Lès 3 * 14-20 di yüli

Bida den e Iglesia Primitivo

Sabat Atardi

Lesa pa e siman aki:

Echonan 2:42-46; Echonan 4:34, 35; Echonan 3:1-26; Echonan 4:1-18; Echonan 5:1-11; Echonan 5:34-39.

Versíkulo di Memoria:

“Tur dia nan tabata sigui reuní huntu den e kortenan di tèmpel. Nan tabata kibra pan den nan kasnan i tabata kome huntu ku kurasonnan kontentu i sinsero, alabando Dios i gosando di e fabor di henter e pueblo”(Echonan 2:46, 47, NIV).

E sentido di urgensia di e iglesia primitivo no por tabata mas fuerte. E forma kon Hesus a kontestá e pregunta enkuanto di e establesimentu di e reino Mesiániko, lagando e kuestion di tempu habrí (Echonan 1:6-8), por a ser interpretá komo ku tur kos tabata dependé riba e binida di e Spiritu i e kulminashon di e mishon apostóliko. Asina, ora Pentekòste a yega, e promé kreyentenan a pensa ku tur kos a ser kumplí: nan a risibí e Spiritu i a kompartí e evangelio ku henter mundu. No ku e apòstelnan a bandoná Yerusalèm i a sali bai den mundu, sino e mundu a bin serka nan (Echonan 2:5-11).

Loke a sosodé despues tabata ku e iglesia a lòs for di biennan material. Sintiendo ku tempu tabata kòrtiku, nan a bende tur loke nan tabatin i a dediká nan mes na siñamentu i na kompañerismo miéntras nan tabata sigui testifiká tokante Hesus, ma solamente den Yerusalèm. E bida komunitario ku nan a desaroyá, ounke e tabata efektivo den yuda esnan pober, pronto a bira un problema, i Dios mester a intervení pa mantené e iglesia uní. Esaki tabata tambe e tempu ku nan a kuminsá haña nan mes ta afrontá oposishon. Sinembargo, meimei di tur esei, nan fe a keda firme.

* Studia e lès di e siman aki pa prepará pa Sabat, 121 di yüli.

Djadumingu15 di yüli

Siñamentu i Kompañerismo

Despues di Pentekòste, Lukas a kambia e narativo pa un deskripshon general di e bida interno di e iglesia na Yerusalèm. “I nan a sigui firme den e doktrina di e apòstelnan i kompañerismo, den kibramentu di pan, i den orashon” (Echonan 2:42, NKJV). E kuater puntonan notá parse di ta básikamente siñamentu i kompañerismo. Di akuerdo ku versíkulo 46, e siñamentu tabata ser ehersé den tèmpel, miéntras e kompañerismo tabata den kasnan privá.

E korte di tèmpel tabata rondoná pa pòrchnan tapá ku tabata ser uzá frekuentemente pa instrukshon rabíniko. Ku e kreyentenan tabata dediká nan mes na e siñamentu di e apòstelnan ta mustra ku e don di e Spiritu no a hiba nan na un religion kontemplativo ma na un proseso di siñamentu intenso bou di e apòstelnan, kende nan siñansa outoritativo tabata ser outentiká pa maravianan i señalnan (Echonan 2:43).

Kompañerismo spiritual tabata un otro marka distintivo di piedat Kristian primitivo. E kreyentenan tabata konstantemente huntu, no solamente den tèmpel ma tambe den nan hogarnan, kaminda nan tabata kompartí kuminda, tabata selebrá e Sena di Señor, i tabata hasi orashon (Echonan 2:42, 46). Dor di tin selebrashonnan diario asina, e Kristiannan primitivo tabata ekspresá nan speransa den e pronto regreso di Hesus, ora nan kompañerismo kunE lo a ser restorá den e reino Mesiániko (Mar. 26:29).

Hogarnan privá tabata hunga un ròl klave den bida di e iglesia primitivo. E kreyentenan ainda tabata asistí na e seremonianan diario di e tèmpel (Echonan 3:1), i riba e Sabatnan nan tabata probablemente den e sinagoganan huntu ku nan rumannan Hudiu (Santiago 2:2), pero e elementonan distintivo di deboshon Kristian tabata ser ehersé den e hogarnan.

Lesa Echonan 2:44, 45; 4:34, 35. Kiko tabata un aspekto importante di kompañerismo Kristian primitivo?



Komo ku nan tabata kere ku e fin tabata serka, nan a disidí ku nan poseshonnan material, “propiedat privá” (pa uza un término mas aktualisá), no tabata dje importante ei mas. Un uzo komun di nan rekursonan material, pa e motibu ei, tabata parse apropiá. No tabatin motibu pa preokupá tokante mayan, komo ku e Mesias Mes lo a proveé pa nan nesesidatnan den e reino Mesiániko (Lukas 22:29, 30). E uzo kompartí aki a permití nan eksperensiá un sentido di unidat mas profundo, ademas di a bira un ehèmpel ekstraordinario di generosidat Kristian.

Djaluna16 di yüli

Kurashon di un Hòmber Lam

Den Echonan 3:1 Pedro i Juan a bai na e tèmpel pa e sirbishi di orashon di 3’or. Esaki ta indiká e karakter básikamente Hudiu di e fe di e iglesia den e periodo trempan aki. Es desir, e apòstelnan no a bai na e tèmpel solamente pa instruí òf haña konbersonan nobo pero pasobra Pedro i Juan tabata Hudiu ainda i, komo tal, ainda tabata komprometé na tradishonnan religioso Hudiu (Echonan 20:16, 21:17-26), a lo ménos te na e punto aki. Ei nan a realisá un milager asombroso (Echonan 3:1-10), kua a duna Pedro e oportunidat pa prediká un sermon mas.

Lesa Echonan 3:12-26. Kiko ta algun di e énfasisnan prinsipal di Pedro den su sermon?



Sinku punto prinsipal tabata karakterisá e predikashon Kristian primitivo: Hesus tabata e Mesias ku a sufri (Echonan 3:18); Dios a resusit’E (Echonan 3:15); Hesus a ser halsá den shelu (Echonan 3:13); E lo bin atrobe (Echonan 3:20); i arepentimentu ta nesesario pa pordon di piká (Echonan 3:19).

Den hopi forma, esaki ta e mesun mensahe ku nos ta hibando na e mundu, ounke e konteksto a kambia. E apòstelnan tabata ainda den un konteksto Hudiu, ora na lugá di kambia religion e pueblo básikamente mester a “migra” for di e pakto bieu na esun nobo. Komo parti di e pueblo di Dios, nan mester a aseptá e Mesias i eksperensiá e nasementu nobo ku ta sigui despues di un berdadero aseptashon di Hesus.

Aktualmente, ounke e situashon ta diferente, e mensahe ainda ta básikamente meskos: Kristu a muri pa nos pikánan, a ser resusitá, i E lo regresá. Esaki ta nifiká, anto, ku nos por haña salbashon den djE. Asta den konteksto di e mensahenan di e tres angelnan di Revelashon 14, Hesukristu krusifiká, Hesukristu resusitá, i Hesukristu ku ta regresá mester ta e sentro di kon nos ta proklamá e mensahenan ei.

“Di tur esnan ku ta profesá di ta Kristian, Atventistanan di e di Shete Dia mester destaká den halsa Kristu dilanti di e mundu. E proklamashon di e mensahe di e di tres angel ta yama pa presentashon di e bèrdat di Sabat. E bèrdat aki, huntu ku otronan inkluí den e mensahe, mester ser proklamá; pero e gran sentro di atrakshon, Kristu Hesus, no mester ser lagá afó. Ta na e krus di Kristu ku miserikòrdia i bèrdat ta topa, i hustisia i pas ta sunchi otro. E pekador mester ser guiá pa wak na Kalvario; ku e simpel fe di un mucha chikitu e mester konfia den e méritonan di e Salbador, aseptando Su hustisia, i kere den Su miserikòrdia.”—Ellen G. White, Gospel Workers, p. 156, 157.

Djamars17 di yüli

E Surgimentu di Oposishon

No a dura muchu te ora e éksito di e iglesia a lanta oposishon di algun lider di Yerusalèm. E tèmpel di Yerusalèm tabata ser atministrá dor di e sumosaserdote i su kolaboradónan, di ken mayoria tabata Saduseo. E sumosaserdote tabata tambe presidente di e konsilio di Sanhedrin, kua den e dianan ei tabata konsistí den su mayoria di Saduseonan i Fariseonan. Pa motibu ku e Saduseonan no tabata kere den resurekshon, nan tabata sinti nan mes masha molestiá ku Pedro i Juan tabata siñando ku Hesus a ser resusitá for di morto. Arestá dor di e guardiannan di tèmpel, e apòstelnan a ser poné den kustodia te e siguiente dia, ora nan a ser tresé dilanti di e konsilio (Echonan 4:1-7).

Lesa Echonan 4:1-18. Ora nan a ser puntrá tokante ku ki outoridat nan tabata aktuando, kon Pedro a kontestá? Kiko tabata un mensahe skondí den loke Pedro a bisa ku e lidernan lo a haña asina menasante?



E desafio tokante outoridat plantiá dor di e lidernan Hudiu ta sugerí un preokupashon pa poder. Pedro, sinembargo, a deklará no solamente ku e milager a ser realisá den nòmber di Hesus ma tambe ku salbashon ta bin for di djE so. E apòstelnan tabata dilanti di e organismo Hudiu di mas haltu; sinembargo, nan tabata den servisio di un outoridat muchu mas haltu. E hòmbernan aki tabata piskadónan Galileo simpel i sin skol; pues, nan kurashi i elokuensia a shòk esnan ku tabata ei. Ounke e lidernan no a realisá esaki, e punto tabata ku e apòstelnan tabata yená ku Spiritu Santu, eksaktamente manera Hesus a predesí (Mat. 10:16-20).

Sin ta kapas di nenga e milager, e hòmber ku a ser kurá tambe tabata presente pa tur hende por a mir’é, e Sanhedrin a ordená e apòstelnan pa stòp di prediká. Nan tabatin miedu di tantu e mensahe komo e popularidat kresiente di e movementu. Ora nan no por a evaluá e evidensia korektamente, nan a permití prehuisio i deseo pa outo-protekshon dikta nan akshonnan.

E último palabranan di Pedro ta entre e tesoronan di mas presioso di e buki di Echonan: “Si ta korekto den bista di Dios pa skucha boso mas ku Dios, boso husga. Pasobra nos no por keda sin papia e kosnan ku nos a mira i a tende” (Echonan 4:19, 20, NKJV).

Djarason18 di yüli

Ananias i Safira

E kompartimentu di biennan den e iglesia primitivo no tabata obligatorio; es desir, e no tabata un kondishon formal di miembresia. Sinembargo, siguramente tabatin vários ehèmpel di generosidat boluntario ku a inspirá henter e komunidat. Un ehèmpel asina tabata Barnabas (Echonan 4:36, 37), ku lo hunga un ròl importante mas despues den e buki.

Sinembargo, tabatin tambe ehèmpelnan negativo ku a menasá e unidat di e iglesia for di paden, nèt na un momentu ora atakenan for di pafó a kaba di kuminsá.

Lesa Echonan 5:1-11. Kiko ta e lèsnan di e storia aki?



Ounke Lukas no a duna nos tur e detayenan, no tin duda ku e problema fundamental di Ananias i Safira no tabata e intento di keda ku e sèn ma e práktika di engaño denter di e komunidat. Nan piká no tabata resultado di un akto impulsivo ma di un plan kuidadosamente elaborá, un intento deliberá di “tèst e Spiritu di Señor” (Echonan 5:9, ESV). Nan no tabata bou di obligashon di bende nan propiedat i duna e sèn na iglesia. Pues, ora nan a komprometé nan mes pa hasi esei, kisas nan tabata aktuando den nan propio interes so, kisas asta purbando di gana influensia entre e rumannan ku loke tabata parse di ta un akto atmirabel di karidat.

E posibilidat aki por yuda splika dikon Dios a kastigá nan di forma asina severo. Asta si e bida komunitario di e iglesia tabata resultado di e konvikshon ku Hesus tabata na punto di bin, un akto manera esun di Ananias i Safira na un etapa asina trempan por a desakreditá e importansia di lealtat na Dios i bira un mal influensia meimei di e kreyentenan.E echo ku no ta ser menshoná ku Ananias a ser duná e chèns pa arepentí, manera den kaso di Safira (Echonan 5:8), por ta debí solamente na e echo ku e relato ta kòrtiku.

E esensia ta ku, for di prinsipio te na final, nan a aktua di forma pekaminoso, i piká ta un asuntu serio den bista di Dios (Ezek. 18:20, Rom. 6:23), asta si E no ta kastig’é semper inmediatamente. De echo, ku kastigu hopi biaha ta ser posponé mester kòrda nos konstantemente kon miserikòrdioso Dios ta (2 Pe. 3:9).

Djaweps19 di yüli

E di Dos Aresto

Si e apòstelnan por a ser uzá pa trese huisio di Dios riba piká, manera den e kaso di Ananias i Safira, nan por a ser uzá tambe pa trese e grasia di Dios riba pekadornan, Nan ministerio di kurashon poderoso (Echonan 5:12-16) tabata evidensia tangibel ku e Spiritu di Dios tabata obrando atraves di nan. Ku asta e sombra di Pedro, hende tabata kere, por a kura hende, ta asombroso. E paralelo di mas serka den e Evangelionan ta esun di un muhé ku a ser saná dor di mishi ku e bistí di Hesus (Lukas 8:43, 44). Lukas, sinembargo, no ta bisa ku e sombra di Pedro realmente tabatin poder kurativo ma ku e hendenan tabata kere esei. Sinembargo, asta si superstishon popular tabata enbolbí, Dios ainda lo a impartí Su grasia.

No opstante, mas e apòstelnan tabata ser yená ku e Spiritu, i señalnan i milagernan tabata ser multipliká, mas e lidernan religioso tabata ser yená ku yalusí. Esaki a hiba nan na arestá e apòstelnan pa di dos biaha (Echonan 5:17, 18). Tabata solamente despues di nan eskape milagroso (Echonan 5:19-24) i un otro diskurso heroiko dor di Pedro, enfatisando ku nan mester “obedesé Dios mas bien ku hende” (Echonan 5:29), ku algun di e outoridatnan a kuminsá konsiderá e posibilidat ku influensianan sobrenatural por tabata obra.

Lesa Echonan 5:34-39. Kon Gamaliel a purba deskurashá e Sanhedrin for di mata e apòstelnan?



E Sanhedrin tabata ser kontrolá dor di e Saduseonan, miéntras e Fariseonan tabata forma un minoria influyente. Gamaliel tabata un Fariseo i un dòkter di lei. E tabata ser respetá asina haltu entre e Hudiunan ku e a bira konosí komo “Rabban” (“nos maestro”), mas bien ku simplemente “Rabbi” (“mi maestro”). Pablo tabata un di su disipelnan (Echonan 22:3).

Gamaliel a rekordá dos otro movementu rebelde den historia resien di Israel ku tambe a atraé siguidónan i a kousa agitashon. E lidernan, sinembargo, a ser matá i nan siguidónan a ser plamá kompletamente. E lès ku e a saka tabata ku si e movementu Kristian tabata di orígen humano, e lo a disparsé pronto. Na otro banda, si e tabata un movementu divino, manera tabata ser bisá dor e apòstelnan, kon nan por a spera di resistié? E konseho di Gamaliel a prevalesé. E apòstelnan a ser kastigá i un biaha mas ordená pa no papia den nòmber di Hesus.

Djabièrnè20 di yüli

Pa mas Estudio:

“Nos ta mayordomonan, konfiá dor di nos Señor ousente ku e kuido di Su kas i Su interesnan, kua E a bin na e mundu aki pa sirbi. E a regresá na shelu, lagando nos na enkargo, i E ta spera pa nos vigilá i spera riba Su aparishon. Laga nos ta fiel na loke E a konfia nos, pa E no bin diripiente i haña nos na soño.”—Ellen G. White, Testimonies for the Church, tomo 8, p. 37.

“E hendenan mester ta impreshoná ku e santidat di nan votonan i promesanan na e kousa di Dios. Promesanan asina generalmente no ta ser konsiderá komo un pagaré di hende pa hende. Pero un promesa ta ménos sagrado i obligatorio pasobra e ta ser hasí na Dios? Pasobra e falta algun término tékniko, i no por ser fòrsá pa lei, e Kristian lo deskuidá e obligashon na kua e a duna su palabra? Ningun nota legal òf pagaré ta mas obligatorio ku un promesa hasí na e kousa di Dios.”—Ellen G. White Comments, The SDA Bible Commentary, vol. 6, p. 1056.

Preguntanan di Diskushon:

pregunta 1Entre hopi otro kos, Hesus a laga dos herensia inmediato pa e disipelnan: e espektativa di Su pronto regreso i un mishon mundial. Kon e dos faktornan aki mester impaktá nos sentido di mishon i e yamada pa prediká e evangelio na e mundu?

pregunta 2Un hende a yega di bisa: “Nos mester ta kla komo si fuera Hesus lo a bin awe, pero sigui traha [den e mishon di iglesia] komo si fuera lo a bai tuma un otro shen aña pa E bin.” Ki sabiduria ta ser hañá den opinion aki, i kon nos por aplik’é na nos yamada den bida?

pregunta 3Dikon e bida, morto, resurekshon, i regreso di Hesus mester ta sentral den tur kos ku nos ta prediká? Òf wak e di e forma aki: Ki sentido tin pa nos prediká sin e eventonan aki?

pregunta 4Kiko e storia di Ananias i Safira mester siña tokante kon difísil ta pa nos konosé e kurason di otronan, sea pa bon òf pa malu?

pregunta 5Ken ta algun Gamaliel di tempu moderno ku bo konosé? Òf, kisas, bo ta den posishon pa hunga e ròl ei pa otronan? Di kualke manera, papia den klas tokante tempunan i kompartí ehèmpelnan tokante kon e dunamentu òf risibimentu di konseho sabí a resultá bon. Ki lèsnan nos por siña for di e relatonan aki?