Lès 9 * 24 di febrüari – 2 di mart

Ofrendanan di Gratitut

Sabat Atardi

Lesa pa e siman aki:

Mat. 6:19-21; Efe. 2:8; 1 Pe. 4:10; Lukas 7:37-47; 2 Kor. 8:8-15; 2 Kor. 9:6, 7.

Versíkulo di Memoria:

"Pasobra Dios a stima mundu asina tantu, ku E a duna Su úniko Yu, pa ken ku kere den djE no bai pèrdí, ma tin bida eterno" (Juan 3:16, NKJV). (Juan 3:16, NKJV).

Nos Dios ta un Dios ku ta duna; e gran bèrdat aki ta ser mirá na un manera mas poderoso den e sakrifisio di Hesus. "Pasobra Dios a stima mundu asina tantu, ku E a duna Su úniko Yu, pa ken ku kere den djE no bai pèrdí, ma tin bida eterno" (Juan 3:16, NKJV). Òf den e versíkulo aki: "Si boso anto, siendo malbado, sa di duna kosnan bon na boso yunan, kuantu mas boso Tata selestial lo duna e Spiritu Santu na esnan ku pidiÉ!" (Lukas 11:13, NKJV).

Dios ta duna i duna; ta Su karakter. Pues, nos ku ta purba reflehá e karakter ei mester duna tambe. Ta difísil pa imaginá bo mes un kontradikshon den tèrminonan di esun di "un Kristian egoista.”

Un manera pa duna bèk loke a ser duná na nos ta pa medio di ofrendanan. Nos ofrendanan ta presentá un oportunidat pa ekspresá gratitut i amor. Riba e dia ku Hesus ta duna e bonbiní na e redimínan den shelu, nos lo mira esnan ku a aseptá Su grasia, i lo realisá ku e aseptashonnan ei a ser hasí posibel dor di nos ofrendanan di sakrifisio.

E siman aki nos lo wak aspektonan importante di ofrenda. Dunamentu generosamente, sea ta for di rekursonan, tempu òf talento, ta un medio poderoso di biba nos fe i revelá e karakter di e Dios Kende nos ta sirbi.

* Studia e lès di e siman aki pa prepará pa Sabat, 3 di mart.

Djadumingu25 di febrüari

"Kaminda Boso Tesoro Ta"

Lesa Mateo 6:19-21. Ounke nos konosé e tèkstnan aki asina bon, kon nos por ta liber sinembargo di e gara poderoso ku tesoronan terenal por tin riba nos? Lesa Kol. 3:1, 2.



"Pasobra kaminda boso tesoro ta, einan boso kurason lo ta tambe" (Mat. 6:21, NKJV) ta un apelashon di Hesus. E magnitut kompleto di e deklarashon aki por ser mirá for di e dos versíkulonan anterior, kua ta pone den kontraste akumulashon di nos tesoronan riba tera ku akumulashon di nan den shelu. Tres palabra ta deskribí tera: mòt, frus, i ladron (lesa Mat. 6:19), di kua tur ta impliká kon temporal i transitorio nos tesoro terenal ta. Ken no a siña kon rápido kosnan terenal por disparsé? "Riba tera tur kos ta instabil, inkonsistente i insigur; e ta suheto na dekadensia, destrukshon, robo i pèrdida. Shelu ta kontrali: tur kos ta eterno, duradero, sigur i no ta peresé. Den shelu no tin pèrdida."—C. Adelina Alexe, "Kaminda Bo Kurason ta Pertenesé," den Beyond Blessings, editá pa Nikolaus Satelmajer, (Nampa, Idaho: Pacific Press Publishing Association, 2013), p. 22.

Wak bo poseshonnan. Asta si bo tin solamente masha tiki, tardi òf trempan mayoria di nan lo ser tirá afó. E eksepshon lo por ta algu ku bo a eredá. Pero un mayordomo sabí mester ta preokupá ku pone tesoronan den shelu pa nan ta seif. Einan, diferente for di aki, bo no mester preokupá ku reseshon, ladron òf sakiadó.

Mateo 6:19-21 ta kontené un di e konseptonan di mas importante riba mayordomia. Bo tesoro ta trèk, hala, persuadí, demandá, atraé i ta deseá di kontrolá bo kurason. Den e mundu material bo kurason ta sigui bo tesoro, pues kaminda bo tesoro ta, ta keda sumamente importante. Mas nos enfoká riba nesesidat i ganashinan terenal, mas difísil ta pa pensa riba asuntunan selestial.

Pa profesá di ta kere den Dios pero ta akumulá nos tesoronan aki riba tera ta hipókrita. Nos akshonnan mester ta di akuerdo ku nos palabranan. Den otro palabra, nos ta mira nos tesoronan riba tera ku bista, pero nos mester mira nos ofrendanan komo tesoronan den shelu pa medio di fe (2 Kor 5:7). Ounke, naturalmente, nos mester ta práktiko i proveé pa nos nesesidatnan (asta penshun), ta krusial pa semper nos tene e kuadro grandi, eternidat, den mente.

Djaluna26 di febrüari

Mayordomonan di e Grasia di Dios

Kiko, di akuerdo ku Efesionan 2:8, ta algu mas ku Dios a duna nos?



Grasia ta "un fabor inmeresí". E ta un regalo ku bo no meresé. Dios a drama Su grasia riba e planeta aki i, si nos simplemente no rechasá esaki, Su grasia lo alkansá nos i transformá nos bida, awor i pa eternidat. Tur e rikesa i poder di shelu ta enkarná den e don di grasia (2 Kor: 8:9). Asta angelnan ta asombrá pa e gran don aki (1 Pe. 1:12).

No tin duda: di tur loke Dios ta duna nos, e grasia duná na nos den Hesukristu ta e don di mas presioso di tur. Sin grasia, nos lo tabata sin speransa. E impakto doloroso di piká riba humanidat ta muchu grandi pa humanonan por yega di libra nan mes di dje. Asta obediensia na e lei di Dios lo por a duna nos bida. "Lei ta kontrario anto na e promesanan di Dios? Di ningun manera! Pasobra si a ser duná un lei ku tabata por a duna bida, e ora ei di bèrdat hustisia lo a ser basá riba lei" (Gal. 3:21). Despues di tur kos, si kualkier lei por a salba nos, lo tabata e lei di Dios. Pero Pablo ta bisa ku asta esei no por salba nos. Si nos mester ser salbá, lo e mester ta pa medio di grasia.

Lesa 1 Pedro 4:10. Kon mayordomia ta relashoná ku grasia? Splika di ki manera e echo di duna na Dios i na otronan ta demostrá Su grasia.



Pedro a bisa ku komo nos a risibí e don di grasia di Dios, en kambio nos mester ta "mayordomonan di e grasia multiforme di Dios" (1 Pe. 4:10). Es desir, Dios a duna nos donnan; p'esei, nos mester duna bèk for di loke a ser duná na nos. Loke nos a risibí, pa grasia, no ta solamente pa komplasé i benefisiá nos mes, sino pa e avanse di e evangelio. Pòrnada nos a risibí (kual ta loke grasia ta trata di dje); pòrnada, anto, nos tin ku duna tur manera ku nos por.

Djamars27 di febrüari

Nos Mihó Ofrenda

Lesa Lukas 7:37-47. Kiko e storia aki ta siña nos tokante e motivashon apropiá pa ofrendanan pa Dios?



Maria a drenta e kamber i a mira Hesus ta sosegá na e mesa. E a kibra e butishi di alabaster ku perfume karu i a bash'e riba djE. Algun a pensa ku su akto tabata inapropiá, konsiderando ku e bida ku e tabata biba tabata ilísito.

Pero Maria a ser librá for di poseshon di demoño (Lukas 8:2). E ora ei, despues di a testiguá e resurekshon di Lázaro, e a bira aplastá ku gratitut. Su perfume tabata e poseshon di mas balioso ku e tabatin, i esaki tabata su manera di demostrá su gratitut na Hesus.

E storia aki ta kapta loke realmente mester ta nos motivashon ora di duna nos ofrendanan: gratitut. Despues di tur kos, ki otro kontesta nos mester tin riba e don impagabel di e grasia di Dios? Su generosidat tambe ta hiba nos na duna, i ora esaki ser uní ku nos gratitut, tur dos ta forma e ingredientenan di ofrendanan signifikativo, inkluso nos tempu, talentonan, tesoronan i kurpa.

Lesa Éksodo 34:26, Levítiko 22:19-24, i Numbernan 18:29. Miéntras e konteksto ta kompletamente diferente for di awe, ki prinsipio nos por saka for di e tèkstnan aki relashoná ku nos ofrendanan?



Nos mihó ofrendanan por parse insufisiente den nos bista, pero nan ta signifikante den bista di Dios. Dunando Dios e mihó ta mustra ku nos ta pone E na promé lugá den nos bida. Nos no ta duna ofrenda pa risibí fabor; en kambio, nos ta duna loke nos tin pa motibu di gratitut pa loke a ser duná na nos den Kristu Hesus.

"Deboshon i generosidat kompleto, impulsá pa amor agradesido, lo hiba na e ofrenda di mas chikitu, e sakrifisio boluntario, un fragansia divino, ku ta hasi e don di balor impagabel. Pero, despues ku boluntariamente nos someté na nos Redentor tur loke ku nos por duna, pa balioso ku e ta pa nos, si nos mira nos debe di gratitut na Dios manera e ta realmente, tur loke nos por a ofresé lo parse di ta hopi insufisiente i pober den nos bista. Pero angelnan ta tuma e ofrendanan aki, ku pa nos ta mustra pober, i ta presentá nan komo un ofrenda di holó dushi dilanti di e trono, i nan ta ser aseptá."—Ellen G. White, Testimonies for the Church, tomo 3, p. 397.

Djarason28 di febrüari

E Intenshonnan di e Kurason

Den un lès anterior nos a nota e storia di e biuda su ofrenda generoso. Ounke chikitu den komparashon ku otro ofrendanan, e tabata generoso pasobra e a demostrá e berdadero naturalesa di su karakter i kurason, kua a pone Hesus bisa, "E biuda pober aki a tira mas tantu aden ku nan tur" (Lukas 21:3, NKJV).

Dios so (Santiago 4:12) konosé nos berdadero motibunan (Prov. 16:2; lesa tambe 1 Kor 4:5). Ta posibel pa tin e akshonnan korekto ku e motibunan robes. Pa duna di abundansia no ta rekerí hopi fe, pero pa duna ku sakrifisio pa bienestar di otronan por bisa enbèrdat algu hopi poderoso tokante nos kurason.

Lesa 2 Korintionan 8:8-15. Kiko Pablo ta papiando di dje aki enkuanto di duna i e motibunan pa duna? Ki prinsipionan nos por saka for di e tèkstnan aki enkuanto di mayordomia?



Loke sea bo motibu pa duna por ta, e ta riba un liña kontinuo ku ta bai di ego pa apnegashon. E lucha riba e liña kontinuo aki entre egoismo i dunamentu ta ser bringá mas frekuente ku kualkier otro lucha spiritual. Egoismo lo fria un kurason ku un tempu tabata na kandela pa Dios. E problema ta bini ora ku nos laga egoismo drenta den nos eksperensia Kristian. Es desir, nos ta haña maneranan pa hustifiká nos egoismo i hasié den nòmber di Kristu.

E faktor fundamental ta yega na un palabra: amor. I amor no por ser manifestá sin apnegashon, un boluntat pa duna di bo mes, asta ku sakrifisio, pa bienestar di otronan.

A ménos ku Dios Su amor ta ser reflehá den nos bida, nos dunamentu lo no reflehá e amor di Dios. Un kurason egoista tin tendensia di stima su mes so. Nos mester pidi Señor pa "sirkumsidá e prepusio di [nos] kurason' " (Deut. 10:16, NKJV) pa nos por siña stima manera nos a ser stimá.

Amor, e base di tur bèrdadero karidat, ta kapta e totalidat di tur generosidat Kristian. E amor di Dios dirigí na nos ta inspirá nos pa stima bèk, i berdaderamente e ta e motibu supremo pa duna.

Djaweps1 di mart

E Eksperensia di Duna

Si Kristu a bini pa revelá na nos e karakter di Dios, un kos mester ta evidente pa awor: Dios ta stima nos, i E ke solamente lo mihó pa nos. E ta pidi nos pa hasi solamente loke lo ta pa nos propio benefisio, nunka pa perhudiká nos. Esaki lo inkluí tambe Su yamada pa nos ta dunadónan generoso i alegre di loke a ser duná na nos. E ofrendanan boluntario i generoso ku nos ta duna ta di mesun benefisio pa nos, ku ta e dunadónan, ku nan por ta pa esnan ku ta risibí nan. Solamente esnan ku duna di e forma aki por sa pa nan mes kuantu mas bendishoná ta pa duna ku pa risibí.

Lesa 2 Korintionan 9: 6, 7. Kon e tèkst aki ta resumí di kiko dunamentu mester trata?



Duna un ofrenda generoso por i mester ta un akto spiritual hopi personal. E ta un obra di fe, un ekspreshon di gratitut pa loke a ser duná na nos den Kristu.

I manera ku kualkier akto di fe, duna solamente ta oumentá fe, pasobra "fe sin obra ta morto" (Santiago 2:20). I no tin mihó manera pa oumentá fe ku pa biba nos fe, kua ta nifiká pa hasi kos ku ta bin di nos fe, ku ta brota for di dje. Segun ku nos ta duna, boluntariamente i generosamente, den nos propio manera nos ta reflehando e karakter di Kristu. Nos ta siñando mas tokante kon Dios ta ora nos eksperensi'E den nos propio aktonan. Pues, duna di e manera aki solamente ta oumentá konfiansa den Dios i e oportunidat pa "purba i mira ku Señor ta bon; bendishoná ta e hende ku ta konfia den djE!" (Sal. 34:8, NKJV).

"Lo ser mirá ku e gloria ku ta bria den e kara di Hesus ta e gloria di amor apnegá. Den lus di Kalvario lo ser mirá ku e lei di amor ku ta ninga su mes ta e lei di bida pa tera i shelu; ku e amor ku 'no ta buska pa su mes' tin su fuente den e kurason di Dios; i ku den Esun mansu i humilde ta ser manifestá e karakter di E ku ta biba den e lus kaminda niun hende por yega."—Ellen G. White, The Desire of Ages, p. 20.

Djabièrnè2 di mart

Pa mas Estudio:

"E spiritu di generosidat ta e spiritu di Shelu. E spiritu di egoismo ta e spiritu di Satanas. E amor apnegá di Kristu ta ser revelá riba e krus. E a duna tur di loke E tabatin, i despues a duna Su mes, pa hende por a ser salbá. E krus di Kristu ta apelá na e generosidat di kada siguidó di e Salbador bendishoná. E prinsipio ilustrá einan ta di duna, duna. Esaki realisá den berdadero generosidat i bon obranan ta e bèrdadero fruta di e bida Kristian. E prinsipio di esnan mundano ta di haña, haña, i asina nan ta spera di sigurá felisidat; pero ora esaki a duna tur su fruta, esaki ta miseria i morto."—Ellen G. White, den Advent Review and Sabbath Herald, 17 di òktober 1882.

Preguntanan di Diskushon:

pregunta 1Kiko tin ku egoismo ku ta hasié asina kontrali na e spiritu di Kristu? Kiko ta kosnan konsiente ku nos por hasi pa yuda protehá nos mes for di loke ta un aktitut asina natural di e hende kaí?

pregunta 2"Laga kada un hasi manera e a proponé den su kurason; no kontra su gustu òf obligá; pasobra Dios ta stima esun ku ta duna ku alegria" (2 Kor. 9:7, NKJV). E palabra Griego tradusí komo "alegre" ta aparesé solamente un biaha den Tèstamènt Nobo i e ta e palabra for di kua nos ta haña e palabra Papiamentu "grasioso". Kiko esei mester bisa nos tokante nos aktitut ora nos ta duna?

pregunta 3Traha un lista di tur e kosnan ku bo a ser duná den Kristu. Hasi orashon tokante loke bo ta skirbi. Kiko e lista aki mester siña nos tokante kon nos mester duna komo kontesta riba loke a ser duná na nos? Na mes momentu, kiko bo lista ta siñabo tokante kon asta nos mihó donashonnan, duná pa e mihó motibunan, por parse asina insignifikante den bista di loke nos a risibí?

pregunta 4Dikon egoismo ta un forma garantisá pa hasi bo mes miserabel?

<

pregunta 5Pensa riba un hende den bo mes famia di iglesia aworakí ku ta den un tipo di nesesidat. Kiko lo bo por hasi, aworakí mes, ku lo por yuda ministrá na e persona òf personanan aki? Kiko bo por hasi, asta si e ta impliká un sakrifisio doloroso di bo parti?