Lès 1 * 30 di mart – 5 di aprel

E Ritmonan di Bida

Sabat Atardi

Lesa pa e siman aki:

Génesis 1; Gen. 8:22; Salmo 90:10; Job 1:13-19; Echonan 9:1-22; Fil. 1:6; Rom. 8:1.

Versíkulo di Memoria:

“Pa tur kos tin un tempu, un ora pa tur propósito bou di shelu” (Eklesiastés 3:1, NKJV)

Algun di e poemanan di mas bunita ku hamas a ser skirbí a bin for di Rei Salomon: “Pa tur kos tin un tempu, un tempu pa tur propósito bou di shelu: un tempu pa nase i un tempu pa muri, un tempu pa planta i un tempu pa ranka ku rais ku tur, loke ku a ser plantá; un tempu pa mata i un tempu pa kura; un tempu pa bash'abou i un tempu pa rekonstruí; un tempu pa yora i un tempu pa hari; un tempu pa tene rou i un tempu pa balia; un tempu pa tira piedra afó i un tempu pa piki piedra; un tempu pa brasa i un tempu pa keda sin brasa; un tempu pa gana i un tempu pa pèrdè; un tempu pa warda i un tempu pa tir'afó; un tempu pa sker i un tempu pa kose; un tempu pa keda ketu i un tempu pa papia; un tempu pa stima i un tempu pa odia; un tempu di guera i un tempu di pas” (Eklesiastés 3:1-8, NKJV).

E palabranan ei ta reflehá asina tantu di eksistensia humano, e etapanan, e ritmonan di nos bida. Sí, nos bida ta pasa dor di fasenan, dor di kambionan, i nan ta hasi esei for di e momentu ku nos nase. Tin biaha e kambionan ta bon, tin biaha no; tin biaha nos tin kontròl riba nan; tin biaha no. E siman aki, laga nos wak e temporadanan i ritmonan di nos bida, spesialmente ora nan ta impaktá nos i nos famianan tambe.

* Studia e lès di e siman aki pa prepará pa Sabat, 6 di aprel.

Djadumingu31 di mart

Na Prinsipio

Beibel ta kuminsá na prinsipio, kua ta sin duda dikon e ta kuminsá ku e palabranan (en realidat un solo palabra na Hebreo) “Na prinsipio . . .” (Gen. 1:1). E enfoke partikular di e kapítulo, naturalmente, ta e transformashon di e tera for di un estado di ta “sin forma, i bashí” (Gen. 1:2) na e mundu ku Dios Mes, riba e di seis dia, a deklará “masha bon” (Gen. 1:31). Den poko palabra, e prinsipio akinan ta e prinsipio di nos mundu.

Lesa Génesis 1. Ounke tin asina tantu kos pasando, hasi bo mes e pregunta: Tin kualke indikashon di inkonsistensia òf kasualidat, òf tur kos a ser hasí den un forma hopi ordená, ku tur kos den su propio tempu i lugá? Kiko bo kontesta ta bisa tokante e karakter di Dios?



Ellen G. White a skibi ku “òrdu ta e promé lei di Shelu” (Signs of the Times, Yüni 8, 1908); aparentemente e ta riba tera tambe. Ounke piká a trastorná e mundu natural, te na algun grado, òrdu, ritmo, i regularidat ta eksistí ainda.

Lesa Génesis 8:22. Kon òrdu ta ser mirá aki tambe?



Asta despues di e Kaida, e temporadanan ta bin i bai den un moda ordená, generalmente. Por lo tantu, huntu ku e lusnan den shelu, esta, e solo i luna, kua mester “dividí dia for di anochi . . . pa señalnan i temporadanan, i pa dianan i añanan” (Gen. 1:14, NKJV), tin e temporadanan tambe, tur parti di e ritmo natural di e mundu ku Dios a krea. I, ounke nos ta haña solamente reflehonan aworakí, un versíkulo manera Isaias 66:23 ta impliká ku den e shelunan nobo i tera nobo e sentido di ritmo, enbèrdat, lo eksistí e ora ei tambe.

Djaluna1 di aprel

E Ritmonan di Bida

Sientífikonan ta papia tokante algu yamá ritmonan sirkadiano, e idea ku tin ritmonan biológiko (tin biaha yamá “oloshinan korporal”) ku ta regulá funshon den nos kurpa. Den otro palabra, ta eksistí un sierto grado di regularidat asta denter di nos kurpa mes. Por lo tantu, te na algun grado, ta eksistí ritmonan tur rònt i asta den nos.

Kiko ta e etapanan pronostikabel di bida menshoná den e siguiente pasashinan di Skritura, i kon nan ta konektá direktamente den bida familiar?

Ekl. 3:2

Gen. 21:8, Huesnan 13:24

Salmo 71:5, Prov. 5:18

Gen. 15:15, Huesnan 8:32

Salmo 90:10

Entre e dos ekstremonan di bida, nasementu i morto, nos tur ta pasa dor di un variedat di temporadanan, diferente pa kada persona. Algun mucha no ta biba largu despues di nan nasementu; otronan ta krese bira adultonan ku ta biba te na un edat madurá. Muchanan ta krese i desaroyá na nan propio ritmo. Algun ta kana òf papia mas lihé ku otronan. Algun lo ta kapas di asistí na skol i krese pa bira profeshonalnan, miéntras otronan lo dediká nan tempu na otro formanan di trabou. Algun lo tin famia, i otronan kisas nunka lo kasa òf tin yu.

Tin biónes di hende riba tera, i ounke nos tin hopi en komun (lesa Echonan 17:26), kada un di nos ta un persona singular, i pues, lo eksistí diferensianan den bida di kada un di nos.

Den un sentido, tambe, e diferensianan aki ta importante pasobra nan ta hasi kada un di nos úniko, kua ta nifiká ku kada un di nos tin algu pa kompartí ku otronan no tin. Den poko palabra, nos diferensianan ta permití nos pa ta un bendishon pa otronan. Por ehèmpel, tantu hóben komo bieu por benefisiá di loke kada un ta ofresé na e otro: “E gloria di hende yòn ta nan forsa, i e splendor di hende bieu ta nan kabei blanku” (Prov. 20:29). No importa den kua fase nos ta, i no importa nos differensianan, nos tur tin algu pa ofresé, no solamente na Señor, sino un na otro, tambe.

Djamars2 di aprel

Algu Inesperá

Lesa Job 1:13–19, 2:7–9. Kiko a pasa ku Job? Den ki forma su eksperensia ta reflehá loke ta sosodé ku tur hende, den un forma òf otro, òf na un momentu òf otro?



E filósofo griego Heraclitus a deklará ku “no tin nada permanente ku eksepshon di kambio.” Nèt ora ta parse ku tur kos ta bayendo bon, algu inesperá ta sosodé. E por ta pèrdida di un trabou òf un man òf un pia, un enfermedat ku ta manda nos kama òf ta kousa un morto prematuro, un kandela di kas, un aksidente di outo, un kaida miéntras nos ta kana ku e maskota di famia.

Naturalmente, no ta tur kambio mester ta negativo. Kisas un promoshon na trabou ta hiba na mihó kondishonnan ekonómiko. Òf kisas bo ta topa un hende ku lo bira bo pareha, un kambio ku hopi lo duna bonbiní.

Di kualke manera, nos por ta siguiendo, asta den un rutina, un ritmo, ora, instantáneamente i inesperadamente, tur kos ta ser afektá.

Job siguramente no tabata ferwagt e etapa nobo den su bida. Beibel ta deskribié komo un hòmber ku tabata “perfekto i rekto, i un ku tabata teme Dios i tabata evitá maldat” (Job 1:1, NKJV). Tambe, nos sa ku e tabata kasá, e tabatin shete yu hòmber i tres yu muhé, i e tabata hopi riku (Job 1:2, 3). Pa momentu ku nos yega meimei di e buki, e a sufri por lo ménos seis pèrdida grandi: su propiedat, su forsa di labor, su yunan, su salú, e sosten di su esposa, i e enkurashamentu di su amigunan. Su mundu a bira kabes abou i su bida familiar ruiná.

Ounke loke a sosodé ku Job tabata bastante ekstremo, ken meimei di nos no a yega di eksperensiá algu inesperá, den un forma hopi negativo tambe? Bida por ta bayendo bon ora, diripiente i sin spièrtamentu, tur kos ta kambia kompletamente, i nos bida, i bida di nos famia, kisas nunka mas ta meskos atrobe.

Esaki no ta nada nobo. Abel probablemente no a spera di a ser asesiná, i Hose no a spera eksaktamente di ser bendé den sklabitut na Egipto. Den tur dos storia, miembronan di famia tabata e traidornan, i den tur dos storia e famianan a ser impaktá grandemente dor di loke a sosodé ku e otro miembronan. Skritura ta yen di ehèmpel di hendenan ku nan bida, i famianan, a ser transformá grandemente dor di kosnan inesperá.

Djarason3 di aprel

Transishonnan

Echo ta ku sernan humano hopi biaha ta kriaturanan di kustumber. I nos, en realidat, ta tene duru na nos maneranan, i mas bieu nos bira, mas difísil ta pa kambia e kustumbernan ei. Enbèrdat, nos no ta kambia fásil. Kuantu esposa a yega di keha durante añanan, “Mi a purba kambia mi esposo, pero . . .”? Sinembargo, Dios ta den e negoshi di kambia nos, si no ta tantu nos personalidat sino, siguramente, nos karakter. Ta di esei e plan di salbashon ta trata: Dios ku ta transformá nos den personanan nobo den djE.

Ki gran kambio a tuma lugá ku Saulo di Tarso, i kon esaki a sosodé? Echonan 8:1, 3; 9:1–22; Gal. 1:15–17.



“Ora Soulo a someté su mes totalmente na e poder konvisente di Spiritu Santu, e a mira e erornan di su bida i a rekonosé e demandanan ekstensivo di e lei di Dios. E ku tabata un Fariseo orguyoso, konfidente ku e tabata ser hustifiká pa medio di su bon obranan, awor a bùig dilanti di Dios ku e humildat i simplisidat di un mucha chikitu, konfesando su propio indignidat i rogando pa e méritonan di un Salbador krusifiká i resusitá. Soulo tabata anhelá pa bin den harmonia i komunion total ku e Tata i e Yu; i den e intensidat di su deseo pa pordon i aseptashon, e a ofresé súplikanan ferviente. . . .

"E orashonnan di e Fariseo penitente no tabata enbano. E pensamentunan i emoshonnan di mas íntimo di su kurason a ser transformá dor di grasia divino; i su fakultatnan mas nobel a ser tresé den harmonia ku e propósitonan eterno di Dios. Kristu i Su hustisia a bira pa Soulo mas ku henter mundu.”—Ellen G. White, The Acts of the Apostles, p. 119, 120.

Asta si bo propio storianan di kombershon ta leu di mes dramátiko ku esun di Soulo, nos tur mester tin nos storia, un eksperensia di kon Señor a obra den nos bida pa kambia nos, pa hasi nos e tipo di hende ku nos sa ku nos mester ta. Sí, e proseso por ta largu, i tin biaha ta fásil pa puntra nos mes si un dia nos ta bai kambia. Na momentunan manera esaki, dos tèkst di Beibel ta asina krusial pa meditá riba dje i pa reklamá pa nos mes.

Djaweps4 di aprel

Interakshonnan

Beibel ta un buki di relashonnan. Dios a krea nos pa ta den relashon ku otronan. Realmente, masha poko di nos ta biba den isolashon kompletu. Na promé lugá, ningun di nos por a sikiera bin den eksistensia si no tabata pa otronan. Asta despues di nasementu, nos tin mester di otronan pa kuida nos, por lo ménos te na un sierto edat ora, en prinsipio a lo ménos, nos por eksistí riba nos mes. I asta si nos tabata por, ken lo tabata ke? Mayoria di nos ke i ta pidi pa kompania i kompañerismo di otro sernan humano. Ounke maskotanan, manera kachó, por ta kompañeronan enkantador, al final e interakshonnan di mas signifikante i transformadó ta bin atraves di otro hende. Nada straño, anto, ku famia, i relashonnan familiar, ta asina krusial pa nos eksistensia.

Pa motibu ku mayoria di nos ta interaktuá, hopi biaha tur ora, ku otronan, e interakshonnan aki por i hopi biaha ta impaktá e kambionan i ritmonan di nos bida. E ta traha dos manera, sinembargo: otronan, den nan interakshonnan ku nos, ta impaktá nos bida. Nos, mientrastantu, den nos interakshonnan ku otronan por impaktá nan bida. I sea nos ta realisá esaki òf nò (i hopi biaha nos no ta realisá), e interakshonnan ei, den un direkshon òf otro, por ta sea a bon òf pa malu. Kon krusial ta anto pa nos ta proaktivo tur ora bai, pa nos influensia inevitabel riba otronan ta semper pa bon, spesialmente riba esnan ku ken nos ta mas será, kua ta generalmente nos mes miembronan di famia.

Lesa e siguiente tèkstnan. Kiko nan ta bisa nos pa hasi den nos interakshonnan ku otronan? Rom. 15:7; Efe. 4:2, 32; 1 Tes. 3:12; Santiago 5:16.



Den hopi forma, e prinsipio ta simpel. Si nos aktua bon, di forma amabel, i ku kompashon pa ku otronan, nos lo ta un influensia positivo riba nan, asta te na e punto kaminda nos lo por kambia nan bida den un forma hopi positivo. Meskos ku Hesus ta kambia bida di hende den forma hopi positivo, ki un privilegio pa nos hasi algu similar pa otronan tambe. Atrobe, nos mester kòrda: nos influensia ta bai ta sea pa bon òf pa malu, asta den formanan sutil. I niun kaminda e influensia aki, sutil òf nò, ta ser mas riparabel ku den nos famianan.

-->

Djabièrnè5 di aprel

Pa mas Estudio:

Imaginá bo mes e kambionan ku a tuma lugá den bida di e disipelnan di Kristu ora nan tabata pasa tempu kunE. Nan tabata generalmente hendenan sin edukashon i simpel, kustumbrá ku e siñansanan i tradishonnan di nan fe Hudiu, pero awor nan tabata ser desafiá dor di e Rabi Galileo. Nan a eksperensiá yalursheit (Mat. 20:20–24), i konflikto (Juan 3:25); nan tabata parse di ta falta fe (Marko 9:28, 29), i asta nan a bandoná (Mat. 26:56) i a traishoná Hesus (Mat. 26:69–74). Na mes momentu, nan tabata kresiendo spiritualmente asina ku hende a rekonos’É ku Pedro tabata ku Hesus (Matt. 26:73), i asta e miembronan di Sanhedrin a keda straño ora nan a persibí ku Pedro i Juan tabata “hòmbernan sin edukashon i sin entrenamento”. . . .”Nan a realisá ku nan tabata ku Hesus” (Echonan 4:13, NKJV).

Pensa, tambe, riba e impakto positivo inkreibel ku nos por tabatin den nos famianan si nos tabata biba den tal forma ku ora otro miembronan di nos famia mira nos, nan sa ku nos “tabata ku Hesus.”

Kiko e palabranan aki di Ellen G. White tin di bisa tokante influensianan den e hogar? “E hogar por ta simpel, pero e por ta semper un lugá kaminda palabranan alegre ta ser papiá i aktonan bondadoso ta ser hasí, kaminda kortesia i amor ta bishitantenan ku ta biba einan.”—The Adventist Home, p. 18.

Preguntanan di Diskushon:

pregunta 1Lesa Eklesiastés 3:1–8. Kiko e versíkulonan aki ta bisa, i kon bo por apliká e prinsipionan einan na bo propio bida i eksperensianan?

pregunta 2Den klas, papia tokante algun di e eksperensianan transformadó ku bo a pasa aden, i papia tokante e lèsnan ku bo a siña i, si ta aplikabel, e lèsnan ku bo mester a siña pero no a siña. Kiko bo a siña for di e lèsnan ku bo no tabata sa? Tambe, papia tokante kon e eksperensianan transformadó aki a impaktá bo famia. Ki lèsnan bo a siña den e situashonnan aki, tambe?

pregunta 3Kiko ta e maneranan ku bo ta biba awe ku, si no tabata pa Kristu den bo bida, lo tabata radikalmente diferente for di loke nan ta aworakí? Kiko esei mester bisabo tokante e poder di Kristu pa kambia nos?