Lès 6 * 4-10 di ougùstùs

E Ministerio di Pedro

Sabat Atardi

Lesa pa e siman aki:

Echonan 9:32-43; Echonan 10:9-16; Efe. 2:11-19; Echonan 11:1-26; Echonan 12:1-18.

Versíkulo di Memoria:

“E ora ei Pedro a kuminsá papia ku nan” ‘Berdaderamente mi ta komprondé ku Dios no ta mustrá parsialidat, pero den tur nashon kualke hende ku ta tem’E i ta hasi loke ta korekto, ta aseptabel p’E’ ”(Echonan 10:34, 35, NRSV).

Ku e partida di Pablo na Tarso, Pablo ta bolbe bira e personahe prinsipal den e narativo di Lukas di e promé dianan di e iglesia Kristian. Pedro ta ser deskribí den un sorto di ministerio ambulante den henter Hudea i e regionnan den besindario. Echonan aki ta konta dos storia di milager kòrtiku, e kurashon di Eneas i e resurekshon di Tabita (Dorkas), kua despues ta ser siguí pa e storia di Cornelio den kapítulo 10.

E kombershon di e Paganonan tabata e tema di mas kontroversial den e iglesia apostóliko. Ounke e diskushonnan ku a sigui despues di e boutismo di Cornelio tabata leu for di resolvé tur e difikultatnan, e dramamentu di e Spiritu, similar na loke a sosodé na Pentekòste, a yuda konvensé Pedro i e rumannan na Yerusalèm ku e bendishonnan di e evangelio no tabata restringí na Hudiunan. Mientrastantu, e iglesia na Antiokía ya a kuminsá move den direkshon di e Paganonan tambe.

E studio di e siman aki tambe ta inkluí e lantamentu di un persekushon nobo i kòrtiku, e biaha aki bou di Rei Herodes, i su impakto riba e apòstelnan, ku a ser di spar den e persekushon impulsá dor di Pablo.

* Studia e lès di e siman aki pa prepará pa Sabat, 11 di ougùstùs.

Djadumingu5 di ougùstùs

Na Lida i Jope

Pedro tabata bishitando e komunidatnan Kristian den e region na kosta di Hudea. Su propósito tabata probablemente pa duna nan instrukshon doktrinal (Echonan 2:42), pero Dios a uz’é di forma poderoso pa realisá milagernan den e mesun forma manera esnan realisá dor di Hesus Mes.

Lesa Echonan 9:32-35. Ki similaridatnan bo ta mira den e milager di Hesus den Lukas 5:17-26 i e kurashon di Eneas?



Apesar di e brevedat di e relato, e milager ta kòrda nos di e storia bon konosí di e paralítiko di Capernaum kurá dor di Hesus (Lukas 5:17-26). Asta e detaye tokante e kama ta similar. Mas importante ainda, sinembargo, tabata e impakto di e kurashon di Eneas, no solamente na Lida ma tambe den e plano di kosta di Sharon. Despues di a verifiká pa nan mes e realidat di e milager, hopi hende a bira na Señor.

Lesa Echonan 9:36-43. Repasá e storia di e resurekshon di Tabita. Kiko tabata asina spesial tokante dje?



Tabita, e término Arameo pa “biná”, na Griego, Dorkas, tabata un kreyente masha kerí den su bario pa motibu di su obranan di karidat Kristian. E storia di su resurekshon tambe ta kore paralelo na un milager realisá dor di Hesus, e resurekshon di e yu muhé di Jairo (Lukas 8:41, 42, 49-56), ku Pedro a testiguá. Siguiendo e ehèmpel di Hesus, e a pidi tur hende pa bandoná e kamber (lesa Marko 5:40). E ora ei e a hinka rudia i a hasi orashon, despues di kua e a yama e muhé morto: “Tabita, lanta” (Echonan 9:40, NRSV).

E apòstelnan a realisá hopi milager; sinembargo, de echo, esakinan tabata akshonnan di Dios atraves di mannan di e apòstelnan (Echonan 5:12). E similaridatnan ku e e milagernan di Hesus mes tabata kisas pa kòrda e iglesia, inkluyendo nos awe, ku loke ta importá mas no ta asina tantu ken e instrumento ta sino e e midí di su sumishon na Dios (lesa Juan 14:12). Ora nos permití Dios totalmente pa uza nos pa e kousa di e evangelio, gran kosnan por sosodé. Pedro no solamente a resusitá Tabita, ma e milager a hiba tambe na hopi kombershon na Jope (Echonan 9:42).

Djaluna6 di ougùstùs

Na Kas di Cornelio

Na Jope, Pedro a keda serka un tal Simon, un kurtidó di kueru (Echonan 9:43). Mientrastantu, na Cesarea, masoménos bintisinku mia (40 kilometer) for di Jope, tabata biba un senturion Romano yamá Cornelio. E i su kas tabata adoradónan deboto di Dios, ounke ainda nan no a uni formalmente na Hudaismo, loke ta nifiká ku Cornelio ainda tabata un Pagano no sirkumsidá. Den un vishon duná dor di Dios, e a ser instruí pa manda mensaheronan na Jope i invitá Pedro pa bishit'é (Echonan 10:1-8).

Lesa Echonan 10:9-16, 28, 34, 35. Kiko Pedro a eksperensiá, i kon e a interpret’é?



Ta importante pa sa ku e vishon di Pedro no tabata tokante kuminda pero tokante hende. Sí, tabata banda di mèrdia, Pedro tabatin hamber, i e bos a bis'é pa mata i kome; sinembargo, Dios a uza e vishon, no pa kita e distinshon entre animalnan puru i impuru pero pa siña Pedro tokante e karakter inklusivo di e evangelio.

E vishon tabata eksplísitamente intenshoná pa kibra e resistensia di Pedro kontra Paganonan. Pedro su punto di bista tabata ku si e a drenta kas di Cornelio i tabatin kompañerismo kuné, e lo a kontaminá su mes i asina bira inkapas pa adorá den e tèmpel òf pa bini dilanti di e presensia di Dios. Hudiunan di e promé siglo for di Hudea i e áreanan rònt no tabata asosiá ku Paganonan no sirkumsidá.

E problema tabata ku e teologia kontemporáneo, kua tabata ekskluí e Paganonan for di e mankomunidat di Israel, ounke e idea aki a bira un pervershon di henter e punto di eksistensia di Israel komo un nashon, kua tabata pa alkansá e mundu ku un konosementu di e Dios berdadero.

Pa motibu ku sirkumsishon tabata e señal di e pakto Abrahámiko, Paganonan insirkumsidá a yega na ser isolá i tratá ku despresio. Nan no por tabatin parti den e bendishonnan di e pakto a ménos ku nan a aseptá sirkumsishon i bira Hudiu. Un konsepto asina, sinembargo, tabata inkompatibel ku e alkanse universal di e morto di Hesus, manera e promé kreyentenan, ku tempu, a bin komprondé.

Djamars7 di ougùstùs

E Don di Spiritu

Echonan 10:44-48 ta revelá un momentu kritiko den historia di e iglesia tempran. Tabata e promé biaha ku e evangelio tabata ser prediká na Paganonan insirkumsidá dor di un di e apòstelnan. Diferente di e kreyentenan Helenista, e apòstelnan i otro kreyentenan Hudiu no tabata kla pa risibí Paganonan den e iglesia. Dor ku Hesus tabata e Mesias di Israel, nan tabata pensa ku e evangelio mester a ser kompartí solamente ku Hudiunan di serka i leu. E Paganonan mester a ser kombertí promé na Hudaismo i despues ser aseptá den e komunidat di fe. Den otro palabra, promé ku Paganonan por a bira Kristian, nan mester bira Hudiu promé. Esei tabata e pensamentu ku mester a ser kambiá entre e promé kreyentenan Hudiunan aki.

E don di lenga duná na Cornelio i su kas a ser añadí komo un señal kla, notabel ku un konsepto asina tabata eróneo, ku Dios no tin faborito, i ku den términonan di salbashon tantu Hudiunan i Paganonan ta para igual dilanti di djE.

Lesa Echonan 11:1-18. Kon e iglesia na Yerusalèm a reakshoná na e eksperensia di Pedro na Cesarea?



E prehuisio establesé pa largu tempu enkuanto di Paganonan a hiba e kreyentenan den Yerusalèm na kritiká Pedro pa a kome ku hendenan insirkumsidá. Ta parse ku nan tabata mas preokupá ku dudanan seremonial Hudiu ku ku e salbashon di Cornelio i su famia. Kisas nan tabatin miedu ku si e iglesia a kibra ku práktikanan asina, e lo a representá un nengamentu di e fe di Israel; nan lo a pèrdè e fabor di Dios, i bira responsabel nan mes pa e mesun akusashonnan, di nan kompañeronan Hudiu, ku a hiba na morto di Esteban.

"E tempu a yega pa un fase di trabou kompletamente nobo hasi entrada den e iglesia di Kristu. E porta ku hopi di e konversonan Hudiu a sera kontra e Paganonan awor mester a ser habrí. I e Paganonan ku a aseptá e evangelio mester a ser konsiderá komo un igualdat ku e disipelnan Hudiu, sin e nesesidat di opservá e rito di sirkumsishon."—Ellen G. White, The Acts of the Apostles, p. 136.

Meskos ku na Pentekòste, aki tambe nan tabata papia den idiomanan ku anteriormente no tabata konosí pa nan, mas bien ku lenguahe eksaltá òf selestial. Solamente e propósito tabata diferente: miéntras pa e disipelnan e don dirigí na e mishon mundial di e iglesia, pa Cornelio e a funshoná komo un konfirmashon ku e grasia di Dios tabata operando asta entre e Paganonan.

Djarason8 di ougùstùs

E Iglesia na Antiokía

Motivá pa e kombershon di Cornelio, Lukas ta interumpí brevemente su relato di e ministerio di Pedro pa mustra e progreso inisial entre e Paganonan.

Lesa Echonan 11:19-26. Kiko a sosodé ora algun di e refugiadonan di Yerusalèm a bin Antiokía?



E sekshon aki di Echonan 11 ta referí bèk na e persekushon di Pablo den kapítulo 8. Asina, miéntras e desaroyonan previo tabata tumando lugá na Hudea i otro kaminda, algun di e kreyentenan Helenista ku a ser fòrsá pa bandoná Yerusalèm tabata plamando e evangelio mas aya di e fronteranan di Hudea.

Lukas ta duna atenshon speshal na e gran siudat di Antiokía, na Siria, kaminda refugiadonan a kuminsá prediká na nan kompañeronan Hudiu i na e Helenistanan, i hopi di nan tabata aseptá e fe. E mandato di Hesus den Echonan 1:8 e ora ei tabata ser realisá atraves di e esfuersonan di e Kristiannan Hudiu Helenista aki. Nan tabata esnan ku a bira e berdadero fundadónan di e mishon na e Paganonan.

Pa motibu di e éksito di e iglesia na Antiokía, e apòstelnan na Yerusalèm a disidí di manda Barnabas pa evaluá e situashon. Tumando nota di e gran oportunidatnan pa e avanse di e evangelio, Barnabas a manda buska Pablo na Tarso, sintiendo ku e por tabata un ayudo vital.

Barnabas tabatin rason. Durante e aña e ku Pablo a traha huntu, gruponan grandi, den su mayoria Paganonan, por a tende e evangelio. E entusiasmo ku kua nan tabata papia tokante Hesukristu a hasi e kreyentenan ei bira konosí pa promé biaha komo "Kristiannan" (Echonan 11:26). Ku nan " a ser yamá" Kristiannan ta indiká ku e término a ser fábrika pa esnan pafó di iglesia, probablemente komo un forma di bofon, miéntras e kreyentenan tabata preferá di referí na nan mes komo "rumannan" (Echonan 1:16), "disipelnan" (Echonan 6:1), òf asta "santunan" (Echonan 9:13). Pa e momentu ku Echonan a ser skirbí, "Kristian" a bira un título komun (Echonan 26:28), i Lukas ta parse di ta aprob'é. "Kristian" ta nifiká un siguidó òf un defensor di Kristu.

Djaweps9 di ougùstùs

E Persekushon di Herodes

Biniendo bèk na Hudea, nos ta afrontá awor e relato di Rei Herodes ehekutando Santiago, e ruman hòmber di Juan i yu hòmber di Zebedeo (Marko 1:19). Tambe e tabata ke a hasi e mesun kos ku Pedro.

Lesa Echonan 12:1-4. Kiko esaki ta siña tokante e desafionan ku e iglesia tempran tabata afrontá?



E Rei Herodes menshoná aki ta Agripa I, e ñetu di Herodes e Grandi (Mat. 2:1); e a goberná Hudea for di A.D. 40 te 44. Komo resultado di su demostrashon di piedat, e a gana popularidat entre su súpditonan Hudiu, spesialmente e Fariseonan. Su intento pa gana e fabor di e Hudiunan dor di ataka algun apòstel ta pas perfektamente ku loke nos konosé di dje for di otro fuentenan.

Pa motibu ku e ehekushon di Santiago tabata efektivo den kumpli ku e agènda di Agripa, e a plania pa ehekutá Pedro tambe. Pedro a ser arestá i entregá na kuater eskuadron di kada unu kuater sòldá pa vigil'é, un eskuadron pa kada un di e kuater vigilianan di anochi. Pedro tabatin kuater sòldá kada biaha huntu kuné: e lo tabata enkadená na dos sòldá, unu na kada banda, i dos lo a vigilá e entrada. Un prekoushon ekstremo asina siguramente a ser tumá pa trata na evitá loke a sosodé kaba ku Pedro (i Juan) algun tempu promé (Echonan 5:17-20).

Lesa Echonan 12:5-18. Kiko a sosodé komo kontesta riba e orashonnan di e rumannan?



E anochi promé ku e dia ku Agripa a plania pa pone Pedro na huisio i ehekut'é, Pedro un biaha mas a ser liberá milagrosamente dor di un angel.

A kontinuashon, nos ta haña e storia di e morto di Agripa na Cesarea (Echonan 12:20-23). Esfuersonan a ser hasí pa identifiká e kousa di su morto (peritonitis, un úlsera, inkluso venenu); sinembargo, Lukas ta bisa klaramente ku e rei a muri pa motibu di un huisio divino.

Djabièrnè10 di ougùstùs

Pa mas Estudio:

“Den e di dies kapítulo di Echonan nos tin ainda un otro ehèmpel di e ministrashon di angelnan selestial, ku a resultá den e kombershon di Cornelio i esnan ku tabata huntu ku n’e. Laga e kapítulonan aki [8-10] ser lesá, i risibí atenshon spesial. Den nan nos ta mira ku shelu ta hopi mas serka di e Kristiannan ku ta enbolbí den e obra di salba alma ku hopi por suponé. Nos mester siña dor di nan tambe e lès di e apresio di Dios pa kada ser humano, i ku kada unu mester trata su próhimo komo un di e instrumentonan di Señor pa e realisashon di Su obra riba tera."—Ellen G. White Comments, The SDA Bible Commentary, vol. 6, p. 1059.

"Ora e iglesia ta hasi orashon, e kousa di Dios lo bai dilanti, i Su enemigunan lo ser destruí, asta si esaki no ta libra e iglesia di sufrimentu i martirio; Lukas su kreensia den e viktoria di e evangelio ta kompletamente realista i ta rekonosé ku ounke e palabra di Dios no ta limitá, su sirbidónan kisas tin ku sufri i ser limitá."—I. Howard Marshall, The Acts of the Apostles (Grand Rapids: Eerdmans, 1980), p. 206, 207.

Preguntanan di Diskushon:

pregunta 1Cornelio ta ser deskribí komo "un hòmber deboto ku ta teme Dios ku henter su kas; e ta duna limosna generosamente na e hendenan i tabata hasi orashon konstantemente na Dios" (Echonan 10:2, NRSV). Ta evidente ku e Spiritu di Dios ya kaba tabata obrando den Cornelio hopi tempu promé ku e a topa Pedro. Por tabata ku su bida deboshonal tabata un oportunidat pa Dios alkans’é ku e mensahe di evangelio? Ki lès tin pa nos den su storia?

pregunta 2Den klas, bai bèk na e pregunta final di djaluna i hasi bo mes e pregunta aki: Kiko ta e konteksto kultural, sosial, i polítiko den kua bo ta biba ku ta reprodusí e tipo di tenshon étniko ku Kristiannan no ta suponé di karisiá? Den otro palabra, ora nos mester, kon nos tur komo Kristiannan por elevá nos mas ariba di nos kultura i trasfondo?

pregunta 3Apesar di nan daño, e esfuersonan di Pablo pa persiguí a resultá den bon efekto: e refugiadonan ku a yega Antiokía a kuminsá prediká, na Hudiunan i na Helenistanan. Den klas, kompartí un eksperensia personal di doló i sufrimentu ku Dios a kambia den un bendishon.

pregunta 4Santiago tabata un di e disipelnan di mas serkano di Hesus (Marko 5:37, 9:2, 14:33); sinembargo, e tabata es promé di e Diesdos ku a sufri martirio. Ki otro ehèmpelnan nos ta haña den Beibel di hendenan fiel ku a sufri inhustamente? Ki lèsnan nos mester saka for di e relatonan aki pa nos mes tokante henter e tema di sufrimentu?