Lès 5 * 28 di yüli - 3 di ougùstùs

E Kombershon di Pablo

Sabat Atardi

Lesa pa e siman aki:

Echonan 26:9-11; Deut. 21:23; Echonan 9:1-20; 1 Kor. 9:1; Gal. 1:1; Echonan 9:20-30.

Versíkulo di Memoria:

“Bai! E hòmber aki ta mi instrumènt skohí pa proklamá Mi nòmber na e Paganonan i nan reinan i na e pueblo di Israel”(Echonan 9:15, NIV).

E kombershon di Soulo di Tarso (kende a bira Pablo) tabata un di e eventonan di mas remarkabel den historia di e iglesia apostóliko. E importansia di Pablo, sinembargo, ta bai muchu mas aya ku kombershon mes, pasobra Pablo siguramente no ta e úniko enemigu di e iglesia ku a bira un Kristian outéntiko. E asuntu, en kambio, ta relashoná ku kiko e a terminá hasiendo na fabor di e evangelio. Pablo tabata un oponente inkoregibel pa e promé kreyentenan, i e daño ku e por a hasi na e iglesia hóben tabata enorme. E tabatin tantu determinashon komo sosten ofisial pa destruí e iglesia. Sinembargo, e a respondé fielmente na e yamada di Dios riba e kaminda pa Damasko i a bira esun di mas grandi di e apòstelnan. “Di entre e persiguidónan di mas amargo i implakabel di e iglesia di Kristu, a lanta e defensor di mas kapas i e mensahero di mas eksitoso di e evangelio.”—Ellen G. White, Sketches from the Life of Paul, p. 9.

E akshonnan anterior di Pablo ora e tabata persiguí e iglesia primitivo semper lo a dun’é un sentido profundo di su propio indignidat, ounke e por a bisa ku un sintimentu ainda mas profundo di gratitut ku e grasia di Dios na dje no tabata enbano. Ku e kombershon di Pablo, Kristianismo a kambia pa semper.

* Studia e lès di e siman aki pa prepará pa Sabat, 4 di ougùstùs.

Djadumingu29 di yüli

Persiguidó di e Iglesia

Pablo tabata un Hudiu Helenista. Su lugá di nasementu tabata Tarso, kapital di Silisia (Echonan 21:39). No opstante, te na sierto punto, e a desviá for di e stereotipo Helenista, pasobra e a ser hibá Yerusalèm, kaminda e a studia bou di Gamaliel (Echonan 22:3), e maestro Fariseo di mas influensia di e époka. Komo Fariseo, Pablo tabata estriktamente òrtodòks, ounke su selo mas bien tabata fanatismo (Gal. 1:14). Ta pa e motibu aki e a hiba Esteban na su morto i a bira e figura klave den e persekushon konsekuente.

Lesa Echonan 26:9-11. Kon Pablo a deskribí su akshonnan kontra e iglesia?



Pablo ta bisa un kaminda ku e evangelio tabata un piedrá di trompeká pa e Hudiunan (1 Kor. 1:23). Ademas di e echo ku Hesus no a korespondé na e espektativa Hudiu di un Mesias real, di ningun manera nan por a aseptá e idea ku Esun ku a muri riba un krus por tabata e Mesias di Dios, pasobra Skritura ta bisa ku kualke hende ku ser kologá ta bou di maldishon di Dios (Deut. 21:23). Pa e Hudiunan, por lo tantu, e krusifikashon tabata den su mes un kontradikshon monstruoso, e evidensia di mas kla ku e afirmashonnan di e iglesia tokante Hesus tabata falsu.

Echonan 9:1, 2 ta mustrá Soulo di Tarso den akshon kontra kreyentenan. Damasko tabata un stat importante masoménos shentitrinta i sinku mia nort di Yerusalèm, i e tabatin un poblashon Hudiu grandi. E Hudiunan ku tabata biba pafó di Hudea tabata organisá den un tipo di ret, kua su sede tabata na Yerusalèm (e Sanhedrin), ku e sinagoganan ku tabata funshoná komo sentronan di apoyo pa e komunidatnan lokal. Tabatin komunikashon konstante entre e Sanhedrin i e komunidatnan atraves di kartanan ku normalmente tabata ser hibá dor di un shalia?, “un ku ta ser mandá” (for di e Hebreo shala?, “manda”). Un shalia? tabata un agente ofisial nombrá dor di e Sanhedrin pa realisá vários funshonnan religoso.

Ora Pablo a pidi e sumosaserdote, presidente di e Sanhedrin, pa kartanan dirigí na e sinagoganan na Damasko, e a bira un shalia?, ku outoridat pa arestá kualke siguidó di Hesus i trese nan Yerusalèm (kompará ku Echonan 26:12). Na Griego, e ekivalente na shalia? ta apostolos, for di kua e palabra apòstel ta derivá. Pues, promé di tabata un apòstel di Hesukristu, Pablo tabata un apòstel di e Sanhedrin.

Djaluna30 di yüli

Riba e Kaminda pa Damasko

Lesa Echonan 9:3-9. Kiko a sosodé ora Pablo tabata yegando Damasko? Kiko ta nifikashon di e palabranan di Hesus den Echonan 9:5 (lesa tambe Echonan 26:14)?



Ora Pablo i su kompañeronan tabata yegando Damasko, algu inesperá a sosodé: masoménos mèrdia nan a eksperensiá un lus intensamente briante for di shelu i un bos ku tabata papia. Esaki no tabata solamente un vishon den sentido profétiko ma un manifestashon divino, dirigí eksklusivamente na Pablo. Su kompañeronan a mira e lus; sinembargo, solamente Pablo a keda siegu; nan a tende e bos; sinembargo, solamente Pablo a komprond’é. E lus tabata e gloria divino di e Hesus resusitá, kende personalmente a aparesé na Pablo na e momentu ei (Echonan 22:14). Na un otro kaminda Pablo ta insistí ku e a mira Hesus, lokual a hasié igual na e Diesdos komo un testigu di Su resurekshon i outoridat apostóliko (1 Kor. 9:1, 15:8).

E diálogo ku a sigui ku Hesus a dal Pablo infinitamente mas ku e lus mes. Pablo tabata apsolutamente konvensí ku, dor di ataká e siguidónan di Hesus di Názarèt, E tabata hasiendo e obra di Dios di purifiká Hudaismo for di e herehia peligroso i teribel ei. Pa su konsternashon, sinembargo, e a siña no solamente ku Hesus tabata bibu ma tambe ku dor di imponé sufrimentu riba Su kreyentenan, e tabata atakando Hesus Mes.

Ora E tabata papiando ku Soulo, Hesus a uza un dicho proverbial, supuestamente di orígen Griego, ku Pablo siguramente tabata konosé: “Ta duru pa skòp kontra e puntanan di heru” (Echonan 26:14, NKJV). E imágen ta esun di un buey ku ta purba move kontra e palu skèrpi ku ta ser uzá pa gui’é. Ora esei sosodé e animal solamente ta lastimá su mes mas ainda.

E dicho aki por indiká un lucha den mente di Pablo, Beibel ta referí na esaki komo e obra di e Spiritu (Juan 16:8-11), ku por a bai bèk na loke a sosodé ku Esteban. “Soulo a tuma un parti prominente den e huisio i konvikshon di Esteban, i e evidensianan impreshonante di e presensia di Dios huntu ku e mártir a hiba Soulo na duda di e hustisia di e kousa ku e tabata defendé kontra e siguidónan di Hesus. Su mente tabata profundamente impreshoná. Den su konfushon e a apelá na esnan den ken su sabiduria i huisio e tabatin pleno konfiansa. E argumentunan di e saserdotenan i gobernantenan finalmente a konvens’é ku Esteban tabata un blasfemadó, ku e Kristu ku e disipel martirisá a prediká tabata un mentiroso, i esnan ku tabata ministrá den kargo sagrado mester tabatin rason.”—Ellen G. White, The Acts of the Apostles, pp. 112, 113.

Djamars31 di yüli

E Bishita di Ananias

Ora e a realisá ku e tabata papiando ku Hesus Mes, Soulo a hasi e pregunta ku lo a duna Hesus e oportunidat ku E tabata buskando: “Kiko lo mi hasi, Señor?” (Echonan 22:10, NKJV). E pregunta ta indiká kontrishon den bista di su akshonnan te na e momentu ei, pero mas importante ainda, e ta ekspresá un boluntat inkondishonal pa laga Hesus guia su bida di ei en adelante. Hibá na Damasko, Soulo mester a warda riba mas instrukshon.

Den Echonan 9:10-19 Beibel ta revelá kon Señor tabata obrando pa prepará Soulo di Tarso pa su bida nobo komo apòstel Pablo. Den un vishon Hesus a duna Ananias e mishon pa bishitá Soulo i pone su mannan riba dje pa restorashon di su bista. Ananias, sinembargo, tabata sa kaba ken Soulo tabata, i tambe kuantu di e rumannan a sufri i asta a pèrdè nan bida pa su motibu. E tabata tambe bon informá di e motibu pa kua Soulo tabata na Damasko, i asina, siguramente, e no tabata ke a bira e promé víktima di Soulo aya. Su basilashon tabata komprendibel.

Sinembargo, loke Ananias no tabata sa tabata ku Soulo a kaba di tin un enkuentro personal ku Hesus ku a kambia su bida pa semper. E no tabata sa ku, na lugá di sigui traha pa e Sanhedrin, Soulo, pa asombro di Ananias, a kaba di ser yamá dor di Hesus pa traha p’E, kua ta nifiká ku Soulo ya no tabata un apòstel di e Sanhedrin ma e instrumènt skohí di Hesus pa hiba e evangelio na tantu Hudiu komo Pagano.

Lesa Galationan 1:1, 11, 12. Ki afirmashon spesial Pablo ta hasi pa loke ta trata su ministerio apostóliko?



Den Galationan, Pablo ta insistí ku e a risibí su mensahe i su apostolado direktamente for di Hesukristu, no for di kualke fuente humano. Esaki no nesesariamente ta kontradesí e papel desempeñá pa Ananias den su yamada. Ora e a bishit’é, Ananias a solamente konfirmá e mandato ku Soulo ya a risibí riba kaminda di Damasko for di Hesus Mes.

De echo, e kambio den bida di Soulo tabata asina dramátiko ku ningun kousa humano por ser asigná na dje. Solamente intervenshon divino por splika kon e oponente di mas fanátiko di Hesus diripiente por a bras’E komo Salbador i Señor, lagando tur kos—konvikshonnan , reputashon, karera—atras, i bira Su apòstel di mas deboto i produktivo.

Djarason1 di ougùstùs

E Komienso di e Ministerio di Pablo

Echonan 9:19-25 ta duna e impreshon ku despues di su kombershon, Pablo a keda na Damasko pa un tempu promé ku e a regresá Yerusalèm (Echonan 9:26). Den Galationan 1:17, sinembargo, Pablo ta añadí ku, promé di a bai Yerusalèm, e a bai Arabia, kaminda aparentemente e a biba den isolashon pa un sierto periodo. “Aki, den soledat di e desierto, Pablo tabatin amplio oportunidat pa studia i meditá den kietut.”—Ellen G. White, The Acts of the Apostles, p. 125.

Lesa Echonan 9:20-25. Kon Lukas ta deskribí e ministerio di Pablo na Damasko? Kon bon a bai?



E ophetivo original di Pablo ora e a sali for di Yerusalèm ku kartanan di e sumosaserdote tabata e kreyentenan Hudiu ku probablemente a buska refugio den e sinagoganan di Damasko (Echonan 9:2). Awor, despues di a bin bèk for di Arabia, e a yega finalmente na e sinagoganan, no pa arestá kreyentenan ma pa oumentá nan kantidat; no pa kalumniá Hesus komo un mentiroso ma pa present’E komo e Mesias di Israel. Kiko mester a pasa den mente di esnan ku, ora nan tabata tende di dje solamente komo un di nan persiguidónan, awor ta tend’é testifiká tokante Hesus? Kiko nan por a hasi sino ku maraviá pa loke Soulo di Tarso a bira i na loke e tabata hasiendo pa e iglesia? (Probablemente nan no tabatin niun idea di e influensia ku e konverso nobo aki lo tabatin finalmente!)

No kapas di kontradesí Pablo, algun di su oponentenan a konspirá pa kita su bida. E relato di Pablo di e episodio (2 Kor. 11:32, 33) ta sugerí ku su oponentenan a denunsi’é na e outoridatnan lokal pa logra nan intento. Sinembargo, ku yudansa di e kreyentenan, Pablo por a skapa den un makutu, posiblemente dor di e bentana di un kas konstruí riba muraya di e stat.

Pablo tabata sa for di komienso ku e lo a afrontá desafionan (Echonan 9:16). Oposishon, persekushon, i sufrimentu for di vários fuente lo tabata un konstante den su ministerio, pero nada lo a sagudí su fe òf sentido di deber, apesar di e difikultatnan i pruebanan ku e tabata afrontá práktikamente na kada paso den su bida nobo den Kristu (2 Kor. 4:8, 9).

Djaweps2 di ougùstùs

Regreso na Yerusalèm

Despues di a skapa for di Damasko, Pablo a regresá Yerusalèm pa promé biaha for di dia e a bai komo un persiguidó. Esaki a sosodé tres aña despues di su kombershon (Gal. 1:18). No tabata un regreso fásil, komo ku e tabata afrontá problemanan tantu paden komo pafó di iglesia.

Lesa Echonan 9:26-30. Kiko a sosodé ku Pablo ora e a yega Yerusalèm?



Na Yerusalèm Pablo a purba uni ku e apòstelnan. Ounke pa e momentu ei ya e tabata un Kristian pa tres aña, e notisia di su kombershon a zona asina inkreibel ku e apòstelnan, meskos ku Ananias promé ku nan, tabata mas bien skèptiko. Nan tabatin miedu ku e tabata solamente parti di un trampa kuidadosamente elaborá. Tabata Barnabas, un Levita di Cipre (Echonan 4:36, 37), pues un Helenista, ku a kibra e resistensia di e apòstelnan i a introdusí Pablo na nan. Nan tambe mester a maraviá pa loke Dios a hasi ku Pablo; es desir, unabes nan a realisá ku e tabata sinsero.

Un resistensia asina, sinembargo, nunka lo a disparsé kompletamente, si no tabata pa motibu di e akshonnan di pasado di Pablo ora e tabata persiguí e iglesia, sino a lo ménos pa motibu di e evangelio ku e tabata prediká. Manera den kaso di Esteban, e kreyentenan di Hudea, inkluyendo e apòstelnan, tabata bastante slo pa komprondé e alkanse universal di e fe Kristian, un fe no basá mas riba e sistema seremonial di Tèstamènt Bieu, spesialmente den e sistema di sakrifisio, ku a pèrdè su balides ku e morto di Hesus riba krus. E sírkulo di relashon di mas será denter di e iglesia na Hudea semper lo tabata e kreyentenan Helenista: ademas di Barnabas mes, e tabata inkluí Felipe, un di e Shete (Echonan 21:8), i Mnason, tambe di Cipre (Echonan 21:16). Vários aña mas despues, e lidernan di iglesia di Yerusalèm ainda lo tabata akusá Pablo di ta prediká básikamente e mesun doktrina ku Esteban a prediká anteriormente (Echonan 21:21).

Durante e diessinku dianan ku e a keda na Yerusalèm (Gal. 1:18), Pablo aparentemente a disidí di kompartí e evangelio ku e mesun Hudiunan no-kreyente ku e a insitá konta Esteban algun tempu promé. Manera ku Esteban, sinembargo, su esfuersonan a topa oposishon fuerte, representando un menasa pa su propio bida. Denun vishon, Hesus a bis’é pa bandoná Yerusalèm pa su propio siguridat (Echonan 22:17-21). Ku yudansa di e rumannan e a baha bai na e stat portuario di Cesarea i for di ei na su siudat natal Silisia, kaminda e lo a keda pa vários aña promé di kuminsá su biahenan mishonero.

Djabièrnè3 di ougùstùs

Pa mas Estudio:

“Un morto general den bataya ta pèrdida pa su ehérsito, pero su morto no ta duna forsa adishonal na e enemigu. Pero ora un hòmber prominente ta uni su mes ku e forsa opuesto, no solamente su servisionan ta bai pèrdí, pero esnan na ken e ta uni su mes ta haña un bentaha disidí. Soulo di Tarso, riba su kaminda pa Damasko, fásilmente por a ser matá dor di Señor, i hopi forsa por a ser saká for di e poder persiguidó. Pero Dios den Su providensia no solamente a spar bida di Soulo, sino a konbertié, i asina a transferí un kampion di e banda di e enemigu na e banda di Kristu.”—Ellen G. White, The Acts of the Apostles, p. 124.

“Kristu a ordená Su disipelnan pa bai i konta tur nashon; pero e siñansanan anterior ku nan a risibiÉ for di e Hudiunan a hasié difísil pa nan komprondé e palabranan di nan Maestro kompletamente, i pa e motibu ei nan tabata slo pa aktua riba nan. Nan tabata yama nan mes e yunan di Abraham, i tabata konsiderá nan mes komo e erederonan di promesa divino. No tabata te vários aña despues di e asenshon di Señor ku nan mente tabata sufisientemente ekspandé pa komprondé klaramente e intenshon di e palabranan di Kristu, ku nan mester a traha pa kombershon di e Paganonan komo tambe di e Hudiunan.”—Ellen G. White, Sketches From the Life of Paul, p. 38.

Preguntanan di Diskushon:

pregunta 1Meditá mas riba e pregunta di Hesus na Pablo riba e kaminda di Damasko: “Dikon bo ta persiguí Mi?” (Echonan 9:4, NRSV). Pa Pablo, e pregunta aki tabata un indikashon ku Hesus di Názarèt enbèrdat a ser resusitá for di morto. Pero, mas ku esei, e tabata un indikashon tambe di e identifikashon spiritual ku ta eksistí entre Hesus i Su iglesia (lesa tambe Mat. 25:34-45). E implikashon ta opvio: kualke daño hasí na e iglesia ta daño hasí na Hesus Mes. Den términonan práktiko, kiko esaki ta nifiká pa nos awe?

pregunta 2Testifiká pa Hesus ta enbolbí sufrimentu pa Hesus. No ta pa kasualidat ku e palabra Griego “testigu” (martys) a bin ta ser asosiá ku “martirio”. Kiko ta nifiká pa sufri pa Hesus?

pregunta 3Tin un dicho bieu na Latin ku ta bisa: Credo ut intelligam, kua ta nifiká: “Mi ta kere pa mi por komprondé.” Kon e idea aki ta yuda nos komprondé kiko a sosodé ku Soulo di Tarso? Es desir, promé ku su kombershon, promé ku Pablo a bira un kreyente den Hesus, e no tabata komprondé. Unikamente despues di su eksperiensia e tabata kaspas di komprondé. Ki lès nos por saka for di esaki pa e momentunan ora nos por haña nos mes frustrá ku esnan ku no ta kere den bèrdatnan ku ta parse asina kla pa nos?