Lès 13 * 22-28 di sèptèmber

Biahe pa Roma

Sabat Atardi

Lesa pa e siman aki:

Echonan 27, 28; Rom. 1:18-20.

Versíkulo di Memoria:

“No tene miedu, Pablo; bo mester para dilanti di Cesar"(Echonan 27:24, ESV).

Pablo tabata deseá pa hopi tempu pa bishitá Roma, pero su aresto na Yerusalèm a kambia tur kos. Dor di a sede na e preshon legalista di e lidernan di iglesia di Yerusalèm, e a terminá den kustodia Romano pa kasi sinku aña, inkluyendo e tempu ku e a pasa riba e biahe riba laman pa bai Italia. E kambio aki a representá un gòlpi severo pa su plannan mishonero.

Apesar di e kontratempu, Hesus Mes a primintí ku e apòstel ainda lo a testifiká di djE na Roma (Echonan 23:11). Asta ora nos faya kunE, Dios lo duna nos ainda un otro chèns, ounke no semper E ta spar nos for di e konsekuensianan di nos akshonnan. No solamente Pablo a ser hibá Roma komo un prizonero, pero no tin niun evidensia bíbliko ku e a yega di bai Spaña, manera e a spera dia hasi (Rom. 15:24). Despues di a ser liberá for di loke ta konosí komo e promé enkarselamentu Romano, Pablo lo a ser arestá atrobe, e biaha aki pa sufri martirio (2 Tim. 4:6-8) bou di Nero den A.D. 67.

Sí, Pablo a yega Roma, i miéntras e tabata sperando den su kas-prizòn pa ser husgá dilanti di e emperador, e a papia, apesar di su kadenanan (Efe. 6:20, Fil. 1:13), sin opstákulo pa ken ku a bini serka di dje (Echonan 28:30, 31), inkluyendo figuranan importante di e kas di Cesar (Fil. 4:22).

* Studia e lès di e siman aki pa prepará pa Sabat, 29 di sèptèmber.

Djadumingu23 di sèptèmber

Nabegando pa Roma

Despues di masoménos dos aña di enkarselashon na Cesarea (Echonan 24:27), Pablo mester a ser mandá Roma. Husgá dor di e promé persona plural i e rikesa di detayenan uzá pa deskribí e biahe largu i turbulento riba laman pa Italia (Echonan 27:1-28:16), Lukas tabata kompañá Pablo, meskos ku un otro Kristian yamá Aristarko (Echonan 27:2). Un otro personahe importante den e historia tabata e senturion Romano, Julio, ku tabatin otro prisioneronan tambe bou di su enkargo (Echonan 27:1).

Tabata na final di zomer ora ku nan a bai. E Ayuno (Echonan 27:9) ta referí na e Dia di Ekspiashon, den e di dos mitar di òktober. Pa motibu di e kondishonnan di wenter, biaha den Mediteráneo normalmente tabata ser evitá entre novèmber i mart. E biahe aki, sinembargo, nan a afrontá difikultatnan for di prinsipio, i despues di hopi tardansa nan a yega e bahia chikitu di Bon Hafnan, den e isla di Kreta (Echonan 27:8).

Lesa Echonan 27:9-12. Miéntras nan tabata den Bon Hafnan, kon Pablo a intervení den e historia, i kon su intervenshon a ser risibí?



E atvertensianan di Pablo no a ser skuchá, i asina nan a disidí pa nabegá direkshon pabou un otro 40 mia for di un haf (Fenise), kaminda nan por a pasa wenter ku siguridat. Desafortunadamente, ku un kambio diripiente den e klima, nan a haña nan den un tempestat asina violento ku e tripulashon no tabatin opshon ku di laga e barku keda drif ku bientu direkshon sùitwèst, leu for di tera seku. Pronto nan a kuminsá tira e karga na awa, i asta algun di e ekiponan di e barku den un intento di pániko pa e bira mas fofo, ya ku e tabata yena ku awa kaba. E situashon tabata dramátiko. Despues di vários dia di poko lus di dia, visibilidat pober, áwaseru pisá, i bientunan fuerte, sin sa unda nan tabata i den kansansio total, “finalmente nan a pèrdè tur speransa di ser salbá" (Echonan 27:20, NIV).

Lesa Echonan 27:21-26. Kiko tabata e di dos intervenshon di Pablo den e storia?



Den palabranan profétiko, Pablo a konta e tripulashon un mensahe ku e a kaba di risibí for di Dios. No tabatin motibu pa desesperá òf pèrdè speransa. Ainda lo tabata bai tin peliger i pèrdida, pero nan tur lo a sobrebibí.

Djaluna24 di sèptèmber

E Noufragio

Den su di dos intervenshon den e historia, Pablo a sigurá tur ku tabata na bordo-276 hende en total (Echonan 27:37)—ku, ounke no tur kos lo a sali bon, lo no tabatin víktimanan; solamente e barku lo a senk (Echonan 27:22). Dieskuater dia despues, e palabranan di e apòstel a kumpli. Ainda bou di un tormento teribel i ku e barku kompletamente flotando, e marineronan a detektá ku tabatin tera serka, posiblemente pasobra nan por a tende zonidunan di olanan ku tabata dal na kosta (Echonan 27:27). Despues di un seri di sondeonan, i teniendo miedu ku e barku lo a ser pushá kontra e barankanan kantu di e kosta, nan a tira kuater anker for di e parti patras di e barku pa asina redusí e velosidat; mientrastantu, nan tabata pidi nan diosnan desesperadamente pa di dia habri (Echonan 27:28, 29).

Lesa Echonan 27:30-44. Ki lèsnan tin aki pa nos den e historia?



Na komienso di e biahe, e senturion tabata trata Pablo bon pero no tabatin motibu pa konfia e huisio nóutiko di e apòstel mas tempran den e biahe. Despues di dos siman, sinembargo, kosnan tabata diferente. Pablo ya a gana rèspèt di e senturion ku su intervenshon profétiko tokante e noufragio (Echonan 27:21-26), kua tabata yegando awor na su kumplimentu.

Pablo a urgi e hendenan na bordo pa kome, sino nan lo no tabatin e forsa pa landa yega na kantu. Providensia divino no nesesariamente ta eksonerá nos di hasi loke normalmente lo tabata nos deber. "Dor di henter e narativo aki, un balanse bunita ta ser mantené entre e siguransa di Dios di nan siguridat i e esfuersonan di e hendenan envolví pa sigur'é."—David J. Williams, Acts (Grand Rapids: Baker, 1990), p. 438.

Segun ku mainta tabata aserká, e marineronan a mira tera; tabata un bahia ku un playa, kaminda nan a disidí di laga e barku wanta den santu. Sinembargo, e barku nunka a alkansá e playa. En kambio, e a dal kontra un banki di santu i a terminá kibrando dor di e forsa di e olanan. E plan di e sòldánan pa mata e prizoneronan pa prevení nan di skapa a ser pará dor di e senturion, prinsipalmente pa motibu di Pablo. Al final, manera Dios a primintí, ni un solo bida a bai pèrdí.

Djamars25 di sèptèmber

Na Malta

Tabata ora ku nan a yega kosta ku e sobrebibientenan a haña sa ku nan tabata na Malta, un isla chikitu meimei di Mediteráneo, djis sùit di Sisilia. Den e dos siman ku nan tabata drif riba laman, dependiendo riba forsa di e bientu, nan a kubri masoménos kuatershentisetentisinku mia desde Bon Hafnan, na Kreta. Awor nan lo mester a warda e tres lunanan di wenter promé ku sigui nan biahe (Echonan 28:11).

Lesa Echonan 28:1-10. Kiko a pasa ku Pablo riba e isla di Malta, i kon Dios tabata kapas pa us'é?



E hendenan di Malta tabata masha amistoso i hospitalario, i nan promé akshon pa ku Pablo i su grupo, ku tabata tur muhá i ku friu, tabata pa sende un kandela pa kalentá nan; e temperatura na Malta den e temporada aki di aña lo no tabata mas haltu ku 50°F (10ºC).

E insidente di e kolebra a hala atenshon di e hendenan na Pablo. Na prinsipio, e paganonan lokal a mira e echo ku e a ser mordé komo un akto di kastigu divino. Nan a pensa ku Pablo tabata un asesino ku a logra skapa for di morto hogá pero ainda a ser atrapá dor di e diosnan, òf kisas e diosa Griego Dikē, e personifikashon di hustisia i vengansa. Pa motibu ku e apòstel no a muri, e a ser aklamá komo un dios, manera a sosodé na Listra vários aña pasá (Echonan 14:8-18). Ounke Lukas no ta keda riba e insidente, ta probablemente sigur pa asumí ku Pablo a probechá di e situashon aki pa duna testimonio di e Dios ku e tabata sirbi.

Publio tabata sea e prokurador Romano di Malta òf simplemente un dignatario lokal, pero e a duna Pablo i su kompañeronan bonbiní pa tres dia te ora ku nan a haña un lugá mas permanente pa keda. Di tur manera, e kurashon di tata di e hòmber aki a duna Pablo e oportunidat pa partisipá den un sorto di ministerio di kurashon entre e pueblo di Malta.

Den e relato di Lukas no tin menshon di niun solo konverso òf di niun kongregashon ku Pablo a laga atras ora ku e a bai for di Malta. Un omishon asina por tabata un total koinsidensia, pero e ta ilustrá e echo ku nos mishon den mundu ta bai mas aya di boutismo òf plantamentu di iglesia; e ta envolví tambe preokupashon pa hende i nan nesesidatnan. Esaki ta e aspekto práktiko di e evangelio (Echonan 20:35; kompará ku Tito 3:14).

Djarason26 di sèptèmber

Pablo na Roma, Finalmente

Despues di tres luna na Malta, Pablo i su kompañeronan finalmente tabata kapas pa kontinuá nan biahe (Echonan 28:11). Nan a yega na Puteoli (Echonan 28:13)—Pozzuoli moderno, den e Bahia di Napoli—for di unda nan lo a biaha pa Roma via kaminda (mira Echonan 28:11-16).

E notisia di e aserkamentu di Pablo rápidamente a yega Roma, i for di einan un grupo di kreyentenan a biaha vários mia pa sùit pa dun'é bonbiní. Ounke nunka e tabata na Roma, e apòstel tabatin numeroso amigunan den e stat: kolaboradónan, konversonan, famia, i hopi otronan ku tabata masha stimá p’e (Rom. 16:3-16). E reunion riba e Foro di Apio mester tabata partikularmente konmovedor, spesialmente den bista di e noufragio i e echo ku Pablo awor tabata un prizonero. Komo resultado di un demostrashon asina úniko di amor i kuido di parti di su amigunan stimá, e apòstel a gradisí Dios i tabata sinti su mes profundamente animá ora e tabata na punto di enfrentá un huisio dilanti di e emperador.

Den su informe ofisial, Festo siguramente mester a skirbi ku di akuerdo ku lei Romano, Pablo no tabata kulpabel di niun krímen signifikante (Echonan 25:26, 27; 26:31, 32). Esaki probablemente ta splika dikon e a ser permití pa hür un kas privá (Echonan 28:30) na lugá di a ser mandá na un prizòn regular òf kampo militar, ounke segun kustumber Romano e tabata kadená na un sòldá tur e tempu. Ku Pablo tabata biba riba su propio gastu ta impliká ku e por a sigui ku su propio ofishi (Echonan 18:3).

Lesa Echonan 28:17-22. Kiko Pablo a hasi asina ku e a establesé su mes?



Ounke Pablo no por a bai na e sinagoga, e sinagoga por a bini serka di dje. Asina, pronto despues di su yegada, siguiendo su pólisa di bai promé na e Hudiunan (Rom. 1:16), e a yama huntu e lidernan Hudiu lokal pa deklará su inosensia i splika, manera e a hasi anteriormente, ku e a ser arestá pa niun otro rason ku e speransa di Israel (Echonan 23:6, 24:15, 26:6-8). Su intenshon no tabata asina tantu pa defendé su mes manera pa krea un atmósfera di konfiansa ku a permitié prediká e evangelio, mustrando kon e resurekshon di Hesus tabata e kumplimentu di e speransa ansestral di Israel. Sorprendé ku nan no a risibí niun informashon for di Yerusalèm tokante Pablo, e Hudiunan a disidí di tend'é.

Djaweps27 di sèptèmber

E Viktoria di e Evangelio

Riba un dia apuntá, e Hudiunan tabata bini na gran kantidat pa tende Pablo su presentashon di e evangelio (Echonan 28:23).

Lesa Echonan 28:24-31. Kiko tabata e punto di Pablo ora e a sita Isaias den e konteksto aki?



E sita di Isaias 6:9, 10 ta deskribí kiko ta pasa ora hende ninga di aseptá e mensahe divino. Ounke algun Hudiu a kere, otronan no, i asina, pa motibu di e gran disputa aki, e apòstel no tabatin otro eskoho ku un biaha mas bira na e Paganonan (Echonan 13:46, 47; Echonan 18:6).

Pablo mester a warda dos aña pa ser husgá dor di e emperador. Mientrastantu, ounke limitá na kas-prizòn, ainda e tabata kapas pa kompartí e evangelio sin strobashon ku esnan ku tabata bin serka di dje. E último esena di Echonan ta unu ku ta enfatisá e viktoria di e evangelio, komo ku niun forsa, sea Hudiu òf Romano, tabata kapas pa stòp su progreso.

No ta kla dikon Lukas a terminá su buki na e altura aki, ya ku tin evidensia ku, debí na e debilidat di e kaso kontra Pablo, e a ser librá for di su enkarselashon, i a bai riba un otro biahe mishonero, i a ser hibá Roma atrobe i ehekutá (2 Tim. 4:6-8). Kisas, for di e punto di bista di e propósito literario di Lukas, dor di a prediká asta na Roma distante, e evangelio ya a alkansá "e finnan di tera" (Echonan 1:8, NIV).

"E pasenshi i alegria di Pablo durante su enkarselamentu largu i inhustu, su kurashi i fe, tabata un sermon kontinuo. Su spiritu, asina diferente for di e spiritu di e mundu, a duna testimonio ku un poder mas haltu ku esun di tera tabata permanesé kuné. I pa medio di su ehèmpel, Kristiannan tabata ser obligá na ehersé energia mas grandi komo defensornan di e kousa di e labornan públiko di kua Pablo a ser retirá. Di e formanan aki e kadenanan di e apòstel tabata influyente, asina ku ora su poder i utilidat tabata parse kòrta kitá afó, i segun tur aparensia e por a hasi lo mínimo, e ora ei e a reuní bòshinan di maishi pa Kristu den kamponan for di kua e tabata parse kompletamente ekskluí."—Ellen G. White, The Acts of the Apostles, p. 464.

For di punto di bista di e mishon di iglesia, sinembargo, por a ser bisá ku e buki di Echonan―òf e historia di e plamamentu di e evangelio―ainda no a terminá, i ta aki ku kada unu di nos ta drenta e esena. Hopi mas kapítulonan eksitante i dramátiko a ser skirbí atraves di siglonan, tin biaha ku e sanger di e testigunan fiel di Dios. Awor ta nos turno pa añadí mas kapítulo, e último (nos ta spera!), i hiba e mishon ku Hesus a laga ku e disipelnan na su pleno kumplimentu—"i e ora ei e fin lo yega" (Mat. 24:14).

Djabièrnè28 di sèptèmber

Pa mas Estudio:

"Kristu a duna e iglesia un enkargo sagrado. Kada miembro mester ta un kanal atraves di kua Dios por komuniká na e mundu e tesoronan di Su grasia, e rikesa inskrudiñabel di Kristu. No tin nada ku e Salbador ta deseá asina tantu ku agentenan ku lo representá Su Spiritu i Su karakter na e mundu. No tin nada ku e mundu mester asina tantu ku e manifestashon atraves di humanidat di e amor di e Salbador. Henter shelu ta sperando pa hòmbernan i muhénan atraves di ken Dios por revelá e poder di Kristianismo."—Ellen G. White, The Acts of the Apostles, p. 600.

"Hopi largu Dios a warda pa e spiritu di servisio tuma poseshon di henter e iglesia asina ku tur hende lo ta trahando p'E di akuerdo ku su habilidat. Ora e miembronan di e iglesia di Dios hasi nan tarea apuntá den e kamponan ku tin mas nesesidat den nan pais i den eksterior, den kumplimentu di e mandato di e evangelio, henter mundu pronto lo ser spièrtá i Señor Hesus lo regresá na e tera aki ku poder i gran gloria."—Página 111.

Preguntanan di Diskushon:

pregunta 1Kon Lukas ta deskribí e fe di Pablo den Dios durante di henter e biahe pa Roma? Kon otronan a ser afektá dor di un fe inkondishonal asina?

pregunta 2Apesar di tur kos ku e a pasa aden, Pablo nunka a bandoná su fe òf su mishon. Na Roma, el a sigui prediká apesar di su libertat limitá. Kiko nos por hasi ora nos ta tentá pa renunsiá nos proklamashon di e evangelio na un hende??

pregunta 3Lesa Romanonan 1:14, 15. Dikon Pablo tabata sinti su mes bou di obligashon―òf un debedó―pa prediká e evangelio na tur hende? Nos ta ménos obligá ku e tabata? Konsiderá e deklarashon aki: "Pa salba almanan mester ta un obra di bida di tur hende ku ta profesá Kristu. Nos ta debedónan na e mundu pa e grasia duná na nos di Dios, pa e lus ku a bria riba nos, i pa e bunitesa i poder diskubrí di e bèrdat."—Ellen G. White, Testimonies for the Church, tomo 4, p. 53

pregunta 4Lesa atrobe e pasashi di Isaias ku Pablo a usa. Kon e idea aki lo por a ser apliká na nos? Sí, nos a ser duná un gran kantidat di bèrdat, pero si nos resistié, òf inkluso na aspektonan di dje ku lo por ta den konflikto ku nos propio deseonan, ki peliger nos lo por afrontá spiritualmente?

pregunta 5Imaginábo di ta e sòldá kadená na Pablo. Kiko bo ta kere ku e a mira den e hòmber na ken e tabata asina djaserka mará?