i responsabilidat individual lo ser revelá den nos bida. Pues, komo mayordomonan, nos ta ser hasí kompletu den e mannan di Dios (Salmo 139:23, 24).

Responsabilidat individual ta un prinsipio bíbliko esensial. Miéntras E tabata riba tera, Hesus tabata individualmente responsabel na e Tata (Juan 8:28). Nos ta responsabel pa tur palabra bano (Mat. 12:36). “Pasobra tur na ken hopi a ser duná, di dje hopi lo ser rekerí” (Lukas 12:48, NKJV). E menasa di mas grandi na responsabilidat individual, sinembargo, ta e tendensia di transferí nos responsabilidatnan na un otro hende. "Laga esaki keda den mente ku no ta nos mes propiedat ta ser konfiá na nos pa invershon. Si tabata asina, nos lo por a reklamá poder inkondishonal; nos lo por a pasa nos responsabilidat riba otronan, i laga nos mayordomia serka nan. Pero esaki no por sosodé, pasobra Señor a hasi nos individualmente Su mayordomonan."—Ellen G. White, Testimonies for the Church, tomo. 7, p. 177.

Preguntanan di Diskushon:

pregunta 1Wak tur e diferente markanan di un mayordomo ku nos a studia e siman aki: responsabilidat individual, konfiabilidat, obediensia, lealtat, un konsenshi kla, i fieldat. Kon esakinan ta relashoná ku otro? Kon fayo den un área lo por hiba na fayo den e otronan? Òf kon tenementu firme den un área lo por hiba na tenementu firme den e otronan?

pregunta 2Meditá mas riba kon e promesanan di e evangelio por yuda esnan ku ta luchando ku un konsenshi kulpabel. Ki promesanan nan por reklamá?

pregunta 3Hopi biaha nos ta wak e konsepto di “lealtat” komo bon den i di su mes. Pero esei semper ta asina? Den ki forma lo por ta posibel pa ta leal na un hende òf algu ku no ta bon? Dikon, anto, e konsepto di “lealtat” mester ser komprondé semper den un konteksto spesífiko pa mira si e lealtat aki ta bon òf infundá?