Lès 12 * 17-23 di mart

E Kustumbernan di un Mayordomo

Sabat Atardi

Lesa pa e siman aki:

Efe. 5:15-17; Kol. 3:23; Lukas 12:35-48; Santiago 4:14; Echonan 3:21; 1 Kor. 9:24-27.

Versíkulo di Memoria:

"Kon un hóben por tene su kaminda puru? Dor di mantené esei segun Bo palabra. Ku henter mi kurason mi a buskaBo; no lagami desviá for di Bo mandamentunan. Bo palabra mi a skonde den mi kurason, pa mi no peka kontra Bo" (Salmo 119:9-11, NKJV).

Bo kustumbernan ta revelá propósito i direkshon den bo bida. Mayordomonan ku ta desaroyá bon kustumbernan ta e mayordomonan di mas fiel. Daniel tabatin un kustumber di orashon diario (Dan. 6:10). Pablo su kustumber tabata pa ta den sinagoga (Ech. 17:1, 2). E ta skirbi tambe: "No laga hende gaña boso: Mal kompania ta daña bon kustumber." (1 Kor 15:33, NKJV). Nos mester kultivá bon kustumbernan pa remplasá esnan malu.

"Nos lo ta individualmente, pa aki i eternidat, loke nos kustumbernan hasi nos. E bida di esnan ku ta forma kustumbernan korekto, i ku ta fiel den ehekushon di tur deber, lo ta manera lusnan briante ku ta tira rayonan di lus kla riba e kaminda di otronan."—Ellen G. White, Testimonies for the Church, tomo 4, p. 452.

E kaminda ku un kustumber ta krea ta e kaminda di mas lihé ku bo por tuma pa haña e rekompensa ku bo ta buska. Un kustumber ta un desishon bon fundá. Den otro palabra, bo no ni mester pensa riba dje; bo ta djis hasié. E kustumber ei por ta hopi bon òf hopi malu, dependiendo di kiko e ta pa bo. E siman aki nos ta wak kustumbernan poderoso ku lo yuda un mayordomo realisá e negoshi di Dios.

* Studia e lès di e siman aki pa prepará pa Sabat, 24 di mart.

Djadumingu18 di mart

Kustumber: Buska Dios Promé

Nos tur tin kustumbernan. E pregunta ta: Ki tipo nan ta? Bon òf malu? Di tur e bon kustumbernan ku un Kristian por tin, buska Dios promé kos tur dia lo mester tabata esun di mas importante di tur.

“Tur mainta dediká bo mes, alma, kurpa i spiritu, na Dios. Establesé kustumbernan di deboshon i konfiansa mas i mas den bo Salbador.”—Ellen G. White, Mind, Character, and Personality, tomo 1, p. 15. Ku un kustumber manera esei, siguramente nos lo a drenta dor di e “porta . . . smal” ku ta hiba na bida (Mat. 7:14).

Dios a bisa, “Lo bo no tin otro dios Mi dilanti” (Eks. 20:3, NKJV). Hesus a bisa, den konteksto di nos nesesidatnan básiko, pa “Buska promé e reino di Dios i Su hustisia” (Mat. 6:33, NKJV), i tambe a ser bisá na nos: “Boso lo buskaMi i hañaMi, ora boso buskaMi ku henter boso kurason” (Yer 29:13, NKJV).

Lesa Mateo 22:37, 38; Echonan 17:28; Efesionan 5:15-17; i Kolosensenan 3:23. Kiko ta ser bisá aki ku por yuda nos pa komprondé kon pa pone Dios promé den nos bida?



Di tur nos ehèmpelnan di buska Señor promé, niun naturalmente ta un mihó ku e ehèmpel di Hesus. Hesus a pone Su Tata promé den tur kos. Nos ta kuminsá mira e prioridat aki durante Su bishita di Pasku na Yerusalèm komo mucha. Ora E a ser konfrontá pa Su mama, ku a hañ'E "den tèmpel", E a bisa Su mama, "Mi mester ta den e asuntunan di Mi Tata" (Lukas 2:46, 49, NKJV).

Atraves di Su bida, Hesus tabata anhelá na komunion ku Su Tata, manera evidensia ta mustra, pa medio di Su bida di orashon. E kustumber aki tabata algu ku e disipelnan no a komprondé kompletamente. Tur e podernan di skuridat no por a separá Hesus for di e Tata, pasobra Hesus a forma e kustumber pa mantené Su mes totalmente konektá kunE.

Nos por sigui e ehèmpel di Hesus dor di tuma e desishon pa stima Dios ku henter nos kurason, mente i alma (Mat. 22:37). Dor di hasi orashon, studia e Palabra di Dios i trata na imitá e karakter di Hesus den tur loke nos ta hasi, nos lo forma e kustumber di pone Dios promé den nos bida. I pa un Kristian, ki mihó kustumber ku esaki por tin?

Djaluna19 di mart

Kustumber: Spera e Regreso di Hesus

Lesa Lukas 12:35-48. Kiko e parabel aki ta siña nos tokante kon nos mester relashoná ku e segundo binida di Hesus? Dikon tur loke nos ta hasi semper mester ta den konteksto di e realidat di e Segundo Binida?



Mayordomia normalmente mester ser praktiká den lus di e regreso di Hesus. E karakter di mayordomonan infiel ku ta aktua manera esnan fiel, finalmente lo ser mustrá pa medio di nan akshonnan; pasobra mayordomonan berdadero i fiel ta ehekutá nan responsabilidatnan dor di vigilá i traha manera kos ku e maestro ta presente. Nan ta biba pa futuro i ta traha fielmente dia pa dia. "Ma nos siudadania ta den shelu, for di unda nos ta spera ansiosamente riba un Salbador, e Señor Hesukristu" (Fil. 3:20, NIV).

Abraham tabata spera un siudat eterno (Hebr. 11:10), i Pablo tabata spera e regreso di Kristu (Hebr. 10:25). Nan tabata personanan ku tabata pensa adelantá, antisipá, plania, i tabata kla pa topa ku Hesus den kualkier momentu. Nos tambe mester desaroyá e kustumber aki di wak na distansia ku un bista firme pa e klímaks di e evangelio (Tito 2:13). Na lugá di lur de bes en kuando òf sporádikamente tira un bista den e profesianan, nos mester wak, vigilá i hasi kontinuamente, semper konsiente di e eternidat ku ta spera nos ora Kristu bini bèk. Na mes momentu, nos mester evitá spekulashonnan ekstrabagante tokante i eventonan di tempu di fin. E promesa di e Segundo Binida ta duna nos direkshon den nos bida, ta proveé un perspektiva korekto na e presente, i ta yuda nos kòrda kiko ta importante den bida. E kustumber di spera e regreso di Hesus ta duna un mayordomo definishon i propósito.

E krus a traha e kaminda pa nos por tin un enkuentro ku e Redentor. Nos ta buska señalnan revelá den Skritura ku ta mustra nos na e binida di Kristu den e gloria di e Tata i angelnan (Marko 8:38). "Asina anto nos no ta fiha nos bista riba e kosnan ku ta ser mirá, ma e kosnan ku no ta ser mirá. Pasobra e kosnan ku ta ser mirá ta temporal, ma e kosnan ku no ta ser mirá ta eterno" (2 Kor 4:18, NIV).

Sí, morto i e realidat konstante di morto, semper mester yuda nos realisá kon limitá i pasahero nos tempu akinan ta. Pero e promesa di e Segundo Binida tambe ta mustra nos ku morto riba su mes ta temporal i pasahero. No ta straño, anto, ku nos mester biba den lus di e promesa di e regreso di Kristu, un promesa ku mester impaktá e manera kon kada mayordomo Kristian ta biba. Laga nos hasié un kustumber awor pa biba semper den e ekspektativa di e regreso di Kristu. Nos nòmber mes ta revelá e realidat di e ekspektativa ei.

Djamars20 di mart

Kustumber: Uza Tempu di Forma Sabí

"Pasobra nos ta solamente di ayera i no sa nada, pasobra nos dianan riba tera ta manera un sombra" (Job 8:9, NKJV).

Bo por para un oloshi, pero no e moveshon di tempu. Tempu no ta warda; e ta sigui move pa dilanti asta si nos para ketu i no ta hasi nada.

Kiko e siguiente tèkstnan ta siña nos tokante nos tempu aki riba tera den e bida aki? Sant. 4:14; Salmo 90:10, 12; Salmo. 39:4, 5; Ekl. 3:6-8. Kiko ta e mensahe básiko ku nos mester saka for di e tèkstnan aki tokante kon presioso nos tempu ta aki?



Ku algu asina limitá i ku no por ser renobá manera tempu, ta importante pa Kristiannan ta bon mayordomonan di dje. Pues nos mester desaroyá e kustumber di usa nos tempu na un manera sabí dor di enfoká riba loke ta importante den e bida aki i esun siguiente. Nos mester manehá tempu basá riba loke e Palabra di Dios ta revelá na nos komo importante, pasobra unabes ku tempu kaba, e no por ser renobá. Si nos pèrdè sèn nos por hañ'e bèk finalmente, kisas asta mas di loke nos a pèrdè promé. Ku tempu no ta asina. Un momentu pèrdí ta un momentu pèrdí pa semper. Ta mas fásil pa nos pone un webu kibrá bèk den su kaska, ku rekuperá sikiera un momentu di pasado. Pues, tempu ta un di e komodidatnan di mas presioso ku Dios a duna na nos. Kon importante ta, anto, pa nos desaroyá e kustumber di probechá lo máksimo di kada momentu ku a ser duná na nos.

"Nos tempu ta pertenesé na Dios. Kada momentu ta di djE, i nos ta bou di e obligashon di mas solèm pa mehorá esaki na Su gloria. Di niun otro talento ku E a duna E lo rekerí kuenta mas estrikto ku di nos tempu.

"E balor di tempu ta mas aya di kalkulashon. Kristu tabata konsiderá tur momentu komo presioso, i ta asina nos mester konsider’é. Bida ta muchu kòrtiku pa nos hasi mal uso di dje. Nos tin solamente un par di dia di grasia den kua nos por prepará pa eternidat. Nos no tin tempu di pèrdè, ni tempu pa dediká na plasernan egoista, ni tempu pa e indulgensia di piká."—Ellen G. White, Christ's Object Lessons, p. 342.

Djarason21 di mart

Kustumber: Mantené un Mente, Kurpa i Alma Sano

Originalmente nos a ser kreá perfekto: mentalmente, físikamente i spiritualmente. Naturalmente, piká a ruiná tur kos. E bon notisia di e evangelio, entre otro kosnan, ta ku Dios ta den e proseso di restourá nos na loke nos a ser destiná pa ta originalmente.

Lesa Echonan 3:21 i Revelashon 21:1-5. Ki speransa ta ser hañá den e tèkstnan aki pa nos? Kon nos mester biba miéntras nos ta spera e restourashon final aki?



Kristu a traha inkansablemente ora E tabata aki pa e elevashon di humanidat spiritualmente, mentalmente, i físikamente, tur esakinan komo prekursor di e restourashon final na fin di tempu. E ministerio di kurashon di Hesus ta prueba ku Dios ke pa nos ta tan salú posibel ku nos por awor te ora ku e fin yega. Pues mayordomonan ta desaroyá kustumbernan pa nan mente, kurpa i alma ku ta promové un estilo di bida saludabel.

Na promé lugá, e mente lo bira mas fuerte miéntras mas e ta ser usá. Komo kustumber, yena bo mente ku "tur loke ta bèrdadero, tur loke ta onorabel, tur loke ta hustu, tur loke ta puru, tur loke ta bunita, tur loke ta di bon fama" (Fil. 4:8, NIV). Pensamentunan asina ta trese pas (Isa. 26:3), i un "kurason trankil ta bida pa e kurpa" (Prow 14:30, NIV). Kustumbernan saludabel di e mente ta permití e toren di poder funshoná den e mihó kondishon posibel.

Na di dos lugá, bon kustumbernan di salú, manera ehersisio i dieta apropiá, ta indiká ku nos ta kuida nos mes. Ehersisio, por ehèmpel, ta baha strès i preshon di sanger, ta mehorá nos humor, i e ta un remedi ku probablemente ta evitá biramentu bieu mas ku kualke kos ku ta disponibel riba rèki.

Na di tres lugá, un mayordomo lo desaroyá bon kustumbernan pa duna vigor na e alma. Elevá bo alma na Dios (Sal. 86:4, 5) i spera (Sal. 62:5). Bo alma lo prosperá ora "bo ta kanando den bèrdat" (3 Juan 3, NKJV) i lo ta "preservá sin kulpa na e binida di nos Señor Hesukristu" (1 Tes. 5:23, NKJV).

Djaweps22 di mart

Kustumber: Outodisiplina

Disiplina propio ta un di e rasgonan di karakter di mas importante ku un mayordomo por tin. "Pasobra Dios no a duna nos un spiritu di temor, sino di poder i di amor i di disiplina propio" (2 Tim. 1:7, NIV). E palabra griego pa disiplina, sophronismos, ta aparesé solamente aki den e versíkulo aki di Tèstamènt Nobo i ta enbolbí e abilidat pa hasi loke mester ser hasí ku un mente balansá i sano ku lo no desviá for di e prinsipionan di Dios. Outodisiplina por yuda nos "diserní loke ta bon i loke ta malu" (Hebr. 5:14, NIV), komprondé situashonnan ku presentá, i tòg na un manera trankilo i humilde, soportá preshonnan i distraishonnan apesar di e resultado. Daniel a sigui loke tabata korekto apesar di e leonnan, kontrali na Samson, kende a biba un bida egoista i a mustra tiki moderashon òf sano huisio. Hosé a sigui loke tabata korekto den kas di Potifar, kontrali na Salomon, kende a adorá otro diosnan (1 Reinan 11:4, 5).

Lesa 1 Korintionan 9:24-27. Kiko Pablo ta bisa aki tokante outodisiplina? Kiko e ta bisa ku finalmente ta na peliger den henter e asuntu di outodisiplina?



"E mundu a ser entregá na sensualidat. Erornan i fábulanan ta abundá. Satanas su trampanan pa destruí almanan a ser multipliká. Tur ku ke santidat perfekto den e temor di Dios, mester siña e lèsnan di temperansia i dominio propio. E apetit i pashonnan mester keda dominá pa e podernan mas haltu di e mente. E outodisiplina aki ta esensial na e fortalesa mental i bista spiritual ei ku lo kapasitá nos pa komprondé i praktiká e bèrdatnan sagrado di e Palabra di Dios."—Ellen G. White, The Desire of Ages, p. 101.

Outodisiplina ta mehora atraves di práktika kontinuo. Dios a yama boso pa "sea santu den tur boso kondukta" (1 Pe. 1:15, NIV) i pa "disipliná bo mes den santidat" (1 Tim. 4:7, NIV). Mayordomonan mester praktiká i train nan mes pa tin outodisiplina meskos ku e atletanan òf músikonan di mas talentoso. Pa medio di e poder di Dios i nos propio esfuerso diligente, nos mester disipliná nos mes den e kosnan ku realmente ta importá.

Djabièrnè23 di mart

Pa mas Estudio:

Enoc i Noe a hasié un kustumber pa kana ku Dios den un époka kaminda poko a keda fiel meimei di ekseso, materialismo i violensia (Gen. 5:24, 6:9). Nan a komprondé i a aseptá e grasia di Dios, i pues tabata bon mayordomonan di e poseshonnan i e tareanan konfiá na nan.

A lo largu di siglonan, hende a kana ku Dios meskos ku Enoc i Noe a hasi. Por ehèmpel, Daniel i su amigunan "a realisá ku pa nan por para komo representantenan di religion bèrdadero meimei di religionnan falsu di paganismo, nan mester tabatin un intelekto kla i perfekshoná un karakter Kristian. I Dios Mes tabata nan Maestro. Hasiendo orashon konstantemente, studiando konsientemente, kedando den kontakto ku Esun invisibel, nan a kana ku Dios manera Enoc a hasi."—Ellen G. White, Prophets and Kings, p. 486.

"Kana ku Dios" ta definí loke un mayordomo ta hasi, es desir, biba ku Dios dia pa dia riba tera. Un mayordomo sabí lo hasié un kustumber pa kana ku Dios meimei di un mundu di korupshon, pasobra solamente pa medio di e konekshon aki ku Dios nos por ta protehá for di kai den e maldatnan ku ta prevalesé.

Ser un fiel mayordomo ta enserá un bida íntegro ku ta kuminsá ku ser di akuerdo ku Dios (Amos 3:3). Nos mester kana den Kristu (Kol. 2:6), kana den nobedat di bida (Rom. 6:4), kana den amor (Efe. 5:2), kana den sabiduria (Kol. 4:5), kana den bèrdat (Salmo 86:11), kana den lus (1 Huan 1:7), kana den integridat (Prov. 19:1), kana den Su lei (Eks. 16:4), kana den bon obra (Efe. 2:10), i kana den un kaminda rekto (Prov. 4:26).

Preguntanan di Diskushon:

pregunta 1Definí humildat i splika su ròl den e bida di un mayordomo (Mat. 11:29, Efe. 4:2, Fil. 2:3, Sant. 4:10). Dikon humildat ta importante den nos kanamentu ku Dios? (Mik. 6:8).

pregunta 2Den klas, papia tokante maneranan ku nos por yuda esnan meimei di nos ku ta gará den kustumbernan malu i asta outo-destruktivo. Kiko boso komo un iglesia lokal por hasi pa yuda e hendenan aki?

pregunta 3Kua ta algun otro bon kustumbernan ku mayordomonan Kristian mester tin? Lesa, por ehèmpel, Tito 2:7, Salmo 119:172, Mat. 5:8.

pregunta 4Den klas, papia tokante tempu i e misterionan di tempu. Dikon e ta parse di ta pasa bai asina lihé? Kon nos por sikiera komprondé kiko ta tempu? I, mas importante ainda, dikon ta nesesario pa nos ta bon mayordomonan di e relativamente tiki kantidat di dje ku nos tin miéntras nos ta riba tera?