Lès 2 * 7-13 di yüli

Pentekòste

Sabat Atardi

Lesa pa e siman aki:

Echonan 2:1-4; Juan 14:16; Echonan 2:5-13; Joel 2:28-32; Echonan 2:22-39; Salmo 110:1-3.

Versíkulo di Memoria:

“E Hesus aki Dios a resusitá, i di esei nos tur ta testigu. Siendo pa e motibu ei eksaltá na man drechi di Dios, i despues di a risibí for di e Tata e promesa di Spiritu Santu, E a basha esaki ku boso tantu ta mira i tende” (Echonan 2:32, 33, NRSV).

“Pentekòste” ta bin for di e palabra pentēkostē, e nòmber Griego pa e Fiesta Hudiu di Simannan (Eks. 34:22); e ta konosí tambe komo e Fiesta di e Promé Frutanan (Num. 28:26). E palabra ta nifiká “di sinkuenta” i ta debe su uzo na e echo ku e fiesta tabata ser selebrá riba e di sinkuenta dia for di e ofrenda di e buhí di puspas riba e promé dia despues di Pasku. E tabata un dia di goso i gradisimentu, ora e pueblo di Dios tabata trese dilanti di Señor “e promé frutanan di e kosecha di trigo” (Eks. 34:22, NIV).

E fiesta e ora ei tabata bira un símbolo apropiá pa e promé kosecha spiritual di e iglesia Kristian, ora Spiritu Santu a ser dramá di forma mas abundante ku nunka promé, i tres mil hende a ser batisá riba un solo dia (Echonan 2:41). Despues di e asenshon di Hesus i Su halsamentu den shelu, e dramamentu di Spiritu aki tabata un evento sobrenatural i repentino, ku a transformá e apòstelnan di Galileonan simpel i deskonosí den hòmbernan di konvikshon i kurashi ku lo a kambia e mundu.

Pentekòste hopi biaha ta ser yamá e dia di nasimentu di iglesia, e momentu ku e siguidónan di Kristu, Hudiunan i (mas despues) Paganonan, tabata ser legitimá komo e komunidat nobo di Dios riba tera.

* Studia e lès di e siman aki pa prepará pa Sabat, 14 di yüli.

Djadumingu8 di yüli

E Binida di e Spiritu

Den obediensia riba e mandato di Hesus, e kreyentenan a warda na Yerusalèm pa e promesa di e Spiritu, i nan a warda den orashon ferviente, arepentimentu sinsero, i alabansa. Ora e dia a yega, nan “tur tabata huntu den un lugá” (Echonan 2;1, ESV), probablemente e mesun aposento haltu di Echonan 1. Pronto, sinembargo, nan lo a muda pa un área mas públiko (Echonan 2:6-13).

Lesa Echonan 2:1-3. Ki elementonan sobrenatural a kompañá e dramamentu di e Spiritu?



E esena tabata intenso. Promé tabatin un bochincha diripiente for di shelu manera gruñamentu di un tormento violento ku a yena henter e lugá, i despues loke tabata parse vlamnan di kandela a aparesé i a sosegá riba esnan ku tabata ei.

Den Skritura, bientu i kandela frekuentemente tabata ser asosiá ku un “teofania” òf un manifestashon divino (por ehèmpel, Eks. 3:2, 19:18, Deut. 4:15). Ademas, bientu i kandela tambe por ser uzá pa representá e Spiritu di Dios (Juan 3:8, Mat. 3:11). Den kaso di Pentekòste, loke sea ta e nifikashon presis di un fenómeno asina, nan tabata señalnan ku tabata introdusí un momentu úniko den historia di salbashon, e dramamentu primintí di e Spiritu.

E Spiritu semper tabata obrando. Su influensia riba e pueblo di Dios den tempunan di Tèstamènt Bieu hopi biaha tabata ser revelá den un forma notabel, ma nunka den su plenitut. “Durante e era patriarkal e influensia di Spiritu Santu hopi biaha a ser revelá den un forma notabel, pero nunka den su plenitut. Awor, den obediensia na e palabra di e Salbador, e disipelnan a ofresé nan súplikanan pa e don aki, i den shelu Kristu a añadí Su interseshon. E a reklamá e don di Spiritu, pa e por a dram’é riba Su pueblo.”—Ellen G. White, The Acts of the Apostles, p. 37.

Juan Boutista a predesí e boutismo ku e Spiritu dor di e Mesias benidero (Lukas 3:16; kompará ku Echonan 11:16), i Hesus Mes a referí na dje vários biaha (Lukas 24:49, Echonan 1:8). E dramamentu aki lo tabata Su promé akto di interseshon dilanti di Dios (Juan 14:16, 26; 15:26). Na Pentekòste e promesa a ser kumplí.

Ounke e boutismo di e Spiritu na Pentekòste tabata un evento úniko relashoná ku e viktoria di Hesus riba krus i Su glorifikashon den shelu, ser yená ku e Spiritu ta un eksperensia ku mester ser ripití kontinuamente den bida di e kreyentenan (Echonan 4:8, 31; 11:24; 13:9, 52; Efe. 5:18).

Djaluna9 di yüli

E Don di Lenga

Den Echonan 2:4 e don di e Spiritu tabata ser manifestá atraves di papiamentu den lenga. Sinembargo, e don aki tabata solamente un di e hopi diferente manifestashonnan di e Spiritu (Echonan 10:45, 46; 19:6). Otronan ta inkluí predikshon di futuro (Echonan 11:28), vishonnan (Echonan 7:55), diskurso inspirá (Echonan 2:8, 28:25), sanashon (Echonan 3:6, 12; 5:12, 16), i kualifikashon pa sirbishi (Echonan 6:3, 5).

E don di lenga na Pentekòste no a tuma lugá pa motibu ku e ta e evidensia típiko òf di mas importante di e dramamentu di e Spiritu. E tabata ser manifestá pa lansa e mishon mundial di e iglesia. Es desir, e yamada duná den Echonan 1:8 tabata rekerí e don di lenga. Si e apòstelnan mester a superá bareranan kultural i alkansá e finnan di tera ku e evangelio, nan mester tabata kapas di papia den e idiomanan di esnan ku mester a tende loke nan tabatin di bisa.

Lesa Echonan 2:5-12. Kiko ta e evidensia ku na Pentekòste e apòstelnan a papia den idiomanan strañero eksistente?



No tin duda ku mayoria di esnan ku a kombertí na Pentekòste tabata Hudiunan di vários tera ku awor por a tende e evangelio den nan propio idioma nativo. Ku e apòstelnan tabata papia den idiomanan strañero eksistente, mas bien ku den idiomanan eksaltá deskonosí, ta ser hasí evidente dor di e término dialektos (Echonan 2:6, 8), kua ta nifiká idioma di un nashon òf un region (kompará ku Echonan 21:40, 22:2, 26:14). Klaramente, anto, nan tabata papia den e diferente idiomanan aki. E milager tabata ku Galileonan simpel awor por a papia un idioma ku, asta oranan promé, nan no tabata konosé. Pa e Hudiunan lokal ei ku a testiguá e esena pero no tabata konosí ku e idiomanan aki, e úniko posibel splikashon tabata ku e apòstelnan tabata burachi, sakando zonidunan straño ku no tabatin sentido pa nan. “Algun, sinembargo, a hasi chèrchi di nan i a bisa: ‘Nan a bebe muchu biña’ ” (Echonan 2:13, IV).

Djamars10 di yüli

E Sermon di Pedro

E akusashon di buracheria a duna Pedro e oportunidat pa splika kiko tabata pasando. Den su diskurso, e apòstel a mustrá promé na Skritura (Echonan 2:16-21), deskribiendo e dramamentu di e Spiritu komo kumplimentu di profesia.

Kompará Echonan 2:17 ku Joel 2:28. Kon Pedro a komprondé e tempu di kumplimentu di e profesia di Joel?



E profesia di Joel tabata tokante e futuro era di salbashon (Joel 2:23), kua lo mester ser karakterisá pa vários señalnan den e mundu natural i un dramamentu generoso di e Spiritu (Joel 2:28-31). Dor di interpretá e evento di Pentekòste den lus di un profesia asina, Pedro a purba enfatisá e relevansia históriko di e momentu ei. Pero tin un diferensia importante den e forma ku e ta sita Joel. Na lugá di e “despues” introduktorio di Joel (Joel 2:28), Kua a mustra di forma basta general na e futuro, Pedro a bisa: “den e último dianan” (Echonan 2:17), indikando ku e akto final den e gran drama di salbashon a kaba di kuminsá. Esaki no ta, naturalmente, un deskripshon kompletu di eventonan di último dianan, ma un evidensia den e sentido di mas haltu di urgensia ku tabata distinguí e iglesia primitivo. Nan no tabata sa ki ora e fin lo a yega pero tabata konvensí ku no tabata falta muchu.

Lesa Echonan 2:22-32. Kiko tabata e punto prinsipal den e presentashon ku Pedro a hasi di e evangelio?



Despues di a resaltá e importansia profétiko di Pentekòste, Pedro a bira na e eventonan resien di e bida, morto, i resurekshon di Hesus. Ta e resurekshon, sinembargo, ku a risibí mas énfasis, ya ku e tabata representá e faktor desisivo den e storia di e evangelio. Pa Pedro, e resurekshon tabata e vindikashon final di Hesus (Echonan 2:22, 27), i e a sita Skritura pa yuda ekspresá su punto tokante nifikashon di e resurekshon.

Pasobra Hesus tabata e Mesias, E no por a ser detené dor di morto. Asina, pa Pedro i pa tur e eskritornan di Tèstamènt Nobo, e resurekshon di Hesus a bira evidensia poderoso, no solamente di Hesus komo e Mesias sino pa henter e mensahe Kristian di salbashon.

Djarason11 di yüli

E Halsamentu di Hesus

“P’esei siendo halsá na e man drechi di Dios, i a risibí di e Tata e promesa di Spiritu Santu, e a dramá esaki, kua boso ta mira i tende awor” (Echonan 2:33).

Den e di tres parti di e diskurso, Pedro a bai bèk na e asuntu di lenga, kua a atraé e hendenan na promé lugá. Na lugá di ta burachi, kua lo tabata straño nueb’or di mainta (Echonan 2:15), e kreyentenan tabata papiando den lenga pasobra Spiritu Santu a kaba di ser dramá for di shelu.

Lesa Echonan 2:33-36. Kiko ta e konekshon entre e Halsamentu di Hesus na man drechi di Dios i e dramamentu di e Spiritu?



E man drechi di Dios ta un posishon di outoridat (Salmo 110:1-3). E argumento di Pedro, kua e a basa riba Skritura, ta ku tabata pa motibu ku Hesus a ser halsá na un posishon asina den shelu ku E a drama e Spiritu riba Su siguidónan. E halsamentu no a duna Hesus un status ku E no tabatin promé (Juan 1:1-3, 17:5). En kambio, e tabata representá e rekonosementu supremo di e Tata di Su derecho eksklusivo komo Señor i Salbador (Echonan 2:36).

E evento aki en realidat ta hiba nos na un di e temanan di mas importante den Skritura: e konflikto kósmiko entre bon i malu. E punto ta ku e Spiritu no por a bin totalmente si Hesus no a ser halsá (Juan 7:39), i Hesus lo no a ser halsá si E no a triunfá riba e krus (Juan 17:4, 5). Den otro palabra, e halsamentu di Hesus tabata e kondishon pa e binida di e Spiritu pasobra e tabata nifiká e aprobashon di Dios di e logronan di Hesus riba krus, inkluyendo e derota di esun ku a tuma e dominio di e mundu aki over (Juan 12:;31).

E entrada di piká den mundu a tira un sombra riba Dios. E morto di Hesus tabata nesesario, no solamente pa redimí sernan humano sino tambe pa vindiká Dios i eksponé Satanas komo un gañadó. Den e ministerio di Hesus, e era di salbashon ya tabata andando (Lukas 4:18-21). Ora E tabata saka demoñonan òf pordoná pikánan, E tabata liberá e koutivonan di Satanas. Sinembargo, tabata e Krus ku lo a dun’E outoridat total pa hasi esei. Asina, ora e outo-sakrifisio di Kristu a ser outentiká den shelu, Satanas a risibí un sla desisivo, i e Spiritu tabata ser dramá pa prepará un pueblo pa e binida di Kristu.

Djaweps12 di yüli

E Promé Frutanan

E oyentenan di Pedro a ser kòrtá te den nan kurason pa su palabranan. Algun di nan kisas por tabata entre esnan ku a pidi e krusifikashon di Hesus algun siman promé (Lukas 23:13-25). Pero awor, persuadí ku Hesus di Názarèt tabata enbèrdat e Mesias apuntá di Dios, nan a sklama ku tristesa: “Kiko nos lo hasi?” (Echonan 2:37).

Lesa Echonan 2:38. Kiko ta e dos rekerimentunan básiko pa pordon?



For di tempu di Juan Boutista arepentimentu tabata ser asosiá ku boutismo (Marko 1:4). Es desir, boutismo a bira un ekspreshon di arepentimentu, un rito ku ta simbolisá e labamentu di piká i e regenerashon moral produsí pa Spiritu Santu (Echonan 2:38, 22:16; kompará ku Tito 3:5-7).

Lesa Echonan 2:38, 39. Ki promesa spesial ta ser duná na esnan ku arepentí i ser batisá?



E hendenan na Pentekòste a ser ofresé no solamente pordon di piká sino tambe e plenitut di e Spiritu pa kresementu personal, pa sirbishi den iglesia, i spesialmente pa mishon. Esaki tabata kisas e bendishon di mas grandi di tur, pasobra e motibu prinsipal ku e iglesia ta eksistí ta pa kompartí e bon nobo di salbashon (1 Pe. 2:9). Asina for di e momentu aki en adelante, nan lo tabatin siguransa di salbashon i e poder di Spiritu Santu, ku lo a kapasitá nan pa e mishon na kua e iglesia a ser yamá.

Djabièrnè13 di yüli

Pa mas Estudio:

E dramamentu di Spiritu Santu na Pentekòste a revelá un bèrdat krusial tokante loke a sosodé den shelu i tokante kon Dios Tata a aseptá e sakrifisio di Kristu pa e pikánan di mundu. E dramamentu di e Spiritu a mustra tambe ku e obra di Kristu den shelu na nos fabor, basá riba Su sakrifisio riba tera, awor a ser inougurá. E eventonan asombroso aki ta mas manifestashonnan di e bèrdat maravioso ku shelu i tera ta konektá den formanan ku nos no por komprondé awor.

“E asenshon di Kristu na shelu tabata e señal ku Su siguidónan tabata bai risibí e bendishon primintí. . . . Ora Kristu a pasa dor di e portanan selestial, E a ser poné riba trono meimei di e adorashon di e angelnan. Tan pronto ku e seremonia aki a ser kompletá, Spiritu Santu a baha riba e disipelnan den korientenan riku, i Kristu a ser berdaderamente glorifiká, asta ku e gloria ku E tabatin ku e Tata for di tur eternidat. E dramamentu Pentekostal tabata e komunikashon di shelu ku e inougurashon di e Redentor a ser kumplí. Di akuerdo ku Su promesa E a manda Spiritu Santu for di shelu na Su siguidónan komo un prueba ku E, komo saserdote i rei, a risibí tur outoridat den shelu i riba tera, i tabata Esun Ungí riba Su pueblo.”—Ellen G. White, The Acts of the Apostles, pp. 38, 39.

Preguntanan di Diskushon:

pregunta 1Kiko di Pentekòste e iglesia por spera di eksperensiá den su bida awe? Kiko ta ser ripití, i kiko no?

pregunta 2Meditá mas riba e echo ku Pedro a hasi e resurekshon di Hesus un parti asina importante di su mensahe di Pentekòste. Loke a hasi e resurekshon ainda mas sorprendente ta ku loke sea kua espektativanan Mesiániko Hudiu tabata eksistí den e tempu ei, niun hende tabata spera ku un Mesias lo a resusitá for di morto. Esei no tabata riba e radar spiritual di ningun hende; esei no tabata loke esnan ku tabata spera e binida di e Mesias a antisipá. Ki lèsnan nos por siña for di esaki tokante kon nos mester sa kiko Beibel ta siña, kontrali na loke sea e siñansanan popular di mas resien ta?

pregunta 3Echonan 2:38 a papia tokante e nesesidat di boutismo. Esaki ta nifiká ku kualke hende ku tabata kere den Hesus pero a muri promé di a ser batisá mester, nesesariamente, bai pèrdí? Hustifiká bo kontesta.