Lès 9 * 25 - 31 di ougùstùs

E di Dos Biahe Mishonero

Sabat Atardi

Lesa pa e siman aki:

Echonan 16; Rom. 3:28; Gal. 2:16; Echonan 17; 1 Kor. 1:23; Echonan 18:1-10.

Versíkulo di Memoria:

“No tene miedu, sigui papia, i no keda ketu. Pasobra Mi ta ku bo, i ningun hende ta bai ataká i hasi bo daño, pasobra Mi tin hopi hende den e stat aki”(Echonan 18:9, 10, NIV).

Bèk na Antiokía, Pablo i Barnabas a alimentá e iglesia i a enbolbí den mas trabou evangelístiko. Esaki tabata aparentemente e último biaha ku nan a traha huntu, komo ku un desakuerdo skèrpi a hiba na nan separashon. E rason pa e desakuerdo di Pablo i Barnabas tabata Marko, primu di Barnabas (Kol. 4:10). Ora Pablo a invitá Barnabas pa regresá na e lugánan ku nan a evangelisá den nan biahanan anterior, Barnabas tabata ke hiba su primu huntu kuné, pero Pablo tabata kontra di esei pa motibu di e fayo di Marko den pasado (Echonan 13:13). E separashon di Pablo i Barnabas, sinembargo, a ser kambiá den un bendishon, pasobra dor di dividí nan esfuersonan nan por a kubri un área mas amplio ku nan a plania promé. Barnabas a tuma Marko i a regresá na Cyprus, e lugá di orígen di Barnabas (Echonan 4:36). Mientrastantu, despues di a invitá Silas pa uni ku ne, Pablo a pasa dor di Siria i Silisia, fortalesiendo e iglesianan einan. Promé di a bai Antiokía pa promé biaha, Pablo a pasa vários aña na Tarso (Echonan 9:30; 11:25, 26). Awor e tabatin e oportunidat pa bolbe bishitá e kongregashonnan ku e a establesé aya. Sinembargo, e plan di Dios p’e tabata muchu mas mihó ku Pablo a kere promé.

* Studia e lès di e siman aki pa prepará pa Sabat, 1 di sèptèmber.

Djadumingu26 di ougùstùs

Bèk na Listra

E eskoho selektivo di Lukas di eventonan ta hiba Pablo kasi stret na Derbe i Listra. Tokante Siria i Silisia, e úniko kos ku e ta bisa ta ku Pablo a pasa dor di e regionnan ei konfirmando e iglesianan (Echonan 15:41).

Lesa Echonan 16:1-13. Kiko e akshonnan di Pablo akinan ta siña nos tokante kon sensitivo e tabata ora e tabata buska pa alkansá otronan?



Ounke tata di Timoteo tabata un Pagano, su mama tabata un Kristian Hudiu; su nòmber tabata Eunice. Apesar di ta insirkumsidá, Timoteo tabata konosé e Skrituranan for di infansia (2 Tim. 3:15), loke ta impliká ku e tambe tabata un persona piadoso. Komo un Kristian, ya e a gana e rèspèt i e atmirashon di tur e kreyentenan lokal.

Pa motibu ku e Hudiunan tabata rekonosé Hudaismo atraves di e liña materno mas bien ku di e tata, Timoteo tabata un Hudiu. E no a ser sirkumsidá riba e di ocho dia despues di nasementu, kisas pa motibu ku su tata, un Griego, tabata mira sirkumsishon komo algu bárbaro.

Deseando di tin Timoteo komo un kolega i sabiendo ku, komo un Hudiu no sirkumsidá, e lo a ser prohibí pa drenta den e sinagoganan Hudiu bou di e akusashon di apostasia, Pablo a laga sirkumsid'é. E motivashon di Pablo pa hasi esei, pa e motibu ei, tabata totalmente práktiko i no mester ser mirá komo un kontradikshon na e evangelio ku e tabata prediká.

Despues di a bolbe bishitá e lugánan ku e tabata den su promé biahe, Pablo a disidí di bai sùitwèst, posiblemente na Efeso, den e provinsia di Asia, pero Spiritu Santu a previnié di hasi asina. E ora ei e a move bai nort, tratando na bai Bitinia, pero atrobe den algun manera sekretu e Spiritu a previnié di bai einan. Pa motibu ku ya kaba e tabata pasando dor di Misia, e úniko opshon di Pablo tabata pa bai pabou na e haf di Troas, for di unda e por a nabegá den un kantidat di direkshon.

Den un vishon di anochi, sinembargo, Dios a mustr'é ku e mester nabegá atraves di e Laman di Egeo pa Masedonia. Ora su kompañeronan a haña sa tokante e vishon, nan a konkluí ku Dios enbèrdat a yama nan pa kompartí e evangelio ku e Masedonionan.

Djaluna27 di ougùstùs

Felipos

Unabes na Masedonia, Pablo i su kompañeronan a biaha pa Filipos, kaminda nan a establesé e promé kongregashon Kristian na Europa.

Lesa Echonan 16:11-24. Na unda e mishoneronan a bai riba Sabat i dikon? Kiko a sosodé finalmente ku nan einan?



Ki ora ku Pablo a yega na un stat, su práktika tabata pa bishitá e sinagoga lokal riba Sabat pa testifiká na e Hudiunan (Echonan 13:14, 42, 44; 17:1, 2; 18:4). Ku na Filipos e i su grupo a bai banda di un riu pa hasi orashon, huntu ku algun muhé, tantu adoradónan Hudiu komo adoradónan Pagano di Dios, probablemente ta nifiká ku no tabatin sinagoga den e stat. E nifikashon di esaki ta ku Pablo no a bai na sinagoganan Hudiu riba Sabat solamente pa propósitonan evangelístiko, sino tambe pasobra esaki tabata su dia di adorashon.

Lesa Echonan 16:25-34. Repasá e storia di e kombershon di e wardadó di prezu. Kiko e mester a hasi pa ser salbá?



E kontesta di Pablo i Silas riba e pregunta di e wardadó di prezu ta den harmonia total ku e evangelio, ya ku salbashon ta kompletamente atraves di fe den Hesus (Rom. 3:28, Gal. 2:16). Loke nos no por konkluí for di e episodio, sinembargo, ta ku kreensia den Hesus ta tur loke ta nesesario pa boutismo, a kosto di e instrukshon doktrinal i práktiko apropiá.

Kiko nos sa tokante e wardadó di prezu? E tabata un Hudiu òf un prosélito Hudiu? Den ámbos kaso, loke e tabatin mester tabata kere den Hesus komo Señor i Salbador. Ke tal si e tabata un Pagano ku ya tabata konosé i adorá Dios, manera Cornelio, Lidia (Echonan 16:14), i vários otronan den Echonan? Ke tal si anteriormente e a asistí na e reunionnan evangelístiko di Pablo den e stat? Loke sea tabata e echonan tokante di dje, e brevidat di e relato no mester ser uzá komo un èksküs pa boutisonan rápido.

Djamars28 di ougùstùs

Tesalónika i Berea

Ora ku Pablo i Silas a ser liberá for di prizòn, e mishoneronan a bai for di Filipos (Echonan 16:35-40). For di Filipos, Pablo i su kompañeronan a bai stret pa Tesalónika, kapital di Masedonia.

Lesa Echonan 17:1-9. Kon e Hudiunan di Tesalónika a reakshoná riba e predikashon eksitoso di Pablo entre e Paganonan?



Un biaha mas nos ta mira Pablo ta buska e sinagoga kaminda e por a kompartí e evangelio. Hopi Griego deboto i no poko muhé prominente a ser persuadí pa e mensahe di Pablo. Ku e konversonan aki a "uni ku Pablo i Silas" (Echonan 17:4) parse di nifiká ku nan a forma un grupo separá i a reuní apart for di e sinagoga, probablemente den kas di Jason.

Motivá ku yalursheit, nan oponentenan a kuminsá un disturbio. Nan intenshon tabata pa hiba Pablo i Silas, Timoteo no ta ser menshoná, dilanti e asamblea di e stat i akusá nan. Komo ku nan no por a haña e mishoneronan, Jason mes i algun otro kreyente nobo a ser lastrá na e outoridatnan lokal bou di e akusashon di ta hospedá agitadónan polítiko.

Lesa Echonan 17:10-15. Kiko tabata e kontesta di e Hudiunan Bereano den komparashon ku esnan na Tesalónika?



E término eugenes (Echonan 17:11) originalmente ta nifiká "bon nasé" òf "di nasementu nobel" pero a bin ta indiká mas generalmente un aktitut "imparsial"; kua probablemente ta e kaso aki. E Hudiunan di Berea ta ser alabá no simplemente pasobra nan tabata di akuerdo ku Pablo i Silas sino pa motibu di nan disponibilidat pa saminá e Skrituranan pa nan mes i riba un base diario pa mira si loke e mishoneronan tabata bisa tabata korekto. Un kontesta meramente emoshonal riba e evangelio, sin e konvikshon intelektual nesesario, tin tendensia di ta superfisial i di durashon kòrtiku.

Denter di poko tempu, sinembargo, persekushon a interumpí e ministerio di Pablo na Berea, obligando e pa avansá mas pa sùit, pa Atenas.

Djarason29 di ougùstùs

Pablo na Atenas

Atenas, e sentro intelektual di Gresia antiguo, literalmente a ser duná na ídolonan. Estatuanan di marmer di personanan i diosnan tabata ser hañá tur kaminda, spesialmente na entrada di e agora (plasa públiko), kua tabata e sentro di bida urbano. Pablo tabata asina perturbá tokante un idolatria asina dominante ku e a kambia su práktika usual di bai promé na e sinagoga, i a adoptá un kurso di akshon dòbel: e tabata diskutí semanalmente den e sinagoga ku Hudiunan i Paganonan deboto, i diariamente den e plasa públiko ku e Griegonan. (Lesa Echonan 17:15-22.)

Komo ku e hendenan di Atenas tabata semper kla pa tende algu nobo, algun filósofonan a interesá den e siñansa di Pablo i a invit'é pa dirigí su mes na e Areópago, e konsilio haltu di e stat. Den su diskurso, Pablo no a sita for di e Skrituranan òf repasá e historia di e trato di Dios ku Israel, manera e a hasi ora ku e tabata papia ku e oudiensia Hudiu (kompará ku Echonan 13:16-41); e aserkamentu aki lo no tabatin masha sentido ku e oudiensia aki. En kambio, e a presentá algun bèrdatnan bíbliko importante den un forma ku paganonan kulto por a komprendé.

Lesa Echonan 17:22-31. Den su diskurso na Areópago, ki gran bèrdatnan tokante Dios i salbashon i historia i humanidat e a prediká na e hendenan aki?



Mayoria di e palabranan di Pablo tabata zona ridíkulo pa e oudiensia pagano sofistiká, ken nan konseptonan tokante Dios i religion a ser grandemente trosé. Nos no sa kon Pablo tabatin intenshon di terminá su mensahe, pasobra parse ku e a ser interumpí na mes momentu ku e a referí na e huisio di Dios di e mundu (Echonan 17:31). E kreensia aki tabata dal frontalmente ku dos konsepto Griego:

  1. ku Dios ta totalmente trasendente, i no tin niun relashon ku e mundu òf preokupashon den asuntunan humano, i
  2. ku ora un persona muri no por tin resurekshon di niun manera.

Esaki ta yuda splika dikon e evangelio tabata lokura pa e Griegonan (1 Kor. 1:23) i e kantidat di konversonan na Atenas tabata chikitu.

Sinembargo, entre esnan ku a yega na kere tabatin algun di e personanan di mas influyente di e sosiedat di Atena, manera Dionisio, un miembro di e Areopago, i Damaris, ken menshon na su nòmber ta impliká ku e tabata di sierto status, si no tambe ku e mes tabata un miembro di e konsilio (Echonan 17:34).

Djaweps30 di ougùstùs

Pablo na Korinto

Echonan 18:1-11 ta relatá e eksperensia di Pablo na Korintio, kaminda e lo a keda pa un aña i mei. Akila i Prisila lo a bira Pablo su amigunan di bida largu (Rom. 16:3, 2 Tim. 4:19). E relato ta impliká ku nan tabata Kristiannan kaba ora ku nan a yega na Korintio, probablemente pa motibu di e deportashon di Hudiunan di Roma dor di Emperador Claudio. Historiadó Romano Suetonius parse ta indiká ku e deportashon a tuma lugá debí na disturbionan den e komunidat Hudiu asosiá ku e nòmber di "Kristu" (Claudius 25.4), kua kisas lo tabata resultado di e predikashon di e evangelio dor di kreyentenan Hudiu lokal. Pues, ta posibel ku Akila i Prisila mes tabata envolví den aktividatnan asina. Den kualke kaso, ademas di kompartí e mesun fe i e mesun trasfondo Hudiu, Pablo i su amigunan nobo tambe a kompartí e mesun fishi.

Lesa Echonan 18:4-17. Kiko tabata resultado di e aktividatnan mishonero di Pablo na Korinto?



Ora Silas i Timoteo a yega for di Masedonia, nan a trese algun apoyo finansiero for di e iglesianan aya (2 Kor. 11:8, 9), kua a permití Pablo dediká su mes kompletamente na predikamentu. E pólisa di Pablo tabata pa biba riba su mes gastu durante su ministerio, ounke e a pensa tambe ku "esnan ku ta prediká e evangelio mester biba di e evangelio" (1 Kor. 9:14).

Apesar di e oposishon Hudiu fuerte riba e mensahe di Pablo, algun Hudiunan sí a kere, komo tambe algun adoradónan Pagano di Dios. Entre e konversonan tabatin Crispo, e lider di sinagoga, i henter su kas. Hopi Korintonan tambe a kere i a ser batisá. E situashon entre e Hudiunan, sinembargo, tabata mas bien tenso, manera e siguiente episodio ta demostrá (Echonan 18:12-17), i Pablo posiblemente tabata planiando pa bandoná Korintio pronto, pero den un vishon di anochi e a risibí kurashamentu divino pa keda (Echonan 18:9-11).

Riba su kaminda di regreso pa Antiokía, Pablo a hiba Akila i Prisila huntu kuné i a laga nan na Efeso, kaminda e a pasa algun dia promé di a reanudá su biahe. Miéntras e tabata einan, e tabatin oportunidat pa prediká den e sinagoga Hudiu lokal, kua su kontesta positivo a pon’é primintí ku, si Dios ke, e lo a bini bèk (Echonan 18:18-21). Esaki a sosodé presisamente den su próksimo biahe.

Djabièrnè31 di ougùstùs

Pa mas Estudio:

“Esnan ku awe ta siña bèrdatnan impopular no mester ser deskurashá si tin momentu nan no risibí resepshon mas faborabel, asta for di esnan ku ta pretendé di ta Kristian, ku Pablo i su kompañeronan for di e hendenan entre ken nan tabata traha. E mensaheronan di e krus mester arma nan mes ku vigilansia i orashon, i sigui padilanti ku fe i kurashi, trahando semper den nòmber di Hesus."—Ellen G. White, The Acts of the Apostles, p. 230.

"Si, den e esenanan final di e historia di e tera aki, esnan na ken bèrdatnan di prueba ser proklamá lo a sigui e ehèmpel di e Bereanonan, skrudiñá e Skrituranan diariamente, i kompará ku e palabra di Dios e mensahenan ku a ser tresé na nan, lo tabatin awe un kantidat grandi leal na e preseptonan di e lei di Dios, kaminda awor tin komparativamente tiki. . . .

"Tur lo ser huzgá di akuerdo ku e lus ku a ser duná. Señor ta manda Su embahadornan ku un mensahe di salbashon, i esnan ku tende E lo tene responsabel pa e manera ku nan ta trata e palabranan di Su sirbidónan. Esnan ku sinseramente ta buska bèrdat lo hasi un investigashon kuidadoso, den e lus di e palabra di Dios, di e doktrinanan presentá na nan."—Página 232.

Preguntanan di Diskushon:

pregunta 1Den konteksto di e último paragraf di e estudio di djaluna, diskutí den klas e implikashon di e siguiente deklarashon: "Tin nesesidat di un preparashon mas kabal riba e parti di kandidatonan pa boutismo. . . . E prinsipionan di e bida Kristian mester ser hasí kla pa esnan ku a kaba di yega na e bèrdat."—Ellen G. White, Testimonies for the Church, tomo 6, p. 91, 92.

pregunta 2Meditá mas riba e último pregunta di djarason. Kon nos komo un iglesia por mustra e mesun komprondementu ku Pablo tabatin di diferensianan kultural i e mesun disponibilidat pa topa e hendenan kaminda nan ta sin komprometé e evangelio òf nos propio identidat religioso?

pregunta 3Lesa Echonan 17:32-34. Kiko nos por siña for di e tres kontestanan ku mensahe di Pablo na Atenas a risibí? (1) “Algun a hasi bofon. Nan tabata dibertí ku e seriedat pashoná di e Hudiu straño aki. Ta posibel pa hasi un chiste di bida; pero esnan ku hasi asina lo haña ku loke a kuminsá komo un komedia mester terminá den tragedia. (2) Algun a posponé nan desishon. E kos di mas peligroso di tur tempu ta ora un hende deskubrí kon fásil ta pa papia tokante mayan. (3) Algun a kere. E hende sabí sa ku ta solamente e bobo lo rechasá e oferta di Dios."—William Barclay, The Acts of the Apostles, rev. ed. (Philadelphia: Westminster, 1976), p. 133.

pregunta 4Pablo realmente a sita un eskritor pagano (Echonan 17:28) pa ekspresá su punto na e hendenan di Atenas. Kiko esei mester bisa nos tokante kon, tin biaha, e echo di uza fuentenan manera esaki por ta di balor? Ki peligernan tin, tambe?