Lès 1 * 30 di yüni – 6 di yüli

Boso Lo Ta Mi Testigunan

Sabat Atardi

Lesa pa e siman aki:

Echonan 1:6-8; Lukas 24:25; Lukas 24:44-48; Deut. 19:15; Echonan 1:9-26; Prov. 16:33.

Versíkulo di Memoria:

“Boso lo risibí poder ora Spiritu Santu a bin riba boso; i boso lo ta Mi testigunan na Yerusalèm, den henter Hudea i Samaria, i te na e finnan di tera”(Echonan 1:8, NRSV).

E mishon di Hesus riba tera a terminá. Pronto Dios lo a manda Spiritu Santu, ken, ratifikando nan esfuersonan ku hopi señalnan i milagernan, lo a poderá i guia e disipelnan riba un mishon ku lo a alkansá e finnan di tera. Hesus no por a keda huntu ku nan pa semper den karni humano. No solamente Su enkarnashon a imponé riba djE un limitashon físiko den konteksto di un mishon mundial, pero Su asenshon i glorifikashon den shelu tabata nesesario pa e Spiritu bin.

Te na e resurekshon di Hesus, sinembargo, e disipelnan no tabata sa e kosnan aki klaramente. Ora nan a bandoná tur kos pa siguiE, nan a kere ku E tabata un libertador polítiko ku un dia lo a saka e Romanonan for di e tera, restablesé e dinastia di David, i restorá Israel na su gloria di pasado. No tabata fásil pa nan a pensa di otro forma.

Esaki ta e tema prinsipal di e instrukshonnan final na e disipelnan den Echonan 1. E promesa di e Spiritu ta bin den e konteksto aki. E kapítulo tambe ta deskribí e regreso di Hesus na shelu i kon e iglesia trempan a prepará su mes pa Pentekòste.

* Studia e lès di e siman aki pa prepará pa Sabat, 7 di yüli.

Djadumingu1 di yüli

E Restorashon di Israel

Tin dos tipo di profesia Mesiániko den Tèstamènt Bieu, un ku ta antisipá un Mesias real ku lo a goberná pa semper (Salmo 89:3, 4, 35-37; Isa. 9:6, 7; Eze. 37:25; Dan. 2:44; 7:13, 14), i un ku ta pronostiká ku e Mesias lo a muri pa e pikánan di e pueblo (Isa. 52:13-53:12; Dan. 9:26). Profesianan asina no ta kontradesí otro. Nan ta solamente mustra na dos fase konsekutivo di e ministerio di e Mesias: promé E lo a sufri, i despues bira Rei (Lukas 17:24, 25; 24:25, 26).

E problema ku espektativa Hudiu Mesiániko di e promé siglo, sinembargo, tabata ku e tabata di un banda. E speransa di un Mesias real ku lo a trese liberashon polítiko a skuresé e noshon di un Mesias ku lo a sufri i muri.

Promé, e disipelnan tabata kompartí e speransa aki di un Mesias real. Nan tabata kere ku Hesus tabata e Mesias (Mat. 16:16, 20) i tin biaha tabata ser hañá ta pleita entre nan mes tokante ken lo a sinta na kua banda di djE ora Su trono a ser establesé (Marko 10:35-37, Lukas 9:46). Apesar di e spièrtamentunan di Hesus tokante e destino ku tabata sper’É, simplemente nan no por a komprondé kiko E tabata kier men. Asina, ora E a muri, nan a bira konfundí i deskurashá. Den nan propio palabranan: “Nos a spera ku E tabata esun ku tabata bai redimí Israel” (Luke 24:21, NIV).

Lesa Echonan 1:6. Kiko e pregunta aki ta bisa tokante loke ainda nan no a komprondé? Den Echonan 1:7, kon Hesus a kontestá nan?



Si e morto di Hesus tabata representá un gòlpi fatal pa e speransa di e disipelnan, e resurekshon a rebib’é, hisando nan espektativanan polítiko kisas te na un nivel eksepshonal. Tabata parse natural pa forma un idea di e resurekshon komo un indikadó fuerte ku e reino Mesiániko finalmente lo a ser establesé.

Den Su kontesta riba nan pregunta, sinembargo, Hesus no a duna un kontesta direkto. E no a rechasá e argumento tras di e pregunta di e disipelnan di un reino inminente, pero E no a asept’é tampoko. E a laga e asuntu sin resolvé, miéntras E a rekordá nan ku e tempu di e akshonnan di Dios ta pertenesé na Dios Mes, i komo tal e ta inaksesibel pa hende.

Djaluna2 di yüli

E Mishon di e Disipelnan

Lesa Echonan 1:8. Na lugá di bira enbolbí den spekulashonnan profétiko, kiko tabata ser sperá pa e disipelnan hasi?



Tin kuater elemento importante den e pasashi aki enkuanto di e mishon di e disipelnan:

  1. E don di Spiritu. Semper e Spiritu tabata aktivo meimei di e pueblo di Dios. Di akuerdo ku e profetanan, sinembargo, lo tabatin un dramamentu spesial di e Spiritu den futuro (Isa. 44:3; Joel 2:28, 29). Komo Hesus Mes a ser ungí ku e Spiritu, Spiritu Santu ya tabata obrando durante tempu di Su ministerio (Lukas 4:18-21) pero no a ser inougurá ofisialmente te na momentu di e glorifikashon di Kristu den shelu (Juan 7:39, Echonan 2:33).
  2. E ròl di testifikashon. Un testimonio ta un relato dirèkt. E disipelnan tabata kompletamente kualifiká pa duna un testimonio asina (Echonan 1:21, 22; 4:20; kompará ku 1 Juan 1:1-3) i a ser mandá awor pa kompartí ku e mundu nan eksperensia úniko ku Hesus.
  3. E plan di e mishon. E disipelnan mester a testifiká promé na Yerusalèm, despues na Hudea i Samaria, i finalmente te na e finnan di tera. E tabata un plan progresivo. Yerusalèm tabata e sentro di bida religioso Hudiu, e lugá kaminda Hesus a ser kondená i krusifiká. Hudea i Samaria tabata áreanan den besindario kaminda Hesus tambe a ministrá. E disipelnan, sinembargo, no mester a limitá nan mes na e área aki so. E ekstenshon di nan mishon tabata mundial.
  4. E orientashon di e mishon. Den tempunan di Tèstamènt Bieu, tabata e nashonnan ku mester a ser atraé na Dios (lesa Isa. 2:1-5), no Israel ku mester “hiba” Dios serka e nashonnan. E poko eksepshonnan (por ehèmpel Yonas) no ta hasi e regla general inbálido. Awor e strategia tabata diferente. Yerusalèm tabata e sentro ainda, pero mas bien ku keda i krea rais einan, tabata ser sperá pa e disipelnan sali bai na e finnan di mas leu di tera.

Lesa Lukas 24:44-48. Kiko tabata e mensahe prinsipal ku e disipelnan mester a prediká?



Durante e kuarenta dianan ku E a pasa huntu ku e disipelnan despues di e resurekshon (Echonan 1:3), Hesus mester a splika nan hopi bèrdat tokante e reino di Dios, ounke ainda tabatin hopi kos ku nan no tabata komprondé, manera nan preguntanan den Echonan 1:6 a mustra. Nan tabata konosí ku e profesianan pero por a mira nan awor den un lus nobo, un lus tirá for di e Krus i e graf bashí (lesa Echonan 3:17-19).

Djamars3 di yüli

E Lo Bin Atrobe

Lesa Echonan 1:9-11. Kon Lukas ta deskribí e asenshon di Hesus? Kiko ta e nifikashon ku tabatin dos angel papiando ku nan (lesa Deut. 19:15)?



Lukas su relato di e asenshon ta mas bien kòrtiku. Hesus tabata huntu ku e disipelnan riba Seru di oleifi, i miéntras ainda E tabata bendishoná nan (Lukas 24:51), E a ser tumá den laira na shelu. E lenguahe, naturalmente, ta fenomenológiko; es desir, e esena ta ser deskribí manera e ta ser mirá den bista humano, no manera e ta realmente. Hesus tabata bandonando e tera, i no tin ningun otro manera pa hasi esei den un forma visibel ku dor di bai ariba.

E asenshon di Hesus tabata un akto sobrenatural di Dios, un di hopi dor di henter Beibel. Esaki ta impliká dor di e manera ku Lukas ta deskribié, ku e eperthe pasivo (“E a ser tumá den laira”, Echonan 1:9, NKJV). Ounke e ta ser uzá solamente aki den Tèstamènt Nobo, e forma verbal aki ta ser hañá vários kaminda den e vershon Griego di Tèstamènt Bieu (e Septuaginto), i nan tur ta deskribí akshonnan di Dios, kua ta sugerí ku Dios Mes tabata Esun ku a tuma Hesus den shelu, meskos ku E tabata Esun ku a lant’E for di morto (Echonan 2:24, 32; Rom. 6:4; 10:9).

Despues ku ya Hesus a ser skondí dor di un nubia, Lukas ta reportá, solamente den Echonan, e episodio di e dos figuranan bistí na blanku ku tabata pará banda di e disipelnan. E deskripshon ta koinsidí ku esun di angelnan den nan bistínan briante (Echonan 10:30, Juan 20:12). Nan a bin pa sigurá e disipelnan ku Hesus lo a bin bèk di e mesun manera ku E a subi bai ariba, i tambe ta solamente Echonan ta informá nos ku Hesus a bai ariba “dilanti di nan wowonan” (Echonan 1:9, NIV).

Pues, e asenshon visibel a bira e garantia di e regreso visibel, kua tambe lo tuma lugá den un nubia, ounke “ku poder i gran Gloria” (Lukas 21:27), no mas komo un evento privá, komo ku “tur wowo lo mir’É” (Rev. 1:7, NKJV), i E lo no ta so (Lukas 9:26, 2 Tes. 1:7). E gloria di e Segundo Binida lo superá e asenshon grandemente.

Djarason4 di yüli

Preparando pa Pentekòste

Den Su kontesta den Echonan 1:7, 8 Hesus no a hasi niun kompromiso enkuanto di tempu. No opstante, e implikashon natural di Su palabranan tabata ku djis despues ku e Spiritu a bin i e disipelnan a kompletá nan mishon, E lo regresá (lesa tambe Mat. 24:14). E remarke di e angelnan (Echonan 1:11) tampoko a kontestá e pregunta di ki dia e reino lo a bin, pero e por a ser komprondé manera ku no tabata falta muchu. Esaki parse di ta splika dikon e disipelnan “a regresá na Yerusalèm ku gran goso” (Lukas 24:52). E promesa di e segundo binida di Hesus na un tempu no spesifiká, kua mester a duna nan enkurashamentu èkstra pa nan mishon, a ser interpretá manera ku e final tabata serka di yega. Desaroyonan mas aleu den Echonan lo demostrá e idea aki.

Lesa Echonan 1:12-14. Ken mas tabata den e aposento haltu, i kon nan a prepará nan mes pa e binida di e Spiritu?



Despues ku nan a regresá for di Seru di Oleifi, e disipelnan a reuní den e kamber di wéspet di mas ariba (na Latin, cenaculum) di un kas privá di dos piso na Yerusalèm. Algun siguidó hende muhé (Lukas 8:1-3, 23:49, 24:1-12), komo tambe mama i rumannan hòmber di Hesus, tabata ei huntu ku e disipelnan.

E rumannan hòmber di Hesus (Marko 6:3) tabata sea yunan hòmber mas hóben di Hosé i Maria (Mat. 1:25, Lukas 2:7) òf, mas probablemente, yunan hòmber di e promé matrimonio di Hosé, den kua kaso Hosé lo tabata biudo ora e a tuma Maria komo su esposa. Nan presensia entre e disipelnan a bin komo un sorpresa, ya ku semper nan tabata mas bien dudoso pa ku Hesus (Marko 3:21, Juan 7:5). Sinembargo, e resurekshon i e aparishon spesial di Hesus na Santiago (1 Kor. 15:7) ta parse di a hasi tur e diferensia. Mas despues Santiago aparentemente asta lo a remplasá Pedro den e liderazgo di e komunidat Kristian (Echonan 12:17; 15:13; 21:18; Gal. 2:9, 12).

Konstantemente den orashon (Echonan 1:14), i konstantemente den e tèmpel alabando Dios (Lukas 24:53), nan tur tabata sin duda enbolbí den un tempu di konfeshon, arepentimentu, i e ponementu un banda di piká. Asta si den nan mente e binida di e Spiritu lo a hiba inmediatamente na e regreso di Hesus, nan aktitut spiritual tabata den kompletu harmonia ku loke tabata na punto di sosodé, ya ku Spiritu Santu ta bin den kontesta riba orashon.

Djaweps5 di yüli

E di Diesdos Apòstel

E promé akshon atministrativo di e promé komunidat Kristian, kua tabata konta ku masoménos 120 kreyente (Echonan 1:15), tabata di skohe un susesor pa Hudas.

Lesa Echonan 1:21, 22. Ki kualifikashonnan e susesor di Hudas tabata ser sperá di tin? Dikon esakinan lo tabata asina importante?



E nesesidat tabata pa un testigu di e resurekshon di Hesus (kompará ku Echonan 4:33); esaki ta krusial pasobra bes tras bes e resurekshon ta ser mirá komo evidensia poderoso pa e Mesianismo di Hesus i e bèrdat di henter e fe Kristian.

E eskoho, sinembargo, mester a ser hasí for di entre esnan ku a kompañá e apòstelnan durante henter e ministerio di Hesus. Pablo lo a insistí mas despues ku, apesar di no tabata huntu ku e Hesus terenal, e tabatin derecho sinembargo riba e fishi apostóliko pasobra su enkuentro ku Hesus riba e kaminda pa Damasko tabata kalifik’é pa karga testimonio di Su resurekshon (1 Kor. 9:1). Apesar di atmití di ta manera “un ku a nase prematuro” (1 Kor. 15:8, ESV), Pablo a nenga di konsiderá su mes ménos kalifiká ku e otro apòstelnan (1 Kor. 9:2, Gal. 2:6-9). Solamente e Diesdos i Pablo, anto, tabata “apòstelnan” den sentido tékniko i outoritativo (Echonan 1:25, 26); sinembargo, den su sentido general básiko komo esnan mandá òf mensaheronan, e término tambe por a ser uzá pa otro obreronan evangéliko (Echonan 14:4, 14; Gal. 1:19).

Lesa Echonan 1:23-26. Kon Matias a ser skohé?



E método ku nan a uza pa skohe Matias por parse straño, pero e tiramentu di lòt tabata un forma estables’é pa hopi tempu di tuma desishon (por ehèmpel, Lev. 16:5-10, Num. 26:55). Ademas, e eskoho tabata entre dos kandidato di antemano rekonosé di igual kualifikashon, no un paso den loke ta deskonosí. E kreyentenan a hasi orashon tambe na Dios, keriendo ku e resultado lo a reflehá Su boluntat (kompará ku Prov. 16:33). No tin evidensia ku e desishon a yega di ser desafiá. Despues di Pentekòste, e tiramentu di lòt no tabata nesesario mas debí na e guiansa direkto di e Spiritu (Echonan 5:3, 11:15-18, 13:2, 16:6-9).

Djabièrnè6 di yüli

Pa mas Estudio:

“Henter e periodo intermedio entre Pentekòste i e Parousia [Segundo Binida] (sea largu òf kòrtiku) mester ser yená ku e mishon mundial di e iglesia den poder di e Spiritu. E siguidónan di Kristu mester anunsiá tantu loke E a logra na Su promé binida komo konvoká hende pa arepentí i kere den preparashon pa Su segundo binida. Nan mester tabata Su testigunan ‘te na e último partinan di tera’ ([Echonan] 1:8) i ‘te na fin di e siglo.’ . . . Nos no tin libertat pa stòp te ora tur dos punto a ser alkansá.”—John R. W. Stott, The Message of Acts: The Spirit, the Church & the World (Downers Grove: InterVarsity, 1990), p. 44.

“E mandato di e Salbador na e disipelnan tabata inkluí tur e kreyentenan. E ta inkluí tur kreyentenan den Kristu te na e fin di tempu. Ta un eror fatal pa suponé ku e obra di salba almanan ta dependé solamente riba e pastor ordená. Tur na ken e inspirashon selestial a yega ta ser komprometé ku e evangelio. Tur ku risibí e bida di Kristu ta ser ordená pa traha pa salbashon di nan próhimo. Pa e obra aki e iglesia a ser establesé, i tur ku tuma riba nan mes su votonan sagrado ta ser komprometé dor di esei pa ta kolaboradornan ku Kristu.”—Ellen G. White, The Desire of Ages, p. 822.

Preguntanan di Diskushon:

pregunta 1Echonan 1:7 ta kòrda nos riba Marko 13:32: “Enkuanto di e dia òf e ora ei niun hende no sa, ni e angelnan den shelu, ni e Yu, ma solamente e Tata” (ESV). Ellen G. White ta bisa: “Nunka mas lo tin un mensahe pa e pueblo di Dios ku lo ta basá riba tempu.Nos no mester sa e tempu definitivo sea pa e dramamentu di Spiritu Santu òf pa e binida di Kristu.”—Selected Messages, vol. 1, p. 188. E ta añadí: “Kualke hende ku kuminsá proklamá un mensahe pa anunsiá e ora, dia, òf aña di e aparishon di Señor, a hisa un yugo i ta proklamando un mensahe ku Señor nunka a dun’é.”—Advent Review and Sabbath Herald, Sept. 12, 1893. Kiko ta e relevansia di deklarashonnan asina pa nos awe?

pregunta 2Un hende a yega di bisa: “Dios tin mester di testigunan mas ku abogadonan.” Kiko bo ta pensa di e deklarashon aki?

pregunta 3Kiko tabata e ròl di orashon den e iglesia primitivo? Ta un koinsidensia ku na kasi tur momentu desisivo den su bida, nos ta topa un referensia na orashon (Echonan 1:24; 8:14-17; 9:11, 12; 10:4, 9, 30; 13:2, 3)? Kiko ta e ròl di orashon den nos bida?