Lès 10 * 3-9 di mart

E Ròl di Mayordomia

Sabat Atardi

Lesa pa e siman aki:

Kol. 1:16-18; Hebr. 4:14-16; 3 Juan 3; Gen. 6:13-18; Rev. 14:6-12; 1 Pe. 1:15, 16.

Versíkulo di Memoria:

"Pasobra Dios no a yama nos pa ta impuru, ma pa hiba un bida santu" (1 Tesalonisensenan 4:7, NIV).

Pa motibu di e profundidat i hanchura di mayordomia, ta fásil pa pèrdè den e kuadro grandi, opstruí pa tangente i aplastá pa su enormidat. Mayordomia ta simpel pero tambe kompliká, i pues e por ser mal interpretá fásilmente. Sinembargo, ni e Kristian ni e iglesia por eksistí òf funshoná sin dje. Ser un Kristian ta tambe ser un bon mayordomo.

"E no ta un teoria ni un filosofia sino un programa di trabou. E ta enbèrdat e lei di bida Kristian. . . . E ta nesesario pa un komprondementu adekuá di bida, i esensial pa un eksperensia religioso berdadero i vital. E no ta simplemente un asuntu di rekonosementu mental, sino e ta un akto di e boluntat i un transakshon definitivo i desisivo ku ta mishi ku tur e fasenan di bida."—LeRoy E. Froom, Stewardship in Its Larger Aspects (Mountain View: Calif., Pacific Press Publishing Association, 1929), p. 5.

Kiko ta algun di e prinsipionan fundamental di loke ta nifiká pa ta un mayordomo Kristian? E siman aki nos lo wak mas e ròlnan ku mayordomia ta hunga den bida Kristian. Nos lo hasi esaki, sinembargo, pa medio di un analogia interesante: e tayer di un garoshi.

* Studia e lès di e siman aki pa prepará pa Sabat, 10 di mart.

Djadumingu4 di mart

Kristu komo e Sentro

Hesus ta e figura sentral den henter Beibel (Juan 5:39), i nos mester mira nos mes den relashon kunÉ. E a paga e pago pa piká i ta "un preis di reskate pa hopi" (Marko 10:45). Hesus tin tur outoridat den shelu i riba tera (Mat. 28:18), i tur kos ta den Su man (Juan 13:3). Su nòmber ta mas haltu ku tur otro, i un dia tur rudia lo dobla p'E (Fil. 2:9-11).

"Hesus ta e sentro bibu di tur kos."—Ellen G. White, Evangelism, p. 186.

Kristu ta e kurason di nos mayordomia i e fuente di nos poder. Pa Su motibu, nos ta produsí un bida digno di biba, demostrando na tur ku E ta e enfoke sentral di nos bida. Pablo por a eksperensiá hopi prueba, pero no importá unda e tabata òf kiko tabata sosodiendo kuné, e tabatin un prioridat pa biba: "Pasobra pa mi, biba ta Kristu, i muri ta ganashi" (Fil. 1:21, NKJV).

Lesa Kolosensenan 1:16-18, , Romanonan 8:21 i 2 Korintionan 5:17. Kiko nan ta bisa nos tokante kon sentral Hesus ta pa tur kos relashoná ku nos?



No tin un mayordomia genuino sin ku Kristu ta nos núkleo sentral (Gal. 2:20). E ta e sentro di "e speransa bendishoná" (Tito 2:13), i "E ta promé ku tur kos, i den djE tur kos ta konsistí" (Kol. 1:17, NKJV). Meskos ku e as ta e sentro di e wil i asina ta karga e peso di e garoshi, Kristu ta tambe e sentro di e mayordomo su bida. Meskos ku un as sólido ta proveé stabilidat, i ta permití e wilnan drai, Hesus tambe ta sentro fiho i stabil di nos eksistensia Kristian (Hebr. 13:8). Su influensia mester afektá tur loke nos ta pensa i hasi. Tur aspekto di mayordomia ta drai rondó i ta haña nan sentro den Kristu.

"Pasobra separá di Mi boso no por hasi nada" (Juan 15:5, NKJV). E sentro di mayordomia no ta un bashí sino e realidat di e Kristu bibu, ku ta obrando den nos pa moldia nos karakter awor i pa eternidat.

Djaluna5 di mart

Doktrina di Santuario

Normalmente un hende no ta pensa riba e santuario den konteksto di mayordomia. Sinembargo, e konekshon tei pasobra e santuario ta asina krusial pa nos sistema di kreensia, i mayordomia ta parti di e sistema. "E komprondementu korekto di e ministerio [di Kristu] den e santuario selestial ta e fundeshi di nos fe."—Ellen G. White, Evangelism, p. 221. Ta imperativo pa nos komprondé e ròl di mayordomia den lus di e konsepto bíbliko aki.

Promé Reinan 7:33 ta deskribí un wil di garoshi. Nos lo ilustrá e doktrina di santuario komo e hòp di e wil. E hòp ta pega na e as i ta proveé mas stabilidat pa e wil ora ku e ta drai. Despues di a eksperensiá morto i un resurekshon viktorioso (2 Tim. 1:10) Kristu, pa medio di Su morto, ta e fundeshi pa Su obra den e santuario (Hebr. 6:19, 20) i ta proveé e stabilidat pa nos fe. I ta for di e santuario E ta ministrá na nos fabor aki riba tera (lesa Hebr. 8:1, 2).

"Parando riba e prinsipio di sola Scriptura [Skritura so], Atventismo Bíbliko ta konstruí su sistema doktrinal for di e perspektiva general di e doktrina di santuario."—Fernando Canale, Secular Adventism? Exploring the Link Between Lifestyle and Salvation (Lima: Perú, Peruvial Union University, 2013), p. 104, 105.

Kiko e tèkstnan aki ta bisa nos tokante e ministerio di Hesus den e santuario? 1 Juan 2:1, Hebr. 4:14-16, Rev. 14:7.



E doktrina di santuario ta yuda revelá e gran bèrdat di salbashon i redenshon, ku ta e núkleo di tur teologia Kristian. Den e santuario nos ta mira no solamente e morto di Kristu pa nos, sino Su ministerio den e santuario selestial tambe. Nos por mira tambe den e Lugá Santísimo e importansha di Dios Su lei i e realidat di huisio final. Fundamental na esaki tin e promesa di redenshon hasí disponibel pa nos pa medio di e sanger dramá di Hesus.

E ròl di mayordomia ta reflehá un bida ankrá den e gran bèrdat di salbashon, manera ta ser revelá den e doktrina di e santuario. Mas profundo nos komprondé loke Kristu a hasi pa nos i loke E ta hasiendo den nos aworakí, mas serka nos ta yega serka Kristu, Su ministerio, Su mishon, Su siñansa, i Su intenshon pa esnan ku ta biba e prinsipionan di mayordomia den nan bida.

Djamars6 di mart

Kreensianan Doktrinal Kristoséntriko

E santuario ta esensial pasobra e ta kaminda e gran bèrdat di salbashon ta ser ekspresá di forma asina poderoso, kaminda e nifikashon di e krus ta ser revelá. I tur nos doktrinanan, di un manera òf otro, mester ser konektá na e promesa di e evangelio i salbashon. Meskos ku e spaknan di e wil, otro doktrinanan ta sali for di e gran bèrdat di salbashon pa medio di fe den Hesus.

"E sakrifisio di Kristu komo un ekspiashon pa piká ta e gran bèrdat rondó di kua tur otro bèrdat ta agrupá. . . . Esnan ku ta studia e sakrifisio maravioso di e Redentor ta krese den grasia i konosementu."—Ellen G. White Comments, The SDA Bible Commentary, tomo 5, p. 1137.

Kiko Hesus tabata kier men ora E a referí na Su mes komo "e bèrdat" den Juan 14:6? Kompará esaki ku Juan 17:17. Kiko nos mester hasi ku e bèrdat? 3 Juan 3.



Nos kreensianan doktrinal ta influensiá ken nos ta i den ki direkshon nos ta bai. Doktrinanan no ta solamente ideanan teológiko apstrakto; tur doktrina bèrdadero ta ankrá den Kristu, i tur mester impaktá e manera ku nos ta biba den vários manera. De echo, hende por bisa, ku hustifikashon, ku nos identidat komo Atventistanan di e di Shete Dia ta ankrá den nos siñansanan doktrinal mas ku kualkier otro kos. E siñansanan, anto, ku nos ta derivá for di Beibel, ta loke ta hasi nos ken nos ta komo Atventistanan di e di Shete Dia.

E ròl di mayordomia ta pa biba bèrdat doktrinal manera e ta den Hesus, i hasiendo esei na un manera ku ta afektá nos kalidat di bida positivamente. "Boso a tend'E i a ser siñá di djE, meskos ku bèrdat ta den Hesus: pa boso pone un banda, enkuanto boso manera di biba di ántes, e hende bieu ku ta ser korumpí konforme e pashonnan engañoso, i pa boso ser renobá den e spiritu di boso mente, i pa boso bisti e hende nobo, ku a ser kreá segun Dios den hustisia i santidat bèrdadero" (Efe. 4:21-24, NKJV).

Den e tèkst aki nos ta haña loke ta nifiká no solamente pa konosé e bèrdat sino pa bib'é. Ser un mayordomo no ta trata solamente di kere doktrinanan, ounke kon bèrdadero e doktrinanan ei ta; ser un mayordomo ta nifiká pa biba e bèrdatnan ei den nos bida i den nos interkambio ku otronan.

Djarason7 di mart

E Mensahenan di e Tres Angelnan

Solamente dos biaha Dios a atvertí e mundu di katástrofe binidero: un biaha na Noe (Gen. 6:13-18, Mat. 24:37) i e otro biaha pa medio di e mensahenan di e tres angelnan (Rev. 14:6-12). E mensahenan aki ta habri un kòrtina pa revelá un perspektiva úniko riba eventonan mundial di futuro. Nos komprondementu di e mensahenan aki a madurá ku tempu, pero e mensahe i mishon ta ketu bai hustifikashon pa medio di fe den Kristu, "e mensahe di e di tres angel den bèrdat:"—Ellen G. White, Evangelism, p. 190. Den otro palabra, na e núkleo di nos mensahe di e bèrdat presente, e mensahe ku nos a ser yamá pa proklamá na e mundu, tin Hesus i Su gran sakrifisio pa nos.

Lesa Revelashon 14:6-12. Kiko ta e esensia di e mensahenan aki? Kiko nan ta bisando na e mundu? Ki responsabilidat tin riba nos relashoná ku e mensahenan aki, i kon mayordomia ta pas aden?



Komo Atventistanan di e di Shete dia, nos mishon ta pa presentá e bèrdat di e mensahenan di e tres angelnan den preparashon pa e segundo binida di Kristu. Hende mester por tuma un desishon relashoná ku eternidat. E ròl di mayordomia ta un asosashon ku Dios den mishon (2 Kor 5:20, 6:1-4).

"Den un sentido spesial, Atventistanan di e di Shete dia a ser poné den e mundu komo vigilantenan i kargadónan di lus. Na nan e último atvertensia a ser konfiá pa un mundu ku ta peresé. Riba nan ta bria lus maravioso for di e Palabra di Dios. Nan a ser duná un obra di importansia di mas solèm: e proklamashon di e mensahenan di e promé, di dos i di tres angel. No tin niun otro obra di gran importansia asina. Nan no mester permití nada otro apsorbé nan atenshon."—Ellen G. White, Testimonies for the Church, tomo 9, p. 19.

E rim di un wil ta serka di e punto di kontakto ku suela i ta representá e mishon di e mensahenan di e tres angelnan. Nan mishon ta pa protehá kontra desviashonnan teológiko i ta identifiká nos responsabilidat den e eventonan di e último dianan. Nos mester ta mayordomonan di e mensahe aki, i proklam’é na e mundu.

Djaweps8 di mart

Mayordomia

Kristu ke pa nos biba un bida santu. Su bida ta ilustrá "santidat" i kon mayordomia ekselente mester ta (Hebr. 9:14). Nos mester manehá nos bida di un manera ku ta agradabel pa Dios, inkluyendo e manera ku nos ta manehá tur loke a ser konfiá na nos. Mayordomia ta un ekspreshon di e santidat ei.

Kompará 1 Pedro 1:15, 16 ku Hebreonan 12:14. Kiko ta nifiká "sea santu" i "santidat"? Kon esaki ta relashoná ku nos mayordomia?



E Romanonan a deskubrí ku un wil di garoshi tabata dura mas tantu si un banchi di heru a ser poné rondó di e rim. E artesanonan tabata keinta e metal pa asina ekspand'é nèt sufisiente pa slep e over di e rim. Awa friu tabata krem e pa e fit bon riba dje. E banchi di heru e ora ei tabata hasi kontakto ku e kaminda ora ku e wil tabata drai.

E banchi di heru riba e rim por representá e konsepto di mayordomia. Esaki ta e momentu di bèrdat, kaminda nos bida spiritual ta frega kontra nos bida práktiko. E ta kaminda nos fe ta topa ku e kosnan bon i malu den bida pa medio di éksito i frakasonan. Ta kaminda nos kreensianan ta bira real den e luchanan duru di bida diario. Mayordomia ta e empake di ken nos ta i loke nos ta hasi. E ta un testigu di nos kondukta i di un bida bon manehá. Nos akshonnan diario ku ta revelá Kristu ta manera e heru riba e wil ku ta mishi ku e kaminda.

Akshonnan ta poderoso i mester ser kontrolá pa medio di nos kompromiso ku Kristu. Nos mester biba ku e siguridat i promesa aki: "Mi por hasi tur kos pa medio di Kristu, Kende ta dunami fortalesa" (Fil. 4:13, NKJV).

"E santifikashon di e alma pa medio di e obra di Spiritu Santu ta e implantashon di e naturalesa di Kristu den humanidat. Religion di evangelio ta Kristu den e bida, un prinsipio bibu i aktivo. E ta e grasia di Kristu revelá den karakter i manifestá den bon obranan. E prinsipionan di e evangelio no por ser deskonektá for di niun departamentu di bida práktiko. Tur liña di e eksperensia i labor Kristian mester ta un representashon di e bida di Kristu."—Ellen G. White, Christ's Object Lessons, p. 384.

Djabièrnè9 di mart

Pa mas Estudio:

Tin biaha mester a bolbe pone e banchi di heru na e wilnan di garoshi pa motibu di e rèkmentu kousá pa e metal ku tabata dal kontra di e kaminda. E ponementu bèk aki tabata rekerí hopi batimentu ku martin riba e banchi di heru mes. E ponementu di e banchi di heru bèk ta representá mayordomia komo santifikashon práktiko. Ta pa tin e mente di Kristu ora ta respondé na kada aspekto grandi òf chikitu di bida, asta ora e proseso por ta duru i doloroso. Sea e proseso aki ta pertenesé na nos uso di sèn, relashonnan di famia, òf empleo, pa menshoná algun, tur mester ser adaptá na e boluntat di Kristu. Tin biaha, manera nos tur sa masha bon, nos por siña e lès aki solamente pa medio di algun gòlpi duru.

No ta fásil pa drecha heru. Tampoko ta fásil pa drecha karakter humano. Pensa riba e eksperensia di Pedro. E tabata tur kaminda ku Hesus, pero e no a spera e palabranan aki for di e lepnan di Hesus: "Mi a hasi orashon pa bo, pa bo fe no faya; i abo, unabes ku bo a kombertí, fortalesé bo rumannan" (Lukas 22:32). No muchu tempu despues, despues di a ninga Hesus, Pedro tabatin un kambio den su bida, pero solamente despues di un eksperensia hopi doloroso i difísil. Den un sentido, su mayordomia a ser restablesé. Pedro a kombertí di nobo, i su bida tabata bai tuma un direkshon nobo, pero solamente despues di algun basta sla.

Preguntanan di Diskushon:

pregunta 1Kiko santifikashon práktiko tin di aber ku Hesus Su instrukshon pa "lag’é nenga su mes, i hisa su krus tur dia"? Lukas 9:23, NKJV. Kiko a ser krusifiká? Gal. 6:14. Kon esaki ta ilustrá e proseso di santifikashon? Kon santifikashon práktiko ta yuda nos siña pensa manera Dios? 1 Kor 2:16.

pregunta 2Kiko tabata bo propio eksperensia enkuanto di kon pruebanan doloroso por duna lèsnan poderoso tokante bida Kristian i sigui Señor? Laga esnan den klas ku ta sinti konfortabel papia tokante e eksperensianan ei i kiko nan a siña. Kiko nos por siña for di eksperensianan di otro tambe?

pregunta 3Pensa riba otro kreensianan ku nos komo Atventistanan di e di Shete dia tin, sea Sabat, e estado di e mortonan, Kreashon, e Segundo Binida, etc. Den ki forma e vários kreensianan aki mester impaktá e kondukta di nos bida en general?