Lès 8 * 18-24 di ougùstùs

E Konsilio di Yerusalèm

Sabat Atardi

Lesa pa e siman aki:

Echonan 15; Gal. 2:11-13; Eks. 12:43-49; Rom. 3:30; Lev. 18:30; Rev. 2:14, 20.

Versíkulo di Memoria:

“Nos ta kere ku ta pa medio di e grasia di nos Señor Hesus nos ta salbá, di e mesun manera ku nan ta"(Echonan 15:11, NIV).

Despues di mas ku dos aña, Pablo i Barnabas a regresá Siria i Antiokia. Pa motibu ku henter e iglesia einan tabata envolví den manda nan komo mishoneronan, tabata natural ku nan lo a duna un informe na e iglesia. E énfasis di e informe, sinembargo, no tabata loke nan a logra pero riba loke Dios Mes a hasi atraves di nan.

E ophetivo di e informe, naturalmente, tabata e éksito di e mishon entre e Paganonan, ounke ku hopi Hudiu tambe a bini na fe. For di e insidente di Cornelio, sinembargo, e kombershon di e Paganonan insirkumsidá a bira un problema (Echonan 11:1-18), pero awor e kantidat grandi di nan tabata ser atmití na miembresia di iglesia, kosnan a bira partikularmente kompliká. Hopi kreyente na Yerusalèm no tabata kontentu. Pa nan, Paganonan mester a ser sirkumsidá promé, es desir, bira proselitonan Hudiu pa asina bira parti di e pueblo di Dios i tin kompañerismo ku nan.

Echonan 15 ta trata tokante e problema di e Paganonan ku ta alkansá un nivel kritiko i tokante e iglesia trahando huntu pa haña un solushon. E Konsilio di Yerusalèm tabata un momentu desisivo den e historia di e iglesia apostóliko den relashon ku su mishon mundial.

* Studia e lès di e siman aki pa prepará pa Sabat, 25 di ougùstùs.

Djadumingu19 di ougùstùs

E Punto en Kuestion

For di prinsipio e iglesia na Antiokia tabata konsistí di tantu Hudiu (Helenista) komo Paganonan insirkumsidá (Echonan 11:19-21, Gal. 2:11-13) ku aparentemente tabata biba den kompañerismo pasífiko ku otro. E kompañerismo ei, sinembargo, a ser plamá dor di e yegada di un grupo di kreyentenan di Yerusalèm.

Lesa Echonan 15:1-5. Kiko tabata e problema ku e iglesia tabata afrontá?



Tradishonalmente yamá Hudaisante, e individuonan ei for di Hudea tabata posiblemente esnan mes identifiká den versíkulo 5 komo Fariseonan ku a kere. E presensia di e Fariseonan den e iglesia no mester sorprendé nos, pasobra Pablo mes tabata un Fariseo promé ku su kombersashon (Fil. 3:5). E grupo aki parse a bai Antiokia riba nan propio inisiativa (Echonan 15:24), ounke un otro insidente ku tambe a tuma lugá na Antiokia algun tempu despues ta mustra ku mayoria Hudiu, inkluyendo e apòstelnan, no tabata masha konfortabel ku e presensia di Paganonan insirkumsidá den e iglesia (Gal. 2:11-13).

Den su epístola na e Galationan, Pablo no ta papia positivamente tokante Hudaisantenan, kalifikando nan komo buskadónan di problema (Gal. 1:7,5:10, ESV) i "rumannan falsu" (Gal. 2:4) kende nan motibu real tabata pa destruí e libertat spiritual di e evangelio i trese e konversonan Pagano den e sklabitut di legalismo.

Nan punto tabata mas bien simpel: a ménos ku e Paganonan tabata sirkumsidá i tabata warda tur e otro leinan seremonial Hudiu, nan no por a ser salbá. Salbashon, asina nan tabata kere, mester a ser hañá solamente denter di e komunidat di pakto di Dios i, di akuerdo ku Tèstamènt Bieu, no tabatin niun otro manera pa bira parti di e pueblo skohí di Dios eksepto atraves di sirkumsishon (Gen. 17:9-14, Eks. 12:48). Den resúmen, Paganonan por a ser salbá solamente si promé nan a bira proselitonan Hudiu.

Pablo i Barnabas, naturalmente, no por a bai di akuerdo ku rekerimentunan asina, kua tabata bai kontra e naturalesa mes di e evangelio. E aserkamentu agresivo di e bishitantenan di Hudea, sinembargo, a generá un diskushon intenso; e palabra den Echonan 15:2 (stasis) tin e sentido di "konflikto" òf "diskordia." Sinembargo, e asuntu tabata demasiado importante pa ser tratá kuné na nivel lokal so. E unidat di e iglesia tabata den wega. E rumannan di Antiokia e ora ei a disidí di manda un kantidat di delegado Yerusalèm, inkluyendo Pablo i Barnabas, pa haña un solushon.

Djaluna20 di ougùstùs

Sirkumsishon

Un di e problemanan grandi den e konflikto aki tabata sirkumsishon. Esaki no tabata un institushon humano (kompará Mat. 15:2, 9). Mas bien, e a ser ordená dor di Dios Mes komo un señal di Su pakto ku e desendientenan di Abraham komo Su pueblo skohí (Gen. 17:9-14).

Lesa Éksodo 12:43-49. Ademas di Israelitanan nasé, ken mas tabata suponé di ser sirkumsidá?



E bendishonnan di e pakto no tabata restringí na Israelitanan nasé pero tabata ekstensivo na kualke esklabo òf strañero pasahero ku tabata deseá di eksperensi'é, tanten ku e mester a ser sirkumsidá. Despues di sirkumsishon, e strañero lo tabatin e mesun status dilanti di Dios manera e Israelita nasé: "E lo ta komo un yu di tera" (Eks. 12:48).

Sirkumsishon, por lo tantu, tabata indispensabel (pa un hende hòmber) pa ta un miembro kompletu di e komunidat di pakto di Dios. I pa motibu ku Hesus tabata e Mesias di Israel, tabata parse natural ku e Hudaisantenan lo a insistí ku niun Pagano por a benefisiá di Su salbashon sin promé bira un Hudiu.

Lesa Romanonan 3:30, 1 Korintionan 7:18, Galationan 3:28, Galationan 5:6. Kiko tabata Pablo su komprendementu di sirkumsishon?



Dor di bisa ku niun Pagano por a ser salbá sin promé djòin Hudaismo, e hòmbernan aki tabata mesklando dos konsepto distinto: pakto i salbashon. Ser un miembro di e komunidat di pakto di Dios no tabata garantisá salbashon (Yer. 4:4, 9:25). Ademas, Abraham mes a ser salbá (hustifiká) pa medio di fe, kua a sosodé promé, i no pa motibu, ku e a ser sirkumsidá (Rom. 4:9-13). Salbashon semper tabata pa medio di fe, miéntras e pakto tabata un provishon di grasia pa medio di kua Dios lo a hasi Su Mes i Su plan di salbashon konosí na henter mundu. Israel a ser skohé pa e propósito aki (Gen. 12:1-3).

E problema, sinembargo, tabata ku dor di asosiá pakto i salbashon asina djaserka, e kreyentenan aki a yega na mira sirkumsishon komo meritorio. E grasia di Dios ku ta salba, sinembargo, no ta ópera kaminda obranan humano ta operá. Asina, pa imponé sirkumsishon riba Paganonan kreyente komo un medio di salbashon tabata pa desformá e bèrdat di e evangelio (Gal. 1:7, 2:3-5), anulá e grasia di Dios (Gal. 2:21), i hasi ku Hesus no tin niun benefisio (Gal. 5:2). Ademas, e tabata un nengamentu di e karakter universal di salbashon (Kol. 3:11, Tito 2:11). Pablo nunka por a bai di akuerdo ku e tipo aki di pensamentu.

Djamars21 di ougùstùs

E Debate

Lesa Echonan 15:7-11. Kiko tabata e kontribushon di Pedro na e debate na Yerusalèm?



Lukas, naturalmente, no ta informá tur e prosedimentunan di e reunion. Lo tabata interesante pa sa, por ehèmpel, e argumentunan di apoyo di e Hudaisantenan (Echonan 15:5), meskos tambe e kontestanan di Pablo i Barnabas (Echonan 15: 12). E echo ku nos tin solamente e diskursonan di Pedro i Santiago ta mustra e importansia di e hòmbernan aki entre e apòstelnan.

Den su diskurso, Pedro a dirigí su mes na e apòstelnan i ansianonan, rekordando nan di su eksperensia ku Cornelio añanan promé. Den esensia, su argumento tabata e mesun ku e a usa dilanti di e rumannan na Yerusalèm (Echonan 11:4-17). Dios Mes a mustra Su aprobashon di e kombershon di Cornelio (ounke e tabata un Pagano insirkumsidá) dor di duna e i su kas e mesun don di Spiritu ku E a duna e apòstelnan na Pentekòste.

Den Su providensia divino, Dios a usa nada ménos ku un persona manera Pedro pa konvensé e kreyentenan di Hudea ku E no ta hasi distinshon entre Hudiunan i Paganonan respekto salbashon. Asta si nan tabata falta e benefishinan purifikadó di e reglanan i regulashonnan di e Pakto Bieu, e Paganonan kreyente no por a ser konsiderá impuru mas, pasobra Dios Mes a limpia nan kurason. E deklarashon final di Pedro tabata zona masha similar na loke nos lo a spera di Pablo: "Nos ta kere ku ta pa medio di e grasia di nos Señor Hesus nos ta salbá, di e mesun manera ku nan ta" (Echonan 15:11, NIV).

Lesa Echonan 15:13-21. Ki solushon pa e problema di e Paganonan Santiago a proponé?



E diskurso di Santiago ta sugerí ku e tabata den un posishon di outoridat (kompará ku Echonan 12:17; 21:18; Gal. 2:9, 12). Independientemente di loke e lo por a komprondé dor di e rekonstrukshon di e tabernakel di David, kua den e profesia di Amos ta referí na e restourashon di e dinastia di David (Amos 9:11, 12), e propósito prinsipal di Santiago tabata pa demostrá ku Dios ya kaba a proveé pa Paganonan djòin, den un sentido, un "pueblo di Dios" rekonstituí, i asina nan por a ser inkorporá den Israel.

Pa motibu di esaki, su desishon tabata ku ningun restrikshon mas no mester a ser imponé riba e konversonan Paganonan, aparte di esnan ku normalmente lo a ser rekerí di strañeronan ku tabata deseá di biba den e tera di Israel.

Djarason22 di ougùstùs

E Dekreto Apostóliko

Lesa Echonan 15:28, 29. Ki kuater prohibishon e konsilio a disidí di imponé riba e konversonan Pagano?



E tema prinsipal pa kua e konsilio a ser konvoká a ser resolvé di manera satisfaktorio. Pa motibu ku salbashon ta pa medio di grasia, Paganonan kreyente tabata ser eksonerá di sirkumsishon ora ku nan a djòin e iglesia. Sinembargo, nan mester a apstené nan mes di kuater kos:

  1. karni ofresé den sakrifisio na ídolonan den ritualnan pagano i despues sirbí den un fiesta di tèmpel òf bendé den e marshe;
  2. konsumo di sanger;
  3. karni di animalnan strangulá; i
  4. inmoralidat seksual den su vários formanan.

Mayoria Kristian awendia ta trata e prohibishonnan alimentisio (prohibishonnan 1-3) komo rekomendashonnan temporal. Pasobra e kosnan ei tabata partikularmente ofensivo pa Hudiunan, e prohibishonnan, nan ta argumentá, tabata intenshoná solamente pa konektá e buraku entre Hudiunan i kreyentenan Pagano. Hopi biaha e ta ser presumí tambe ku tur otro leinan di Tèstamènt Bieu, inkluyendo e leinan di kuminda Levitikal (Levítiko 11) i e mandamentu di Sabat (Eks. 20:8-11), kua ta ousente for di e lista, no ta obligatorio mas pa Kristiannan.

E asina yamá dekreto apostóliko, sinembargo, no tabata ni temporario ni un kódigo nobo di étika Kristian ku tabata ekskluí tur otro kos relashoná ku Tèstamènt Bieu. De echo, bou di guiansa di Spiritu Santu (Echonan 15:28), e apòstelnan i ansianonan di e iglesia a reprodusí e regulashonnan di Levítiko 17-18 solamente konserniente e habitantenan strañero di Israel.

Den konteksto di Levítiko, e prohibishonnan aki ta nifiká renunsiamentu di paganismo. Kualke strañero ku tabata deseá di biba na Israel mester a renunsiá e práktikanan pagano ei na kua nan tabata kustumbrá (Lev. 18:30). Di mes manera, kualke Pagano kreyente ku tabata deseá di djòin e iglesia tabata ser rekerí pa tuma un posishon firme kontra paganismo.

Esaki, sinembargo, tabata djis e promé paso. Unabes aden, naturalmente tabata ser sperá di dje pa hasi e boluntat di Dios dor di obedesé e mandamentunan ei ku ta universal, pre-Mosaiko, i no fundamentalmente seremonial, manera e Sabat (Gen. 2:1-3) i ku e ta sigui e diferensia entre alimentonan puru i impuru (Gen. 7:2).

Ku e dekreto no tabata temporal ta kla, por ehèmpel, for di Revelashon 2:14, 20, kaminda e promé i e último prohibishon ta ser ripití, implísitamente kontemplando e otro dos, tambe. De echo, evidensianan históriko ta mustra ku e dekreto ainda tabata ser konsiderá normativo dor di Kristiannan hopi despues di e periodo di Tèstamènt Nobo.

Djaweps23 di ougùstùs

E Karta For di Yerusalèm

Lesa Echonan 15:22-29. Ki medidanan adishonal a ser tumá dor di e iglesia di Yerusalèm enkuanto di e desishon di e konsilio?



E promé medida tabata pa skirbi un karta na e kreyentenan Pagano pa asina informá nan di loke a ser disidí. E karta, skirbi na nòmber di e apòstelnan i ansianonan di Yerusalèm, tabata un dokumento ofisial ku tabata reflehá e superioridat di e iglesia di Yerusalèm‒siguramente pa motibu di e liderazgo di e apòstelnan‒riba e otro komunidatnan Kristian. Skirbí den A.D. 49, kua ta e fecha mas probabel di e konsilio, e karta aki ta unu di e promé dokumentonan Kristian ku nos tin.

E iglesia di Yerusalèm a disidí tambe pa apuntá dos delegado, Hudas Barsabas i Silas, pa kompañá Pablo i Barnabas te Antiokia; nan mishon tabata pa hiba e karta i konfirmá su kontenido.

Lesa Echonan 15:30-33. Kon e iglesia na Antiokia a reakshoná riba e karta?



Ora ku e karta a ser lesá, e iglesia tabata yená ku gran goso pa motibu di e mensahe alentador: sirkumsishon no mester a ser rekerí di e konversonan Pagano. Tambe nan no a lanta niun opheshon na e demandanan di e karta (e kuadrúplika dekreto apostóliko). E promé divishon di mas serio den e iglesia tempran a ser rekonsiliá asina, a lo ménos den teoria.

Na konklushon di e konsilio, e evangelio di Pablo a ser kompletamente rekonosé dor di e lidernan di iglesia na Yerusalèm, ku a ekstendé na dje i Barnabas e man drechi di kompañerismo komo un señal di aseptashon i konfiansa (Gal. 2:9). Sinembargo, e Kristiannan Hudiu ei ku a sigui biba segun e lei Hudiu ainda lo a hañ’é altamente problemátiko pa kompartí mesa ku e Paganonan, kende, pa tur intenshon i propósitonan, a permanesé ritualmente impuru.

E problema aki ta ser mustrá, por ehèmpel, dor di e insidente ku a envolví Pedro den Galationan 2:11-14. "Asta e disipelnan", Ellen G. White ta bisa, "no tabata tur prepará pa aseptá boluntariamente e desishon di e konsilio."—The Acts of the Apostles, p. 197.

Djabièrnè24 di ougùstùs

Pa mas Estudio:

“E konversonan Hudiu generalmente no tabata inkliná pa move mes rápidamente ku e providensia di Dios a habri e kaminda. For di e resultado di e trabounan di e apòstelnan meimei di e Paganonan tabata evidente ku e konversonan entre e último personanan lo a eksedé e konversonan Hudiu hopi den kantidat. E Hudiunan tabata teme ku si e restrikshonnan i seremonianan di nan lei no a ser hasí obligatorio riba e Paganonan komo un kondishon di kompañerismo di iglesia, e pekuliaridatnan nashonal di e Hudiunan, kua te awor a mantené nan distinto for di tur otro hende, finalmente lo a disparsé for di entre esnan ku a risibí e mensahe di evangelio."—Ellen G. White, The Acts of the Apostles, p. 189.

"E Kristiannan Hudiu ku tabata biba na bista di e tèmpel naturalmente tabata permití nan mente bolbe na e privilegionan pekuliar di e Hudiunan komo un nashon. Ora ku nan a mira e iglesia Kristian ta apartá for di e seremonianan i tradishonnan di Hudaismo, i a persibí ku e santidat pekuliar ku kua e kustumbernan Hudiu a ser invertí pronto lo a ser pèrdí for di bista den lus di e fe nobo, hopi a bira indigná ku Pablo komo esun ku, den gran medida, a kousa e kambio aki. Asta e disipelnan no tabata tur prepará pa aseptá boluntariamente e desishon di e konsilio. Algun tabata zeloso pa e lei seremonial, i nan a mira Pablo ku desaprobashon pasobra nan a pensa ku su prinsipionan enkuanto di e obligashonnan di e lei Hudiu tabata poko floho."—Página 197.

Preguntanan di Diskushon:

pregunta 1Den klas, bai bèk na e pregunta final di djaluna. Kon nos ta komprondé e echo ku pertenesé na e iglesia "korekto" no ta garantisá salbashon? Por ehèmpel, siguramente Israel antiguo tabata e "iglesia korekto", pero esei no ta nifiká ku tur hende den dje tabata salbá. Si ta den e iglesia berdadero no ta garantisá salbashon, e ora ei kiko ta e bentaha di ta parti di dje?

pregunta 2Kon pa aseptá Paganonan insirkumsidá den e komunidat di fe tabata un di e problemanan atministrativo di mas importante ku e iglesia tempran tabata afrontá. Kiko por ta algun problemanan komparabel den nos iglesia awe, i kiko e ehèmpel di Echonan 15 ta siña nos tokante kon pa dil ku nan?

pregunta 3Den klas, laga algun hende tuma e posishon di e Hudiunan ku a insistí ku Paganonan mester bira proselitonan Hudiu promé ku nan djòin e iglesia, kua nan a mira (i ku rason) komo un ekstenshon di e promesanan di pakto hasí na Israel. Kiko ta nan argumentunan, i kon bo por respondé? Kon un debate manera esaki lo por mustra nos dikon asuntunan ku awe ta parse asina opvio lo por, den un tempu diferente, ta parse hopi mas difísil ku loke nan ta pa nos awe?