Lès 11 * 10-16 di mart

Debe - Un Desishon Diario

Sabat Atardi

Lesa pa e siman aki:

Salmo 37:21; Mat. 4:3-10; Mat. 6:33; Deut. 28:12; Prov. 13:11; Prov. 21:5; 2 Kor. 4:18.

Versíkulo di Memoria:

"Duna tur hende loke boso debe nan: si boso ta debe belasting, paga belasting; si ta tributo, tributo; si ta rèspèt, rèspèt; si ta onor, onor. No debe ningun hende nada, sino solamente e debe kontinuo pa stima otro; pasobra esun ku stima su próhimo a kumpli ku lei" (Romanonan 13:7, 8, NIV).

Tin biaha bo por tin sufisiente suerte pa haña un hende ku ta dispuesto pa fiabo sèn. Kisas e persona ei ta hasié ku un intenshon puru, es desir, realmente e ke yuda sakabo for di un problema finansiero. Pero den mayoria kaso, hende no ta fiabo sèn for di bondat di nan kurason. Nan ta fiabo sèn pasobra nan ke gana mas (di bo) sèn a kambio.

Nos mester hasi tur loke nos por pa evitá debe. Naturalmente, den sierto sirkunstansia, manera kompra di un kas òf un outo, konstrukshon di un iglesia, òf hasi un estudio, nos mester fia sèn. Pero e mester ser hasí di forma mas sabí posibel, ku e intenshon di sali for di e debe mas pronto posibel.

Sinembargo, nos mester ta kuidadoso. Gasta sèn ku nos no tin ta un porta di entrada pa e pueblo di Dios pa "hasi kudishi i amor pa tesoronan terenal e rasgonan dominante di nan karakter. Tanten ku e rasgonan aki ta dominá, salbashon i grasia ta hala atras."—Ellen G. White, Early Writings, p. 267.

Nos mester mehorá nos kapasidatnan i abilidatnan pa nos por permanesé disipliná i hasi tur loke nos por pa evitá debe. E siman aki nos lo wak kiko Beibel ta bisa enkuanto di debe.

* Studia e lès di e siman aki pa prepará pa Sabat, 17 di mart.

Djadumingu11 di mart

Fia i Gasta

E profetanan i Eliseo tabata kap palu banda di Riu Hordan ora ku "kabes di heru di e hacha a kai den awa; ‘Ai, mi shon!’ [un di e profetanan] a grita. ‘Anto ta fiá e ta' " (2 Reinan 6:5, NIV). E verbo "fia" ta nifiká usa, ku pèrmit, algu ku ta pertenesé na un otro hende. E pèrmit aki ta trese riesgo i responsabilidat kuné. Sèn fiá no ta diferente for di e hacha fiá, eksepto ku e por tin konsekuensianan mas serio si e ser mal usá.

E úniko motibu ku nos ta fia sèn ta pa gast'é. E riesgo finansiero ku nos ta tuma ta ora nos presumí ku nos tin e abilidat di paga bèk i ku lo no tin sorpresanan finansiero den futuro. Sinembargo, futuro ta deskonosí na nos (Ekl. 8:7); p'esei, fiamentu di sèn semper tin un riesgo kuné.

Kiko e siguiente tèkstnan tin di bisa tokante debe?

Salmo 37:21

Ekl. 5:5

Deut. 28:44, 45

Nos por fia sèn ku e intenshon di us'é na un manera sabí, pero e tentashon pa gasta loke nos tin, asta di sèn fiá, por hiba na algun problema hopi difísil. Enbèrdat, gastamentu di sèn fiá ta permití hopi di nos pa biba di formanan ku realmente nos no por permití nos mes. Tentashon pa fia i gasta ta e batimentu di kurason di un kultura di konsumidó ku ta afektá e riku i e pober. Ora nos ser tentá, nos mester buska Dios Su provishon (1 Kor. 10:13), pasobra fiamentu por ta un maldishon (Deut. 28:43-45).

No kuminsá ku e mal kustumber di fia sèn. Si bo tin e kaba, pag’é bèk mas pronto posibel. Nos mester siña gasta na un manera sabí i ser kuidadónan di e sèn di Dios, i no ser dominá pa e sèn di e mundu en kambio.

Atrobe, tin algun situashon den kua nos mester fia. Pero e mester ser hasí ku koutela i ku e intenshon di paga tur kos bèk tan pronto ku nos por.

Djaluna12 di mart

Mayordomia i Gratifikashon Instantáneo

"I Jacob a duna Esau pan i stobá di lenteha; e ora ei e a kome i bebe, a lanta i a bai su kaminda. Asina Esau a despresiá su derecho di primogenitura" (Gen. 25:34, NKJV). Esau tabata un hòmber robusto di kunuku ku tabata sigui su pashonnan. Ora e a hole e stobá di su ruman, e tabata ke e lenteha inmediatamente, ounke tabata poko probabel ku e tabata muriendo di hamber. Kontrolá pa su emoshon i sintimentunan, e a permití e preshon di e momentu tuma kòntròl di su rasonamentu, i a kambia su derecho di primogenitura pa un tiki gratifikashon instantáneo. Ora e tabata ke su derecho di primogenitura bèk, i "maske e a buska esaki di manera diligente ku lágrima" (Hebr. 12:17, NKJV), e no a hañ'e.

Den kontraste, nos tin e ehèmpel di Hesus. Despues di un ayuno di 40 dia i serka di muri di hamber, Hesus a ser tentá dor di Satanas tres biaha (Mat. 4:3-10). Pero Hesus a mira e tentashonnan pa loke nan tabata, i asta den Su kondishon debil E no a sede na gratifikashon. Hesus a biba henter Su bida ningando e plasernan di piká i gratifikashon, i dor di hasi esei E a mustra ku nos tambe por tabatin poder riba piká. E no a interkambiá òf pèrdè Su derecho di primogenitura, i E ta invitá nos tur pa kompartí e echo ku nos ta ko-erederonan kunÉ (Rom. 8:17, Tito 3:7). Nos ta mantené nos derecho di primogenitura dor di sigui e ehèmpel ku Hesus a duna ora E a ser tentá (1 Kor. 10:13).

E mihó kos ku e mundu aki por ofresé ta pa eksperensiá e aki i awor, pasobra e no por ofresé un eksperensia den e mas aya. Pa biba pa bo mes ta kontrali di biba pa Dios.

Kiko e siguiente tèkstnan ta siña tokante e potensial peligernan di gratifikashon instantáneo, asta pa hendenan fiel? 2 Sam. 11:2-4, Gen. 3:6, Fil. 3:19, 1 Juan 2:16, Rom. 8:8.



E deseo pa gratifikashon instantáneo ta sintomátiko di un mente deskontrolá; e ta un enemigu di pasenshi ku ta debilitá metanan riba término largu, ku ta burla di responsabilidat i ta hasi atentado kontra dje. Pa tarda ku gratifikashon ta un prinsipio ku ta ser siñá; e ta un abilidat di bida ku ta yuda nos manehá situashonnan i preshonnan, spesialmente e tentashonnan ku mundu tin di ofresé, manera fiamentu di sèn na un manera no sabí. E idea aki, sinembargo, no ta popular den un mundu konstruí riba e indulgensia di rekompensa instantáneo, solushonnan rápido, i intriganan pa bira riku lihé. Unabes nos a eksperensiá gratifikashon instantáneo, nos tin mas probabilidat di skohe e rekompensa di korto plaso atrobe, i atrobe i atrobe. . . . Mayordomonan di e donnan ku Dios a duna na nos no mester kai den e trampa ei.

Djamars13 di mart

Biba Denter di Bo Rekursonan

"Tin tesoro presioso i zeta den kas di e sabi, ma un hende bobo ta dispidí tur loke e tin" (Prov. 21:20, NKJV). E versíkulo aki ta pone e mayordomia di responsabilidat ekonómiko den kontraste ku maneho luhoso i ku gastamentu. Hende bobo no ta hasi plan pa biba denter di nan rekursonan. Na un manera golos nan ta gasta e rikesa ku nan tin na nan disposishon, asta rikesa fiá, i nan ta sinti ku sabiduria finansiero òf un bida ekonómiko ta un atversidat, manera un dieta indeseá. Sinembargo, asta ora nos mester fia sèn, manera pa un kas, nos mester hasi esaki ku konsiderashon kuidadoso i e realisashon ku nos mester biba denter di nos rekursonan.

Esnan riku por biba denter nan rekursonan segun nan rikesa. Nan problema ta ku semper nan ta preokupá tokante nan rikesa i kon pa konservá esaki. Ora ku hende tin hopi tiki i ta biba di salario pa salario, nan ta preokupá tokante sostené bida, i no rikesa. No opstante, Beibel ta duna konseho riba bibamentu denter di nos rekursonan, no importá kuantu nos tin. Pablo ta rekomendá loke nos lo por konsiderá simplesa ekstremo: "I si nos tin kuminda i paña pa bisti [lo por inkluí bibienda], ku esakinan nos mester ta kontentu" (1 Tim. 6:8, NIV). Pablo no ta konsiderá poseshonnan terenal dje importante ei pasobra pa e, biba den Kristu ta sufisiente (Fil. 1:21).

Ki prinsipio mester ser rekòrdá promé ku kualkier otro kos? Mat. 6:33. Kon nos por tin sigur ku esaki ta e manera ku nos ta bibando nos bida?



Nos mester pensa riba nos rekursonan no komo entrada ma komo rekursonan ku nos tin un responsabilidat pa manehá. Un presupuesto ta e método ku nos mester usa pa kumpli ku e tarea aki. Plania un presupuesto ta un abilidat siñá ku mester ser studiá deliberadamente. Práktika di disiplina i esfuerso ta nesesario pa ta eksitoso den maneho di un plan finansiero balansá (Prov. 14:15). Si nos hasi e kompromiso pa ta eksitoso den nos plan di mayordomia finansiero, nos lo ta kapas pa evitá erornan finansiero bergonsoso.

Si bo tin problema ku maneho di sèn, traha un presupuesto. E no mester ta kompliká. E por ta tan simpel manera suma tur bo gastunan pa algun luna i despues bo ta saka un promedio di bo gastunan mensual. E klave ta pa biba denter di bo rekursonan, sin importá kiko pasa, i pa hasi tur loke ta posibel pa evitá debe.

Djarason14 di mart

Bisa Nò na Debe

Lesa Deuteronomio 28:12. Kiko esaki ta siña nos tokante hinka nos kurpa den muchu debe? Ki prinsipio nos ta mira ta ser ehersé aki?



Ta simplemente sentido komun pa evitá debe tantu ku bo por. Skritura ta deskurashá nos tambe pa para bòrg pa debenan di otro hende (Prov. 17:18, 22:26). Debe ta influensiá futuro i ta obligá nos pa someté na su demandanan for di nos posishon di debilidat finansiero. E ta un remedi suave ku Kristiannan ta haña difísil pa ninga i manehá. Debe kisas no ta inmoral, pero e no ta fortalesé nos bida spiritual.

"Mester tene kuenta ku ekonomia na un manera estrikto, sino un debe pisá lo tuma lugá. Keda denter di e límitenan. Evitá hasimentu di debe manera lo bo evitá lepra."—Ellen G. White, Counsels on Stewardship, p. 272.

Debe por bira sklabitut finansiero ku ta hasi nos un "esklabo di esun ku ta fia nos" (Prov. 22:7). Pasobra debe ta asina enbolbí ku e struktura di nos mundu ekonómiko, nos ta pensa di dje komo simplemente e norma. Despues di tur kos, nashonnan kompletu ta eksistí riba debe; dikon individuonan lo no mester hasi meskos? Esaki ta un aktitut robes pa nos tin.

"Hasi un pakto solèm ku Dios ku pa medio di Su bendishon lo bo paga bo debenan i e ora ei no debe niun hende nada si bo tin ku biba riba papa ku pan. Ta asina fásil pa ora bo ta drecha bo mesa pa saka bintisinku sèn pa algun kos èkstra. Kuida e depchinan, i e dòlernan lo kuida nan mes. Ta e tiki aki i e tiki aya ku ta ser gastá pa esaki, esaya, i esun otro, ku pronto ta oumentá bira dòler. Ninga mes por lo ménos miéntras bo ta den hopi debe. . . . No duda, bira deskurashá, òf bira bèk. Ninga bo gustu, ninga e indulgensia di apetit, spar bo sèn i paga bo debenan. Eliminá nan mas pronto ku ta posibel. Ora bo por para firme komo un hende liber atrobe, sin debe niun hende nada, lo bo a alkansá un gran viktoria."—Ellen G. White, Counsels on Stewardship, p. 257.

Debe ta un fundeshi debil pa Kristiannan para riba dje. E por hasi daño na nos eksperensia spiritual i impaktá nos abilidat pa finansiá e obra di Dios. E ta hòrta nos abilidat di duna na otronan ku konfiansa, i ta hòrta oportunidatnan pa e bendishonnan di Dios.

Djaweps15 di mart

Spar i Invertí

Vruminganan ta traha pa spar provishon pa wenter (Prov. 6:6-8). Nos ta sabí pa konsiderá nan maneranan ora nos spar sèn komo rutina pa un propósito spesífiko. E punto di sparmentu ta pa tin rekursonan disponibel pa nos gastunan òf nesesidatnan di bida kontrali na gasta òf akumulá loke nos ta gana. Manehá sèn ta rekerí sabiduria, traha presupuesto, i disiplina. Si tur loke nos ta hasi ta spar pa nos mes, nos ta hòrtando e poseshonnan di Dios na lugá di manehá nan.

"Sèn uzá innesesariamente ta un dòbel pèrdida. No solamente e a bai, sino su potensial pa spar tambe a bai. Si nos a pon'é un banda, e lo por tabata multiplikando riba tera pa medio di sparmentu òf den shelu atraves di dunamentu. . . . Sparmentu ta un disiplina ku ta desaroyá outoridat riba sèn. Na lugá di laga sèn hiba nos na unda ku nos kaprichonan ta inkliná, nos ta tuma kòntròl."—Randy C. Alcorn, Money, Possessions and Eternity (Carol Stream: Illinois, Tyndale House Publishers, 2003), p. 328.

Lesa Proverbionan 13:11, Proverbionan 21:5, i Proverbionan 13:18. Ki palabranan práktiko tin aki pa nos ku por yuda nos pa atendé mihó ku nos problemanan finansiero?



Mayordomonan ta spar pa nesesidatnan familiar i ta invertí den shelu ora nan ta manehá e biennan di Dios. No ta trata di kuantu un persona ta poseé, sino ta trata di tin un plan di maneho bíbliko bon kla, loke sea bo situashon finansiero por ta. Sparmentu pa nesesidatnan familiar mester ser hasí na un manera sabí. Pa minimalisá kualkier pèrdida, parti e riesgo (Ekl. 11:1, 2). Traha den un minimalisashon asina promé ku bo propio deseonan (Prov. 24:27) i despues buska konseho kualifiká serka otronan (Prov. 15:22) ta dos hèrmènt eksitoso den e modelo aki. Segun ku nesesidat ta ser suplí i rikesa ta krese, nos mester "kòrda Señor bo Dios, pasobra ta [E] ta dunabo poder pa gana rikesa" (Deut. 8:18, NIV).

E modelo di invershon di mas sigur pa e mayordomo di Dios ta pa invertí den "e reino di shelu" (Mat. 13:44). No tin reseshon, riesgo, ladron, òf krísis den merkado. Ta meskos ku ora bo tin un tas òf pòtmòni ku nunka lo gasta (Lukas 12:33). Aseptá Hesus ta habri e kuenta, i debolbé diesmo i duna ofrenda ta depósitonan. Es desir, maske kuantu nos mester kuida nos kosnan terenal akinan, manera paga nos kuentanan, nos mester keda mantené nos enfoke semper riba bèrdatnan eterno.

Djabièrnè16 di mart

Pa mas Estudio:

Tur abilidat natural, aptitut, òf don ta bini di Dios, sea nos a nase kuné genétikamente, influensiá i eduká dor di nos ambiente, òf tur dos. E parti importante di e komparashon ta loke nos ta hasi ku e abilidatnan ku nos tin. Dios ta spera ku mayordomonan ta siña pa ta maestronan di nan aptitutnan i abilidatnan pa medio di edukashon i eksperensia práktiko (Ekl. 10:10).

Bezaleel tabata yená "ku e Spiritu di Dios den sabiduria i komprondementu, den konosementu i den tur obra" (Eks. 35:31, NKJV). E i Aholiab (Eks. 35:34) tabatin e abilidat pa siña otronan nan obranan.

Nos por siña pa ta mihó mayordomonan i spesífikamente pa eliminá debe miéntras nos ta biba den un mundu materialista. Semper nos mester ta desaroyando nos abilidatnan pa medio di lesamentu, seminarionan, edukashon formal, (ki ora ku ta posibel), i finalmente praktiká loke nos a siña. Oumentando nos abilidatnan ta kapasitá nos pa duna e mihó di nos mes na Dios i pa ta bon mayordomonan.

E parabel di e talentonan ta indiká ku kada mayordomo a risibí talentonan "segun su abilidat" (Mat. 25:15, NKJV). Dos sirbidó a dupliká nan kantidatnan; e di tres a skonde di dje den tera. Semper nos mester lucha pa mehorá loke nos tin, pero pa dera e talento no a mustra ningun abilidat òf aptitut. Manehá sèn, sali for di debe, kultivá disiplina i eksperensia práktiko ta desaroyá kompetensianan ku ta ser bendishoná dor di Dios. Pa bira eksitoso i bon den algu, nos mester ripití esaki bes tras bes.

"Segun ku e lèsnan di Beibel ta ser praktiká den bida diario, nan tin un influensia profundo i duradero riba e karakter. E lèsnan aki Timoteo a siña i a praktiká. E no tabatin talentonan spesialmente briante, pero su trabou tabata balioso pasobra e a usa su abilidatnan duná dor di Dios den servisio di e Maestro."—Ellen G. White, The Acts of the Apostles, p. 205.

Preguntanan di Diskushon:

pregunta 1Ounke ku kòntròl propio semper ta importante pa e Kristian, ta spesialmente importante ora un falta di kòntròl propio por hiba na difikultat finansiero òf asta ruina. Kiko nos komo iglesia por hasi pa yuda esnan ku por ta den peliger di e problema aki?

pregunta 2Lesa Romanonan 13:7, 8. Kon nos por apliká e palabranan aki na nos bida diario i den tur nos interakshonnan ku otronan?

pregunta 3Algun hende ta argumentá ku nos no mester preokupá tokante hinka nos mes den debe, pasobra Hesus ta bini bèk pronto. Kon lo bo respondé na e afirmashon aki?